ဝန်းသိုမြို့နယ်တွင် တရားမဝင် တမလန်းသစ်များ တင်လာသည့်ကား ဖမ်းမိ
DVB
·
November 6, 2016
စစ်ကိုင်းတိုင်းဒေသကြီး၊ ကသာခရိုင်၊ ဝန်းသိုမြို့နယ် ၅ မိုင်မှာ တရားမဝင် တမလန်းသစ်တွေ တင်ဆောင်လာတဲ့ မတ်တူးကားတစီးကို နိုဝင်ဘာ ၅ ရက်နေ့ မနက်ပိုင်းက ဖမ်းဆီးမိခဲ့ကြောင်း ဝန်းသိုမြို့မရဲစခန်းမှူး ဒုရဲမှူး တင်မောင်သက်က ပြောပါတယ်။
သတင်းအရ ဝန်းသိုမြို့မရဲစခန်းမှူး ဦးဆောင်ပြီး သက်သေတွေနဲ့အတူ ဝန်းသိုမြို့နယ် ၅ မိုင်မှာ ပင်လယ်ဘူးဘက်ကနေ မောင်းနှင်လာတဲ့ မတ်တူးအမျိုးအစား မော်တော်ယာဉ်ကို စစ်ဆေးရှာဖွေဖို့ တားဆီးရာ အစစ်ဆေးမခံဘဲ မောင်းနှင်ထွက်ပြေးသွားခဲ့တယ်လို့ ဆိုပါတယ်။
ဒီနောက်မှာတော့ သင်တောရွာအနီး တံတားအမှတ် (၃/၆) မှာ ကားရပ်ပြီး ယာဉ်ပေါ်လိုက်ပါလာသူတွေ ထွက်ပြေးသွားလို့ ယာဉ်ကို ရှာဖွေရာ ကာလတန်ဖိုး ကျပ် ၈၄၀၀၀ လောက် တန်ဖိုးရှိ တမလန်းသစ်ခွဲသားဆိုဒ်စုံ ၃၁ ချောင်းကို သိမ်းဆည်းရမိခဲ့တယ်လို့ ဆိုပါတယ်။
ယာဉ်ပေါ်လိုက်ပါလာသူတွေကို လိုက်လံဖမ်းဆီးရာ ကျော်သူရ၊ လှိုင်မြင့်၊ မခင်မာဌေးတို့အား ဆိုင်ကယ် ၂ စီးနဲ့အတူ ဖမ်းဆီးရမိခဲ့ပြီး ယာဉ်မောင်း စန်းဇော်နဲ့ သစ်ပိုင်ရှင် ဝင်းဇော်တို့မှာ ထွက်ပြေးလွတ်မြောက်သွားကြောင်း သိရပါတယ်။
တရားမ၀င်တမလန်းသစ်တွေ သယ်ဆောင်လာသူတွေကို ဝန်းသိုမြို့မရဲစခန်းမှ (ပ)၁၁၉/၂၀၁၆ ပြည်သူပိုင် ၆(၁) နဲ့ အရေးယူဆောင်ရွက်နေတယ်လို့ သိရပါတယ်။