နိုင်ငံတကာအဆင့်မီ ရဲသင်တန်းကျောင်း ပေါ်ပေါက်လာအောင် လုပ်ပေးမည်ဟု ဒေါ်စု ပြော
DVB
·
June 8, 2016
နိုင်ငံတကာအဆင့်မီ ရဲသင်တန်းကျောင်းတခု ဖြစ်ထွန်းပေါ်ပေါက်လာအောင် ကြိုးပမ်း လုပ်ဆောင်မယ်လို့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ပြောပါတယ်။
မန္တလေးတိုင်းဒေသကြီး၊ ရမည်းသင်းမြို့ရှိ အမှတ် ၁ ရဲလေ့ကျင့်ရေးကျောင်းမှာ ဒီကနေ့ကျင်းပတဲ့ ‘အကြမ်းဖက်တိုက်ဖျက်ရေး အနီးကပ်တိုက်ခိုက်နည်းနှင့် လေ့ကျင့်ရေး သင်တန်းသူများ၏ လက်တွေ့အသုံးချ ဖမ်းဆီးထိန်းသိမ်းနည်း သရုပ်ပြပွဲ’ အခမ်းအနားမှာ ပြော ခဲ့တာပါ။
မြန်မာနိုင်ငံရဲတပ်ဖွဲ့ အမှတ် (၁) ရဲလေ့ကျင့်ရေးကျောင်းကို ရဲတပ်ဖွဲ့ သင်တန်းကျောင်းများရဲ့ စံပြသင်တန်းကျောင်းအဖြစ် အဆင့်မြှင့်တင် ဖွင့်လှစ်နိုင်ဖို့ ရည်ရွယ်ထားပြီး အခြေခံလိုအပ်ချက် တွေကို ကော်မတီဖွဲ့စည်း ညှိနှိုင်းဆောင်ရွက်မယ်လို့ ပြောခဲ့ပါတယ်။
ဒေါ်အောင်ဆန်းစုကြည်က “ရဲသင်တန်းသားတွေရဲ့ လိုအပ်ချက်တွေ၊ မျှော်လင့်ချက်တွေကို မဖြည့်ဆည်းပေးနိုင်ရင် အဖိုးတန်တဲ့ရဲတွေ မွေးထုတ်ပေးတဲ့နေရာမှာ ပြဿနာ ရှိနိုင်ပါတယ်။ ရဲသင်တန်းကို အကောင်းဆုံးဖြစ်အောင် မြှင့်တင်ပေးချင်ပါတယ်။ နေ့ချင်းညချင်း ဖြစ်နိုင်ဖို့ဆိုတာတော့ မလွယ်ပါဘူး။ ကိုယ့်နိုင်ငံရဲ့ ဘဏ္ဍာရေးအခြေအနေအရ လုပ်ပေးရမှာပါ။ သင်တန်းသားတွေ အနေနဲ့လည်း ဆရာတွေနဲ့ ဆွေးနွေးတင်ပြပြီး အတ္တမပါဘဲ မြန်မာနိုင်ငံ ရဲတပ်ဖွဲ့ကြီးတခုလုံး အဆင့်မြင့်မားလာဖို့ အကြံပြုသင့်တယ်” လို့ ပြောပါတယ်။
နိုင်ငံတော်အတိုင်ပင်ခံပုဂ္ဂိုလ်က သင်တန်းကျောင်းအတွင်း အခြေခံလိုအပ်ချက်တွေဖြစ်တဲ့ ရဲဝတ်စုံ လုံလောက်မှုရှိမရှိ၊ လျှပ်စစ်မီး၊ သောက်သုံးရေ ဖူလုံစေရေးနှင့် ကျန်းမာရေး စောင့်ရှောက်မှုတွေ၊ အဆောက်အအုံ လိုအပ်ချက်တွေကို ထောက်ပြ ဆွေးနွေးခဲ့ပါတယ်။