ပဲခူးတိုင်းဒေသကြီး ကျောက်တံခါးမြို့နယ်အတွင်း တရားမ၀င်သစ်ကားတွေကို ရဲက တားဆီးရာမှာ ရပ်တန့်မပေးဘဲ မောင်းနှင်ထွက်ပြေးတဲ့အတွက် ပစ်ခတ်ဖမ်းဆီးခဲ့ပါတယ်။ ဖဒိုနယ်မြေရဲစခန်းအပိုင် မြို့ချောင်းကျေးရွာ သစ်တောစစ်ဆေးရေးဂိတ်မှာ ဒီနေ့မနက် ၂ နာရီ ၁၅ မိနစ်လောက်က ဖမ်းဆီးခဲ့တာဖြစ်ပါတယ်။ သစ်တောဦးစီးဌာန တောအုပ်ကြီး ဦးကျော်ခင်နဲ့ သစ်တောရဲတပ်ဖွဲ့က ဒုရဲအုပ်ဝင်းကို ဦးစီးတဲ့ အင်အား ၂၀ လောက် တာဝန်ထမ်းဆောင်နေစဉ်မှာ တရားမ၀င်သစ်ကား ၄ စီးနဲ့ လူ ၂၀ လောက် စုဝေးရောက်လာပြီး စစ်ဆေးရေးဂိတ်မောင်းတံကို ဖယ်ရှားဖို့ ကြိုးစားခဲ့ကြတယ်လို့ ဆိုပါတယ်။ တားမြစ်တဲ့အကြားက ကားတစီးဟာ အတင်းမောင်းဝင်လာပြီး ဂိတ်ကသံဆူးကြိုးတွေကို တိုးတိုက်မောင်းနှင်ခဲ့လို့ ဘီးပေါက်ပြီး ဆက်လက်မောင်းပြေးတယ်လို့ ဆိုပါတယ်။ ရဲက သေနတ် ၇ ချက် မိုးပေါ်ထောင်ဖောက်ပေမယ့် ကားကိုမောင်းပြေးတာကြောင်း နောက်ဘီးကို ပစ်ဖောက်ရပ်တန့်စေခဲ့တယ်လို့ ဆိုပါတယ်။ ဒီကားနဲ့အတူ နောက်ကလိုက်ပါလာတဲ့ ဟိုက်ဂျက်အမျိုးအစားကားကိုလည်း တရားမ၀င်သစ်တွေနဲ့အတူ ဖမ်းဆီးရမိခဲ့ကြောင်း၊ ထွက်ပြေးသူတွေကို ရဲတပ်ဖွဲ့က လိုက်လံဖမ်းဆီးနေတယ်လို့ ရဲမှတ်တမ်းအရ သိရပါတယ်။ ကျန်နှစ်စီးနဲ့ပတ်သက်လို့ နောက်ဆက်တွဲ မသိရသေးပါဘူး။ သတင်း - ကျော်အောင်၊ ဓာတ်ပုံ - ဖြိုးကိုလင်း (ညောင်ဝိုင်း)