လူငယ်ဝန်ကြီးချုပ် ဦးအယ်လ်ဖောင်းရှိုနှင့် မေးမြန်းချက်

သမ္မတအဖြစ်ရွေးကောက်ခံထားရသူ ဦးထင်ကျော် လက်မှတ်ထိုး အတည်ပြုထားတဲ့ ပြည်နယ်တိုင်းလွှတ်တော်အသီးသီးမှာ အန်အယ်လ်ဒီက တင်သွင်းတဲ့ ၀န်ကြီးချုပ် အမည်စာရင်း တွေမှာ ကယားပြည်နယ် ၀န်ကြီးချုပ်အဖြစ်ရွေးခံသူ ဦးအယ်လ်ဖောင်းရှိုးကတော့ အသက် ၃၇ နှစ်သာရှိတဲ့ လူငယ်ဝန်ကြီးချုပ်ဖြစ်လာမှာဖြစ်ပါတယ်။ ဦးအယ်လ်ဖောင်းရှိုဟာ ကယန်း/ရှမ်း လူမျိုးဖြစ်ပြီး ၁၉၇၉ ခုနှစ် ဖေဖော်ဝါရီလ ၅ ရက်နေ့မှာ လောပိတရှမ်းရွာ၊ လွိုင်ကော်မြို့နယ်မှာ အဖ ဦးသန်းသရီးရှိုနဲ့ အမိ ဒေါ်သိန်းတင်တို့က မွေးဖွားခဲ့တာဖြစ်ပါတယ်။ ဦးအယ်လ်ဖေါင်းရှိုဟာ မွေးချင်း ၇ ယောက်ရှိတဲ့ထဲက အငယ်ဆုံး ဖြစ်ပါတယ်။ မူလတန်းပညာကို လောပိတရှမ်းရွာ မူလတန်းကျောင်းမှာ သင်ယူခဲ့ပြီး အလယ်တန်းကို မဲစဲ့မြို့နယ် အခြေခံပညာ အထက်တန်းကျောင်းမှာ သင်ယူခဲ့ပါတယ်။ အထက်တန်းပညာ ကိုတော့ ပဲခူးတိုင်း အမှတ် (၂) အခြေခံပညာ အထက်တန်းကျောင်း (တောင်ငူ)မှာ သင်ယူခဲ့ ပါတယ်။ ၂၀၀၂ - ၂၀၀၃ ခုနှစ်မှာ BT.Ed ဘွဲ့ဖြင့် တက်ရောက်ခဲ့ပြီး B.Ed (ပညာရေးဘွဲ့) ကို (၂၀၀၆)ခုနှစ်တွင် ရရှိခဲ့သူဖြစ်ပါတယ်။ ၂၀၀၁ ခုမှာတော့ မယ်စဲ့မြို့နယ်၊ မယ်စဲ့နန်ကျေးရွာမှာ မူလတန်းပြဆရာအဖြစ် တာဝန် ထမ်းဆောင်ခဲ့သလို အလယ်တန်းပြနှင့် အထက်တန်းပြ (ကျောင်းဆရာ) အဖြစ် ကယားပြည်နယ်၊ မယ်စဲ့မြို့နယ် အခြေခံပညာ အထက်တန်းကျောင်းမှာ တာဝန်ထမ်းဆောင်ခဲ့ ပါတယ်။ ဒါ့အပြင် မယ်စဲ့မြို့နယ်ရှိ ပညာရေးမှူးရုံးမှာ လက်ထောက် ပညာရေးမှူးနဲ့ ပညာရေးမှူးအဖြစ် တာဝန်ထမ်းဆောင်ခဲ့ပြီး ၂၀၁၅ ခုနှစ် ဇွန်လ မြို့နယ်ပညာရေးမှူးအဖြစ်ကနေ နုတ်ထွက်ခဲ့ပြီး မယ်စဲ့မြို့နယ် အမျိုးသားဒီမိုကရေစီအဖွဲ့ချုပ် (အန်အယ်လ်ဒီ)မှာ နိုင်ငံရေးကိစ္စရပ်များ စတင် လုပ်ဆောင်ခဲ့ပါတယ်။ ၂၀၁၅ အထွေထွေရွေးကောက်ပွဲမှာတော့ မယ်စဲ့မြို့နယ် ပြည်နယ်လွှတ်တော် အမှတ် (၂) တွင် အမျိုးသားဒီမိုကရေစီအဖွဲ့ချုပ် ကိုယ်စားလှယ်အဖြစ် ယှဉ်ပြိုင်ခဲ့ပြီး အနိုင်ရရှိခဲ့တာဖြစ်ပါတယ်။ ကယားဝန်ကြီးချုပ်ဖြစ်လာရင် လုပ်ဆောင်မယ့်အရာတွေနဲ့ပတ်လို့ မေးမြန်းထားပါတယ်။ ကယားပြည်နယ်ဝန်ကြီးချုပ်အဖြစ် ရွေးချယ်ခံရတဲ့စာရင်းမှာ တွေ့ပါတယ်။ ဆိုတော့ အခု ၀န်ကြီးချုပ်အဖြစ် အတည်ပြုလိုက်ပြီလား။ “ကျနော်တို့ ပြည်နယ်လွှတ်တော်မှာ တင်ထားပါတယ်။ မနက်ဖြန် အတည်ပြုမှာပါ။ ” ဦးအယ်ဖောင်းရှိုအနေနဲ့ ကယားပြည်နယ်ဝန်ကြီးချုပ် ဖြစ်လာပြီဆိုရင် ကယားပြည်နယ် အတွင်းမှာ အဓိက ဘာတွေ ဦးစားပေးတော့ လုပ်ဆောင်မှာလဲ။ “ကျနော်တို့ ပြည်နယ်က ဆင်းရဲတယ်။ ဆင်းရဲတဲ့ အကြောင်းအရင်းကတော့ ပညာတတ်တွေ အားနည်းလို့ပေါ့ဗျာ။ အဲဒါ ကျနော်တို့ ပညာရေး အခန်းကဏ္ဍကို မြင့်တင်ဖို့ ကြိုးစားသွားမှာပေါ့။ တချိန်ထဲမှာပဲ ကျနော်တို့ ရွေးကောက်ပွဲကြေညာစာတန်းမှာပါတဲ့ပါပဲ ပြည်တွင်းငြိမ်းချမ်းရေးနဲ့ တိုင်းရင်းသားတွေရဲ့ အရေးကိုလည်း ကျနော်တို့ အကောင်အထည်ဖော်မှာပေါ့နော်။ ဇောင်းပေးပြီးမှ အကောင်အထည်ဖော်မယ်လို့ ကျနော်တို့ ဒါ ပြင်ဆင်ထားတယ်။ ” လောလောဆယ် ကယားပြည်နယ်အတွင်း ရင်ဆိုင်နေရတဲ့ အဓိက ပြဿ နာတွေက ဘာတွေ ရှိလဲ။ “ရှင်းရှင်းပြောရမယ် ဆိုရင်တော့ဗျာ။ ပြဿ နာတွေတော့ အများကြီးရှိနိုင်သလို အဖြေတွေလည်း ရှိပါတယ်။ အဓိကကတော့ တိုင်းရင်းသားရင်ကြားစေ့ရေးပေ့ါ။ ကျနော်တို့ ကယားပြည်နယ်က လူမျိုး ၉ မျိုးကို အခြေံတာလေဗျာ။ balance တခုကို ကျနော်တို့က ဖန်တီးပေးရမှာပေါ့။” အခုက ပြည်သူတွေက ရွေးကောက်တဲ့ ပထမဆုံး ကယားပြည်နယ်ဝန်ကြီးချုပ်ဖြစ်လာမှာဆိုတော့ အရင်အစိုးရထက်စာရင် ဘာတွေ လုပ်နိုင်မယ်လို့ထင်လဲ။ “ရှင်းရှင်းပြောမယ်ဆိုရင် ကျနော်တို့က ပြည်သူတွေ တကယ်ယုံကြည်အားကိုးစွာနဲ့ ရွေးချယ် တင်မြောက်လိုက်တဲ့ အစိုးရဖြစ်မှာလေ။ ပြည်သူတွေရဲ့ ယုံကြည်မှုကိုတော့ ကျနော်တို့က အကောင်အထည် ဖော်ရမှာပေါ့။ အကောင်အထည်ဖော်ရမှာကတော့ များပါတယ်။ ဖော်လည်း ဖော်ဖို့ကို စိုင်းပြင်ထားပြီးသားပါ။ စာရွက်တွေပေါ်မှာ ချရေးဖို့ ရယ်ဒီပါပဲ။ ” ဦးအယ်လ်ဖောင်ရှိုအနေနဲ့ ၇၉ ခုမှာမွေးဖွားတဲ့အတွက် လူငယ်ထဲမှာလို့ ပြောလိုရတာပေါ့နော်။ ဒါကြောင့် လူငယ်တွေကို ဘာတွေ တိုက်တွန်းပြောဆိုချင်တာမျိုးတွေရှိမလဲ။ “ကျနော်တို့ ကယားပြည်နယ်မှာရှိနေတဲ့ လူငယ်လေးတွေက တီထွင်ဆန်းသစ်မှုကို လိုလားနေ ကြတယ်။ ဒါပေမယ့် သူတို့ လုပ်ပိုင်ခွင့်တွေမရှိသေးဘူးပေါ့နော်။ သူတို့ ဘ၀လေးတွေ။ အတော့ ကျနော်တို့ တက်လာရင် ကျနော်တို့ လုပ်ပေးသွားနိုင်လိမ့်မယ်လို့ ကျနော်ယုံကြည်ပါတယ်။ လုပ်လည်းလုပ်ပေးဖို့ ပြင်ထားပါတယ်။ ” တခြားဖြည့်စွက်ပြောချင်တာ ဘာရှိဦးမလဲ။ “ကျနော် ဖြည့်စွက်ပြောချင်တာကတော့ ကယားပြည်နယ်ရဲ့ တိုးတက်ဖို့အရေးကို ကျနော် ပြည်သူတွေနဲ့ တသားထဲ တိုးတက်အောင် ဖော်ဆောင်သွားမယ်လို့ စိတ်ထဲမှာ သံဓိဌာန် ချထားပါတယ်။ ပြည်သူတွေလည်း ကျေနပ်မယ်လို့ကျနော်ယုံကြည်ပါတယ်။ ကျနော် ကြိုးစား သွားမှာပါ။ ”

Independent media are under attack by the Myanmar junta. DVB continues reporting the facts, but needs support for the safety of our journalists. You help with any donation. Thank you.

Donate
More News
Up