ကလောမြို့အ၀င် ဘီးခွန်ကောက်ခံရေး တိုးဂိတ်အနီးမှာ သြဂုတ် ၂၇ ရက်နေ့က တိုရိုတာ ကားတစီးပေါ်ကနေ ကျပ်သိန်းပေါင်း ၁၉၀၀ ကျော်တန်ဖိုးရှိ စိတ်ကြွဆေးပြားတွေ ဖမ်းဆီးမိခဲ့ပါတယ်။
မူးယစ်တပ်ဖွဲ့စု (၂၅) ပူးပေါင်းအဖွဲ့ဟာ ကလောမြို့အဝင် ဘီးခွန်ကောက်ခံရေးတိုးဂိတ်အနီးမှာ ကလောဘက်ကနေ အောင်ပန်းဘက်ကို ကျော်ဦး မောင်းနှင်ပြီး စိုးသက်လင်း လိုက်ပါလာတဲ့ YGN 3D/5448 နံပါတ်ပါ TOYOTA HILUX SURF မော်တော်ယာဉ်ကိုရှာဖွေရာကနေ အခုလို ဖမ်းဆီးမိခဲ့တာလို့ မြန်မာနိုင်ငံရဲတပ်ဖွဲ့က သတင်းထုတ်ပြန်ပါတယ်။
ယာဉ်နောက်ခန်းအတွင်း ငွေကျပ် ၁,၉၆၀ သိန်းတန်ဖိုးရှိ စိတ်ကြွရူးသွပ်ဆေးပြား ၉၈,၀၀၀ ပြားနဲ့ လက်ကိုင်ဖုန်း ၂ လုံးတို့ကို သိမ်းဆည်းရမိခဲ့တယ်လို့ ဆိုပါတယ်။
စစ်ဆေးချက်အရ စိတ်ကြွရူးသွပ်ဆေးပြားတွေ ပို့ဆောင်ခိုင်းတဲ့ ဘားအံမြို့နေ သန့်ဇင်ထွန်း(ခ) သူရမောင်မောင် နဲ့ ဝင်းဆွေ တို့ ၂ ဦးကိုလည်း ဟဲဟိုးမြို့အနီး၊ ဘ၀သံသရာတံတား မိုင်တိုင်အမှတ် ၉၈ မှာ 3J/8157 HILUX မော်တော်ယာဉ်နဲ့ တွေ့ရှိ ဖမ်းဆီးရမိတယ်လို့ သတင်းမှာ ဖော်ပြပါတယ်။
သူတို့ ၄ ဦးကို မူးယစ်ဆေးဝါးနှင့်စိတ်ကိုပြောင်းလဲစေသည့် ဆေးဝါးများ ဆိုင်ရာ ဥပဒေအရ အရေးယူထားတယ်လို့ ဆိုပါတယ်။
