မောင်တောမြို့နယ်နဲ့ ရသေ့တောင်မြို့နယ်ထဲက နယ်ခြားစောင့်ရဲစခန်းတွေ အကြမ်း ဖက်တိုက်ခိုက်ခံရတဲ့ ဖြစ်စဉ်နဲ့ပတ်သက်လို့ ကနဦးတွေ့ရှိချက်တွေကို   ရခိုင်ပြည်နယ်လွှတ်တော် လေ့လာစုံစမ်းရေးရေးအဖွဲ့က  ပဏာမ အစီရင်ခံစာတင်သွင်းလိုက်ပါတယ်။ အဖွဲ့ဝင် ၁၁ ဦးပါဝင် ဖွဲ့စည်းခဲ့တဲ့ ၉/၁၀ မောင်တော၊ ရသေ့တောင်အကြမ်းဖက်ခံရမှု လေ့လာစုံစမ်းရေးကော်မတီက မောင်တော၊ ဘူးသီးတောင်နဲ့ ရသေ့တောင်မြို့က ကျေးရွာ ၉ ခုနဲ့ နယ်ခြားစောင့်ရဲဌာနတွေကို လေ့လာခဲ့ပြီး ပဏာမတွေအစီရင်ခံစာကို နိုဝင်ဘာ ၉ ရက်နေ့မှာ ရခိုင်ပြည်နယ်လွှတ်တော်ကို တင်သွင်းခဲ့တာပါ။ အစီရင်ခံစာပါ ချက်ခြင်းအရေးတကြီးဆောင်ရွက်ဖို့လိုတဲ့ကိစ္စတွေထဲမှာ  ဒေသခံ တိုင်းရင်းသားတွေ အတွက်လုံခြုံရေးတိုးမြှင့်ဆောင်ရွက်ဖို့၊ ဆရာ/ဆရာမတွေအတွက် လုံခြုံရေးအစီအစဉ်တွေ ဆောင်ရွက်ပေးဖို့၊ မောင်တောမြို့နယ်အတွင်း နတ်မြစ်တလျောက်နဲ့ မေယုတောင်တန်းက စီးဆင်းတဲ့ ချောင်းတွေမှာ အထူးလုံခြုံရေးဆောင်ရွက်ဖို့၊ နှစ်နိုင်ငံလူဝင်လူထွက် ကြပ်မတ်စိစစ်ဖို့၊ စပါးတွေ အချိန်မီ ရိတ်သိမ်းနိုင်ဖို့ ရိတ်သိမ်းခြွေလှေ့စက်တွေ အစိုးရက စီစဉ်ထောက်ပံ့ပေးဖို့၊ ဘင်္ဂလီရွာတွေရဲ့ ဖွဲ့စည်းပုံကို စနစ်တကျဖြစ်အောင် စီစဉ်ဖို့ စတာတွေ ပါဝင်ပါတယ်။ လေ့လာစုံစမ်း ကော်မတီအဖွဲ့ ခေါင်းဆောင် ဦးအောင်ဝင်းက “အခုပိုပြီဆိုးလာတာက မြင်းလွတ်မှာ ပညာရေး ၀န်ထမ်းနေတဲ့ အဆောက်အအုံတွေကို မီးရှို့တဲ့ကိစ္စမျိုးဆိုတာ ဒေသထဲမှာ တော်တော်လေး အခက်အခဲရှိနိုင်တဲ့ ပြဿနာဖြစ်တယ်။ အခုရက်ထဲမှာ ထပ်ဖြစ်လာတာတွေ အများကြီးရှိတယ်။ ဒီကိစ္စမျိုးတွေ ဒီလောက်နဲ့မပြီးဘူး။ ဆက်ဖြစ်နေဦးမယ်။ ဒါတွေက ဒေသခံတိုင်းရင်းသားတွေမှာ ပိုပြီး အခက်အခဲဖြစ်စေတယ်။ ကျန်းမာရေး၊ ပညာရေးဝန်ထမ်းတွေ သွားလာရာမှာ လမ်းခရီးမှာ အနှောင့်အယှက်ပေးတာတွေ ရှိနေတဲ့အတွက် သူတို့ရဲ့လုပ်ငန်းတွေကို သွားလာလုပ်ကိုင်ဖို့အတွက် ဘင်္ဂါလီရွာတွေကို ဖြတ်မသွားပဲ လမ်းတွေဖောက်ပေးဖို့ လိုနေတယ်လို့လည်း” လို့လည်း သူကပြောပါတယ်။ ရခိုင်ပြည်နယ်လွှတ်တော်ရဲ့ လေ့လာစုံစမ်းရေးကော်မတီဟာ ဘင်္ဂါလီတွေနဲ့လည်း တွေ့ဆုံခဲ့ပြီး အများစုက အကြမ်းဖက်မှုကိုမလိုလားဘဲ သူတို့ရဲ့ လိုအပ်ချက်တွေ တောင်း ဆိုချက်တွေကို ဥပဒေဘောင်ထဲကပဲ တောင်းဆိုပြီး ငြိမ်းငြိမ်းချမ်းချမ်း နေလိုသူတွေဖြစ်တယ်လို့ လည်းပြောပါတယ်။ ဘင်္ဂလီကျေးရွာတွေမှာ လူတယောက်မှ မရှိတော့ဘဲ ထွက်ပြေးနေတာ၊ တချို့ရွာတွေမှာ ယောကျာ်းတွေလုံးဝမရှိဘဲ မိန်းမနဲ့ ကလေးတွေပဲရှိနေတာ၊ တချို့ရွာတွေမှာ နေ့ခင်းဘက် လူလုံးဝမရှိဘဲ ညအချိန်မှပြန်ရောက်လာတာတွေတွေ့ရသလို မီးရှို့ခံရတယ်လို့ စွပ်စွဲတဲ့ ရွာတွေကလည်း ကိုယ့်ရွာကိုယ် မီးရှို့ပြီးထွက်ပြေးတဲ့ အထောက်အထားတွေ တွေ့ရတယ်လို့ လည်း ဆိုပါတယ်။ မောင်တော၊ ရသေ့တောင်အကြမ်းဖက်ခံရမှု လေ့လာစုံစမ်းရေးကော်မတီကို ပါတီပေါင်းစုံက လွှတ်တော်ကိုယ်စားလှယ်တွေ၊ လွှတ်တော်ဥပဒေရေးရာနဲ့ လုပ်ငန်းကော်မတီဝင်တွေ စုစုပေါင်း ၁၁ ဦးပါဝင်ပြီး အောက်တိုဘာလ ၂၄ ရက်နေ့မှာ ပြည်နယ်လွှတ်တော်က ဖွဲ့စည်းတာဝန်ပေးခဲ့တာပါ။ ကော်မတီအနေနဲ့ အကြမ်းဖက်တိုက်ခိုက်မှုနဲ့ နောက်ကွယ်က အကြောင်းတွေ၊ ပြဿနာမဖြစ်အောင် တားဆီးကာကွယ်ဖို့နည်းလမ်း၊ တိုင်းရင်းသားတွေရဲ့ အကျိုးစီးပွား ကာကွယ်ထိန်းသိမ်းဖို့ ကိစ္စ၊ လုံခြုံရေးအစီအမံ စတာတွေကို လေ့လာစုံစမ်းရမှာဖြစ်ပါတယ်။ လေ့လာစုံစမ်းရေးအဖွဲ့ဟာ ကော်မတီသက်တမ်းကုန်မယ့် ဒီဇင်ဘာ ၃၁ ရက်နေ့မတိုင်ခင် နောက်ထပ်ကွင်းဆင်းလေ့လာဖို့ရှိနေပြီး အပြီးသတ်အစီရင်ခံစာကို လေ့လာပြီးနှစ်ပတ်အတွင်း ရခိုင်ပြည်နယ်လွှတ်တော်ကို တင်သွင်းရမှာပါ။ ကော်မတီအဖွဲ့ ခေါင်းဆောင် ဦးအောင်ဝင်းက “ကော်မတီက ဒီဇင်ဘာ ၃၁ ရက်နေ့အထိ သက်တမ်း ရှိပါတယ်။ ဒါပေမယ့် အရေးတကြီး ဆောင်ရွက်သင့်တဲ့ကိစ္စတွေကို တွေ့ရတဲ့အတွက် မြန်မြန်ဆန်ဆန် ဆောင်ရွက်ပေးနိုင်အောင် ပဏာမအစီရင်ခံစာကို တင်သွင်းရတာပါ” လို့ ဒီဗွီဘီကို ပြောပါတယ်။ အခုတင်သွင်းတဲ့ ပဏာမအစီရင်ခံစာဟာ အရေးတကြီးလုပ်ဆောင်ရမယ့် ကိစ္စတွေကို ပြည်နယ်လွှတ်တော်ဥက္ကဋ္ဌကတဆင့် ပြည်နယ်အစိုးရကို တင်ပြဖို့နဲ့ လိုအပ်ရင် ပြည်ထောင်စု အစိုးရနဲ့ ပြည်ထောင်စုလွှတ်တော်ကို တင်ပြဖို့ရှိပေမယ့် အစီရင်ခံစာကို ဆွေးနွေးဖို့ အထူး အစည်းအဝေး ဒါမှမဟုတ် အရေးပေါ်အစည်းအဝေးခေါ်ဖို့ မရှိသေးဘူးလို့ သိရပါတယ်။ သတင်း/ဓာတ်ပုံ-ကိုအောင်