ဒေါ်အောင်ဆန်းစုကြည်နဲ့ ပြည်ဖျက်ဗိုင်းရပ်စ်ပိုး (၃) မျိုး ကုသရေး
DVB
·
February 3, 2016
ပြီးခဲ့တဲ့နှစ် နိုဝင်ဘာလ အထွေထွေရွေးကောက်ပွဲမှာ ပြည်သူလူထုမဲ အများဆုံးကို အနိုင်ရခဲ့တဲ့ အမျိုးသားဒီမိုကရေစီအဖွဲ့ချုပ် ကိုယ်စားလှယ်တွေ ဦးဆောင်တဲ့ သမိုင်းဝင် ဒုတိယအကြိမ် ပြည်သူ့လွှတ်တော် ပထမ ပုံမှန်အစည်းအဝေးကို ဖေဖော်ဝါရီ (၁) ရက်နေ့က စတင်ကျင်းပလို့ ပြီးစီးခဲ့ပါပြီ။
အဲ့ဒီအစည်းအဝေးကနေ အမျိုးသားဒီမိုကရေစီအဖွဲ့ချုပ်မှ ဦးဝင်းမြင့်ကို ပြည်သူ့လွှတ်တော် ဥက္ကဋ္ဌအဖြစ်လည်းကောင်း၊ ပြည်ခိုင်ဖြိုးပါတီမှ ဦးတီခွန်မြတ်ကို ဒု-ဥက္ကဋ္ဌအဖြစ်လည်းကောင်း တာဝန်ထမ်းဆောင်ဖို့ အတည်ပြုခဲ့ပြီးတဲ့နောက် ပြည်သူ့လွှတ်တော် အကြီးအကဲနှစ်ဦးက ကတိသစ္စာပြုခဲ့ကြပါတယ်။
“တည်ဆဲဥပဒေများ၊ နည်းဥပဒေများ၊ အမိန့်များ၊ ကြေညာချက်များဟာ ဒီမိုကရေစီ ကျင့်စဉ်နဲ့ညီ မညီ၊ လူ့အခွင့်အရေး စံနှုန်းများနဲ့ ကိုက်မကိုက်၊ အပြည်ပြည်ဆိုင်ရာ သဘောတူညီချက်များနဲ့ ဆီလျော်မှုရှိမရှိ၊ နိုင်ငံတကာ စာချုပ်စာတမ်းများနဲ့ အကျုံးဝင်မ၀င်၊ ပြည်သူလူထုအတွက် အကျိုးရှိမရှိ၊ ပြည်သူလူထုရဲ့ ဘ၀လုံခြုံရေးနဲ့ စိတ်လုံခြုံရေးကို အကာအကွယ်ပေးမပေးတို့ကို လေ့လာစိစစ်ကြပြီး ပြင်ဆင်ခြင်း၊ ဖြည့်စွက်ခြင်း၊ ပယ်ဖျက်ခြင်း၊ အသစ်ရေးဆွဲခြင်းတို့ကို ဆောင်ရွက်နေကြရမှာ ဖြစ်ပါတယ်”လို့ လွှတ်တော်ဥက္ကဋ္ဌသစ် ဦးဝင်းမြင့်က ပြောကြားခဲ့တယ်ဆိုတာကို ဒီဗွီဘီသတင်းမှာ ဖတ်လိုက်ရပါတယ်။
အင်မတန်ကျက်သရေရှိတဲ့စကား၊ ပြည်သူလူထု အကြားချင်ဆုံးစကားကို လွှတ်တော် ဥက္ကဋ္ဌသစ်က ပြောသွားတယ်လို့ပဲ ဆိုပါရစေ။ ဒါပေမယ့် လက်တွေ့မှာ ဒီစကားဟာ ဘယ်လောက် ခရီးပေါက်မယ်၊ ဘယ်လောက်အတိုင်းအတာထိအောင် အကောင်အထည် ဖော်နိုင်မယ် ဆိုတာကတော့ အမျိုးသားဒီမိုကရေစီအဖွဲ့ချုပ်ပါတီ တခုတည်း အပေါ်မှာသာ တည်မှီနေတာ မဟုတ်ပါဘူး။ နိုင်ငံရေးအင်အားစုအားလုံး၊ ပါတီအသီးသီးနဲ့တကွ တပ်မတော်သားတွေ၊ အရပ်သား၊ ကျောင်းသား၊ ရဟန်းသံဃာများ အပါအ၀င် နိုင်ငံသူ နိုင်ငံသားအားလုံး (All Stakeholders) တွေဟာ မှန်ကန်တဲ့ အပြောင်းအလဲတွေအပေါ် ဘယ်လောက်ထိ လိုချင်ဆန္ဒ ပြင်းပြသလဲဆိုတာ အပေါ်မှာသာ မူတည်ပါလိမ့်မယ်။
ဒီနေ့မျက်မှောက်ကမ္ဘာကြီးမှာ အလွန်အန္တရာယ်များတဲ့ ဗိုင်းရပ်စ်ပိုးတွေ ကူးစက်ပြန့်ပွားလို့ သေကျေပျက်စီးမှုတွေ တိုးပွားလာနေသလို ဆေးပညာရှင်တွေ၊ ကျန်းမာရေး ၀န်ထမ်းတွေကလည်း အစွမ်းကုန်ကုသ အဖြေရှာနေကြပါတယ်။ တချို့ပိုးတွေက အရင်က ပေါ်ခဲ့ဖူးပြီးပေမယ့် လူသားတွေ တီထွင်တဲ့ ကာကွယ်ဆေးတွေကို ခံနိုင်ရည်ရှိလာပြီး မျိုးရိုးဗီဇပြောင်းလို့ အဖျက်စွမ်းအား ပိုကောင်းလာကြတယ်။ တချို့ပိုးတွေကတော့ နောက်တိုး အသစ်တွေပေါ့။ အခုလောလောဆယ်မှာ ထင်ရှားလူသိများပြီး ကြောက်မက်ဖွယ် အကောင်းဆုံး ဗိုင်းရပ်စ်ပိုးတွေကတော့ အီဗိုလာ (Ebola)၊ အေအိုင်ဒီအက်စ် (HIV)၊ ဇီကာ (Zika) နဲ့ သွေးလွန်တုပ်ကွေး (Dengue) ဗိုင်းရပ်စ်ပိုးတွေပါပဲ။
ဆင်းရဲနွမ်းပါးပြီး ကျန်းမာရေးအသိ နိမ့်ကျတဲ့ အရပ်ဒေသတွေ၊ အုပ်ချုပ်ပုံစနစ် မမှန်ကန်တဲ့ တိုင်းနိုင်ငံတွေမှာ ဒီဗိုင်းရပ်စ်ပိုးတွေကြောင့် အနာရောဂါတွေ ဖြစ်ပွားခဲ့ရင် လျှင်မြန်စွာ ကူးစက် ပြန့်ပွားတတ်သလို၊ သေကျေပျက်ဆီး ဆုံးရှုံးမှုလည်း ပိုကြီးမားလေ့ရှိတယ်။
အဲ့ဒီလိုပါပဲ လွန်ခဲ့တဲ့နှစ် (၅၀) ကျော်ကတည်းက စစ်ဖိနပ်အောက် ရောက်ခဲ့ရပြီး အုပ်ချုပ်ပုံစနစ် မမှန်ကန်ခဲ့တဲ့ မြန်မာနိုင်ငံမှာ ကိုယ်ကျင့်သီလနဲ့ စာရိတ္တဆိုတဲ့ စိတ်ကျန်းမာရေး နယ်ပယ်ကို ဗိုင်းရပ်စ်ပိုးအမျိုးမျိုး ကူးဆက်ပြန့်ပွားခြင်း ခံခဲ့ရပြီး ကဏ္ဍပေါင်းစုံမှာ ချွတ်ခြုံကျ၊ နာတာရှည် ရောဂါသည်ဘ၀ ရောက်ခဲ့ရတယ် မဟုတ်လား။
ကမ္ဘာမှာ သူခိုးမရှိတဲ့နိုင်ငံလို့ တချိန်တခါတုန်းက နိုင်ငံရပ်ခြား ကုန်သည်တွေ အသိအမှတ်ပြု လေးစားခံခဲ့ရတဲ့ မြန်မာနိုင်ငံဟာ စောရပြည်လို့ ခေါ်ရလောက်အောင် နိစ္စဓူဝ လူမှုဘ၀တွေမှာ ရှောင်လို့မလွတ်နိုင်တဲ့ အဂတိလိုက်စားမှုတွေ၊ တရားမမျှတမှုတွေ ပြည့်လျှမ်း ညစ်နွမ်းနေတဲ့ အခြေအနေဆိုးကြီးထဲ လှောင်ပိတ်ခံနေရအောင် အစိုးရကနေ အောက်ခြေပြည်သူတွေကြား ကူးဆက်ပြန့်ပွားနေတဲ့ ကြောက်မက်ဖွယ်ရာ ဗိုင်းရပ်စ်ပိုး (၃) မျိုး ရှိပါတယ်။
အဲ့ဒါတွေကတော့ ….
(၁) အာဏာရှင်ဗိုင်းရပ်စ်ပိုး
(၂) အကျင့်ပျက်ခြစားဗိုင်းရပ်စ်ပိုး
(၃) အခွင့်ထူးခံဗိုင်းရပ်စ်ပိုး စတာတွေပဲ ဖြစ်ပါတယ်။
အဆိုပါ ဗိုင်းရပ်စ်ပိုးတွေဟာ ပေါက်ပွားချင်တိုင်း ပေါက်ပွားခွင့် နှစ်ရှည်လများ ရခဲ့ကြတော့ အလွန်သန်စွမ်းကြတယ်။ ဟိရိသြတ္တပ္ပတရား၊ ဗြဟ္မစိုရ်တရား၊ မြတ်စွာဘုရားရှင်ရဲ့ တရားဓမ္မ အဆုံးအမ စတဲ့ ကာကွယ်ဆေးတွေတောင် မတိုးတော့ဘဲ လူတိုင်းလိုလိုရဲ့ နှလုံးသားနဲ့ ကိုယ်ကျင့်သီလကို ထိုးနှက်ချိုးဖျက် မိုက်တွင်းနက်စေခဲ့တယ် မဟုတ်လား။
(၁) အာဏာရှင်ဗိုင်းရပ်စ်ပိုး
ဒီဗိုင်းရပ်စ်ပိုးရဲ့ လက္ခဏာကတော့ အများသိပြီးကြတဲ့အတိုင်း အနိုင်ကျင့်ဗိုလ်ကျမယ်၊ စီးပိုးမယ်၊ ဘယ်ကိစ္စမဆို သူ့စိတ်တိုင်းကျ ချယ်လှယ်မယ်၊ အရာရာကို မောင်ပိုင်စီးချင်တယ်။ တခြားသူတွေရဲ့ သဘောထားကို လုံးလုံး ထည့်သွင်းစဉ်းစားပေးခြင်း မပြုဘူး။ သူ့ဆန္ဒကိုသာ အမြဲရှေ့တန်းတင်လေ့ ရှိကြတာ လူတိုင်းသိပါတယ်။
ဗိုလ်ချုပ်ကြီးနေ၀င်း မြေစမ်းခရမ်းပျိုးခဲ့တဲ့ ဒီအာဏာရှင် ဗိုင်းရပ်စ်ပိုးဟာ တပ်မတော်သားတွေ သာမက နိုင်ငံရေး၊ အုပ်ချုပ်ရေး၊ စီးပွားရေး၊ ပညာရေး၊ လူမှုရေး စတဲ့ ရှိရှိသမျှ နယ်စုံပယ်စုံမှာသာမက အငယ်ဆုံး လူ့အဖွဲ့စည်းဖြစ်တဲ့ မိသားစုတွေထဲမှာတောင် ကျယ်ကျယ်ပြန့်ပြန့် ကူးစက်ရင်း အခုဆို ထုံးတမ်းအစဉ်အလာသဘော၊ သူတို့ရဲ့ မူလရပိုင်ခွင့်လို့တောင် ထင်မှတ်မှားတဲ့အဆင့် ရောက်နေပါပြီ။ တနည်းအားဖြင့်ပြောရရင် ဗိုင်းရပ်စ်ပိုးဟာ အသွေးထဲ အသားထဲထိ စိမ့်ဝင်ပြီး နှလုံးအိမ်မှာလွှမ်း၊ ရောဂါတော်တော်ကျွမ်းနေတဲ့ အဆင့်ကို ရောက်နေပြီဆိုတဲ့ သဘောပါပဲ။
(၂) အကျင့်ပျက်ခြစားဗိုင်းရပ်စ်ပိုး
ဒီနေ့ မြန်မာနိုင်ငံမှာ အကျင့်ပျက်ခြစားတယ်ဆိုတာ နေ့ခင်းကြောင်တောင် ဗြောင်လုပ်ဆောင်ရဲတဲ့အဆင့် ရောက်သွားပြီ။ ဟီရိသြတ္တပ္ပတရားတွေ ပျောက်ဆုံးစေတဲ့ လာဘ်ပေးလာဘ်ယူ ကိစ္စတွေဟာ နေ့စဉ် လူမှုဘ၀တွေထဲမှာ သမားရိုးကျကိစ္စတရပ်လို ပျော်ဝင်ဖြစ်တည်နေခဲ့ပြီလေ။ ပြည်သူ့ဘဏ္ဍာ ခိုးယူခွင့်ရဖို့ မင်္ဂလာဆောင်မှာ လက်ဖွဲ့တာကစလို့ ပုံသဏ္ဌာန်အမျိုးမျိုးနဲ့ အပေးအယူ လုပ်နေကြတာ လူတိုင်းမြင်နေရတာ မဟုတ်လား။
ဒီအကျင့်ပျက်ပိုးဟာ မြန်မာနိုင်ငံရဲ့ အုပ်ချုပ်ရေး အာဏာပိုင်တွေထဲမှာသာမက ကိုယ်ကျင့်တရားတွေ ကောင်းမွန်အောင် ထိန်းကြောင်း တည့်မတ်ပေးရမယ့် အာစရိယဂိုဏ်းဝင် မိဘဆရာသမား၊ ဘာသာရေးခေါင်းဆောင်၊ ရဟန်းသံဃာတချို့ထိတိုင်အောင် နက်နက်ရှိုင်းရှိုင်း ကူးစက်ပြန့်ပွားနေတာဟာ အလွန်စိုးရိမ်စရာကောင်းတဲ့ အခြေအနေလို့ပြောရင် မမှားပါဘူး။
အဆိပ်ပြင်းလွန်းလှတဲ့ အဂတိတရားလေးပါးကို အခြေခံလာတာမို့ အကျင့်ပျက် ခြစား ဗိုင်းရပ်စ်ပိုးဟာ နိုင်ငံနဲ့ချီပြီး စာရိတ္တသီလ၊ ၀ါရိတ္တသီလတွေ ကျိုးပြတ်ချွတ်ခြုံကျစေအောင် အဖျက်စွမ်းအား ကြီးမားလွန်းလှပါတယ်။ ဒီပိုး ကူးဆက်ပြန့်ပွားနေတဲ့ ကမ္ဘာပေါ်မှာ ရှိရှိသမျှ တိုင်းနိုင်ငံ လူ့အဖွဲ့အစည်းတိုင်းဟာ အလွန်အရုပ်ဆိုး အကျည်းတန်တဲ့ မတရားမှုတွေနဲ့သာ ပြည့်လျှမ်းနေလေ့ရှိပြီး လူများစုဟာ ငရဲဘုံမှာ ကျခံရသလို ဆင်းရဲဒုက္ခ ရောက်ကြရပါတယ်။
(၃) အခွင့်ထူးခံဗိုင်းရပ်စ်ပိုး
မြန်မာနိုင်ငံမှာ ဖြစ်ပျက်ခဲ့၊ ဖြစ်ပျက်ဆဲ လူမှုအနိဌာရုံ အစုစုရဲ့ မြစ်ဖျားခံရာ အရင်းခံ အကြောင်းတရားဟာ တရားဥပဒေ မစိုးမိုးခြင်းပါဘဲ။ အဲ့ဒီလို တရားဥပဒေစိုးမိုးမှု မရှိစေတဲ့ လက်သည်တရားခံတွေကတော့ အခွင့်ထူးခံ ဗိုင်းရပ်စ်ပိုး ကူးစက်နေတဲ့ ဥပဒေအထက် နေလိုသူတွေဆိုတာ မြင်သာပါတယ်။
လူအများ ဆင်းရဲမွဲတေနေတဲ့ တိုင်းပြည်မှာ မတော်မတရားတဲ့ နည်းလမ်းတွေနဲ့ သူများထက်ရူး အခွင့်ထူးခံချင်စိတ်ဆိုတာ အသိဉာဏ်ပညာ မဖွံ့ဖြိုးမှု၊ ကိုယ်ကျင့်တရား မရင့်ကျက်မှုကို ညွှန်ပြနေတာပါပဲ။ လက်နက်ကိုင်ပြီး အခွင့်ထူးခံသူတွေကို စစ်ဂျပိုး၊ စီးပွားရေးမှာ အခွင့်ထူးခံသူတွေကို ခရိုနီ၊ ရာထူးဌာနန္တရမှာ အခွင့်ထူးခံသူတွေကိုတော့ မိုးကျရွှေကိုယ်လို့ ပြည်သူတွေရဲ့ တံထွေးခွက်မှာ ပက်လက်မျောလို့ ကဲ့ရဲ့မုန်းတီးမှုကို ခံကြရတာ မဟုတ်လား။
အထက်မှာဖော်ပြပခဲ့တဲ့ ပြည်ဖျက်ဗိုင်းရပ်စ်ပိုး (၃) မျိုး နှိပ်စက်လို့ ညှိးခြုံးပိန်ခြောက် နိုင်ငံရုပ်ပျောက်နေတဲ့ မြန်မာပြည်ကို ရောဂါကင်းစင်အောင်ကုသဖို့ ဒေါက်တာ ဒေါ်အောင်ဆန်းစုကြည် ဦးဆောင်တဲ့ အစိုးရအဖွဲ့ဟာ မကြာခင်မှာ လုပ်ပိုင်ခွင့် အကန့်အသတ် ဘောင်ခတ်မှုတွေနဲ့အတူ တရားဝင်ကုသခွင့်လိုင်စင်ကို လွှဲယူပါတော့မယ်။
ဆေးပီးနေတဲ့ ဗိုင်းရပ်စ်ပိုးတွေကို ကင်းစင်အောင် ကုသဖို့ဆိုတာ အချိန်အတိုင်းအတာတခု ယူရမှာဖြစ်သလို ရှင်းရှင်းလင်းလင်း ပျောက်ကင်းဖို့ဆိုတာ သမားတော်ရဲ့ အရည်အသွေးပေါ်မှာ သာမက လူနာတွေရဲ့ ပူးပေါင်းပါဝင်မှု၊ ရောဂါပျောက်ချင်တဲ့ဆန္ဒ ပြင်းထန်မှုတွေပေါ်မှာလည်း တည်မှီနေပါတယ်။
ဘုရားမကြိုက်၊ နတ်မကြိုက်တဲ့ အကျင့်ပျက် စရိုက်ဆိုး အထက်ပါ ဗိုင်းရပ်စ်ပိုးတွေကို အမြစ်ဖြတ် ရှင်းလင်းသုတ်သင်နိုင်အောင် ကြိုးပမ်းနေတဲ့ လူထုခေါင်းဆောင် ဒေါ်အောင်ဆန်းစုကြည်ရဲ့ အဆင့်မြင့်နိုင်ငံရေးခရီးစဉ်မှာ ပါဝင်နိုင်ဖို့ နိုင်ငံသားတိုင်းဟာ မိမိကိုယ်မှာ စွဲကပ်နေတဲ့ အကျင့်ဟောင်းတွေကို ကိုယ်တိုင်ပြင်ခြင်းနဲ့ ပထမအဆင့်အနေနဲ့ ပူးပေါင်းပါဝင်နိုင်ပါတယ်။ မကောင်းမှန်းသိရင် ကိုယ်ကိုယ်တိုင် ကိုယ့်မှာစွဲကပ်နေတဲ့ အကျင့်ဆိုးတွေ စပြုပြင် စွန့်လွှတ်ကြဖို့ လိုပါတယ်။
ဒုတိယအဆင့်အနေနဲ့ မိမိဝန်းကျင်မှာရှိတဲ့ လူပုဂ္ဂိုလ်တွေမှာ အနည်းနဲ့အများဆိုသလို ကူးဆက်ပြန့်ပွားနေတဲ့ အထက်ပါ အဖျက်စွမ်းအားကြီးတဲ့ ဗိုင်းရပ်စ်ပိုးတွေ ပျောက်ကင်းအောင် ကုသရေးမှာ အမျိုးသားရေးတာဝန်တရပ် အနေနဲ့ မိမိစွမ်းသလောက်၊ နိုင်သလောက် လက်တွဲဖေးကူ ကုသိုလ်ယူကြပါလို့ တိုက်တွန်းလိုက်ပါတယ်။
အထွေထွေရွေးကောက်ပွဲမှာ အမျိုးသားဒီမိုကရေစီအဖွဲ့ချုပ်ကို မဲပေးဖို့ လက်သန်းမှာ မှင်အစွန်းခံလိုက်ရုံနဲ့ မိမိတို့တာဝန် ပြီးဆုံးသွားပြီလို့ မထင်မှတ်စေချင်ပါဘူး။ တပြည်လုံးမှာ ဂျွတ်တက်နေတဲ့ အကျင့်ဆိုးတွေ ရှင်းထုတ်သန့်စင်ဖို့ တာဝန်ဟာ အသစ်တက်လာမယ့် အရပ်သားအစိုးရ တာဝန်ပဲလို့ မမှတ်ပါနဲ့။ ပြည်သူတွေကိုယ်တိုင် ကိုယ်ပိုင်အသိတရားနဲ့ မပါဝင် မပူးပေါင်းရင် ဘယ်ကိစ္စမျိုးမဆို မပြီးမြောက်နိုင်ပါဘူး။ လူ့အဖွဲ့အစည်းတခုအတွက် စစ်မှန်တဲ့ ပြုပြင်ပြောင်းလဲခြင်းဆိုတာ အဲ့ဒီခေတ်ရဲ့ လိုအပ်နေတဲ့ ပြောင်းလဲမှုကို လူတဦးချင်း တယောက်ချင်းစီက ပြင်းပြစွာ မွတ်သိပ်လာခြင်းနဲ့အတူ၊ မိမိကိုယ်ကိုယ်ကို မိမ်ိပြောင်းလဲခြင်းများရဲ့ စုပေါင်းပါဝင် ဖြည့်ဆည်းခြင်းတွေရဲ့ ဘုံအကျိုးရလဒ်ပါပဲ။ အဲ့ဒီလို ပြောင်းလဲမှုမျိုးကို ဟန့်တားနှောင့်ယှက်နိုင်တဲ့ အရာဆိုတာ ဒီလောကမှာ မရှိနိုင်တော့ပါဘူး။ မြန်မာနိုင်ငံသားတိုင်း မိမိကိုယ်မိမိ ပြုပြင်အောင်နိုင်ကြပါစေ။
မင်းကောင်းချစ်
ဖေဖော်ဝါရီလ ၃ ရက်နေ့ ၂၀၁၅ ခုနှစ်