ကရင်ပြည်နယ်မဲသဝေါဒေသမှာ ကလိုထူးဘောကရင်အစည်းအရုံး (KK0) ခွဲထွက်အဖွဲ့တွေနဲ့ မနေ့ကထိ တိုက်ပွဲ ၁၉ ကြိမ်ဖြစ်ပွားပြီး တပ်မတော်ဘက်က အရာရှိစစ်သည်တချို့ ကျဆုံး ဒဏ်ရာရ ခဲ့တယ်လို့ စစ်တပ်ပိုင် မီဒီယာ မြ၀တီက သတင်းထုတ်ပြန်ပါတယ်။
ကရင်လက်နက်ကိုင်အဖွဲ့ဘက်ကလည်း တပ်ရင်းမှူး အဆင့်ရှိသူ၁ ဦးအပါအ၀င် ၄ ဦး သေဆုံးကာ ဗိုလ်ကြီးအဆင့်ရှိသူ တဦးကိုအရှင်ဖမ်းမိပြီး လက်နက် ၇ လက်၊ မော်တော်ယာဉ် ၂ စီး၊ ထော်လာဂျီ ၁ စီး၊ ဆိုင်ကယ် ၄ စီးနဲ့ ကျည်မျိုးစုံ ၁၁၇၉ တောင့် သိမ်းဆည်း ရမိတယ်လို့ သတင်းမှာဖော်ပြပါတယ်။
အစိုးရတပ်မတော်က မယ်သဝေါဒေသမှာ နယ်မြေရှင်းလင်းမှုတွေကို စက်တင်ဘာ ၁၁ ရက်မှ စတင်ဆောင်ရွက်ခဲ့ရာ စက်တင်ဘာ ၁၉ ရက်မှာ မြိုင်ကြီးငူ- မဲသဝေါ ကားလမ်းတစ်လျှောက်ရှိ (KKO) ခွဲထွက်အဖွဲ့ အခြေစိုက် လှုပ်ရှားတဲ့ စခန်းတွေအားလုံးကို ဖယ်ရှား ရှင်းလင်းနိုင်ခဲ့ပြီလို့လည်း ဆိုပါတယ်။
အလားတူ စက်တင်ဘာ ၂၁ ရက်က ကချင်ပြည်နယ်၊ ၀ိုင်းမော်မြို့နယ် ကဇူးကျေးရွာအနားမှာ တပ်မတော်စစ်ကြောင်းက ပုံမှန်လုံခြုံရေးဆောင်ရွက်စဉ် KIA လက်နက်ကိုင်အဖွဲ့က ဆွဲမိုင်းနှစ်လုံးနဲ့ ဖောက်ခွဲတိုက်ခိုက်ခဲ့တာကြောင့် တပ်မတော်သားအချို့ ထိခိုက်ဒဏ်ရာရ သေဆုံးမှုရှိခဲ့တယ်လို့လည်း စစ်တပ်က သတင်းထုတ်ပြန်ပါတယ်။
ဓာတ်ပုံ – မြ၀တီ
