ဖြူးမြို့နယ် တရားရုံးအတွင်း သုံးမြှောင့်ချွန် စကေဘာဖြင့် ထိုးမှုဖြစ်ပွား
DVB
·
September 20, 2016
ပဲခူးတိုင်းဒေသကြီး၊ ဖြူးမြို့နယ် တရားရုံးအတွင်း ဒီနေ့မနက် ၁၁ နာရီလောက် သက်သေအစစ်ခံဖို့ စောင့်ဆိုင်းနေသော Asia မော်တော်ယာဉ်အသင်း ဥက္ကဋ္ဌဖြစ်သူကို အမည်မသိလူငယ်တဦးက သုံးမြှောင့်ချွန် စကေဘာနဲ့ထိုးပြီး ထွက်ပြေးသွားပါတယ်။
အထိုးခံရတဲ့ Asia မော်တော်ယာဉ်အသင်း ဥက္ကဋ္ဌ ဦးဝင်းနိုင်ဟာ ဖြူးမြို့နယ် တရားရုံး မှာ ရာဇသတ်ကြီးဥပဒေပုဒ်မ ၄၂၀ အမှုအား သက်သေအစစ်ခံဖို့ရောက်ရှိနေစဉ် တရားရုံး ၀ရန်တာရှေ့ မှာ စကေဘာနဲ့ အထိုးခံခဲ့ရတာလို့ မျက်မြင်တဦးက ပြောပါတယ်။
ဦးဝင်းနိုင်ကို ဖြူးမြို့နယ်ဆေးရုံကို အရေးပေါ် ပို့ဆောင်ကုသနေစဉ် စိုးရိမ်ရလို့ မွန်းလွဲပိုင်းမှာ ဖြူးဆေးရုံမှတဆင့် ရန်ကုန်ကို လူနာတင်ကားနဲ့ ပို့ဆောင်ကုသပေးခဲ့ရတယ်လို့ ဆိုပါတယ်။
အမည်မသိလူငယ်ဟာ ဦးဝင်းနိုင်ကို တိုက်ခိုက်ခဲ့ပြီးနောက် တရားရုံးအပြင်ဘက် ထွက်ပြေးပြီး ဆိုင်ကယ်နဲ့ မောင်းနှင်ထွက်ပြေးသွားခဲ့တယ်လို့ မျက်မြင်သက်သေက ပြောပါတယ်။
"တရားရုံးဝင်းထဲမှာ ဖြစ်တာဗျ။ အဲ့လူက အတင်းဝင်ထိုးတာ။ ဘေးကလူက ဝင်လုံးတော့ ထိုးတဲ့လက်နက် ကျနေခဲ့တယ်။ ဆိုင်ကယ်က အဆင်သင့်လုပ်ထားတာ။ သူ တက်တော့ ဆိုင်ကယ်ခေါင်းထောင်ပြီး မှောက်တယ်။ ဆိုင်ကယ်က ဖင်ထိုင်ခုံအစွတ်ကြီး ကျကျန်ခဲ့တယ်။ အဲ့အတိုင်း မောင်းပြေးတာ။ လိုက်ဖမ်းမယ်ဆိုရင်တော့ဗျာ၊ လူတွေအများကြီး။ မိသင့်တယ်။"
ဆိုင်ကယ်နဲ့ ထွက်ပြေးဖို့ ကြိုးစားစဉ်မှာလည်း Asia မော်တော်ယာဉ်ဝန်ထမ်းတဦးက လူငယ်အား အတင်းဝင်လုံးထွေး ဖမ်းဆီးခဲ့ပေမယ့် အမည်မသိလူငယ်ထံမှ အရိုးအသွား ၁၀ လက်မခွဲခန့် သုံးမြှောင့်ချွန် စကေပါတစ်ချောင်းသာ ကျကျန်ခဲ့ပြီး ထွက်ပြေးသွားတယ်လို့ ဆိုပါတယ်။
တရားရုံးအတွင်း စကေဘာနဲ့ ၀င်ထိုးတဲ့ အမည်မသိလူငယ်ကို ဖမ်းဆီးရမိရေးအတွက် ဖြူးမြို့နယ်ရဲတပ်ဖွဲ့က လိုက်လံစုံစမ်းရှာဖွေနေကြောင်း သိရပါတယ်။
သတင်း-ကျော်အောင် (ကညွတ်ကွင်း)
