Search Results For: ရခိုင်

ရခိုင်ပြည်နယ်က ၁၂ နှစ်အထက် ကျောင်းသား/သူများကို ကိုဗစ်-၁၉ ကာကွယ်ဆေးထိုးပေး

ရခိုင်ပြည်နယ်ရှိ အသက် ၁၂ နှစ်အထက် ကျောင်းသား/ ကျောင်းသူတွေကို စစ်ကောင်စီက ပထမအကြိမ် ကိုဗစ်-၁၉ ကာကွယ်ဆေးအား အောက်တိုဘာ ၁၇ ရက် မနက် ၉ နာရီက စတင် ထိုးနှံပေးခဲ့ပါတယ်။

စစ်ကောင်စီက ရခိုင်ပြည်နယ်ရှိ အသက် ၁၂ နှစ်အထက် ကျောင်းသား/သူ နှစ်သိန်းလောက် ကိုဗစ်-၁၉ ကာကွယ်ဆေးထိုးနှံပေးဖို့ ရည်ရွယ်ထားတယ်လို့ သိရပါတယ်။

Sinovac အမျိုးအစား ကိုဗစ်ကာကွယ်ဆေးအား အစိုးရစာသင်ကျောင်း၊ ပုဂ္ဂလိကစာသင်ကျောင်းတွေနဲ့ ဘုန်းတော်ကြီးသင်ပညာရေးကျောင်းတွေက ကျောင်းသူ/ကျောင်းသားတွေအား  ထိုးပေးနေတာပါ။

ရခိုင်ပြည်နယ်ရှိ ၁၆ မြို့နယ်ကို ဒီနေ့မနက် စတင်ကာ တစ်ပြိုင်တည်းထိုးပေးနေတာဖြစ်ပြီး လမ်းပန်းဆက်သွယ်ရေးခက်ခဲတဲ့ မာန်အောင်မြို့နယ်ကိုလည်း ကာကွယ်ဆေး ကြိုးစားပို့ပေးနေတယ်လို့ ပြည်နယ်ကျန်းမာရေးဦးစီးဌာနက ပြောပါတယ်။

ဓာတ်ပုံ - MPA

16 hours Ago

ရခိုင်ပြည်နယ်ဝန်ကြီးချုပ် ဦးညီပု အလုပ်ကြမ်းနှင့် ထောင်ဒဏ် ၂ နှစ်ချမှတ်ခံရ

ရခိုင်ပြည်နယ်ဝန်ကြီးချုပ် ဦးညီပုကို စစ်ကောင်စီက ဖမ်းဆီးတရားစွဲဆိုပြီးနောက် အောက်တိုဘာ ၈ ရက် ဒီနေ့ အလုပ်ကြမ်းနဲ့ ထောင်ဒဏ် ၂ နှစ် ချမှတ်လိုက်ပါတယ်။

စစ်တွေအကျဉ်းထောင်အထူးတရားရုံးကနေ နိုင်ငံတော်အကြည်ညိုပျက်စေမှုနဲ့ ထောင်ဒဏ်ချမှတ်တာလို့  ဒီအမှုလိုက်ပေးနေတဲ့ ရှေ့နေဆီက သိရပါတယ်။

စစ်တပ်က အာဏာသိမ်းတဲ့ ဖေဖော်ဝါရီ ၁ ရက်နေ့မှာပဲ ဝန်ကြီးချုပ်ဦးညီပုကို နေအိမ်အကျယ်ချုပ်ထားခဲ့ပြီး ပြန်လွတ်လာတဲ့နောက်ပိုင်း သူ့ရဲ့ ဖေ့စ်ဘွတ်ခ်စာမျက်နှာကနေ ပြည်သူသို့ ပြန်ကြားချက်ဆိုတဲ့ ဗွီဒီယိုဖိုင်ကို တင်ခဲ့တာကြောင့် ပြန်ပြီး ဖမ်းဆီး ခံလိုက်ရတာပါ။

ဒါ့အပြင် ဦးညီပုဟာ အန်အယ်လ်ဒီအစိုးရလက်ထက် ဝန်ကြီး ၄ ယောက်နဲ့အတူ ဂွမြို့နယ်ထဲက သောင်ထွန်းမြေပေါ်မှာ မြေကွက်ဖော်တဲ့ကိစ္စအတွက် အဂတိလိုက်စားမှု တိုက်ဖျက်ရေးဥပဒေ ပုဒ်မ ၅၅ နဲ့လည်း တရားစွဲဆိုခံထားရပါသေးတယ်။

1 week Ago

ရခိုင်တွင် စစ်ကောင်စီခန့်ဝန်ကြီး ရုတ်တရက် နေမကောင်းသဖြင့် ရဟတ်ယာဉ်ဖြင့် ဆေးရုံပို့ခဲ့ရ

ရခိုင်ပြည်နယ်မှာ စစ်ကောင်စီကခန့်အပ်ထားတဲ့ သယံဇာတရေးရာဝန်ကြီး ဦးသန်းထွန်းဟာ ကျောက်တော်မြို့ကို ရောက်ရှိနေစဥ်  ရုတ်တရက်သွေးတိုးလာတာကြောင့် စစ်တွေဆေးရုံကို စစ်ရဟတ်ယာဉ်နဲ့ အရေးပေါ်ပို့ဆောင်ခံရတယ်လို့ သိရပါတယ်။

ဝန်ကြီး ဦးသန်းထွန်းဟာ ကျောက်တော်မြို့အောက်ဆီဂျင်စက်ရုံဖွင့်ပွဲအတွက် ရောက်ရှိနေစဉ် ဒီကနေ့ညနေ ၄ နာရီကျော်မှာ ရုတ်တရက်သွေးတိုးလာတာကြောင့် ကျောက်တော်ဆေးရုံမှာ အရေးပေါ်ကုသမှုပေးခဲ့ပြီး စိုးရိမ်ရတဲ့အခြေအနေကြောင့် စစ်တွေမှာ ဆက်လက်ကုသ​ပေးဖို့ စစ် ရဟတ်ယာဉ်နဲ့ ပို့​ဆောင်ခဲ့ရတယ်လို့ လုပ်ဖော်ကိုင်ဖက်တွေဆီက သိရပါတယ်။

ကျောင်းဆရာဟောင်း ဦးသန်းထွန်းဟာ စစ်တွေမြို့မိမြို့အဖြစ် လေးစားခံရသူဖြစ်ပြီး စစ်တွေ ဆေးရုံကြီး အရေးပေါ်လူနာတွေကို ဦးဆောင်ကူညီနေသူဖြစ်တယ်လို့ သိရပါတယ်။

စစ်အာဏာသိမ်းပြီးနောက် ရခိုင်ပြည်နယ်စစ်ကောင်စီဝင် ဖြစ်လာခဲ့ပြီး အစိုးရအဖွဲ့များ ပြန်လည်ဖွဲ့စည်းတဲ့အချိန်မှာ ဝန်ကြီးအဖြစ် ခန့်အပ်ခံခဲ့ရတာလို့ သိရပါတယ်။

3 weeks Ago

ရခိုင်စည်ပင်ဝန်ကြီးဟောင်း ဦးမင်းအောင်ကို အလုပ်ကြမ်းနှင့်ထောင်ဒဏ်ချမှတ်

ရခိုင်ပြည်နယ် တောင်ကုတ်မြို့မှာ စစ်အာဏာရှင်အလိုမရှိကြောင်း ဆန္ဒဖော်ထုတ်မှုကြောင့် ဖမ်းဆီးခံနေရတဲ့ စည်ပင်ဝန်ကြီးဟောင်း ဦးမင်းအောင်နဲ့ ကိုသန့်ဇင်ဖြိုးတို့ကို စက်တင်ဘာ ၁၇ ရက်နေ့မှာ တောင်ကုတ်မြို့နယ်တရားရုံးက အလုပ်ကြမ်းနဲ့ထောင်ဒဏ် ၂ နှစ် ၂ လစီ ချမှတ်လိုက်တယ်လို့ သိရပါတယ်။

အမှုကို လိုက်ပါဆောက်ရွက်ပေးနေတဲ့ ရှေ့နေ ဒေါ်သိင်္ဂီမောင်က    “သူတို့ကို စွဲထားတာက ၂ မှုပါ၊ ငြိမ်းစုစီ ၁ မှုရယ်၊ ဘေးစီမံ ၁ မှုရယ်ပေါ့။ အဲဒါ ဘေးစီမံအရ အလုပ်ကြမ်းနဲ့ ထောင်ဒဏ် ၂ လ၊ ငြိမ်းစုစီကတော့ အလုပ်ကြမ်းနဲ့ ထောင်ဒဏ် ၂ နှစ်ပါ။ အဲဒါဆိုရင် အဲဒီပြစ်ဒဏ် ၂ ခုလုံးကို သီးခြားစီကျခံစေလို့ အမိန့်ချတာဖြစ်တဲ့အတွက် ၂ နှစ်နဲ့  ၂ လ ကျခံရမှာပေါ့။ ဒီလိုအမိန့်မချခင်ကတည်းက ကိုမင်းအောင်ကမှာခဲ့ပါတယ်၊ ဒီမြို့နယ်တရားရုံးကချတဲ့အမိန့်ကို သက်ဆိုင်ရာ အယူခံရုံးအဆင့်ဆင့်ကို ဆက်ပြီးအယူခံတက်ပေးဖို့မှာခဲ့တယ်။ ကျန်မကလည်း ကျမအမှုသည်အတွက် ဆက်ပြီးအယူခံတက်သွားမှာပါ” လို့ ပြောပါတယ်။

ဝန်ကြီးဟောင်း ဦးမင်းအောင်နဲ့ ကိုသန့်ဇင်ဖြိုးတို့ဟာ ပြီးခဲ့တဲ့ ဖေဖော်ဝါရီလ ၉ ရက်နေ့က တောင်ကုတ်မြို့မှာ စစ်အာဏာရှင်အလိုမရှိကြောင်း ဆန္ဒဖော်ထုတ်မှုကြောင့် ဖမ်းဆီးခံခဲ့ရပြီး တောင်ကုတ်မြို့မရဲစခန်းမှာ ငြိမ်းစုစီ ပုဒ်မ-၁၉နဲ့ ဘေးစီမံ ပုဒ်မ-၂၅ တွေနဲ့ အမှုဖွင့်လှစ် တရားစွဲဆိုခံခဲ့ရတာပါ။

ဝန်ကြီးဟောင်း ဦးမင်းအောင်ဟာ NLD အစိုးရလက်ထက်မှာ ရခိုင်ပြည်နယ် စည်ပင်ဝန်ကြီးအဖြစ် လုပ်ကိုင်ခဲ့ပြီး လက်ရှိအချိန်မှာ ရခိုင်ပြည်နယ်ဝန်ကြီးချုပ် ဦးညီပု၊ ပြည်နယ် ဝန်ကြီးဦးအောင်ကျော်ဇံ၊ ဝန်ကြီးဦးကျော်လွင်နဲ့ ဝန်ကြီး ဦးကျော်အေးသိန်းတို့ကို စွဲဆိုထားတဲ့ အဂတိလိုက်စားမှုတိုက်ဖျက်ရေးဥပဒေပုဒ်မ-၅၅ နဲ့အတူ ထပ်မံအမှုဖွင့်ခံထားရတဲ့အတွက် ဆက်လက်အမှုရင်ဆိုင်ရမှာ ဖြစ်ပါတယ်။

1 month Ago

ဖက်ဆစ်စစ်တပ် ဆန့်ကျင်ဆန္ဒပြခဲ့သည့် ရခိုင်ကျောင်းသား ၄ ဦး ထောင်ဒဏ် ၂ နှစ်ခွဲစီ ချမှတ်ခံရ

ဖက်ဆစ်စစ်တပ်အလိုမရှိကြောင်းဆန္ဒပြလို့ စစ်တွေအကျဉ်းထောင်မှာ ဖမ်းဆီး တရားစွဲဆိုခံနေရတဲ့ ရခိုင်ပြည်ကျောင်းသားသမဂ္ဂအဖွဲ့ဝင် ကျောင်းသား ၄ ဦးကို စက်တင်ဘာ ၁၅ ရက်မှာ စစ်တွေမြို့နယ်တရားရုံးက ထောင်ဒဏ် ၂ နှစ် ၆ လစီ ချမှတ်လိုက်ပါတယ်။

အဆိုပါ ကျောင်းသား ၄ ဦးကို မတရားဖမ်းဆီးထိန်းသိမ်းထားတာ ၁ နှစ်ကြာပြီးနောက်  နိုင်ငံတော် အကြည်ငြိုပျက်စေမှု ပုဒ်မ-၅၀၅(ခ)နဲ့  ထောင်ဒဏ် ၂ နှစ်စီနဲ့ ၊  သဘာဝဘေးစီမံခန့်ခွဲမှု ဥပဒေ ပုဒ်မ-၂၉ နဲ့ ထောင်ဒဏ် ၆ လစီ  စုစုပေါင်း ထောင်ဒဏ် ၂ နှစ်ခွဲစီ ချမှတ်လိုက်တာပါ။

ထောင်ဒဏ်ချမှတ်ခံရတဲ့ ကျောင်းသား ၄ ဦးကတော့  ရခိုင်ပြည်ကျောင်းသားသမဂ္ဂ ပြန်ကြားရေးတာဝန်ခံ ကိုကျော်နိုင်ဌေး၊ တွဲဖက်ပြန်ကြားရေးတာဝန်ခံ ကိုဦးသန်းနိုင်၊ ကိုကောင်းထွန်း(ဒဂုံတက္ကသိုလ်၊ ရန်ကုန်မြို့)နဲ့ ကိုမြတ်စိုးဝင်း(တွဲဖက်အတွင်းရေးမှူး၊ ကျောက်ဖြူပညာရေးကောလိပ်)တို့ ဖြစ်ကြပါတယ်။

စစ်တပ်က ကျောင်းသားတွေကို ခုလို ထောင်ဒဏ်နှစ်ရှည်ချမှတ်တာနဲ့ ပတ်သက်ပြီး  ရခိုင်ပြည်ကျောင်းသားသမဂ္ဂ ပြင်ပဆက်ဆံရေးတာဝန်ခံ ကိုကျော်ဝင်းထွန်းက “ ဒီဟာကလုံးဝ မတရားဘူး၊ လူငယ်ကျောင်းသားတွေကို ၁ နှစ်တိတိ ဒီအချုပ်ထဲမှာအချိန်အကြာကြီး မတရားပဲနဲ့ ထိန်းသိမ်းချုပ်နှောင်ထားပြီးတဲ့အခါမှ ဒီလိုမျိုး နှစ်အကြာကြီးချလိုက်တာက တစ်ဖက်သတ် ကျောင်းသားတွေကို ဖိနှိပ်တာလို့ ကျနော်တို့ မြင်တယ်။ ဒီကျောင်းသားတွေကို ဖိနှိပ်ရင် ဒီကျောင်းသားတွေ လွတ်လာရင် သူတို့ကိုတစ်စုံတစ်ရာထောက်ပြမှာတို့၊ သူတို့ရဲ့လုပ်ရပ်တွေကို ပြည်သူကြားမှာချပြမှာတို့ကို သူတို့ကကြောက်နေတယ်လို့မြင်ပါတယ်၊ အဲဒီလိုမြင်တဲ့အတွက် ကျနော်တို့ ရှေ့ဆက်ပြီးတော့ စစ်တပ်ရဲ့အုပ်ချုပ်သူတွေရဲ့ မှားနေတဲ့လုပ်ရပ်တွေကို လိုက်ပြီးတော့ တိုက်ပွဲဝင်သွားမယ်၊ သူတို့ရဲ့မှားနေတဲ့ လုပ်ရပ်တွေကို ကျနော်ဆက်ပြီးတော့ ရခိုင်ပြည်သူတွေ အတွက် တိုက်ပွဲဝင်သွားမယ်”  ပြောပါတယ်။

အဆိုပါကျောင်းသား ၄ ဦးအတွက် အမှုကိုလိုက်ပါဆောင်ရွက်ပေးနေတဲ့ ရှေ့နေတွေနဲ့တိုင်ပင်ကာ ခရိုင်တရားရုံးကို အယူခံဝင်သွားမယ်လို့ ရခိုင်ပြည်ကျောင်းသားသမဂ္ဂ ပြင်ပဆက်ဆံရေးတာဝန်ခံက ပြောပါတယ်။

1 month Ago

“သုံးလတာ ရိက္ခာရပ်ဆိုင်းခဲ့ရသော ရခိုင်အိုင်ဒီပီစခန်းများက အစာအိမ်ပိုင်ရှင်များ”

ထမင်းချက်သည့်ဒယ်အိုးတစ်လုံးနှင့် အသီးအရွက်ချက်သည့်ဒယ်အိုးတစ်လုံးတို့ဖြင့် ဒေါ်ဟာဆီနာအနေဖြင့် မီးဖိုချောင်ကို လည်ပတ်နေသည်မှာ သုံးလခန့်ရှိနေပြီဖြစ်သည်။ ထိုကာလအတွင်း သူတို့မိသားစုအတွက် အဓိကဟင်းပွဲက သူနေထိုင်ရာ ဒုက္ခသည်စခန်းအနီးပတ်ဝန်းကျင်မှ ရှာဖွေ၍ရလာသော အသီးအရွက်များပင်ဖြစ်ခဲ့ရသည်။ အသားနှင့်ငါးဟင်းပွဲကိုတော့ ပုံဆွဲပြမှရတော့မည်ဟု အသက် ၃၇ နှစ်အရွယ် ဒေါ်ဟာဆီနာက ပြောသည်။

မိသားစုထမင်းဝိုင်းအတွက် နေ့စဉ်နှင့်အမျှ အသီးအရွက်တစ်မျိုးတည်းကိုသာ ချက်ပြုတ်ပေးရသည့်အတွက် မီးဖိုချောင်အလုပ်ကို ငြီးငွေ့လာသော်လည်း ကုလသမဂ္ဂ(UN) နှင့် နိုင်ငံတကာမှအကူအညီပေးရေးအဖွဲ့ (INGOs) အဖွဲ့များ၏ ကူညီထောက်ပံ့မှုကို အားကိုးနေရသူများဖြစ်သည့်အခြားရွေးချယ်စရာမရှိ။ မိသားစုထမင်းဝိုင်းအတွက် တခြားဖွေဖွေရာရာ အသားနှင့် ငါးဟင်းကို မစီစဉ် ပေးနိုင်ခြင်းကို စိတ်မကောင်းဖြစ်မိသည်ဟု ၎င်းဆိုသည်။

“တစ်ရက်တလေ သားသမီးတွေက စိတ်ဆိုးကြတယ်။ နေ့တိုင်း ထမင်းတစ်မျိုးနဲ့ အသီးအရွက်တစ်မျိုးတည်း စားရလို့၊ ကျမလည်း ကိုယ့်မိသားစုအတွက် အရသာရှိတဲ့ အစားအသောက်တွေလုပ်ပေးချင်တာပဲ”ဟု ဒေါ်ဟာဆီနာ ကပြောသည်။

မြန်မာနိုင်ငံတွင် နိုင်ငံရေးအပြောင်းအလဲဖြစ်ခဲ့ပြီးနောက် ကန့်သတ်ချက်များကြောင့် UN၊ INGOs အဖွဲ့အစည်းများ၏ ကူညီထောက်ပံ့မှုမရသည်မှာ သုံးလခန့်ကြာမြင့်နေပြီဖြစ်သော ရခိုင်ပြည်နယ်အတွင်းရှိ အိုင်ဒီပီစခန်းက မိသားစုများအားလုံးမှာလည်း ဒေါ်ဟာဆီနာကဲ့သို့ မိသားစုစားသောက်ရေး အတွက် ထမင်းတစ်အိုး၊ အသီးအရွက်တစ်အိုးဖြင့် အဆင်ပြေသလို ဖြေရှင်းနေကြရသည်။

“စခန်းထဲကလူတွေ ခူးတာများလို့ တစ်ပင်တည်းရှိတဲ့ ဒန့်သလွန်ပင်တောင် အရွက်မထွက်တော့ဘူး”ဟု စစ်တွေမြို့ ဒါးပိုင်အိုင်ဒီပီစခန်းတွင်နေထိုင်သော ဒေါ်ဆေတာရာဘေဂေါင် ကပြောသည်။

ရခိုင်ပြည်နယ်အတွင်းရှိ အိုင်ဒီပီစခန်းက မိသားစုဝင်တစ်သိန်းလေးသောင်းကျော်အတွက် ကမ္ဘာ့စားနပ်ရိက္ခာအစီအစဉ် (WFP) အခြေခံစားသောက်ကုန်များဖြစ်သော ဆန်၊ ဆီ၊ ဆားတို့ကို ထောက်ပံ့ ပေးနေခြင်းဖြစ်ပြီး ကိုဗစ်ရောဂါထိန်းချုပ်မှုကြောင့် ကန့်သတ်ခံလိုက်သည့်အတွက် ပြီးခဲ့သည့် မေလကုန်ကစ၍ ရိက္ခာမရဖြစ်ကာ စားသောက်ရေးအခက်အခဲများကို ကြုံတွေ့ခဲ့ရသည်။

“တစ်နေ့ကို ကလေးတွေအတွက် မုန့်စရိတ်အပါအဝင် စားသောက်စရိတ်က ကျပ်ခုနစ်ထောင်လောက် ကုန်တယ်။ ရိက္ခာအထောက်အပံ့မရတာ သုံးလလောက်ရှိသွားပြီဆိုတော့ ထမင်းနပ်မှန်ဖို့ မနည်းရုန်းကန်နေရတယ်”ဟု စစ်တွေမြို့ ဒါးပိုင်အိုင်ဒီပီစခန်းက မလှလှမေ ကပြောသည်။

လွန်ခဲ့သော ကိုးနှစ်ကျော် ၂၀၁၂ ခုနှစ်က ရခိုင်ပြည်နယ်တွင် ဖြစ်ပွားခဲ့သည့် ပဋိပက္ခကြောင့် မွတ်ဆလင်ဦးရေ တစ်သိန်းလေးသောင်းကျော်မှာ အိုင်ဒီပီစခန်းအသီးသီးတွင် နေထိုင်နေကြရပြီး ၎င်းတို့အတွက် လိုအပ်သော စားနပ်ရိက္ခာများကို အဓိကအားဖြင့် UN၊ INGOs အဖွဲ့အစည်းများကသာ ထောက်ပံ့ပေးလျက်ရှိသည်။

ထိုသို့ ထောက်ပံ့ရေးအစီစဉ်တွင်လည်း အစိုးရ၏ ခွင့်ပြုချက်မှာ အရေးပါနေသည့်အတွက် အစိုးရကအပြောင်း အလဲဖြစ်စဉ်ကလည်း အိုင်ဒီပီစခန်းရှိ မိသားစုဝင်များ ဝမ်းရေးအတွက် အရေးပါနေသည်ဟု ဒါးပိုင်စခန်းတာဝန်ခံ ဦးသိန်းမောင် ကပြောသည်။

“ကျနော်တို့စခန်းတွေကို ရိက္ခာဖြန့်မယ်ဆိုရင် အစိုးရခွင့်ပြုချက်လိုတယ်။ ကန့်သတ်ချက်တွေရှိတယ်”ဟု ၎င်းကဆိုသည်။

ရိက္ခာထောက်ပံ့မှုကို သုံးလခန့် ရပ်ဆိုင်းထားခဲ့ရာမှ ကမ္ဘာ့စားနပ်ရိက္ခာအစီအစဉ်(WFP)က ဩဂုတ် ၂၆ ရက်က စ၍ အိုင်ဒီပီစခန်းတွင် နေထိုင်လျက်ရှိသော လူတစ်ဦးကို ငွေကျပ်တစ်သောင်းငါးထောင် ကိုပြန်လည်ထောက်ပံ့ပေးခဲ့ကြောင်း မိသားစုဝင်များက ပြောသည်။

ကမ္ဘာ့စားနပ်ရိက္ခာအစီအစဉ်(WFP)သည် ထိလွယ်ရှလွယ်သူမိသားစုများအား လစဉ်ကူညီထောက်ပံ့ပေးနေသည့် စားနပ်ရိက္ခာနှင့် ငွေသားအထောက်အပံ့များကို ယခုအပတ်မှစတင်ကာ ရခိုင်ပြည်နယ်တွင် ပြန်လည်ဖြန့်ဝေပေးနိုင်ပြီဖြစ်ကြောင်း ကုလသမဂ္ဂအဖွဲ့(မြန်မာ)က ဩဂုတ် ၂၇ ရက်က ကြေညာခဲ့သည်။

“လူတစ်ဦးကို တစ်သောင်းငါးထောင်နှုန်းပေးတာပါ။ မိသားစု ငါးယောက်ရှိတဲ့အိမ်က ၇၅၀၀၀ ကျပ်ရပါတယ်။ အဲငွေနဲ့ပဲ လိုအပ်တာဝယ်ယူစားသောက်ရမှာဖြစ်ပါတယ်”ဟု ရိက္ခာငွေထောက်ပံ့ပေးနေသူတစ်ဦး ကပြောသည်။

ဒေါ်ဟာဆီနာတို့ နေထိုင်လျက်ရှိသော ဒါးပိုင်အိုင်ဒီပီစခန်းသည် စစ်တွေမြို့နယ် သဲချောင်းအိုင်ဒီပီစခန်းအနီးတွင်တည်ရှိပြီး သဲချောင်းအိုင်ဒီပီစခန်းမှာ ယခုအခါ စခန်းတစ်ခုအနေအထားမဟုတ်တော့ဘဲ ရပ်ကွက်တစ်ခုကဲ့သို့ နေအိမ်အဆောက်အဦးများ၊ ဈေးဆိုင်များဖြင့် စည်ကားနေပြီဖြစ်သဖြင့် ရိက္ခာအတွက် စားသောက်ကုန်များမရဘဲ ငွေကြေးရအကူအညီရရှိသည့်အတွက် ၎င်းတို့အနေဖြင့် လိုအပ်သော စားသောက်ကုန်များကို ဝယ်ယူရရှိခြင်းဖြင့် အဆင်ပြေနေသည်ဟု ဆိုသည်။

သို့သော် အလုပ်အကိုင်မရှိသောကြောင့် မိသားစုစားသောက်ရေးအတွက် အထောက်အပံ့များမှာ ပြတ်သွား၍ မရဟု ဒေါ်ဟာဆီနာက ဆက်ပြောသည်။

“စခန်းမှာရှိတဲ့လူတွေရဲ့ဒုက္ခက စားသောက်ရေးတစ်ခုတည်းမဟုတ်ပါဘူး။ အမျိုးသမီးတွေကလည်း ကလေးမွေးကြတယ်။ သူတို့အတွက် လိုအပ်တဲ့ကျန်းမာရေးစောင့်ရှောက်မှုတွေအတွက် ငွေလိုတယ်”ဟု စစ်တွေမြို့နယ် ဒါးပိုင် အိုင်ဒီပီစခန်းက ကိုယ်ဝန် ခုနစ်လရှိပြီ ဖြစ်သော မတာရာဘီဘီ ကပြောသည်။

အထောက်အပံ့မရ၍ မိသားစုဝင်များအားလုံး ဒုက္ခရောက်ကြသော်လည်း မိခင်နှင့် ကလေးအတွက် အဟာရဖြည့်တင်း ရန်လိုအပ်နေသော ကိုယ်ဝန်ဆောင်များ၏ ဒုက္ခကပို၍ကြီးမားသည်ဟု မတာရာဘီဘီက ဆက်ပြောသည်။

အိုင်ဒီပီစခန်းများတွင် နေထိုင်ရသည့် မိသားစုဝင်များ၏ ဒုက္ခမျိုးစုံကို ဖြေရှင်းနိုင်ရန်အတွက် ရခိုင်ပြည်နယ်ရှိ အိုင်ဒီပီစခန်းများ ပိတ်သိမ်းရေးမဟာဗျူဟာတစ်ခုကို ပြီးခဲ့သည့် အမျိုးသားဒီမိုကရေစီအဖွဲ့ချုပ်(NLD) ဦးဆောင်သော အစိုးရလက်ထက်က ကုလအတွင်းရေးမှူးချုပ်ဟောင်း ကိုဖီအာနန်ဦးဆောင်သော ရခိုင်ပြည်နယ်ဆိုင်ရာ အကြံပေးကော်မရှင်ကို ဖွဲ့စည်းခဲ့ပြီး လေ့လာတွေ့ရှိချက် အပြီးသတ်အစီရင်ခံစာကို ၂၀၁၇ ခုနှစ် ဩဂုတ်လက အစိုးရအဖွဲ့ထံ တင်သွင်းခဲ့သည်။

အဆိုပါ အစီရင်ခံစာ၏ အကြံပြုချက်များအရ ရခိုင်ပြည်နယ်ရှိ အိုင်ဒီပီစခန်းများအားလုံးပိတ်သိမ်းပြီး ပြန်လည်နေရာချထားရေးအစီစဉ်ကို လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာနက ဆောင်ရွက်ခဲ့သည်။ ထိုသို့ဆောင်ရွက်ရာတွင် ကျောက်တော်နှင့် မြေပုံမြို့နယ်ရှိ အိုင်ဒီပီစခန်းတစ်ချို့ကို ပိတ်သိမ်း၍ နေရာချပေးနိုင်ခဲ့သည်။

ထို့နောက် ကျောက်ဖြူမြို့ရှိ ကျောက်တလုံးအိုင်ဒီပီစခန်းကို ပိတ်သိမ်းရေးအတွက် ဆောင်ရွက်နေဆဲ ကာလမှာပင် စစ်အာဏာသိမ်းမှုဖြစ်စဉ်များကြောင့် အိုင်ဒီပီအရေးအပါအဝင် ဒုက္ခသည်များအရေးတို့မှာ ကစဉ့်ကလျားဖြစ်လာခဲ့သည်။

အဆိုပါ အာဏာသိမ်းမှုက အိုင်ဒီပီစခန်းရှိမိသားစုဝင်များ ပြန်လည်နေရာချထားရေးအစီစဉ်သာမက ရိက္ခာရရှိမှု အခြေနေထိပါ ထိခိုက်လာခဲ့သည်။

“အာဏာသိမ်းမှုက ကျမတို့အတွက် မျှော်လင့်ချက်မဲ့သွားပြီ”ဟု ကျောက်ဖြူမြို့ ကျောက်တလုံးအိုင်ဒီပီ စခန်းက အမျိုးသမီးတစ်ဦးက ပြောသည်။

UN၊ INGOs အဖွဲ့များက ရိက္ခာထောက်ပံ့မှုရပ်ဆိုင်းထားသည့်အချိန်တွင် စခန်းအနီးရှိ ပိန်းခင်းများ၊ ဒန့်တလွန်ပင်များကိုသာ အားကိုး၍ မိသားစုဟင်းလျာအဖြစ် အများစားဆုံးစားခဲ့ရသည်ဟု စစ်တွေမြို့ ဒါးပိုင်အိုင်ဒီပီစခန်းရှိ မလှလှမေက အထောက်အပံ့မရခဲ့သည့်အချိန် စားသောက်ရေးအတွက် ဖြတ်ကျော်ခဲ့ပုံကို ပြောပြသည်။

“စားသောက်ရေးဘယ်လောက်ခက်ခဲလဲဆိုတာကို ကျမတို့မီးဖိုချောင်ကို ကြည့်ရင်သိပါတယ်”ဟု ပိန်းဥအိုးကို လက်ညှိုးညွန်၍ မလှလှမေ ကပြောသည်။

UN၊ INGOs အဖွဲ့များ၏ အကူညီအထောက်အပံ့ မရသည့်အချိန်တွင် စားသုံးရန်အတွက် သက္ကယ်ပြင်အိုင်ဒီပီစခန်းရှိ မြေကွက်လပ်တွင် ဟင်းသီးဟင်းရွက်ပင်တစ်ချို့ကို စိုက်ပျိုးထားသည်ဟု စစ်တွေမြို့ သက္ကယ်ပြင်အိုင်ဒီပီစခန်း တာဝန်ခံက အရေးပေါ်ရိက္ခာအတွက် ကြိုတင်ပြင်ဆင်ထားပုံကို ပြောသည်။

“အဓိက ဆန်တစ်ခုရှိဖို့အရေးကြီးတယ်။ ဆန်ရှိရင် တခြားအသီးအရွက်ကို လိုအပ်တဲ့အချိန် စားလို့ရအောင် စခန်းအနီးမှာ ကန်စွန်း၊ ခဝဲ၊ ဗူးပင်တွေကို စိုက်ပျိုးထားကြတယ်”ဟု ၎င်းကဆိုသည်။

အိုင်ဒီပီစခန်းများကို ရိက္ခာဖြန့်ဝေပေးမှု ဆိုင်းငံ့သွားခြင်းမှာ ကိုဗစ်ရောဂါကာကွယ်ထိန်းချုပ်ရေးကြောင့် ရိက္ခာဖြန့်ဝေပေးမည့်သူများကို အသွားအလာကန့်သတ်ထားခြင်းကြောင့်ဖြစ်သည်ဟု ပြည်နယ်လူမှုဝန်ထမ်း၊ ကယ် ဆယ်ရေးနှင့် ပြန်လည်နေရာချထားရေးဦးစီးဌာနကဘက်က ဆိုသည်။

ဩဂုတ်လကုန်ပိုင်းကစ၍ WFP ၏ထောက်ပံ့မှု ပြန်လည်စတင်ခဲ့သဖြင့် အသီးအရွက်နှင့်သာ သုံးလနီးပါးနှစ်ပါးသွားခဲ့ရသည့် ဒေါ်ဟာဆီနာတို့ မိသားစုထမင်းဝိုင်းတွင် အသားနှင့်ငါးဟင်းတို့ကို ရက်အနည်းငယ်ခန့် မြင်တွေ့ရတော့မည်ဖြစ်သည်။

2 months Ago

ရခိုင်တွင် အကြမ်းဖက်ဥပဒေဖြင့် တရားစွဲခံရသူ ၂၀၀ ကျော်၏ မိသားစုဝင်များကို ထောက်ပံ့

ရခိုင်ပြည်နယ် အကျဉ်းထောင်အသီးသီးမှာ ချုပ်နှောင်ခံနေရတဲ့ လူ ၂၀၀ ကျော်ရဲ့ မိသားစုဝင်တွေကို ကိုဗစ်ကာလအတွင်း စားဝတ်နေရေးအထောက်အပံ့ဖြစ်စေဖို့ ဝေဟင်အောင်ဖောင်ဒေးရှင်း ငွေကျပ်သိန်းတစ်ရာကျော် ထောက်ပံ့ပေးနေတယ်လို့ စာရေးဆရာ ကိုဝေဟင်အောင်က ပြောပါတယ်။

ရခိုင်မှာ အေအေနဲ့ ဆက်စပ်တယ်ဟုဆိုကာ စစ်တပ်က သံသယနဲ့ဖမ်းဆီးပြီးနောက် အကြမ်းဖက်ဥပဒေတွေနဲ့ တရားစွဲဆိုခံထားရသူတွေရဲ့ မိသားစုဝင်တွေကို ထောက်ပံ့ပေးနေတာပါ။ 

စာရေးဆရာကိုဝေဟင်အောင် “လက်ရှိကတော့ ရခိုင်ပြည်နယ်အနှံ့ပေါ့နော် အကြမ်းဖက်ဥပဒေနဲ့ အစွဲဆိုခံထားရတဲ့လူကတော့ အကုန်လုံးစုစုပေါင်း ၂၀၁ ဦးထိ ကျနော်တို့စာရင်းကောက်ယူရရှိထားတာပေါ့၊ ဒီလူတွေရဲ့မိသားစုတွေကို ကျနော်တို့က တစ်မိသားစုကို ပိုက်ဆံ ၅ သောင်းနှုန်းနဲ့ ကူညီထောက်ပံတာဖြစ်တယ်၊ ဒီကာလက ကိုဗစ်ကာလဆိုတော့ သူတို့ရဲ့မိသားစုတွေအနေနဲ့ စားရေးသောက်ရေး၊ နေရေးထိုင်ရေးတွေမှာ အခက်အခဲရှိမယ်ဆိုတာကို ကျနော်တို့သုံးသပ်ပြီးတော့ ကူညီထောက်ပံ့ရတာဖြစ်ပါတယ်။ ကျနော်က ပရဟိတလုပ်နေတဲ့အချိန်မှာ ဒီကာလမှာ ပြည်တွင်းပြည်ပက အလှူရှင်တွေဆီက လှူဒါန်းထားတဲ့ အလှူငွေတွေထဲက တချို့တဝက်ကိုဆွဲထုတ်ပြီးတော့ သူတို့ကို ပြန်လည်ကူညီထောက်ပံ့ပေးတာ” လို့ ပြောပါတယ်။

ရခိုင်ပြည်နယ်မှာ အကြမ်းဖက်ဥပဒေနဲ့ တရားစွဲဆိုခံရပြီး အကျဥ်းထောင်တွေမှာ ဖမ်းဆီးထိန်းသိမ်းခံနေရသူတွေဟာ သံတွဲထောင် ၉ ဦး၊ ကျောက်ဖြူထောင် ၇၆ ဦး၊ မြောက်ဦးထောင် ၄၇ ဦး၊ စစ်တွေထောင် ၆၄ ဦးနဲ့ ဘူးသီးတောင်ထောင်မှာ ၅ ဦး စုစုပေါင်း ၂၀၁ ဦးရဲ့ မိသားစုဝင်တွေကို ငါးသောင်းကျပ်စီ ထောက်ပံ့ပေးနေကာ တချို့တဝက်ကိုတော့ ပေးထားပြီး ဖြစ်တယ်လို့ ဆိုပါတယ်။

ရခိုင်မှာ အကြမ်းဖက်ဥပဒေနဲ့ တရားစွဲဆိုခံနေရသူတွေရဲ့ မိသားစုဝင်တွေကို ထောက်ပံ့နိုင်ဖို့ စာရင်းကောက်ယူရာမှာ လက်ရှိအချိန်ထိ မိသားစုတွေနဲ့အဆက်အသွယ်မရဘဲ ပျောက်ဆုံးနေသူ ၂၁ ဦးထိရှိနေတယ်လို့ ဆိုပါတယ်။

အဆိုပါပျောက်ဆုံးနေသူ ၂၁ ဦးရဲ့ မိသားစုဝင်တွေကိုလည်း ငါးသောင်းကျပ်စီ ထောက်ပံ့ပေးသွားမှာဖြစ်ကာ စုစုပေါင်း သိန်း ၁၁၀ ကျော် လှူဒါန်းသွားမယ်လို့ စာရေးဆရာ ကိုဝေဟင်အောင်က ပြောပါတယ်။

2 months Ago

ရခိုင်ပြည်နယ်တွင် ဒီရေတောများ ပိုမိုခိုးယူခုတ်လှဲမှုရှိလာသဖြင့် ပျက်စီးမှုများလာ

ရခိုင်ပြည်နယ်မှာ ဒီရေတော ဧက ၄၀၀၀၀၀ ကျော်ရှိရာ နိုင်ငံရေးမတည်ငြိမ်မှုတွေနဲ့ စားဝတ်နေရေး အခက်အခဲတွေကြောင့် ဒီရေတောတွေကို အရင်တုန်းကထက် ခိုးယူခုတ်လှဲတာ တွေများလာနေတဲ့အတွက် ဒီရေတောတွေ ပျက်စီးလာနေတယ်လို့ ရခိုင်ကမ်းရိုးတန်း သဘာဝပတ်ဝန်းကျင်ထိန်းသိမ်းရေးအသင်း(RCA)ကနေ သိရပါတယ်။

ရခိုင်ကမ်းရိုးတန်းသဘာဝပတ်ဝန်းကျင်ထိန်းသိမ်းရေးအသင်း(RCA) ဥက္ကဋ္ဌ ဒေါက်တာမောင်မောင်ကြည်က “အရင်တုန်းကတော့ ဧက ၄၀၀၀၀၀ ကျော်လောက် ရှိတယ်လို့တော့ စာရင်းဇယားအရ သိရတာပေါ့နော်၊ ဒါပေမဲ့ ၈၈ နောက်ပိုင်းမှာ ပုစွန်ကန်တွေ၊ နောက်လယ်ကာရီတွေ လုပ်တာနဲ့တင် ရခိုင်က ဧရိယာတစ်သိန်းခွဲလောက် ပျက်စီးဆုံးရှုံးသွားတယ်လို့ သိရတာပေါ့။ ကျနော်တို့ကိုယ်တိုင် ပေါက်တောတို့၊ မင်းပြားတို့ ဘက်ကို ရောက်တဲ့အခါကျတော့ အဲဒီပုဇွန်ကန်အပျက်တွေ၊ အများကြီးတွေ့ခဲ့ရတယ်၊ နောက်ဆားကွင်းလုပ်တာတွေရှိတယ်၊ အခုလည်း ဝန်ဖိုက်ဒီရေတောဆိုရင် ရမ်းဗြဲရယ်၊ တောင်ကုတ်ရယ်၊ မြေပုံရယ်၊ ကျောက်ဖြူရယ် ဒီကြားပေါ့၊ အဲဒီဝန်ဖိုက်ဟာဆိုရင်လည်း အမှန်ဆိုကြိုးဝိုင်းတောပေါ့၊ သို့သော်လည်းပဲ လူတွေရဲ့ဗဟုသုတနည်းတာလည်းပါတယ်၊ နောက်တခုကတော့ စီးပွားရေးလုပ်ကိုင်ဖို့ အခွင့်အရေးမရှိတာလည်းပါတာပေါ့၊ ကျနော်တို့ ကြားရတာကတော့ ဌာနဆိုင်ရာတွေမှာလည်း ကိုဗစ်နဲ့ ပြီးတော့ နိုင်ငံရေးအကျပ်အတည်းနဲ့ ဆိုတော့ လွတ်လွတ်လပ်လပ်သွားလို့မရတဲ့အခါ ခိုးခုတ်တဲ့ဟာတွေပေါ့၊ ခိုးထုတ်မှု ပိုများနေတယ်လို့ ကြားပါတယ်”လို့ ပြောပါတယ်။

ရခိုင်မှာ ဒီရေတောတွေ ပြန်လည်ထိန်းသိမ်းစိုက်ပျိုးတာတွေရှိပေမဲ့  ကြီးကြီးမားမား ထိန်းသိမ်း စိုက်ပျိုးနိုင်တာ မရှိသေးသလို အခုလို ဒီရေတောတွေ ပျက်စီးလာတဲ့အတွက် သဘာဝငါးသယံဇာတတွေ ဆုံးရှုံးလာနေကာ သဘာဝပတ်ဝန်းကျင် ထိခိုက်မှုတွေရှိ လာနိုင်တယ်လို့လည်း ဆိုပါတယ်။

ရခိုင်မှာ အရင်က ဒီရေတောဧက ၄ သိန်းကျော်ရှိတာမှာ ယခုအချိန်မှာတော့ ဒီရေတောဧက ၁ သိန်းကျော်လောက်ပဲ ကျန်ရှိတော့တဲ့အတွက် ပြန်လည်ထိန်းသိမ်းစိုက်ပျိုးဖို့ လိုအပ်​နေသလို ပြည်သူတွေကိုလည်း ဒီ​ရေတောတွေနဲ့ပတ်သက်ပြီး အသိပညာပေးတာတွေ ပိုမိုလုပ်ဆောင်ပေးဖို့ လိုအပ်တယ်လို့လည်း ဒေါက်တာမောင်မောင်ကြည်က ပြောပါတယ်။

(လယ်ကာရီ (ဒေသအခေါ် ) - တာပေါင်များနှင့် ရေငန်များကို တားပြီး ပိတ်ဆို့ထားသည့် အရာ)

2 months Ago

ရခိုင်ပြည်နယ်တွင် ကျပ်သိန်း ၈သောင်းတန် မူးယစ်ဆေးများ ဖမ်းဆီးရမိ

ရခိုင်ပြည်နယ်မှာ ကျပ်သိန်းပေါင်း ၈ သောင်းလောက်တန်ဖိုးရှိတဲ့ မူးယစ်ဆေးတွေကို သယ်ဆောင်လာတဲ့ ယာဉ်မောင်းနဲ့အတူ ဖမ်းဆီးရမိခဲ့တယ်လို့ မြန်မာနိုင်ငံ မူးယစ်ဆေး ထိန်းချုပ်ရေးဗဟိုကော်မတီက ဒီနေ့ ထုတ်ပြန်ပါတယ်။

ဩဂုတ် ၂၇ ရက် နေ့လယ်ပိုင်းက မောင်တောမြို့နယ် ကျီးကန်းပြင်စစ်ရေးဂိတ်မှာ မောင်တောကနေ ကြိမ်ချောင်းကို မောင်းနှင်လာတဲ့ နစ်ဆန်း ၈ ဘီး ဆီဘောက်ဆာကားကို ပူးပေါင်းအဖွဲ့က စစ်ဆေးဖို့ ရပ်တန့်ခိုင်းရာမှာ ဖမ်းဆီးရမိတာဖြစ်ပါတယ်။

စစ်ဆေးစဉ် ခုန်ချထွက် ပြေးသွားတဲ့ အသက် ၃၁ နှစ်ရှိ ယာဉ်မောင်း အောင်ကျော်လှိုင် (ခ) အောင်ကျော်(ခ)ဂေါက်ကြီးကို  လိုက်လံဖမ်းဆီးရာ ညနေ ၆ နာရီလောက်မှာ စစ်ဆေးရေးဂိတ်နဲ့ ၆ ဖာလုံလောက်အကွာမှာ ဖမ်းဆီးရမိခဲ့တယ်လို့ ထုတ်ပြန်ချက်က ဆိုပါတယ်။

အဲဒီနောက်ကားရဲ့ ဆီလှောင်ကန်ကို ဖွင့်ဖောက်စစ်ဆေးရာ ဆာလာအိတ်တွေနဲ့ ထည့်ထား တဲ့ ဒေသကာလတန်ဖိုး ငွေကျပ် ၇ ဒသမ ၇၈ ဘီလီယံတန်ဖိုးကျော်ရှိတဲ့ စိတ်ကြွရူးသွပ်ဆေးပြား ၅ ဒသမ ၁၇ သန်းကျော်၊ အိုက်စ် (မက်သ်အဖက်တမင်း) အလေးချိန် ၈၀၀ ဂရမ် သိမ်းဆည်းရမိလို့ သူတို့ကို မူးယစ်ဆေးဝါးနဲ့ စိတ်ကို ပြောင်းလဲစေတဲ့ ဆေးဝါးများဆိုင်ရာ ဥပဒေအရ အရေးယူထား ပြီး ကွင်းဆက်တွေကို စစ်ဆေးဖော်ထုတ်နေတယ်လို့ ဆိုပါတယ်။

2 months Ago

ရခိုင်ပြည်နယ်တွင် ကိုဗစ်-၁၉ ရောဂါဖြင့်သေဆုံးသူ ၄၀၀ ခန့်ရှိလာ

ရခိုင်ပြည်နယ်မှာ  ဩဂုတ် ၂၇ ရက်နေ့အထိ  ကိုဗစ်-၁၉ ကူးစက်ခံရသူပေါင်း  ၄၀၀ လောက် သေဆုံးခဲ့တယ်လို့ ပြည်နယ်ကိုဗစ်ထိန်းချုပ်ရေးနဲ့ အရေးပေါ်တုံ့ပြန်ရေး ကော်မတီက ထုတ်ပြန်ပါတယ်။

ပြည်နယ်ထဲက မြို့နယ် ၁၇ မြို့နယ်မှာ မနေ့က ၂ ယောက် သေဆုံးခဲ့ပြီး စုစုပေါင်း ၃၈၂ ယောက် သေဆုံးခဲ့ပါတယ်။

စစ်တွေမြို့နယ်မှာ ၆၉ ယောက် သေဆုံးလို့ အများဆုံးဖြစ်ပြီး တောင်ကုတ်မြို့နယ်မှာ ၆၂ ယောက် သေဆုံးခဲ့ပါတယ်။

မြေပုံမြို့နယ်မှာ ၁ ယောက် သေဆုံးခဲ့လို့ အနည်းဆုံးဖြစ်ပြီး ဘူးသီးတောင်နဲ့ ရမ်းဗြဲမြို့နယ်တို့မှာ ၆ ယောက်စီနဲ့ ဒုတိယ အနည်းဆုံးဖြစ်ပါတယ်။

ပိုးတွေ့လူနာ အရေအတွက်တော့ ဂွမြို့နယ်မှာ အယောက် ၇၀၀ ရှိတာကြောင့် အများဆုံးဖြစ်ပြီး လက်ရှိမှာလည်း ကုသဆဲလူနာ ၉၉ ယောက်ရှိနေပါတယ်။

“ပိုးတွေ့နှုန်းများတယ်ဆိုတာနဲ့ ပိုးတွေ့သူများတယ်ဆိုတာ မတူဘူး။ အရင် First Wave နဲ့ Second Wave တုန်းကလို ဘယ်လိုလူမျိုးကို စစ်ရမယ်ဆိုတဲ့ သတ်မှတ်ချက်မရှိတော့ တကျောင်းတဂါထာဆိုသလို တမြို့နဲ့ တမြို့ စစ်တဲ့နှုန်း ပုံစံ မတူကြတော့ဘူး။ ဖျားတာနဲ့ လာစစ်ပါဆိုတဲ့ မြို့နယ်နဲ့ အောက်ဆီဂျင်ကျမှာ လာပါဆိုတဲ့ မြို့နှစ်မြို့မှာ ဘယ်မြို့ ပိုးတွေ့သူများမလဲ။ တကယ်တော့ စစ်သူများရင် ပိုးတွေ့များမယ်။ ကြိတ်ကုများရင် ပိုးတွေ့နည်းမယ် ဒါပဲ” လို့ မြို့နယ်ဆေးရုံတခုက လက်ထောက်ဆရာဝန်တယောက်က ပြောပါတယ်။

ပြီးတော့ စစ်တွေမှာ ပိုးတွေ့လူနာ အယောက် ၅၉၀၊ ကျောက်ဖြူမှာ အယောက် ၄၉၀၊ မောင်တောမှာ ၄၇၆ ယောက်နဲ့ အများဆုံးဖြစ်ပါတယ်။

မြေပုံမြို့နယ်မှာ ပိုးတွေ့လူနာ ၅၁ ယောက်နဲ့ အနည်းဆုံးဖြစ်ပြီး မင်းပြားမှာ ၅၇ ယောက်၊ ရသေ့တောင်မှာ ၆၃ ယောက်၊ ပုဏ္ဏားကျွန်းမှာ ၆၉ ယောက်နဲ့ အနည်းဆုံး ဖြစ်ပါတယ်။

2 months Ago

ရခိုင်တွင် Stay at Home ကာလပြည့်သွားသော်လည်း မိမိအသိဖြင့်နေထိုင်ကြရန် AAတိုက်တွန်း

ကိုဗစ်-၁၉ ရောဂါ ကူးစက်မှုရှိနေသေးတဲ့အတွက် ရခိုင်ပြည်သူတွေအနေနဲ့ မိမိအသိစိတ်နဲ့ သွားလာနေထိုင်ကြဖို့ ရက္ခိုင်အမျိုးသားအဖွဲ့ချုပ်/ရက္ခိုင့်တပ်တော်  ULA/AA က ဩဂုတ် ၂၆ ရက် ဒီနေ့ ထုတ်ပြန်ထားပါတယ်။

ကိုဗစ်ကာကွယ်ထိန်းချုပ်နိုင်ဖို့ အေအေက ပြီးခဲ့တဲ့ဇူလိုင် ၂၀ ရက်နေ့ကစပြီး သြဂုတ် ၂၅ ရက်နေ့ထိ သီတင်း ၅ ပတ်လောက်  Stay at Home ကာလသတ်မှတ်ခဲ့တာဟာ မနေ့ကပြည့်ခဲ့ပြီးနောက်  ခုလို ထုတ်ပြန်လိုက်တာပါ။

မြန်မာနိုင်ငံမှာ ကိုဗစ်-၁၉ ကာကွယ်ဆေးထိုးနှံပေးတာတွေဟာ တနိုင်ငံလုံးအတိုင်းအတာအရ လိုအပ်ချက်တွေရှိနေပေမဲ့ ကာကွယ်ဆေးထိုးနှံထားသူတွေဟာ ရောဂါကူးစက်ခံရပါက အသက်အန္တရာယ်ကြုံတွေ့ရမှုနည်းပါးတာကို သုတေသနမှတ်တမ်းတွေအရတွေ့ရှိရပြီး ကာကွယ်ဆေးထိုးထားသူတွေဟာ မိမိပတ်ဝန်းကျင်၊ ရပ်ရွာနဲ့ တိုင်းပြည်ကို ကိုဗစ်ကာကွယ်ရေးမှာ အထောက်အကူပြုတာကြောင့် အခွင့်အရေးရပါက ကာကွယ်ဆေးထိုးထားကြဖို့ကိုလည်း တိုက်တွန်းထားပါတယ်။

လက်ရှိနိုင်ငံတချို့မှာ ကိုဗစ်-၁၉ မျိုးရိုးဗီဇပြောင်း မျိုးကွဲအသစ်တွေ တွေ့ရှိနေရပြီး စတုတ္ထလှိုင်းစတင်မယ့် အလားအလာတွေရှိနေတာကြောင့် ပြည်သူတွေအနေနဲ့ သတိပေါ့လျော့စွာသွားလာနေထိုင်တာတွေမလုပ်ကြဖို့နဲ့ ကိုဗစ်ကူးစက်ခံထားရသူတွေဟာ ရောဂါလက္ခဏာမပြပဲရှိနေနိုင်တာကြောင့် ရောဂါအချိန်မရွေးကူးစက်ခံရနိုင်တဲ့အတွက် သတိထားသွားလာကြဖို့ကိုလည်း တိုက်တွန်းထားပါတယ်။

ရက္ခိုင်အမျိုးသားအဖွဲ့ချုပ်က Stay at Home ကာလ သတ်မှတ်ခဲ့ပြီးနောက် လိုက်နာ နေထိုင်ကြရမယ့် စည်းကမ်းချက်တွေကို ပြည်သူတွေအနေနဲ့ သိရှိနားလည်ကြပြီးဖြစ်တဲ့အတွက် Stay at Home ကာလကို ထပ်မံမတိုးမြှင့်တော့ပင်မဲ့လည်း အရင်ထုတ်ပြန်ထားခဲ့တဲ့ ကိုဗစ်ကာကွယ်ရေးစည်းကမ်းချက်တွေအတိုင်း သွားလာနေထိုင်ကြဖို့ကိုလည်း ထုတ်ပြန်ချက်မှာ ပါရှိပါတယ်။

ရခိုင်ပြည်နယ်မှာ ကိုဗစ်တတိယလှိုင်းအတွင်း မေလမှ သြဂုတ် ၂၅ ရက်အထိ ကိုဗစ်ကူးစက်ခံရသူဦးရေ ၃၉၁၄ ဦးနဲ့ သေဆုံးသူ ၃၇၁ ဦး ရှိနေပြီဖြစ်တယ်လို့လည်း ဖော်ပြထားပါတယ်။

2 months Ago

ရခိုင်စစ်ရှောင်စခန်းက အသက် ၆၅ နှစ်အထက်ရှိသူများကို ကိုဗစ်ကာကွယ်ဆေးထိုးပေးရန် စီစဥ်နေ

ရခိုင်ပြည်နယ် စစ်ဘေးရှောင်စခန်းတွေမှာရှိတဲ့ အသက် ၆၅ နှစ်နဲ့အထက်ရှိသူတွေကို ထိုးနှံပေးဖို့ မြို့နယ်ကျန်းမာရေးဌာနတွေက လုပ်ဆောင်နေတယ်လို့ သိရပါတယ်။

ရခိုင်ပြည်နယ်မှာ အသက် ၆၅ နှစ်နဲ့အထက် ဘိုးဘွားများအပါအဝင် လူပေါင်း ၉၀၀၀၀ ကျော်ကို ​သြဂုတ်လ ၁ ရက်နေ့ကစတင်ပြီး ကိုဗစ်ကာကွယ်ဆေးထိုးနှံပေးခဲ့ပြီး အခု စစ်ဘေးရှောင်စခန်းတွေကို ထိုးပေးဖို့ စီစဉ်နေတာပါ။ 

ပြည်နယ်ကျန်းမာရေးဦးစီးဌာန လက်ထောက်ညွှန်ကြားရေးမှူး ဒေါက်တာစိုးဝင်းပိုင်က “အခုကတော့ ၉၄၀၀၀ ကျော်ထိုးထားပါတယ်။ အုပ်စု ၁၂ ခု သတ်မှတ်တာပေါ့။ အသက် ၁၅ နှစ်တွေလည်းပါတယ်၊ နိုင်ငံဝန်ထမ်းတွေလည်းပါတယ်၊ ဘော်လန်တီယာတွေလည်းပါတယ်၊ စျေးရောင်းတဲ့သူတွေလည်းပါတယ်။ အဲတော့ အုပ်စု ၁၂ ခုလို့ သတ်မှတ်တယ်၊ ဒါပေမဲ့အုပ်စု ၁၂ ခုကို ဆေးမလောက်ဘူး။ မလောက်တဲ့အတွက် ရခိုင်ပြည်နယ်က တိုင်းမှူးဆိုတဲ့သူက ၅ ခုလို့ သတ်မှတ်ပေးတယ်။ အဲတော့ ၆၅ နှစ်အထက်ပြီးရင် သက်ကြီးဝါကြီး ဘုန်ကြီးတွေပေါ့နော်၊ အဲဒီလိုမျိုး  ၅ ခုလို့သတ်မှတ်တယ်။ ဒါပေမဲ့အောက်ခြေမှာတော့ မြို့နယ်မှာရှိတဲ့ မြို့နယ်အုပ်ချုပ်နဲ့ မြို့နယ်ကျန်းမာကရွေးချယ်ပြီးတော့ ထိုးပေးတာပေါ့။ ကျနော်တို့မှာ အသက် ၆၅ နှစ်အထက်ဆိုတဲ့ဟာမှာ စစ်ဘေးရှောင်စခန်းက အုပ်စုတွေလည်းပါတယ်၊ အသက် ၆၅ နှစ်အထက်ကို မြို့နယ်က ဦးစားပေးပြီးတော့ထိုးပေးနေတယ်၊ အခုနောက်ပိုင်းမှာလည်း စခန်းတွေကို ဦးစားပေးပြီးတော့ ထိုးပေးဖို့ စီစဥ်နေတယ်လို့ ပြောသံကြားတယ်” လို့ ပြောပါတယ်။

ရခိုင်မှာ ပြီးခဲ့တဲ့ NLD အစိုးရလက်ထက်က အိန္ဒိယနိုင်ငံထုတ် ကိုဗစ်ကာကွယ်ဆေး ထိုးနှံပေးထားသူ ၁၂၀၀၀၀ ကျော်ရှိပြီး အခုထပ်မံပြီး တရုတ်နိုင်ငံထုတ် ကိုဗစ်ကာကွယ်ဆေး ၉ သောင်းကျော် ထိုးနှံပေးထားပြီး ဖြစ်တယ်လို့ သိရပါတယ်။

ရခိုင်ပြည်သူတွေအနေနဲ့ ဘယ်နိုင်ငံကထုတ်တဲ့ ကာကွယ်ဆေးကိုမဆို မဖြစ်မနေထိုးကြဖို့နဲ့ ကိုဗစ်ကာကွယ်ဆေးထိုးနှံထားသူတွေဟာ ကိုဗစ်ကူးစက်ခံရပါကလည်း အသက်အန္တရာယ်ကြုံတွေ့ရမှုနည်းပါးတာကြောင့် မဖြစ်မနေထိုးကြဖို့ ရခိုင့်တပ်တော်စစ်ဦးစီးချုပ် ဗိုလ်ချုပ်ထွန်းမြတ်နိုင်က တိုက်တွန်းပြောဆိုထားပါတယ်။

2 months Ago

ရခိုင်ပြည်နယ်တွင် Covid Call Center ဖွင့်လှစ်ကူညီနေ

ရခိုင်ပြည်သူပြည်သားတွေ ကိုဗစ်-၁၉ ရောဂါနဲ့ ပတ်သက်လို့  သတင်းတွေကို မှန်မှန်ကန်ကန်သိရှိနိုင်ဖို့နဲ့ အကူအညီတောင်းခံနိုင်ဖို့အတွက် အရပ်ဘက်လူမှုအဖွဲ့အစည်းတွေက ရခိုင်ပြည် Covid Call Center တခုကို ဖွင့်လှစ်ကူညီနေပါတယ်။ 

ကိုဗစ်-၁၉ တတိယလှိုင်း၊ အသွင်ပြောင်းဗိုင်းရပ်စ်ပိုး မြန်မာနိုင်ငံက ဒေသအသီးသီးလိုပဲ ရခိုင်ပြည်နယ်တခုလုံးကို ကူးစက်ပြန့်ပွားနေချိန်မှာ ဒီ  Call Center ကို ဖွင့်လှစ်ခဲ့တာဖြစ်ပါတယ်။ 

ရခိုင်သားတိုင်းနားလည်ဖို့အတွက်  ဖုန်းနံပါတ်က 09-779 778 880 ကို ၂၄ နာရီပတ်လုံး ရခိုင်ဘာသာစကားနဲ့ ဆက်သွယ်မေးမြန်းနိုင်ပါတယ်။ 

ဒီဖုန်းနံပါတ်ကို ဆက်ပြီး ခေါ်ဆိုတဲ့အခါ အနီးပတ်ဝန်းကျင်က ဆရာဝန်တွေ၊ အရေးပေါ် လူနာတင်တင်ကားတွေ၊ အောက်စီဂျင်ရရှိနိုင်တဲ့နေရာတွေ၊ အောက်စီဂျင် မရနိုင်ခင် အချိန်မှာလုပ်ကိုင်ရဖို့နည်းလမ်းတွေ၊ ရောဂါနဲ့ ပတ်သက်တဲ့ အချက်အလက်တွေ၊ ကာကွယ်ဖို့ နည်းလမ်းတွေကို သိရှိ၊ ရရှိနိုင်မှာဖြစ်ပါတယ်။ 

လိုင်းခွဲတွေထဲမှာ အော်ပရေတာတွေနဲ့ တိုက်ရိုက်ဆက်သွယ်ဖို့ အတွက် နံပါတ် (၀)ကို နှိပ်ရန်၊ ရောဂါလက္ခဏာနဲ့ ကူးစက်တတ်တဲ့နည်းလမ်းတွေကို သိချင်ရင် နံပါတ် (၁)ကို နှိပ်ရန်၊ ရောဂါကာကွယ်ရေးနည်းလမ်းတွေကို သိဖို့အတွက်နံပါတ် (၂)ကို နှိပ်ရန်၊ အောက်စီဂျင် ကျပါက ပြန်တက်လာအောင်လုပ်ဆောင်နိုင်တဲ့ နည်းလမ်းတွေအတွက် နံပါတ်(၃) ကိုနှိပ်ရန်၊ ကျန်းမာရေးဝန်ထမ်းတွေနဲ့ တိုင်ပင်ပြောဆိုဖို့ နံပါတ် (၄)ကို နှိပ်ရန်၊ အရေးပေါ်ကားတွေကို ခေါ်ဖို့ နံပါတ် (၅)ကိုနှိပ်ပါ၊ အောက်စီဂျင် ရရှိနိုင်မယ့်နေရာတွေကို သိချင်ပါကနံပါတ် (၆)ကို နှိပ်ရန်၊ အရေးပေါ် အစားအသောက် အခက်အခဲရှိရင် ခေါ်နိုင်မယ့် ဖုန်းနံပါတ်တွေ သိဖို့အတွက် နံပါတ် (၇)ကို နှိပ်ပါ၊ လှူဒါန်းလိုပါက ဆက်သွယ်နိုင်မယ့် ဖုန်းနံပါတ်တွေကို သိဖို့အတွက် နံပါတ် (၈) ကို နှိပ်ရန်တို့ဖြစ်ပါတယ်။ 

ဒီစင်တာကို “Blue Ocean Operating Management”၊ “We ❤ Rakhine” နဲ့ “Sittwe Oxygen Plant (S.O.P)” တို့ ပူးပေါင်းဆောင်ရွက်ကြတာဖြစ်ပါတယ်။

တာဝန်ရှိသူတဦးဖြစ်တဲ့ ခိုင်ကောင်းစံက “အဓိကကတော့ ကိုဗစ် တတိယလှိုင်းမှာဆိုရင် မြို့နယ်တိုင်းလိုလိုမှာ သေဆုံးမှုတွေ ပိုများလာတယ်။ နောက်ပြီးတော့ အစိုးရကိုယ်တိုင်က ဒီလို Call Center တွေ လုပ်နိုင်ခြေမရှိဘူးပေါ့။ အခုအစိုးရဆိုရင်တော့ ပိုပြီးတော့ ဆိုးတာပေ့ါ။ စီမံခန့်ခွဲမှုတွေ ယိုယွင်းနေတဲ့အချိန်မှာတော့ ကျနော်တို့ အရပ်ဘက်အဖွဲ့အစည်းတွေနဲ့ ပူးပေါင်းထားတဲ့ ဒီအဖွဲ့တွေကတော့ Call Center လုပ်ဖို့ လိုအပ်တာပေါ့နော်။”လို့ပြောပါတယ်။

လတ်တလောမှာ အချက်တော်တော်များများကို ဆောင်ရွက်နိုင်ပေမဲ့ ရိက္ခာထောက်ပံ့မှုကိုတော့ အနည်းအကျဉ်းပဲ ထောက်ပံ့နိုင်သေးတယ်လို့ဆိုပါတယ်။  

လွန်ခဲ့တဲ့သီတင်း နှစ်ပတ်ခန့်က ရခိုင်ပြည်နယ်တွင်းက မြိုနယ် ၁၇ မြို့နယ်စလုံးမှာ ကူးစက်မှု၊ သေဆုံးမှု နှုန်းထားတွေ မြင့်မားခဲ့ပြီး အများအားဖြင့် စစ်တွေ၊ မင်းပြား၊ ကျောက်ဖြူ၊ သံတွဲ၊ ဂွ၊ တောင်ကုတ်စတဲ့မြိုနယ်တွေမှာ ပိုမိုသိသာကြောင်းနဲ့ လက်ရှိမှာတော့ သေဆုံးနှုန်းတွေ၊ ကူးစက်နှုန်းတွေကတော့ တော်တော်လေး ကျဆင်းလာတယ်လို့ဆိုပါတယ်။ 

“ကျလာတဲ့အကြောင်းရင်းကတော့ အထူးသဖြင့်ကတော့ အစိုးရရဲ့ စီမံမှုကြောင့် မဟုတ်ဘဲနဲ့ ကျွန်တော်တို့ ရခိုင်အမျိုးသားအဖွဲ့ချုပ် ULA ရဲ့ ထုတ်ပြန်ချက်တွေပေါ့နော်။ သူက Stay At Home နေဖို့ ၁၄ ရက် နှစ်ကြိမ်လုပ်ခဲ့တယ်၊ အခု မနေ့တနေ့ကမှ တကြိမ် ထပ်တိုးတာပေါ့၊ တပတ်ပဲ ထပ်တိုးတာပေါ့။ အဲဒီအပေါ်မှာ ပြည်သူလူထုတွေ လိုက်နာမှုက အားကောင်းလာတယ်။ ကိုဗစ်လူနာတွေရော၊ ပိုးတွေ့လူနာတွေရော၊ ဖျားနာတဲ့လူတွေ တော်တော်ကျသွားတာကို တွေ့ရတယ်ပေ့ါလေ သေဆုံးနှုန်းက အစ” လို့ပြောပါတယ်။

2 months Ago

ရခိုင်ပြည်နယ်တွင် ကျေးရွာများကို စစ်တပ်က ဝင်ရောက်စစ်ဆေးနေသဖြင့် ဒေသခံများ စိုးရိမ်

ရခိုင်ပြည်နယ်၊ တောင်ကုတ်မြို့နယ်ရှိ ကျေးရွာတွေမှာ သြဂုတ် ၁၇ ရက်ကစတင်ပြီး စစ်တပ်က အင်အားအလုံးအရင်းနဲ့ ဝင်ရောက်လာကာ ဒေသခံတွေကို စစ်ဆေးမေးမြန်းနေတာကြောင့် ဒေသခံတချို့မှာ စိုးရိမ်ထိတ်လန့်ကာ ထွက်ပြေးတိမ်းရှောင်နေကြပါတယ်။

နတ်မော်ကျေးရွာသားတစ်ဦးက  “အခုက စစ်တပ်ကနေပြီးတော့ ကျနော်တို့ကျေးရွာတွေဘက်ကို အင်အားအလုံးအရင်းဝင်လာကြတာပေါ့။ စစ်သား ၃၀/၄၀ နဲ့လာတဲ့ခါလည်း ရှိသလို တခါတလေဆိုရင် စစ်ကား ၃/၄ စီးနဲ့ဝင်လာတဲ့ အခါလည်းရှိတယ်။ ကျနော်တို့ရွာတွေဆိုတာက စစ်တပ်နဲ့ ကျွမ်းဝင်တဲ့ရွာတွေမဟုတ်ဘူးလေ။ အခုအချိန်မှ စစ်တပ်ကအင်အားအလုံးအရင်းနဲ့ ဝင်ထွက်ပြီးတော့ ဟိုလူကို မသင်္ကာလို့ မေးသလို၊ ဒီလူ့ကိုမသင်္ကာလို့ မေးသလိုကျတော့ တချို့ လည်းကြောက်ပြီးတော့ တိမ်းရှောင်ရတာတွေရှိတယ်။ ကျနော်တို့စိုးရိမ်တာက စစ်တပ်ကအရင် ဒီလိုမျိုးဝင်ထွက်တာတွေလည်း မရှိဘူးပေါ့။ အခုအချိန်မှာ ဒီလိုမျိုးဝင်ထွက်သွားလာနေပြီးတော့ ဘာအကြောင်းကြောင့် သွားလာနေတာလည်းဆိုကိုလည်း တိတိကျကျမသိရဘူး။ ဒီအပေါ်မှာ တိုက်ပွဲတွေဖြစ်လာမှာလားဆိုပြီးတော့လည်း ဒေသခံတွေက စိုးရိမ်နေကြတာပေါ့”လို့ ပြောပါတယ်။

အခုလို စစ်တပ်ကကျေးရွာတွေကို အင်အားအလုံးအရင်းဝင်ရောက်လာပြီး ကျေးရွာနေသူ လူငယ်တချို့ကိုလည်း စစ်ဆေးမေးမြန်းနေသလို လက်ရှိအချိန်မှာလည်း ကျေးရွာနားမှာ စစ်တပ်က ဝိုင်းထားပြီးစောင့်ကြည့်နေတယ်လို့ ကင်းတောင်ကျေးရွာနေ ဒေသခံကပြောပါတယ်။

ကင်းတောင်ကျေးရွာသားတစ်ဦး  “ကင်းတောင်ရွာကို ၁၇ ရက်နေ့က စစ်သားအယောက် ၄၀ လောက်ရောက်လာတယ်။ ရွာကိုဝင်လာပြီးတော့ ရွာနားတဝိုက်မှာ ကင်းပုန်းတွေချပြီးတော့ စောင့်ကြည့်နေတာရှိတယ်။ နောက်ကင်းတောင်ရဲ့အထက်ဘက် ကျောက်မောင်နှမ၊ ကိုင်းချောက် တောင်၊ ကြက်ကိုင်းတို့ရွာတွေမှာလည်း စစ်ကြောင်းပုံစံမျိုးတွေ သွားလာနေကြတာတွေရှိတယ်။ ကျောက်မောင်နှမရွာက ကလေးတစ်ယောက်ကိုတော့ စစ်ဆေးတာတွေရှိတယ်လို့ သိရတယ်။ ဒီလိုစစ်တပ်က အင်အားအလုံးအရင်းနဲ့ ဝင်လာတဲ့အတွက် ကျနော်တို့ဒေသခံတွေမှာ တအား စိုးရိမ်ထိတ်လန့်မှုတွေရှိလာနေကြတာပေါ့”လို့ ပြောပါတယ်။

ရခိုင်ပြည်နယ်မှာ စစ်တပ်နဲ့ ရက္ခိုင့်တပ်တော်တို့ တိုက်ပွဲဖြစ်ပွားမှု မရှိတာဟာ ၁၀ လဝန်းကျင်ရှိလာ ပြီးနောက် ရခိုင်မှာ စစ်တပ်က အင်အားတိုးချဲ့ချတာတွေ ရှိလာနေတာပါ။

မြို့ပေါ်တွေမှာလည်း လုံခြုံရေးချထားကာ စစ်ဆေးတာတွေရှိနေသလို ညဘက်တွေမှာလည်း ဧည့်စာရင်းဝင်ရောက်စစ်ဆေးတာတွေ ရှိလာနေတာကြောင့် ဒေသခံတွေမှာ တကျော့ပြန်တိုက်ပွဲတွေဖြစ်ပွားလာမှာကို စိုးရိမ်နေကြ ပါတယ်။

2 months Ago

ရခိုင်ပြည်နယ်တွင် Stay at Home ကာလ ထပ်တိုး

ရခိုင်ပြည်နယ်မှာ Stay at home ကာလကို သြဂုတ် ၁၉ ရက်မှ ၂၆ ရက်အထိ နောက်ထပ် ၁ ပတ် ထပ်တိုးလိုက်တယ်လို့ ရက္ခိုင်အမျိုးသားအဖွဲ့ချုပ် ULA ကနေ ဒီနေ့ထုတ်ပြန်ပါတယ်။

အခုလို ထုတ်ပြန်တာဟာ ကိုဗစ်-၁၉ တတိယလှိုင်းမှာ ဆက်လက်ရှိနေပြီး ရောဂါကူးစက်ခံ ရတဲ့အန္တရာယ် လုံးဝမရှိတော့တဲ့အနေအထားကို ရောက်ရှိစေဖို့ Stay at Home ကာလ နောက်ထပ် ၁ ပတ်လောက် ထပ်တိုးမြှင့်လိုက်တာဖြစ်တယ်လို့ ဆိုပါတယ်။

ရခိုင်ပြည်နယ်မှာ  ကိုဗစ်ရောဂါပိုးကူးစက်ပျံ့နှံ့မှုနဲ့ ကူးစက်ခံရသူ အရေအတွက် သိသိသာသာ လျော့ဆင်းသွားတာကို တွေ့ရတာဟာ ရခိုင်ပြည်သူတွေအနေနဲ့  မလိုအပ်ဘဲ အပြင်သွားလာတာ တွေ မရှိတော့ဘဲ ကိုယ့်အိမ်မှာကိုယ် အတတ်နိုင်ဆုံးနေထိုင်နေကြတာတွေကြောင့်ဖြစ်တယ်လို့ လည်း ဆိုပါတယ်။

ရခိုင်မှာ ကိုဗစ်ရောဂါ ကြိုတင်ကာကွယ်ထိန်းချုပ်နိုင်စေရေးလုပ်ငန်းတွေမှာ အထောက်အကူ ပြုစေဖို့ Stay at Home ကာလအား ၂ ပတ်လောက် ၂ ကြိမ်ထုတ်ပြန်ခဲ့ပြီး ဖြစ်ပေမဲ့လည်း ကိုဗစ်ရောဂါပိုးကူးစက်မှုနှုန်းဟာ လုံးဝရပ်တန့်သွားတာ မဟုတ်သေးဘဲ ကူးစက်ခံရသူတွေဟာ ရခိုင်ပြည်နယ်ရှိ မြို့နယ်အများစုမှာ သြဂုတ် ၁၈ ရက်ညနေထိ ရှိနေသေးတယ်လို့လည်း ထုတ်ပြန်ချက်မှာ ပါရှိပါတယ်။

ရခိုင်မှာ ကိုဗစ်တတိယလှိုင်းအတွင်း မေလမှ သြဂုတ် ၁၇ ရက်ထိ ကိုဗစ်ကူးစက်ခံ ရသူ ဦးရေ ၃၆၆၂ ဦးနဲ့ သေဆုံးသူ ၃၄၄ ဦးထိရှိပြီလို့ ပြည်နယ်ကျန်းမာရေးဦးစီးဌာနရဲ့ ထုတ်ပြန်ချက်အရ သိရပါတယ်။

2 months Ago

စစ်ကောင်စီ၏ ကန့်သတ်မှုများကြောင့် ရခိုင်စစ်ဘေးရှောင်များအတွက် စားနပ်ရိက္ခာဖြန့်ဝေလုပ်ငန်းများ နှောင့်နှေးနေဟု ICRC ပြော

အများပြည်သူအလုပ်ပိတ်ရက်တွေ ထပ်တိုးလိုက်တာနဲ့ ရခိုင်ပြည်နယ်အစိုးရက ထောက်ပံ့ပို့ဆောင်ရေးဆိုင်ရာ ကန့်သတ်ချက်အသစ်တွေ သတ်မှတ်လိုက်တာကြောင့်  နေရပ်စွန့်ခွာ ဒုက္ခသည်တွေအတွက် စားနပ်ရိက္ခာဖြန့်ဝေပေးမှုလုပ်ငန်းတွေ နှောင့်နှေးကြန့်ကြာနေတယ်လို့ အပြည်ပြည်ဆိုင်ရာကြက်ခြေနီကော်မတီ (ICRC)ကနေ သိရပါတယ်။  

ICRC ရန်ကုန်ရုံး ပြန်ကြားဆက်သွယ်ရေး မန်နေဂျာ ဂျက်ကလင်းဖာနန်ဒတ်စ်က “  အများပြည်သူ ရုံးပိတ်ရက်တွေ ထပ်မံကြေညာတာကြောင့်  ICRC ရဲ့ ယာဉ်တွေ ခရီးသွားလာဖို့ ခွင့်ပြုပေးတဲ့ လုပ်ငန်းစဉ်မှာ နှောင့်နှေးကြန့်ကြာမှုတွေဖြစ်ခဲ့ပါတယ်။ ဒီနှောင့်နှေးကြန့်ကြာမှုအပါအဝင် ပြည်နယ်တာဝန်ရှိသူတွေက ထုတ်ပြန်တဲ့ ထောက်ပံ့ပို့ဆောင်ရေးနဲ့ ဆိုင်တဲ့ သတ်မှတ်ချက်အသစ်တွေကြောင့် လာမယ့် ရက်သတ္တပိတ်တွေမှာ ပေးအပ်ဖို့ စီစဉ်ထားတဲ့ စားနပ်ရိက္ခာဖြန့်ဝေပေးမှုတွေ နှောင့်နှေးကြန့်ကြာမှုရှိမှာဖြစ်ကြောင်း ပြည်နယ်နဲ့ မြို့နယ် သက်ဆိုင်ရာ တာဝန်ရှိသူတွေအပြင် စခန်းကော်မတီတာဝန်ရှိသူတွေကိုလည်း အသိပေး အကြောင်းကြားထားပါတယ်။”လို့ ဒီဗွီဘီကို ပြောပါတယ်။

ဒါ့အပြင် ဘေးဒဏ်ခံရလွယ်တဲ့နေရပ်စွန့်ခွာလူမှုအသိုက်အဝန်းတွေထံ ICRC ရဲ့ ကူညီထောက်ပံ့မှုတွေ ဖြစ်နိုင်သမျှ မြန်မြန် ပြန်လည်ဆောင်ရွက်နိုင်ဖို့ ရည်ရွယ်ချက်နဲ့ အခုလို ထောက်ပံ့ပို့ဆောင်ရေးဆိုင်ရာစိန်ခေါ်မှုတွေကို ဖြေရှင်းနိုင်မယ့် နည်းလမ်းရရှိဖို့ ပြည်နယ် တာဝန်ရှိသူတွေနဲ့ လတ်တလော ဆွေးနွေးနေတယ်လို့လည်း ICRC ရုံးကပြောပါတယ်။

စစ်ကောင်စီက ကိုဗစ်-၁၉ ရောဂါ ကာကွယ်၊ ထိန်းချုပ်ကုသနိုင်ရေးအတွက် အများပြည်သူအလုပ် ပိတ်ရက်တွေကို ဩဂုတ် ၂၂ ရက်နေ့အထိ ဆက်လက်တိုးမြှင့်သတ်မှတ်ထားတာဖြစ်ပါတယ်။ ရခိုင်ပြည်နယ်အစိုးရက ICRC ရဲ့ လူသားချင်းစာနာမှုအကူအညီပေးရေးလုပ်ငန်းတွေအပေါ် ဘယ်လို ကန့်သတ်ချက်အသစ်တွေ ပြုလုပ်နေလဲဆိုတာကိုတော့ အသေးစိတ်ပြောဆိုခြင်းမရှိပါဘူး။   

အပြည်ပြည်ဆိုင်ရာကြက်ခြေနီကော်မတီ (ICRC)ဟာ ရခိုင်ပြည်နယ်ထဲမှာ လူသားချင်းစာနာထောက်ထားမှု အကူအညီပေးနေတဲ့ နိုင်ငံတကာအဖွဲ့အစည်းတစ်ခုဖြစ်ပြီး သက်ဆိုင်ရာ တာဝန်ရှိသူတွေခွင့်ပြုတဲ့နေရာတွေမှာ ကူညီပေးရေးလုပ်ငန်းတွေ ဆောင်ရွက်နေတာ ဖြစ်ပါတယ်။

အခုလို စစ်ကောင်စီရဲ့ ကန့်သတ်မှုတွေကြောင့် စားနပ်ရိက္ခာကူညီပေးနေတဲ့ လုပ်ငန်းတွေ နှောင့်နှေးနေတဲ့အကြောင်း စစ်ဘေးရှောင်စခန်းတာဝန်ရှိသူတွေထံ ဆက်သွယ်ပြောဆိုခဲ့တယ်လို့ စစ်ဘေးရှောင်စခန်းတွေနဲ့ လူမှုကယ်ဆယ်ရေးတွေကို လုပ်ဆောင်ပေးနေတဲ့ မြတန်ဆောင် ဆရာတော်က  မိန့်ပါတယ်။

မြတန်ဆောင်ဆရာတော်က  “ စစ်တွေ ICRC ရုံးကရော၊ မြောက်ဦးICRC ရုံးကပါ ဖုန်းဆက်လာတယ်။ သူတို့အနေနဲ့ ဒီနေ့ ( ဩဂုတ် ၁၂) ရက် ကစပြီးတော့ စစ်ရှောင်စခန်းတွေကို ကူညီပေးနေတဲ့ လူသားချင်းစာနာမှုဆိုင်ရာ အကူအညီတွေကို ရက်အကန့်သတ်မရှိ ရပ်နားလိုက်တယ်ဆိုပြီးတော့ ပြောတယ်။ အဲဒါကြောင့် စစ်ရှောင်စခန်းတာဝန်ရှိသူတွေအနေနဲ့ ကြိုတင်ပြင်ဆင်စရာရှိရင်ကြိုတင်ပြင်ဆင်လို့ရအောင် တရားဝင်အကြောင်းကြားတာလို့ ပြောတယ်”  လို့ မိန့်ဆိုပါတယ်။

ရခိုင်ပြည်နယ်ရှိ စစ်ဘေးရှောင်စခန်းအများစုဟာ ICRC နဲ့ WFP မှကူညီထောက်ပံ့မှုတွေကို အဓိက အားထားနေရတာဖြစ်ပြီး တခြားသော အရပ်ဖက်အဖွဲ့အစည်းတွေက ကိုဗစ်ကာလအတွင်း အခြေခံ လူတန်းစားတွေကို ကူညီထောက်ပံ့နေကြတဲ့အတွက် ICRC ရဲ့ ထောက်ပံ့မှုတွေ ရပ်ဆိုင်း လိုက်ပါက စစ်ဘေးရှောင်တွေဟာ အငတ်ဘေးဆိုက်သွားမှာဖြစ်တယ်လို့ မြတန်ဆောင် ဆရာတော်က ဆက်လက်မိန့်ပါတယ်။

ရခိုင်မှာ စစ်ဘေးရှောင်စခန်းတွေကို သက်ဆိုင်ရာဌာနတွေက ဆန်တစ်ခုတည်းကိုသာ ထောက်ပံ့ပေးတာဖြစ်ပြီး ထောက်ပံ့ပေးရာမှာလည်း ပြည်စုံလုံလောက်အောင် ထောက်ပံ့ပေးတာ မရှိဘူးလို့သိရပါတယ်။

ICRC အနေနဲ့ ရခိုင်ပြည်နယ်အတွင်း ထောက်ပံ့ပေးနေတဲ့ စစ်ဘေးရှောင်စခန်း ၅၀ ကျော်ရှိကာ ဆန်၊ ဆီ၊ ဆားစတဲ့ အခြေခံစားသောက်ကုန် ၇ မျိုးကို ထောက်ပံ့နေတာဖြစ်တာဖြစ်ပါတယ်။

2 months Ago

ရခိုင်ပြည်နယ်ဝန်ကြီးချုပ် ဦးညီပုနှင့် ဝန်ကြီး ၄ ဦးကို စစ်ကောင်စီက အဂတိလိုက်စားမှုဖြင့်စွပ်စွဲ အမှုဖွင့်

ဖမ်းဆီးခံထားရတဲ့ ရခိုင်ပြည်နယ်ဝန်ကြီးချုပ် ဦးညီပုနဲ့ ဝန်ကြီး ၄ ဦးကို အဂတိလိုက်စားမှု တိုက်ဖျက်ရေးဥပဒေနဲ့ အမှုဖွင့်အရေးယူထားတယ်လို့ စစ်ကောင်စီမီဒီယာတွေမှာ  ဩဂုတ် ၁၂ ရက် ညက သတင်းထုတ်ပါတယ်။

ဝန်ကြီးချုပ် ဦးညီပု၊ ပြည်နယ်ဘဏ္ဍာရေး၊ အခွန်၊ စီမံကိန်းနှင့် စီးပွားရေး ဝန်ကြီး ဦးကျော်အေးသိန်း၊ ပြည်နယ် လျှပ်စစ်၊ စက်မှုနှင့် လမ်းပန်း ဆက်သွယ်ရေး ဝန်ကြီး ဦးအောင်ကျော်ဇံနဲ့ ပြည်နယ် စိုက်ပျိုးရေး၊ မွေးမြူရေး၊ သစ်တောနှင့် သတ္တုတွင်းဝန်ကြီးဟောင်း ဦးကျော်လွင်တို့ကို အဂတိလိုက်စားမှု တိုက်ဖျက်ရေး ဥပဒေ ပုဒ်မ ၅၅ အရ စစ်တွေမြို့မရဲစခန်းမှာ ဩဂုတ် ၁၂ ရက်က ပထမသတင်းပေး တိုင်ကြားချက် ဖွင့်လှစ်၍ တရားစွဲဆို အရေးယူဖို့လုပ်ဆောင်နေတာလို့ဆိုပါတယ်။

စစ်ကောင်စီရဲ့ အဂတိကော်မရှင်က စုံစမ်းစစ်ဆေးရေးအဖွဲ့ ဖွဲ့စည်းစစ်ဆေးခဲ့ရာမှာ  ဝန်ကြီးချုပ်နဲ့ ဝန်ကြီးတွေဟာ တာဝန် ထမ်းဆောင်ခဲ့ချိန်က ဂွမြို့နယ်အတွင်း ဂုံးသောင်မြေနေရာပေါ်မှာ တန်ဖိုးနည်း မြေကွက်ဖော်ထုတ်ရေးဆောင်ရွက်ရာမှာ နိုင်ငံတော် သမ္မတရုံး ညွှန်ကြားချက်အမှတ်(၁/၂၀၁၇)ကို လိုက်နာဆောင်ရွက်ခြင်းမရှိဘဲ လုပ်ငန်း ဆက်စပ်တဲ့ ကုမ္ပဏီတစ်ခုကို စိစစ်ခြင်းမပြုဘဲ ဆောင်ရွက်စေခဲ့တာ၊ ဒီလုပ်ငန်းအတွက် စာချုပ်သဘောတူချက်မှာ မပါဝင်ဘဲ ကုန်ကျစရိတ်နဲ့ နစ်နာကြေးအကြောင်းပြကာ ငွေကျပ် ၅၃၅ သန်းကျော်ကို ကုမ္ပဏီသို့ ပေးအပ်ခဲ့တာကြောင့် နိုင်ငံတော် ငွေကြေး၊ ပစ္စည်းနဲ့ ပိုင်ဆိုင်မှုကို ထိခိုက် နစ်နာ ဆုံးရှုံးစေခဲ့တယ်လို့ဆိုပါတယ်။

ဒါ့အပြင် ကုမ္ပဏီတစ်ခုကို နိုင်ငံပိုင်အဆောက်အဦ သုံးလုံးမှာ အထည်ချုပ်လုပ်ငန်း လုပ်ကိုင်ရန် ခွင့်ပြု ခဲ့တာ၊ အဆောက်အဦ ပြင်ဆင်ဖို့ ငွေကျပ် ၅၅ သန်းကျော်ကို ပြည်နယ်တည်ဆောက်ရေး လုပ်ငန်းစိစစ်ရေးကော်မတီ ရန်ပုံငွေမှ ထောက်ပံ့ကြေး ပေးအပ်ခဲ့တာ၊ ကုမ္ပဏီ လုပ်ငန်း လည်ပတ်ဆောင်ရွက်ခြင်း မရှိပေမဲ့ အဆောက် အဦ သုံးလုံးကို လက်ရှိအချိန်ထိ ပြန်မအပ်ဘူးလို့ စွပ်စွဲထားပါတယ်။

ရခိုင်ပြည်နယ်စာရင်းစစ်ချုပ်ရုံးအစီရင်ခံစာအရ ၂၀၁၉ ခုနှစ် အောက်တိုဘာ ၁ ရက် စာရင်းဖွင့်လက်ကျန် ပြည်နယ်တည်ဆောက်ရေးလုပ်ငန်း စိစစ်ရေးကော်မတီ ရန်ပုံငွေကျပ် ၈၆၅ သန်းကျော်ကို ပြည်နယ်ရဲ့ ဒေသဖွံ့ဖြိုးရေး ရန်ပုံငွေသို့ လွှဲပြောင်းထည့်သွင်း ခဲ့မှုမရှိဘဲ ဆက်လက် သုံးစွဲခဲ့အတွက် နိုင်ငံတော်ရဲ့ ငွေကြေး၊ ပစ္စည်းနဲ့ ပိုင်ဆိုင်မှုကို ထိခိုက် နစ်နာ ဆုံးရှုံးစေခဲ့တယ်လို့လည်း ဆိုပါတယ်။

စည်ပင်သာယာရေး ဝန်ကြီးဟောင်း ဦးမင်းအောင်ဟာလည်း တာဝန်ထမ်းဆောင်ခဲ့စဉ်က ပြည်နယ်အစိုးရရဲ့ ခွင့်ပြုရန်ပုံငွေမှာ ပါဝင်ခြင်းမရှိတဲ့ လွှတ်တော်ရဲ့ ခွင့်ပြုချက်မရှိတဲ့ ဈေး (၅)ဈေး တည်ဆောက်တဲ့လုပ်ငန်းကို နိုင်ငံတော်သမ္မတရုံးရဲ့ ညွှန်ကြားချက်အမှတ်(၁/၂၀၁၇)ပါ တင်ဒါဆိုင်ရာ လုပ်ထုံး လုပ်နည်းတွေနဲ့အညီ ဆောင်ရွက်ခဲ့တာမရှိဘူးလို့ စစ်ကောင်စီက စွပ်စွဲထားပါတယ်။

ရခိုင်ပြည်နယ် ဝန်ကြီးချုပ် ဦးညီပုဟာ စစ်ကောင်စီရဲ့ အဂတိလိုက်စားမှုစွပ်စွဲချက်တွေနဲ့ ပတ်သက်ပြီး ပြန်လည်တုံ့ပြန်နိုင်ခြင်းမရှိသေးပါဘူး။ 

ရခိုင်ဝန်ကြီးချုပ်ဦးညီပု အပါအဝင် အစိုးရအဖွဲ့ဝင် ဝန်ကြီးတွေနဲ့ ရခိုင်ပြည်နယ်လွှတ်တော်ဥက္ကဋ္ဌ၊ ဒုဥက္ကဋ္ဌ တွေဟာ စစ်တပ်က စစ်တပ်အာဏာသိမ်းနောက်တစ်နေ့ကတည်းက ဂွမြို့အခြေစိုက် အမှတ် ၅၆၂၊ ခြေလျင်တပ်ရင်းမှာ ဖမ်းဆီး ထိန်းသိမ်း ခံထားရ တာဖြစ်ပါတယ်။

2 months Ago

ရခိုင်ပြည်နယ်အတွက် စားနပ်ရိက္ခာထောက်ပံ့ပေးရန် ရခိုင်အမျိုးသားပါတီ တောင်းဆို

ကိုဗစ်-၁၉ ကပ်ရောဂါဘေးကာလအတွင်း ရခိုင်ပြည်နယ်တွင်းရှိ ပြည်သူတွေကို အစားအစာ ကူညီထောက်ပံ့ပေးဖို့နဲ့ ကျန်းမာရေးစောင့်ရှောက်မှုကောင်းမွန်အောင် ဆောင်ရွက်ပေးဖို့ ရခိုင်အမျိုးသားပါတီက စစ်ကောင်စီကို တောင်းဆိုလိုက်ပါတယ်။  

ရခိုင်ပြည်နယ်အတွင်း ကုန်စျေးနှုန်းကျဆင်းပြီး တည်ငြိမ်ဖို့နဲ့ အလုပ်အကိုင်အခွင့်အလမ်းတွေ ဆုံးရှုံးလို့ ၀င်ငွေ မထိခိုက်အောင် ဆောင်ရွက်ပေးဖို့လည်း ရခိုင်အမျိုးသားပါတီက  စစ်ကောင်စီလက်အောက်ခံ ရခိုင်ပြည်နယ်ဝန်ကြီးချုပ်ထံ သြဂုတ် ၁၀ ရက်စွဲနဲ့ အိတ်ဖွင့်ပေးစာ ပေးပို့ တောင်းဆိုတာပါ။  

ကိုဗစ်-၁၉ ကပ်ရောဂါဟာ ရခိုင်ပြည်နယ် မြို့နယ်အားလုံး၊ မြို့ပြနဲ့ ကျေးလက်၊ စစ်ဘေးရှောင်စခန်းတွေမှာပါမကျန် ပျံ့နှံ့ကူးစက်မှုကြောင့် နေ့စဉ် အသက်ဆုံးရှုံးမှု သတင်းတွေကြားရပြီး လက်လုပ်လက်စားသမားတွေဟာ ၀င်ငွေရလမ်းနည်းပါးလို့ စားနပ်ရိက္ခာအကျပ်အတည်းတွေ ကြုံနေရပြီလို့ ဖော်ပြပါတယ်။ စစ်ရှောင်စခန်းတွေမှာလည်း စားနပ်ရိက္ခာပြတ်လပ်နေပြီလို့ ဆိုပါတယ်။ 

စားနပ်ရိက္ခာအခက်အခဲကို ကိုင်တွယ်ဖြေရှင်းမပေးနိုင်ရင် ခိုးဆိုးလုယက်မှု၊ အသက်အန္တရာယ်ပြုမှုနဲ့ ဆူပူအုံကြွမှုလို ပြစ်မှုတွေဖြစ်လာမှာကို အထူးစိုးရိမ်နေရကြောင်းနဲ့ လက်ရှိမှာတောင် နေရာတချို့မှာ ခိုးဆိုးလုယက်မှုတွေ ဖြစ်ပွားနေတာ ကြားနေရပြီလို့ ရေးထားပါတယ်။ 

လူမှုအဖွဲ့အစည်းတချို့နဲ့ လူပုဂ္ဂိုလ်တချို့က တပိုင်တနိုင် ထောက်ပံ့ပေမယ့် လုံလောက်မှုမရှိကြောင်း၊ စစ်ဘေးရှောင်စခန်းတွေကို နိုင်ငံတကာက လှူဒါန်းတဲ့ လူသားချင်းစာနာမှု အထောက်အပံ့တွေကိုလည်း ပိတ်ပင်ထားတယ်လို့ သိရကြောင်းနဲ့ ဒီကပ်ရောဂါကို အစိုးရတရပ်အနေနဲ့ အစီအစဉ်ချ ကိုင်တွယ်ဖြေရှင်းဖို့ လိုတယ်လို့ တိုက်တွန်းထားပါတယ်။ 

ပြည်နယ်အစိုးရအနေနဲ့ ကိုဗစ်ကပ်ဘေးကာလမှာ ပြည်သူလူထု လိုအပ်တဲ့ စားဝတ်နေရေး အခက်အခဲကို ဖြေရှင်းပေးခြင်းမရှိသေးသလို ဖြေရှင်းပေးမယ့် အစီအစဉ်ကိုလည်း ပြောဆိုခြင်းမရှိကြောင်းနဲ့ ပြည်နယ်တွင်း လုံခြုံရေး၊ စစ်ဆေးရေးကိစ္စကိုသာ ဦးစားပေးဆောင်ရွက်နေတယ်လို့ ဝေဖန်ထားပါတယ်။

ကာကွယ်တားဆီးရေးကို ကြိုတင်ဆောင်ရွက်ခြင်းမပြုတဲ့အတွက် ရခိုင်ပြည်နယ်အနှံ့ ရောဂါကူးစက်ပျံ့နှံ့ခဲ့ရသလို ပြည်သူတွေဟာ အောက်ဆီဂျင်ရအောင် ကိုယ်ထူကိုယ်ထ လုပ်ဆောင်နေရခြင်း၊ အိမ်သုံးဆေးဝါးတွေ ပြတ်လပ်စျေးကြီးတာတွေ ဖြစ်နေတယ်လို့ ဆိုပါတယ်။

အိမ်သုံးဆေးဝါး၊ ဆေးရုံဆေးခန်းသုံးပစ္စည်းတွေ၊ စားသုံးဆီ၊ လယ်ယာနဲ့ ရေလုပ်ငန်းသုံးစက်ပစ္စည်းတွေ၊ ရခိုင်ပြည်နယ်ထွက် လယ်ယာထွက်ကုန်ပစ္စည်းတွေကို နယ်လုံဝန်ကြီး ခွင့်ပြုချက်ရယူနေရဆဲဖြစ်တာကို ရုပ်သိမ်းပေးဖို့ တောင်းဆိုထားပါတယ်။ 

ဒါ့အပြင် ဧည့်စာရင်းတိုင်ကြားတာကို ရုပ်သိမ်းပေးဖို့နဲ့ ကားဆိုင်ကယ်နဲ့ သွားလာနေသူတွေကို အစိုးရဘက်က လက်နက်အပြည့်အစုံနဲ့ စစ်ဆေးနေတာတွေကို ရပ်တန့်ပေးဖို့ တောင်းဆိုထားပါတယ်။ 

ရခိုင်အမျိုးသားပါတီဟာ ရခိုင်ပြည်နယ်မှာ  လူထုထောက်ခံမှုအများအပြားရတဲ့ နိုင်ငံရေးပါတီ ဖြစ်ပါတယ်။

2 months Ago

ရခိုင်တွင် Stay at Home ကာလ ULA/AA က ၂ ပတ်ထပ်မံ တိုးမြှင့်

ရခိုင်မှာ ကိုဗစ်ကာကွယ်ထိန်းချုပ်နိုင်ရေးအတွက်  ပြည်သူတွေအနေနဲ့ ကိုယ့်အိမ်မှာ ကိုယ်နေထိုင်ကြရမယ့် (Stay at Home) ကာလကို သြဂုတ် ၅ ကနေ ၁၈ ရက်အထိ နောက်ထပ် ၂ ပတ်ခန့်ထပ်မံတိုးမြှင့်လိုက်တယ်လို့ သြဂုတ် ၄ ရက်နေ့မှာ ULA/AA က ထုတ်ပြန်လိုက်ပါတယ်။

ရခိုင်မှာ ဇူလိုင် ၂၀ ရက်ကနေ သြဂုတ် ၄ ရက်အထိ Stay at Home ကာလ ၂ ပတ်ခန့်သတ်မှတ်ခဲ့ပြီး လိုက်နာရမဲ့စည်းကမ်းချက်တွေကိုလည်း ထုတ်ပြန်ခဲ့ပြီးနောက်မှာတော့ ပထမလှိုင်းနဲ့ ဒုတိယလှိုင်းတွေထက် တတိယလှိုင်းမှာ ကူးစက်ခံရသူတွေ များလာကာ သေဆုံးသူတွေလည်း တိုးလာနေပေမဲ့ Stay at Home သတ်မှတ်လိုက်ပြီးတဲ့နောက် ကိုဗစ်ကူးစက်နှုန်းကို အတိုင်းအတာ တစ်ခုထိ ထိန်းချုပ်နိုင်ခဲ့တယ်လို့ ဆိုပါတယ်။

အခုလို Stay at Home ကာလအတွင်း ကိုဗစ်ကာကွယ်ရေးအတွက် မဖြစ်မနေ လိုက်နာရမဲ့စည်းကမ်းချက်တွေထဲက စားဝတ်နေရေးအခက်အခဲတွေ၊ စျေးရောင်းစျေးဝယ်ကိစ္စ တွေ၊ နာရေးကိစ္စတွေနဲ့ မဖြစ်မနေသွားလာရမဲ့ကိစ္စတွေရှိပါက ကိုဗစ်စည်းကမ်းချက်တွေနဲ့အညီ သွားလာ နေထိုင်ကြဖို့ တိုက်တွန်းထားသလို ကိုဗစ်ကာကွယ်ဆေးတွေကိုလည်း မဖြစ်မနေထိုးကြဖို့နဲ့ ကာကွယ်ဆေးသွားရောက်ထိုးနှံရာမှာလည်း လူစုလူဝေးမဖြစ်စေဘဲ ကိုဗစ်စည်းကမ်းချက်နဲ့အညီ ထိုးနှံကြဖို့ တိုက်တွန်းထားပါတယ်။

ဒါ့အပြင် လောင်းကစားဝိုင်းတွေနဲ့ အရက်ဆိုင်တွေဟာ လူစုလူဝေးဖြစ်စေတာကြောင့် အတတ်နိုင်ဆုံး ရှောင်ရှားကြဖို့နဲ့ ရပ်ဝေးမှ မိမိနေရပ်ကိုပြန်လာသူတွေအနေနဲ့လည်း Quaratine ၂ ပတ်မှ ၃ ပတ်ခန့်ထိနေထိုင်ကြဖို့ကိုလည်း တိုက်တွန်းထားပါတယ်။

ရခိုင်မှာ ကိုဗစ်တတိယလှိုင်းအတွင်း မေလကနေ ​သြဂုတ် ၃ ရက်အထိ ကိုဗစ်ကူးစက်ခံရသူ ၃၀၂၁ ဦးထိရှိကာ သေဆုံးသူ ၂၃၉ ဦးရှိနေပြီဖြစ်တယ်လို့ ပြည်နယ်ကျန်းမာရေးဦးစီးဌာနက သိရ ပါတယ်။

2 months Ago

ရခိုင်စစ်ဘေးရှောင် သက်ကြီးရွယ်အိုများကို ကိုဗစ်ကာကွယ်ဆေး ဦးစားပေးထိုးပေးရန် တိုက်တွန်း

ရခိုင်ပြည်နယ်အတွင်း စစ်ဘေးရှောင်စခန်းတွေမှာရှိတဲ့  အသက် ၆၅ နှစ်ကျော်အရွယ် သက်ကြီးရွယ်အိုအားလုံးကို  ကိုဗစ်-၁၉ ကာကွယ်ဆေးတွေ ဦးစားပေးဖို့ပေးဖို့  ရခိုင်တိုင်းရင်းသားမျိုးနွယ်များအစည်းအရုံး တာဝန်ရှိသူက တိုက်တွန်းပြောကြားလိုက်ပါတယ်။  

ရခိုင်ပြည်နယ်မှာ ကိုဗစ်-၁၉ ကာကွယ်ဆေးကို အသက် ၆၅ နှစ်အထက်ရှိသူတွေ၊ ဝန်ထမ်းတွေနဲ့ စေတနာ့ဝန်ထမ်းတွေကို ဇူလိုင်လ  ၃၁ ရက်နေ့ကစတင်ပြီး မြို့နယ်အနှံ့မှာ ကျန်းမာ​ရေးဌာနက ကာကွယ်ဆေးထိုးနှံပေးနေတာဖြစ်ပါတယ်။

ဒီလို ကာကွယ်ဆေးထိုးပေးရာမှာ မြို့ပေါ်စစ်ဘေးရှောင်စခန်းတွေမှာရှိတဲ့ အသက် ၆၅ နှစ်အထက်ရှိသူတချို့ကိုပဲ ကိုဗစ်ကာကွယ်ဆေးထိုးနှံပေးပြီး နယ်တွေမှာရှိတဲ့ စစ်ဘေးရှောင်စခန်းက သက်ကြီးရွယ်အိုတွေကိုတော့ ထိုးပေးတာမရှိသေးဘူးလို့ ရခိုင်တိုင်းရင်းသားမျိုးနွယ်များအစည်းအရုံး အတွင်းရေးမှူး ကိုဇော်ဇော်ထွန်းက ပြောပါတယ်။

“မြို့ပေါ်မှာရှိတဲ့ စခန်းတွေမှာတော့ ၆၅ နှစ်အရွယ်သက်ကြီးပိုင်းတွေကို ထိုးပေးနေတဲ့ဟာတွေကို တွေ့တယ်။ တချို့မြို့ပြနဲ့အလှမ်းဝေးတဲ့ အဲဒီစခန်းတွေမှာတော့မထိုးနိုင်တဲ့ အခြေအနေတွေကို တွေ့ရတယ်။ နောက်မြို့ပေါ်မှာလည်းပဲ တချို့နေရာတွေက စခန်းတွေမှာကျ တော့ ဘာကြောင့်လည်းမသိဘူး၊ မထိုးပေးနိုင်တဲ့ စခန်း ၁/၂ ခုတော့ရှိတယ်”။

ရခိုင်တစ်ပြည်နယ်လုံးမှာ ကိုဗစ်ကာကွယ်ဆေးဆေးအလုံးရေ ၁ သိန်းဝန်းကျင်လောက်ပဲ ရရှိမှာဖြစ်လို့ အသက် ၆၅ နှစ်နဲ့အထက်အကုန်လုံးကို  ထိုးနိုင်မယ့် အခြေအနေ မရှိကြောင်းနဲ့ ၆၅ နှစ်အရွယ်တွေကို ထိုးမယ်ဆိုရင် ဒီကယ်ဆယ်ရေးစခန်းတွေမှာရှိတဲ့ သက်ကြီးပိုင်းတွေကို ဦးစားပေးပြီး အကုန်လုံးပြီးစီးအောင် ထိုးပေးသင့်တယ်လို့လည်း ဆိုပါတယ်။

ရခိုင်ရှိ စစ်ဘေးရှောင်စခန်းမှာ​နေထိုင်ကြတဲ့သူတွေဟာ ကျန်းမာရေးချို့တဲ့သူတွေနဲ့ ရောဂါအခံရှိသူတွေပါဝင်ပြီး လူစုလူဝေးတွေနဲ့နေထိုင်နေကြရကာ ဆေးဝါးလိုအပ်ချက်တွေ ရှိနေသလို ကိုဗစ်ကာကွယ်ရေးအတွက် ပြည့်စုံလုံလောက်တဲ့ အကူအညီမရလို့ ကိုဗစ်ကူးစက်နိုင်ခြေများနေတာဖြစ်ပါတယ်။

“ကယ်ဆယ်ရေးစခန်းတွေမှာကျတော့ ကူးစက်နိုင်ခြေက အရမ်းကိုများတယ်၊ နောက်ကိုယ်ခံအားနည်းနေတာကတစ်ကြောင်း၊ နောက်ရောဂါအခံရှိနေတာက တစ်ကြောင်း၊ နောက်လူစုလူဝေးနဲ့မလွဲသာ မရှောင်သာနေရတဲ့အနေအထားကြောင့်ပေါ့၊ အဲဒီတော့ ဒီလူတွေကိုဆေးထိုးပေးလိုက်ချင်းအားဖြင့် စခန်းတွေအတွက်တော်တော်ကြီးကို စိတ်ချလို့ရတဲ့ အနေအထားကို ဖြစ်သွားတာပေါ့”  လို့ ကိုဇော်ဇော်ထွန်းက  ပြောပါတယ်။

ရခိုင်ပြည်နယ်အတွင်း  နီးစပ်ရာစစ်ဘေးရှောင်စခန်းတွေနဲ့ မြို့ပေါ်တွေမှာခိုလှုံနေကြရတဲ့ စစ်ဘေးရှောင် ဦးရေဟာ ၁ သိန်းကျော်ထိရှိနေတာ ဖြစ်ပါတယ်။

2 months Ago

ရခိုင်ပြည်နယ်တွင် ရေကြီးမှုပိုမိုဆိုးရွားလာပြီး လူနေအိမ်များရေနစ်မြုပ်နေ

ရခိုင်ပြည်နယ်၊ မောင်တော၊ သံတွဲနဲ့ တောင်ကုတ်စတဲ့မြို့နယ်တွေမှာ ရေကြီးနေတဲ့ အခြေအနေဟာ ဇူလိုင် ၂၇ ရက် ညနေပိုင်းမှာ ပိုမိုဆိုးရွားလာပြီး လူနေအိမ်တွေရေနစ်မြုပ်ကာ ဒေသခံတွေ ရေဘေးဒုက္ခ ကြုံနေရပါတယ်။

မနေ့ညကစတင်ပြီး မိုးအဆက်မပြတ် မိုးရွာသွန်းမှုတွေကြောင့် မောင်တောမြို့နယ် မြောက်ပိုင်းရှိ တမန်းသား၊ သက်ကိုင်ညာစတဲ့ ရွာတွေမှာ ရေကြီးရေလျှံကာ နေအိမ်တချို့ ရေနစ်မြုပ်နေတယ်လို့ တမန်းသား ဘုန်းကြီးကျောင်းက အရှင်စန္ဒေဘာသက မိန့်ပါတယ်။

“အိမ်ထောင်စု ၄၀ လောက်။ ခေါင်မိုးထိတော့ မဟုတ်ဘူး။ မိုးစွန့်ထိတယ်။ အိမ်ခင်းခြေပါ မြုပ်တာ။ ထမင်းဟင်းချက်စားလို့မရအောင်။”။ 

ရေကြီးရေလျှံနေတာကြောင့် လူတွေသေဆုံးသူ မရှိပေမဲ့ အိမ်မွေးတိရစ္ဆာန်၊ စားနပ်ရိက္ခာတွေ ဆုံးရှုံးပျက်စီးခဲ့တယ်လို့လည်း အရှင်စန္ဒေဘာသက မိန့်ပါတယ်။

ရေဘေးဒုက္ခသည် လူဦးရေ ၂၀၀ ကျော်လောက် နေအိမ်စွန့်ခွာကာ ကုန်းမြင့်ပိုင်းမှာ ရှိနေတဲ့ နီးစပ်ရာ စာသင်ကျောင်း၊ ဘုန်းကြီးကျောင်းတွေမှာ ခိုလှုံနေရပြီး ရွာမှာရှိတဲ့ အိမ်ခြေတွေ အကုန်လုံးနီးပါးရေဝင်နေသလို ဆန်တွေ ထင်းတွေ ရေစိုကုန်တာတွေကြောင့် ချက်စားဖို့ ခက်ခဲနေတယ်လို့ ရှင်းပြပါတယ်။

ရေဘေးဒုက္ခရောက်နေသူတွေကို ကိုယ့်ရွာသားအချင်းချင်းသာ ကူညီပေးနေကြတာဖြစ်ပြီး သက်ဆိုင်ရာ တာဝန်ရှိသူတွေနဲ့ ဘယ်အဖွဲ့တွေကမှ ကူညီတာမရှိသေးဘူးလို့ ဒေသခံက ပြောပါတယ်။

သံတွဲမြို့မှာလည်း  ဇူလိုင် ၂၅ ရက်ကစပြီး မိုးသည်းထန်စွာရွာသွန်းလို့ ရေကြီးမှုတွေကြောင့် ဒီနေ့မှာတော့  သံတွဲမြို့ရဲ့ သုံးပုံနှစ်ပုံလောက်  ရေကြီးကာ နေအိမ်တွေ ရေနစ်မြုပ်ကုန်လို့  ရေဘေးသင့်ပြည်သူတွေကို ဘေးလွတ်ရာသို့ ပို့ဆောင်ထားတယ်လို့ ဆိုပါတယ်။

ကူညီကယ်ဆယ်ရေးတွေလုပ်ဆောင်ပေးနေတဲ့ သိမ်ကုန်းကျောင်းဆရာတော် ဦးတေဇိန္ဒက “သံတွဲရေကြီးမှုအခြေအနေက သုံးချိုးနှစ်ချိုးလောက် မြင့်သွားပြီ၊ တစ်မြို့လုံးနီးပါးကို ရေလွှမ်းမိုးသွားတယ်လို့တောင် ပြောလို့ရတယ်၊ အိမ်ခြေကတော့ အခုဘုန်းကြီးသွားနေတဲ့ ရပ်ကွက်တွေမှာဆိုရင် ၃၀၀/ ၄၀၀ လောက်မြုပ်မှာပေါ့၊ မြို့ရဲ့နေရာစုံတော်တော်များများကို ရေဝင်နေပြီ”လို့မိန့်ပါတယ်။

ပြီးခဲ့တဲ့ ၂၀၀၄ ခုနှစ်တုန်းက သံတွဲမှာရေကြီးစဉ်က အိမ်တွေပြိုတဲ့အထိဖြစ်ခဲ့ဖူးပြီး အခုတကြိမ်က ပိုဆိုးတာကြောင့် စိုးရိမ်နေကြတာလို့ ဆရာတော်က မိန့်ပါတယ်။

ရေဘေးဒုက္ခသည်တွေကို ရွှေဆံတော်တောင်ခြေ ဓမ္မာရုံထဲမှာပဲ ထားရှိကာ အလှူရှင်မိသားစု တစ်စုကလည်း ဒီနေ့တစ်ရက်စာ လှူထားပြီး နောက်ထပ်ရေတက်လာပါက ပျက်စီးဆုံးရှုံးမှုတွေ ရှိလာနိုင်တယ်လို့ ဆိုပါတယ်။

သံတွဲမြို့က ရေနစ်မြုပ်နေတဲ့နေရာတွေမှာရှိတဲ့ နေအိမ်တွေကို လျှပ်စစ်မီး ဖြတ်တောက်ထားပြီး အရေးကြီးတဲ့နေရာတွေကိုတော့ မဖြစ်မနေပေးထားပါတယ်။

သံတွဲဆေးရုံဝင်းအတွင်း  မြေနိမ့်ပိုင်းရှိအဆောင်တွေမှာ ရေဝင်လာတဲ့အတွက် လူနာတွေနဲ့ အောက်ဆီဂျင်အိုးတွေကို အဆောင်သစ်တွေဆီကို ပြောင်းရွှေ့ထားရပါတယ်။

တောင်ကုတ်မြို့မှာလည်း မိုးသည်းထန်စွာရွာသွန်းနေတာကြောင့် ရေကြီးရေလျှံကာ မြို့ပေါ်ရှိ ရပ်ကွက်တချို့မှာ နေအိမ်အောက်ထပ်တွေကို ရေဝင်ရောက်တာတွေနဲ့ လမ်းတွေကို ရေကျော်တာတွေရှိနေပါတယ်။

3 months Ago

ရခိုင်ပြည်နယ်၌ နှစ်လအတွင်း ကိုဗစ်-၁၉ ကူးစက်ခံရသူ ၂၃၃၇ ဦး၊ သေဆုံးသူ ၁၁၈ ဦးရှိ

ရခိုင်ပြည်နယ်မှာ  မေလ ၂၅ ရက်မှ ဇူလိုင် ၂၆ ရက်အထိ နှစ်လအတွင်း  ကိုဗစ်-၁၉ ရောဂါကူးစက်ခံရသူ ၂၃၃၇ ယောက်ရှိပြီး သေဆုံးတဲ့သူ ၁၁၈ ယောက်ရှိတယ်လို့ ပြည်နယ် ကျန်းမာရေးဌာနက ထုတ်ပြန်ပါတယ်။

ကိုဗစ်ပိုးတွေ့လူနာတွေကတော့ စစ်တွေမြို့နယ်က ၄၅၂ ယောက်၊ ပုဏ္ဏားကျွန်းမြို့နယ်က အယောက်  ၃၀ ၊ ပေါက်တောမြို့နယ်က ၂၄ ယောက်၊ ရသေ့တောင်မြို့နယ်က ၂၂ ယောက်၊ မြောက်ဦးမြို့နယ်က ၆၃ ယောက်၊ ကျောက်တော်မြို့နယ်က ၉၄ ယောက်၊ မင်းပြားမြို့နယ်က ၂၆ ယောက်၊ မြေပုံမြို့နယ်က ၁၈ ယောက်ရှိပါတယ်။

ကျောက်ဖြူမြို့နယ်မှာတော့ အယောက် ၂၅၀၊ ရမ်းဗြဲမြို့နယ်က ၆၄ ယောက်၊ မာန်အောင်မြို့နယ်က ၃၃ ယောက်၊ အမ်းမြို့နယ်က ၇၈ ယောက်၊ သံတွဲမြို့နယ်က ၂၂၅ ယောက်၊ တောင်ဂုတ်မြို့နယ်က ၁၄၄ ယောက်၊ ဂွမြို့နယ်က ၃၀၁ယောက်၊ မောင်တောမြို့နယ်က ၄၁၆ ယောက်နဲ့ ဘူးသီးတောင်မြို့နယ်က ၉၇ ယောက်မှာ ကိုဗစ်ရောဂါပိုးတွေ့ရှိခဲ့တာလို့ ဆိုပါတယ်။

အဆိုပါ ကိုဗစ် လူနာတွေထဲက ကျန်းမာရေးပြန်လည်ကောင်းမွန်လာပြီးတော့ ဆေးရုံကနေ ဆင်းခွင့်ရတဲ့သူ ၁၀၅၀ ယောက်ရှိပြီး ဆေးကုသမှုခံယူနေဆဲလူနာ ၁၁၆၉ ယောက်ရှိတယ်လို့ သိရပါတယ်။

ရခိုင်ပြည်နယ် ကျေးရွာတွေမှာ အနံပျောက်၊ ဖျားနာ၊ ချောင်းဆိုးတဲ့သူတွေများပြားနေပေမယ့် တိုက်နယ်အဆင့်ဆေးရုံတွေမှာ ကိုဗစ်စစ်ဆေးတဲ့ စင်တာတွေမရှိသလို ဆေးရုံသွားပြမှသာ သံသယလူနာအဖြစ် မြို့နယ်တွေကို လွှဲပြောင်ပေးတာဖြစ်လို့ ရောဂါကူးစက်နှုန်းများပြားနိုင်တယ်လို့ ဒေသခံက ပြောပါတယ်။

ပရဟိတအဖွဲ့တွေအနေနဲ့ သက်ဆိုင်ရာ မြို့နယ်အလိုက် အောက်ဆီဂျင်ရရှိရေးနဲ့ အောက်ဆီဂျင်စက်ရုံတည်ဆောက်ရေးအတွက် အလှူငွေကောက်ခံတာတွေလုပ်ဆောင်နေသလို ရောဂါကွယ်ထိန်းချုပ်နိုင်ရေး အစွမ်းကုန် ကြိုးပမ်နေတယ်လို့ ပရဟိတအဖွဲ့ဝင်တစ်ယောက်က ဆိုပါတယ်။

ဒါအပြင် ရခိုင်ပြည်နယ်အတွင်းမှာ ကိုဗစ်ရောဂါထိန်းချုပ်နိုင်ရေးအတွက် ရခိုင်အမျိုးသားအဖွဲချုပ် ULA/AA က ဇူလိုင်လ ၂၀ ရက်မှ  သြဂုတ် ၄ ရက်နေ့ထိ မိမိအိမ်မှာနေထိုင်ကြဖို့ Stay at Home ထုတ်ပြန်ချက်ကို ရခိုင်ပြည်သူအများစု လိုက်နာကြတယ်လို့ သိရပါတယ်။

ဓာတ်ပုံ-PDYO

3 months Ago

ရခိုင်ကျောင်းသား ၄ ဦးကို ရုံးထုတ်စဉ် ထပ်မံဆန္ဒပြသဖြင့် ရိုက်နှက်ပြီး ထောင်ကိုပြန်ပို့ခံရ

ရခိုင်ပြည်နယ်မှာ ဖက်ဆစ်စစ်တပ် အလိုမရှိကြောင်း ဆန္ဒဖော်ထုတ်မှုကြောင့် တစ်နှစ်နီးပါး ဖမ်းဆီးခံနေရတဲ့ ရခိုင်ပြည်ကျောင်းသားသမဂ္ဂအဖွဲ့ဝင်  ကျောင်းသား ၄ ဦးကို ဇူလိုင် ၁၆ ရက်နေ့က စစ်တွေတရားရုံးမှာ ရုံးထုတ်ပါတယ်။

ဒီလို ရုံးထုတ်စဉ်မှာ ဖမ်းဆီးခံကျောင်းသားတွေက ထပ်မံဆန္ဒပြခဲ့တာကြောင့် စစ်ကောင်စီလက်နက်ကိုင်တပ်ဖွဲ့တွေက ကျောင်းသားတွေကို အကြမ်းဖက်ရိုက်နှက်ဖမ်းဆီးပြီး  အကျဉ်းထောင်ကို ပြန်ပို့ဆောင်လိုက်တယ်လို့ ရခိုင်ပြည်ကျောင်းသားသမဂ္ဂ ပြင်ပဆက်ဆံရေးတာဝန်ခံ ကိုကျော်ဝင်းထွန်းက ပြောပါတယ်။

“ဒီနေ့မှာ လျှောက်လဲချက်ပေးရမယ်ဆိုပြီးတော့ ရှေ့နေက ပြောထားတာပေါ့လေ။ ပြီးရင် ကျောင်းသားအမှုတွေနဲ့အတူ အကြမ်းဖက်အမှုတွေနဲ့ ရင်ဆိုင်နေရတဲ့ ရခိုင်မြို့နယ်တွေက ရွာသားတွေ ရှိတာပေါ့။ အဲဒီအမှုတွေက ရွာသားတွေကလည်း ဆိုင်းငံ့ကာလဖြစ်နေတယ်။ ဒီအမှုတွေက အမိန့်မချနိုင်ဖြစ်နေတယ်ဆိုတော့ ဒီကျောင်းသား ၄ ယောက်က သူတို့အတွက်ပါ အမိန့်ချပေး။ အမိန့်မချပေးရင် ရုံးမထွက်တော့ဘူးဆိုပြီးတော့ ရွာသားတွေအတွက် ဆန္ဒပြတာပေါ့။ အဲဒီမှာ ရုန်းရင်းဆန်ခတ်ဖြစ်ကြတော့ သူတို့ကို ထောင်ကို တန်းပို့မယ်ဆိုပြီး အဓမ္မဖမ်းဆီး ချုပ်နှောင်ပြီးတော့ ကားပေါ်ကိုတင်လိုက်တာပေါ့။ ကျနော်တို့လည်း ကြားတယ်၊ အဲဒီနေရာမှာ ကျနော်တို့လည်း ရှိနေတော့ အချုပ်ကားထဲမှာ ရိုက်နေတာကို အသံလည်း ကြားလိုက်ရတာပေါ့” လို့ ပြောပါတယ်။

အခုလို ပြည်သူတွေအပေါ် စစ်တပ်က  အကြမ်းဖက်လုပ်ဆောင်လာတာဟာ နှစ်ပေါင်းများစွာ ကြာလာပြီး မခံမရပ်နိုင်တဲ့အတွက် ကျောင်းသားတွေအနေနဲ့ ရှေ့ထွက်ကာ ဆန္ဒဖော်ထုတ်ခဲ့ကြတာလို့ ဆိုပါတယ်။

ဆန္ဒပြကျောင်းသားတွေကို ဖမ်းဆီးချုပ်နှောင်ထားတာဟာလည်း ၁ နှစ်နီးပါး ကြာလာပြီဖြစ်ပေမဲ့ အမိန့်တစ်စုံတစ်ရာမချပဲ အချိန်ကြန့်ကြာနေတာဟာ မဖြစ်သင့်တော့သလို ပြည်သူတွေအပေါ် အကြမ်းဖက်လုပ်ဆောင်တာတွေကိုလည်း ကန့်ကွက်ရှုတ်ချတယ်လို့ ရခိုင်ပြည်ကျောင်းသားသမဂ္ဂက   ဆိုပါတယ်။

ပြီးခဲ့တဲ့နှစ်  အောက်တိုဘာ ၁၉ ရက်နေ့က ရခိုင်ပြည်နယ်အတွင်း လူအခွင့်အရေး ချိုးဖောက်ခံရတာတွေနဲ့ ပတ်သက်ပြီး ဖက်ဆစ်စစ်တပ် ဆန့်ကျင်ရေး စစ်တွေမြို့တွင်း လှည့်လည် ဆန္ဒဖော်ထုတ်ခဲ့တာကြောင့် ရခိုင်ပြည်ကျောင်းသားသမဂ္ဂ ပြန်ကြားရေးတာဝန်ခံ ကိုကျော်နိုင်ဌေး၊ တွဲဖက်ပြန်ကြားရေးတာဝန်ခံ ကိုဦးသန်းနိုင်၊ ကိုကောင်းထွန်း (ဒဂုံတက္ကသိုလ်၊ ရန်ကုန်မြို့)နဲ့  ကိုမြတ်စိုးဝင်း(တွဲဖက်အတွင်းရေးမှူး၊ ကျောက်ဖြူပညာရေးကောလိပ်)တို့ဖမ်းဆီးခံရပြီး  စစ်တွေမြို့နယ် ရဲတပ်ဖွဲ့မှူး ရဲမှူးဇော်နိုင်က တရားလိုပြုလုပ်ကာ နိုင်ငံတော်အကြည်ညိုပျက်စေမှု ပုဒ်မ- ၅၀၅(ခ)နဲ့ စစ်တွေမြို့နယ်တရားရုံးမှာ တရားစွဲဆိုခဲ့တာ ဖြစ်ပါတယ်။

သူတို့ ၄ ယောက်ထဲက ကိုကျော်နိုင်ဌေး၊ ကိုဦးသန်းနိုင်ပါ နှစ်ဦးနဲ့ ကိုတိုးတိုးအောင် တို့ဟာ ပြီးခဲ့တဲ့နှစ် စက်တင်ဘာ ၉ ရက်နေ့ကလည်း ရခိုင်ပြည်နယ်အစိုးရရုံးရှေ့မှာ အလားတူ ဆန္ဒဖော်ထုတ်မှုကြောင့် ငြိမ်းစုစီဥပဒေပုဒ်မ-၁၉နဲ့ တရားစွဲဆိုခံခဲ့ရကာ မေလ ၆ နေ့ မှာ ငွေဒဏ်ချမှတ်ခံရပါတယ်။

လက်ရှိအချိန်မှာတော့ ဖမ်းဆီးခံ ကျောင်းသား ၄ ဦးဟာ နိုင်ငံတော်အကြည်ညိုပျက်စေမှု ပုဒ်မ-၅၀၅(ခ)နဲ့ရော၊ သဘာဝဘေးအန္တရာယ်ဆိုင်ရာစီမံခန့်ခွဲမှု ဥပဒေ ပုဒ်မ ၂၉နဲ့ပါ ထပ်မံ တရားစွဲဆိုခံထားရပါတယ်။

3 months Ago

ကိုဗစ်ပိုးတွေ့လူနာအသစ် ၁၈၀၀ ကျော်တွင် ရခိုင်ပြည်နယ်၊ မောင်တောမြို့က အများဆုံးဖြစ်

မြန်မာနိုင်ငံမှာ တရက်အတွင်း ကိုဗစ်-၁၉ ရောဂါကူးစက်မှုအသစ်  ၁,၈၆၃ ယောက် ရှိခဲ့ပြီး ရခိုင်ပြည်နယ်၊ မောင်တောမြို့က ပိုးတွေ့လူနာ ၁၁၇ ယောက်နဲ့ အများဆုံးဖြစ်တယ်လို့ စစ်ကောင်စီလက်အောက်ခံ ကျန်းမာရေးနဲ့ အားကစားဝန်ကြီးဌာနက ထုတ်ပြန်ထားပါတယ်။

ဒီစစ်ဆေးမှုမှာတော့ အာဏာဖီဆန်ရေးလှုပ်ရှားမှု (CDM) မှာ ပါဝင်နေကြတဲ့ ဆေးရုံတွေ၊ ဓာတ်ခွဲစမ်းသပ်ခန်းတွေ မပါဝင်ဘဲ စစ်အုပ်စုလက်အောက်ခံ တပ်မတော်ဆေးရုံတွေ အများစုမှာ စမ်းသပ်စစ်ဆေးခဲ့တာမို့ ရောဂါကူးစက်မှု တိကျတဲ့ ပမာဏအတိုင်းအဆကိုတော့ မသိနိုင်သေးပါဘူး။

ဝန်ကြီးဌာန ထုတ်ပြန်ချက်ထဲမှာတော့ ပြီးခဲ့တဲ့ ၂၄ နာရီအတွင်း ဓာတ်ခွဲနမူနာ ၉,၁၄၆ ခုကို စစ်ဆေးခဲ့ရာမှာ ရောဂါကူးစက်မှုအသစ် ၁,၈၆၃ ယောက် တွေ့ရှိခဲ့ရတာမို့ ပိုးတွေ့နှုန်း ၂၀ ဒသမ ၃၇ ရာခိုင်နှုန်း ရှိနေခဲ့ကာ ပြီးခဲ့တဲ့ရက်တွေကထက် ပိုမိုများပြားလာပါတယ်။

ဒါ့အပြင် လူနာ ၁၇ ယောက် ထပ်မံသေဆုံးတာမို့ ကိုဗစ်-၁၉ ရောဂါကူးစက်ခံရပြီး စုစုပေါင်းသေဆုံးသူ  ၃,၃၆၄ ယောက်၊ ရောဂါကူးစက်ခံရသူ စုစုပေါင်း ၁၆၁,၂၁၀ ယောက် ရှိခဲ့ပြီလို့ ဆိုပါတယ်။

ပြည်နယ်၊ တိုင်းဒေသကြီးအလိုက် ပိုးတွေ့လူနာသစ် တွေ့ရှိရတဲ့နှုန်းမှာတော့ စစ် ကိုင်းတိုင်းဒေသကြီးမြို့နယ် ၂၃ ခုမှာ ၃၃၆ ယောက်၊ ပဲခူးတိုင်းဒေသကြီး မြို့နယ် ၁၉ ခုမှာ ၁၉၈ ယောက်စီနဲ့ အများဆုံးဖြစ်ပြီး သူ့နောက်မှာတော့ ရခိုင်ပြည်နယ်က ၁၉၆ ယောက်၊ ရန်ကုန်တိုင်းဒေသကြီးက ၁၉၁ ယောက်၊ မန္တလေးတိုင်းဒေသကြီးက ၁၈၉ ယောက်၊ ရှမ်း ပြည်နယ်က ၁၅၀ ယောက်စီ အသီးသီးနဲ့ အများဆုံး ကူးစက်ခံထားရပါတယ်။

မြန်မာနိုင်ငံမှာ ပထမဆုံးသော ကိုဗစ်-၁၉ အတည်ပြုလူနာကိုတော့ ပြီးခဲ့တဲ့ ၂၀၂၀ ပြည့်နှစ်၊ မတ် ၂၃ ရက်က စတင်တွေ့ရှိခဲ့တာဖြစ်ပြီး ပြီးခဲ့တဲ့ ဇန်နဝါရီ ၂၇ ရက်မှာတော့ အာဆီယံနိုင်ငံတွေထဲ အစောဆုံး ကာကွယ်ဆေးထိုးနှံတဲ့နိုင်ငံ ဖြစ်လာခဲ့ပါတယ်။

ခုရက်ပိုင်းတွေမှာ ရောဂါကူးစက်မှုဟာ နေ့စဉ်ရက်ဆက် ခပ်စိပ်စိပ်ဖြစ်နေခဲ့ပြီး    မျိုးရိုးဗီဇကွဲ ကိုဗစ်-၁၉ ရောဂါပိုး ၃ မျိုး စစ်ဆေးတွေ့ရှိခဲ့ကြောင်းလည်း ဇွန် ၁၅ ရက်နေ့က ကြေညာထားပါတယ်။

ပြီးခဲ့တဲ့ ဇွန်လ ၃ ရက်နေ့ ကာကွယ်ရေးဝန်ကြီးဌာန၊ ဆေးသုတေသနစင်တာမှ စစ်ဆေးတဲ့ ဓာတ်ခွဲစစ်ဆေးချက်အဖြေအရ ကိုဗစ်-၁၉ မျိုးရိုးဗီဇ ပြောင်းလဲတဲ့ပိုးတွေ့ရှိသူ ၁၁ ဦး တွေ့ရှိရတယ်လို့ ဆိုပါတယ်။

4 months Ago

ရခိုင်ဒီမိုကရေစီအဖွဲ့ချုပ် ပါတီဗဟိုတွဲဖက်အတွင်းရေးမှူး ဦးကျော်ကျော်လင်းအပါအဝင် ၃ ဦး ပြန်လွတ်

ရခိုင်ပြည်နယ် တောင်ကုတ်မြို့မှာ ဖေဖော်ဝါရီ ၂၈ ရက်က အာဏာရှင်အလိုမရှိကြောင်း ဆန္ဒပြမှုကြောင့် နိုင်ငံတော်အကြည်ငြိုပျက်စေမှု ပုဒ်မ ၅၀၅(က)၊ ငြိမ်းစုစီပုဒ်မ ၁၉ တို့နဲ့ တရားစွဲဆို ဖမ်းဆီးခံထားရသူ ရခိုင်ဒီမိုကရေစီအဖွဲ့ချုပ် (ALD) တောင်ကုတ်မြို့နယ် ဗဟိုတွဲ ဖက်အတွင်းရေးမှူး ဦးကျော်ကျော်လင်းအပါအဝင် ၃ ဦး ပြန်လည်လွတ်မြောက်လာပါတယ်။

ဦးကျော်ကျော်လင်းအပါအဝင် ၃ ဦးအား နိုင်ငံတော်အကြည်ညိုပျက်စေမှု ပုဒ်မ ၅၀၅(က) ကို ပယ်ဖျက်ကာ ဇွန် ၃၀ ရက်မှာ  ပြန်လည်လွှတ်ပေးလိုက်ပေမယ့် ငြိမ်းစုစီ ပုဒ်မ-၁၉နဲ့ ထပ်မံအမှု ရင်ဆိုင်ရမယ်လို့ အခမဲ့အကျိုးဆောင်ပေးနေတဲ့ ရှေ့နေ ဦးခင်မောင်ဌေးက  ပြောပါတယ်။

“ဦးကျော်ကျော်လင်းပါ ၃ ဦးကို ပုဒ်မ ၅၀၅-က ကို နိုင်ငံတော် ပယ်ဖျက်လိုက်တော့ လွတ်မြောက်သွားခဲ့တာပေါ့။ ဒီဦးကျော်ကျော်လင်းပါ ၃ ဦးကို စွဲထားတာကတော့ ၁ မှုတည်း မဟုတ်ပါဘူး၊ အမှုက ၂ မှု၊ ငြိမ်းစုစီ ပုဒ်မ ၁၉ လည်းပါသေးတယ်။ ပုဒ်မ ၅၀၅-က ကပြန်လွတ်တော့ ငြိမ်းစုစီ ပုဒ်မ ၁၉ နဲ့ အာမခံယူရတယ်၊ ငြိမ်းစုစီ ပုဒ်မ ၁၉ နဲ့ ထပ်ပြီးတရားရင်ဆိုင်ရမှာပါ။”

တောင်ကုတ်မြို့မှာ စစ်အာဏာရှင်အလိုမရှိကြောင်း ဆန္ဒဖော်ထုတ်မှုကြောင့် ဖမ်းဆီးတရားစွဲ ဆိုထားသူ ၇ ဦးထိရှိကာ ၃ ဦးကို ပြန်လွှတ်ပေးခဲ့ပြီးနောက် NLD ပါတီဝင် ၁ ဦးဖြစ်တဲ့ တောင်ကုတ်မြို့နယ်လွှတ်တော်ကိုယ်စားလှယ်ဟောင်း ဦးမင်းအောင်ပါ ၄ ဦးကိုတော့ ငြိမ်းစုစီ နဲ့ ဘေးစီမံပုဒ်မတွေနဲ့ ဖမ်းဆီးတရားစွဲဆိုခံနေရပြီး ပြန်လည်လွတ်မြောက်ထဲမှာတော့ မပါဝင်ဘူးလို့ သိရပါတယ်။

4 months Ago

ရခိုင် စစ်ဘေးရှောင်စခန်းအချို့တွင် ကလေးငယ်များ အရေပြားရောဂါဖြစ်ပွားနေ

ရခိုင်ပြည်နယ် ကျောက်တော်မြို့နယ် ကန်စောက်စစ်ဘေးရှောင်စခန်းအပါအဝင် အနီးအနားရှိ စစ်ဘေးရှောင်စခန်းမှာ နေထိုင်နေကြတဲ့ ကလေးတွေမှာ အခုရက်ပိုင်းအတွင်း အရေပြားမှာ ယားနာတွေဟာ ခန္ဒာကိုယ်အနှံ့ ဖြစ်နေကြတယ်လို့ သိရပါတယ်။

ကလေးတွေမှာ အရေပြားရောဂါဖြစ်ပွားတာဟာ အခုရက်ပိုင်းအတွင်းမှာ မိုးသည်းထန်စွာရွာသွန်းမှုတွေကြောင့် စစ်ဘေးရှောင်စခန်းတွေမှာ ရေကြီးကာ ပတ်ဝန်းကျင်ညစ်ညမ်းမှုတွေနဲ့ ရေသန့်ရှင်းမှု မရှိတာတွေကြောင့် ဖြစ်နိုင်တယ်လို့ ရခိုင်တိုင်းရင်းသားမျိုးနွယ်များအစည်းအရုံးရဲ့ အတွင်းရေးမှူး ကိုဇော်ဇော်ထွန်းက ပြောပါတယ်။

“ကျနော်တို့ဆီကို အကြောင်းကြားလာကတော့ ကျောက်တော်မြို့နယ် ကန်စောက်စစ်ဘေးရှောင်စခန်းပေါ့။ အဲဒီမှာ ကလေး ၁၀ ယောက်လောက်က အရေပြားမှာ ယားနာတွေ ပေါက်တာပေါ့၊ အများကြီးပဲပေါက်တယ်၊ တချို့ကလေးတွေမှာ အနည်းငယ်ပေါက်နေတဲ့သူတွေလည်းရှိတယ်လို့ ပြောကြပါတယ်၊ နောက်ပြီး တခြားအနီးအနားစခန်းတွေမှာလည်းပဲ အရေပြားရောဂါ အသေးစားလေးတွေ ဖြစ်နေတယ်လို့ သိရတယ်။ ကျွန်နော်တို့ ဘာကြောင့်ဖြစ်တယ်မှန်းတော့ တိတိကျကျမသိနိုင်သေးပါဘူး၊ ဒါပေမဲ့လည်း ဖြစ်နိုင်ခြေရှိတာတွေကတော့ ဒီရက်ပိုင်းတွေမှာမိုးကြီးပြီးတော့ ရေပြည့်တာ၊ နောက်အဲဒါတွေကြောင့် ပတ်ဝန်းကျင်ညစ်ညမ်းတာ၊ ရေမသန့်ရှင်းမှုတွေဖြစ်တာ ဒါတွေနဲ့ဆက်စပ်နိုင်ပါတယ်” လို့ ပြောပါတယ်။

အဆိုပါ အရေပြားရောဂါဖြစ်ပွားနေတဲ့ စစ်ဘေးရှောင်စခန်းက ကလေးတွေကို နီးစပ်ရာကျေးလက်ကျန်းမာရေးဌာနတွေက လာရောက်ကာ ဆေးကုသမှုတွေပေးနေတယ်လို့လည်း ဆိုပါတယ်။

4 months Ago

ကိုဗစ်ပိုးတွေ့လူနာများရှိသော်လည်း စိုးရိမ်စရာမလိုဟု ရခိုင်ပြည်နယ်ကျန်းမာရေးဌာနပြော

ရခိုင်ပြည်နယ်မှာ ကိုဗစ်-၁၉ ပိုးတွေ့လူနာတွေဟာ ကျန်းမာရေးကောင်းမွန်ပြီး စိုးရိမ်ရတဲ့ အနေအထား မရှိသလို သက်ဆိုင်ရာဆေးရုံတွေမှာ ဆေးကုသမှုခံယူနေတယ်လို့ ပြည်နယ်ကျန်းမာရေးဦးစီးဌာနမှ လက်ထောက်ညွှန်ကြားရေးမှူး ဒေါက်တာ စိုးဝင်းပိုင်က ပြောပါတယ်။

ကိုဗစ်ပိုးတွေ့လူနာအများစုဟာ နယ်စပ်ကုန်သွယ်ရေးလုပ်ကိုင်နေသူတွေနဲ့ နယ်စပ်ကနေ ခိုးဝင်လာသူတွေဖြစ်တယ်လို့လည်း ပြောပါတယ်။

“ရခိုင်ပြည်နယ်မှာ နယ်စပ်ကုန်သွယ်ရေးရယ်၊ နယ်စပ်ဖြတ်ကျော်ဝင်လာတဲ့ မောင်တောမှာဆိုရင် ခိုးဝင်လာတဲ့လူတွေလည်းပါတယ်။ သူတို့ကို စစ်တာမှာ တွေ့တာ၊ သူတို့ရဲ့ ကျန်းမာရေးက ကောင်းပါတယ်။  လူနာ ၅၃ ဦးထဲမှာ နယ်စပ်ကုန်သွယ်ရေးလုပ်ပြီး ပြန်လာတဲ့လူတွေကို ကွာရန်တင်းထားပြီး တွေ့တာကအများပေါ့။ ရောဂါလက္ခဏာပြတဲ့ စစ်တွေမှာ တစ်ယောက်၊ မောင်တောကလည်း ကောင်းပါတယ်။ ထောက်ပံ့မှုတွေပေးနေတယ်၊ စိုးရိမ်ရတဲ့အနေအထားမှာ မရှိပါဘူး”လို့ ဒေါက်တာ စိုးဝင်းပိုင်က ပြောပါတယ်။

ကိုဗစ်-၁၉ ရောဂါဟာ ပြီးခဲ့တဲ့ ၂၀၁၉ ခုနစ်က စတင်ကာ တစ်ကမ္ဘာလုံးကြုံတွေ့ခံစား နေရတာဖြစ်ကာ ရခိုင်မှာလည်း ကြုံတွေ့ခံစားဖူးပြီဖြစ်တာကြောင့် ပြည်သူတွေအနေနဲ့ ပေါ့ပေါ့ဆဆ မနေဘဲ မိမိကအစ ကူးစက်မခံရအောင် နေထိုင်ဖို့ လိုအပ်တယ်လို့လည်း ဒေါက်တာ စိုးဝင်းပိုင်က ပြောပါတယ်။

“ကိုဗစ်နဲ့ယှဉ်တွဲ နေထိုင်ဖို့နဲ့ နောက်ထပ်ရောဂါ မကူးအောင်ဆိုရင် New Normal Life ဆိုတဲ့ မလိုအပ်ဘဲ အိမ်ပြင်မထွက်ဖို့၊ လူစုလူဝေးမလုပ်ဖို့၊ နောက်အိမ်ပြင်ထွက်ရင် Mask တပ်ဖို့၊ လက်ကိုခဏခဏဆေးဖို့၊ နှာချေချောင်းဆိုရင် အုပ်ပြီးဆိုးဖို့ပေါ့။ ဒါတွေက အမြဲတမ်းလိုက်နာ ဆောင်ရွက်ဖို့လိုတယ်။ ကာကွယ်ဆေးထိုးထားပြီးပြီဆိုရင်လည်း အမှုမဲ့ အမှတ်မဲ့ နေလို့မရဘူး။ ရောဂါကာကွယ်ဖို့ ခုနကပြောတဲ့ဟာတွေကို စနစ်တကျလိုက်နာနေထိုင်မှပဲ မိမိနဲ့ မိမိ ပတ်ဝန်းကျင်ကို ကာကွယ်ရာရောက်မှာပေါ”။

ရခိုင်မှာ ကိုဗစ်-၁၉ ပိုးတွေ့လူနာ ၈၀ ကျော်ထိရှိကာ ဆေးရုံကဆင်းခွင့်ရသူ ၂၇ ထိရှိပြီဖြစ်ပါတယ်။

4 months Ago

စစ်ရှောင်စခန်းရှိ တဲအိမ် ၆၀၀ ခန့်ပျက်စီးနေသဖြင့် ရခိုင်ဒုက္ခသည်များ နေထိုင်ရေးအခက်ကြုံ

ရခိုင်ပြည်နယ်မှာ မိုးသက်လေပြင်းတွေကြောင့် စစ်ဘေးရှောင်စခန်းရှိ လူနေတဲအိမ် ၆၀၀   ဝန်းကျင်ပျက်စီးသွားကာ စစ်ဘေးရှောင်တွေ နေထိုင်ရေး အခက်အခဲရှိနေတယ်လို့ ရခိုင်တိုင်းရင်းသားမျိုးနွယ်များအစည်းအရုံးက သိရပါတယ်။

မိုးဦးကာလ မိုးသက်လေပြင်းကျရောက်တာတွေကြောင့် ပျက်စီးသွားတဲ့ တဲအိမ် ၂၀၀ လောက်နဲ့  ပြီးခဲ့တဲ့လ ဆိုင်ကလုန်းမုန်တိုင်း (YAAS) အရှိန်ကြောင့် ပျက်စီးသွားတဲ့ ရခိုင်စစ်ဘေးရှောင်စခန်းတချို့က လူနေတဲအိမ် ၄၀၀  စုစုပေါင်း တဲအိမ် အလုံးပေါင်း ၆၀၀ လောက်  ပျက်စီးသွားခဲ့တာဖြစ်ပါတယ်။

ရခိုင်တိုင်းရင်းသားမျိုးနွယ်များအစည်းအရုံးရဲ့ အတွင်းရေးမှူး ကိုဇော်ဇော်ထွန်းက “ ဒီစစ်ဘေးရှောင်စခန်းတွေမှာရှိတဲ့ လူနေတဲအိမ်တွေဟာ ဟောင်းနွမ်းဆွေးမြေ့နေကြပြီ၊ ဒီဟာတွေကို အသစ်ပြန်ဆောက်ရမယ့် အချိန်မှာ မဆောက်နိုင်ခဲ့ဘူး၊ ဒါကြောင့် မုတ်သုံမိုးရာသီစဝင်တဲ့အချိန်မှာ မုန်တိုင်းအရှိန်ကြောင့် မိုးသက်လေပြင်းကျပြီးတော့ တချို့မှာ အမိုးပျက်တာတွေ၊ ဝါးထရံကာပျက်တာတွေ၊ ကြမ်းခင်းပေါက်တာတွေ၊ အိမ်တွေယိမ်းယိုင်တာတွေရှိတယ်၊ အဲဒီဟာအရေအတွက်က ၄၀၀ ကျော်လောက်ရှိတယ်၊ အခုမိုးဦးကာလမှာလည်း မိုးသက်လေပြင်းတိုက်ပြီးတော့ ထပ်ပျက်စီးသွားတာတွေက ၂၀၀ ဝန်းကျင်လောက်ရှိတယ်၊ လုံးပေါင်း ၆၀၀ ဝန်းကျင်လောက်ဟာ လူနေလို့အဆင်မပြေတော့ဘူး” လို့ ပြောပါတယ်။

ပျက်သွားတဲ့အိမ်တွေကို တခြားမိတ်ဖက်အဖွဲ့အစည်းတွေနဲ့ပေါင်းပြီး ယာယီနေထိုင်လို့ရအောင်ဆောင်ရွက်ပေးနေပေမဲ့   မိုးများတဲ့ ရခိုင်ဒေသမှာ ဒုက္ခသည်တွေ နေထိုင်ရေးက ဖြစ်သလိုနေနေရတဲ့အတွက်  ရေရှည်အတွက် အဆင်ပြေဘူးလို့လည်း  ပြောပါတယ်။

ဒါ့အပြင် စားသောက်ရေးမှာလည်း လုံလောက်တဲ့ထောက်ပံ့မှုတွေမရရှိသလို နိုင်ငံတကာအ ဖွဲ့အစည်းတွေအနေနဲ့လည်း နိုင်ငံရေးမတည်ငြိမ်မှုတွေကြောင့် အရင်ကလိုကူညီဆောင်ရွက်ပေးနိုင်တဲ့ အခြေအ‌နေမရှိတော့ပါဘူး။ 

“နေထိုင်ရေးတစ်ခုတည်းမဟုတ်ဘူး။ စားရေးသောက်ရေးပိုင်းမှာဆိုရင်လည်း စစ်ကောင်စီက ပုံမှန်ထောက်ပံ့မှုတွေ မရှိဘူး၊ တချို့စခန်းတွေဆို ရောက်ချင်တဲ့ အချိန်ရောက်တယ်။ တချို့စခန်းတွေဆို လုံးဝမရောက်ဘူး။ တခြားကူညီပေးနေတဲ့ UN အဖွဲ့အစည်းတွေဖြစ်တဲ့ WFP တို့ I CRC တို့ကလည်း သူတို့ အခက်အခဲနဲ့သူတို့၊ ပုံမှန်မရောက်ဘူး၊ ရောက်တာနောက်ကျတယ်။ ဟိုမှာစားဖို့သောက်ဖို့က အချိန်နဲ့အမျှလိုနေတယ်။ အပြင်မှာ အလုပ်အကိုင်ထွက်လုပ်ဖို့ကလည်း အလုပ်အကိုင်တွေကမရှိဘူး။ ရှိတာလည်းနဲ့ထမင်းတစ်လုပ်ကို ဝမ်းဝရုံလောက်ပဲ အာဟာရဖြစ်ဖြစ်၊ မဖြစ်ဖြစ် ကျန်းမာရေးနဲ့ညီညွတ်ညွတ် မညွတ်ညွတ် အခုကအဲဒီလိုစားနေရတယ်” လို့ ကိုဇော်ဇော်ထွန်းက ပြောပါတယ်။

ရခိုင်မှာ စစ်တပ်နဲ့ အေအေတို့ ၂ နှစ်ကျော်ကြာတိုက်ပွဲဖြစ်ပွားခဲ့ပြီးနောက် စစ်ဘေးရှောင်ဦးရေ နှစ်သိန်းကျော်ထိရှိခဲ့ပါတယ်။

လက်ရှိရခိုင်မှာတိုက်ပွဲ မဖြစ်တဦ  ၈ လဝန်းကျင်ရှိလာပေမဲ့ စစ်ဘေးရှောင်ဦးရေ တစ်သိန်းကျော်ဟာ အကြောင်းအမျိုးမျိုးကြောင့် မိမိနေရပ်ကိုမပြန်ရဲဘဲ စစ်ဘေးရှောင်စခန်းတွေနဲ့ နီးစပ်ရာနေရာတွေမှာ ခိုလှုံနေကြဆဲဖြစ်ပါတယ်။

Photo Credit- ရခိုင်တိုင်းရင်းသားမျိုးနွယ်များအစည်းအရုံး

4 months Ago

ရခိုင်ပြည်နယ်က ကန်ထရိုက်စီးပွားရေးလုပ်ငန်းရှင်များ အခက်ကြုံ

စစ်အာဏာရှင်လက်ထက် ရခိုင်ပြည်နယ်၊ သံတွဲခရိုင်မှာ ကန်ထရိုက် လုပ်ငန်းရှင်တွေဟာ ဘဏ်တွေမှာ ငွေကြေး အကန့်အသတ်နဲ့သာထုတ်ယူခွင့်ရတာကြောင့် ငွေကြေးလည်ပတ်မှု မရှိတော့တဲ့အတွက် စီးပွားရေးလုပ်ငန်းတွေ ထိခိုက်လာနေတယ်လို့ လုပ်ငန်းရှင်တွေက ပြောပါတယ်။ 

သံတွဲက လုပ်ငန်းရှင် ဦးထွန်းသန့်ကျော်က “တပ်မတော်က အာဏာသိမ်းပြီးနောက်ပိုင်း ကျနော်တို့ ဘာဆက်လုပ်ရမလဲ။ လုပ်ငန်းလုပ်ရမှာလား၊ မလုပ်ရဘူးလား မေးတဲ့အခါ ပုံမှန်ဆက်လုပ်ပါလို့ ပြောတယ်။ ပုံမှန်အတိုင်း ထုတ်ပေးပါမယ်လို့ ပြောတယ်။ အဲဒီတော့ ကျနော်တို့က ယုံယုံယုံကြည်နဲ့ ဆက်လုပ်တာပေါ့။ အခုကျတော့ ကျပ်သိန်း ၁၀၀ ကနေ တပတ်ကို သိန်း ၃၀ ပဲပေးတော့တယ်။ ကျနော်တို့အတွက် ဒီသိန်း ၃၀ က ဆင့်ပါးစပ်ကိုနှမ်းပက်သလို ဖြစ်နေတယ်။ အခုက ဒီအတိုင်းသွားမယ်ဆိုရင် ကားသမားတွကအစ ပိုက်ဆံမပေးနိုင်ဘူး။ ပန်းရန်သမားတွေဆိုလည်း မပေးနိုင်ဘူး။ အဲဒီတော့ ဒေသခံ အလုပ်သမားတွေကအစ စားဝတ်နေရေး ခက်ခဲလာကြပြီ။” လို့ ပြောပါတယ်။  

ဒီအခြေအနေကို ကူညီဖြေရှင်းပေးဖို့ သံတွဲခရိုင်အတွင်း လုပ်ငန်းရှင်တွေ စုပေါင်းအစည်းအဝေးတရပ် ပြုလုပ်ပြီး အာဏာသိမ်းစစ်ကောင်စီကို တောင်းဆိုသွားဖို့ ဒေသခံ လုပ်ငန်းရှင်တွေက စီစဉ်နေပါတယ်။ 

“ကျနော်တို့က တခုခုလုပ်မှ ထူးခြားတော့မယ်။ ဒါကြောင့် ဒီ တရက်၊ နှစ်ရက်အတွင်း လုပ်သွားမယ်။ ကျနော်တို့က အစည်းအဝေးလုပ်ပြီးတော့ စာတင်မလား၊ ဆန္ဒပြမလား၊ ဒီနှစ်ခုကို ကျနော်တို့ ဆုံးဖြတ်သွားမယ်။”လို့ လုပ်ငန်းရှင်   ဦးထွန်းသန့်ကျော်ကပြောပါတယ်။

ရခိုင်မှာရှိတဲ့ စီးပွားရေးလုပ်ငန်းရှင်အများစုဟ ဒေသခံတိုင်းရင်းသားတွေဖြစ်ကာ မိမိဒေသ ဖွံ့ဖြိုးတက်ရေးအတွက် တနိုင်တပိုင်လုပ်ကိုင်နေကြသူတွေ ဖြစ်တာကြောင့် စစ်ကောင်စီအနေနဲ့  လုပ်ငန်းလည်ပတ်နိုင်အောင် လုပ်ဆောင်ပေးသင့်တယ်လို့လည်း ဆိုပါတယ်။

အန်အယ်လ်ဒီအစိုးရလက်ထက် တိုက်ပွဲတွေပြင်းထန်ဖြစ်ပွားခဲ့တဲ့ ရခိုင်ပြည်နယ်မှာ လက်ရှိအချိန်မှာတော့ တခြားတိုင်းနဲ့ပြည်နယ်တွေမှာထက်စာရင်  တည်ငြိမ်အေးချမ်း နေပါတယ်။ 

4 months Ago

ဖမ်းဆီးခံ ရခိုင်ကျောင်းသား ၄ ဦးအမှု လိုပြသက်သေမလာသဖြင့် ထပ်မံရုံးချိန်း

ဖမ်းဆီးတရားစွဲဆို ခံနေရတဲ့ ရခိုင်ကျောင်းသားသမဂ္ဂအဖွဲ့ဝင် ကျောင်းသား  ၄ ယောက်ကို  မေလ ၃၁ ရက်က  စစ်တွေမြို့နယ်တရားရုံးမှာ ရုံးထုတ်ခဲ့ပြီး တရားလိုပြသက်သေတွေ ရောက်မလာလို့ အမှုကိုမစစ်ဆေးနိုင်ပဲ ထပ်မံရုံးချိန်းလိုက်ရပါတယ်။

ရခိုင်ပြည်နယ်မှာ ပြင်းပြင်းထန်ထန်တိုက်ပွဲဖြစ်ပွားခဲ့တုန်းက စစ်တပ်ရဲ့ လူအခွင့်အရေး ချိုးဖောက်မှုတွေနဲ့ပတ်သက်ပြီး   အဆိုပါကျောင်းသား ၄ ယောက်က ဆန္ဒပြခဲ့တဲ့အတွက် ပြီးခဲ့တဲ့နှစ်ကတည်းက ဖမ်းဆီးတရားစွဲခံနေရတာပါ။

သူတို့ကို ဖမ်းဆီးချုပ်နှောင်ထားတာဟာ ၈ လဝန်းကျင်ရှိလာပြီဖြစ်ကာ လက်ရှိကျောင်းတွေလည်း ပြန်ဖွင့်လှစ်လာနေပြီး ကျောင်းတက်ရမယ့်အချိန်မှာ  အခုလိုကျောင်းသားတွေကို ဖမ်းဆီးတရားစွဲဆို အကျဉ်းထောင်ထဲကို ထည့်ထားတာဟာမဖြစ်သင့်ဘူးလို့ ရခိုင်ပြည်ကျောင်းသားသမဂ္ဂ ပြင်ပဆက်သွယ်ရေး တာဝန်ခံ ကိုကျော်ဝင်းထွန်းက ပြောပါတယ်။

“ကျောင်းသားတွေ ထောင်ထဲရောက်နေတာဟာ အခုဆိုရင် ၈ လနီးပါးတောင်ရှိလာပြီပေါ့၊ အခုဆိုရင်လည်း ကျောင်းတွေ ဘာတွေဖွင့်ပြီဆိုတော့ ကျောင်းသားတွေက စာသင်ခန်းထဲကို မရောက်နိုင်ဘဲ ထောင်ထဲက သံတိုင်တွေကြားထဲကို ရောက်နေရတဲ့အခြေအနေပေါ့၊ ဒါကတော့ ကျောင်းသားထုတွေအတွက်ရော၊ သူတို့အတွက်ပါ နစ်နာတဲ့ကိစ္စတစ်ခုလို့ပဲ မြင်ပါတယ်”လို့ ပြောပါတယ်။

ရခိုင်ပြည်နယ်အတွင်း စစ်တပ်ရဲ့လူ့အခွင့်အရေး ချိုးဖောက်မှုတွေနဲ့ပတ်သက်ပြီး ၂၀၂၀ အောက်တိုဘာ ၁၉ ရက်နေ့က  စစ်တွေမြို့တွင်း လှည့်လည်ကာ ဆန္ဒဖော်ထုတ်ခဲ့တာကြောင့် ရခိုင်ပြည်ကျောင်းသားသမဂ္ဂ ပြန်ကြားရေးတာဝန်ခံ ကိုကျော်နိုင်ဌေး၊ တွဲဖက်ပြန်ကြားရေးတာဝန်ခံ ကိုဦးသန်းနိုင်၊ ကိုကောင်းထွန်း(ဒဂုံတက္ကသိုလ်)နဲ့ ကိုမြတ်စိုးဝင်း(တွဲဖက်အတွင်းရေးမှူး၊ ကျောက်ဖြူပညာရေးကောလိပ်)တို့ ၄ ဦးကို ဖမ်းဆီးခဲ့ပြီးစစ်တွေမြို့နယ်ရဲတပ်ဖွဲ့မှူး ရဲမှူးဇော်နိုင်က တရားလိုပြုလုပ်ကာ နိုင်ငံတော်အကြည်ညိုပျက်စေမှု ပုဒ်မ-၅၀၅(ခ) နဲ့ စစ်တွေမြို့နယ်တရားရုံးမှာ တရားစွဲဆိုခဲ့တာပါ။

အဆိုပါကျောင်းသား ၄ ဦးထဲက ကိုကျော်နိုင်ဌေး၊ ကိုဦးသန်းနိုင်ပါ နှစ်ဦးနဲ့ ကိုတိုးတိုးအောင် တို့ဟာ ၂၀၂၀ စက်တင်ဘာလ ၉ ရက်နေ့က ရခိုင်ပြည်နယ်အစိုးရရုံးရှေ့မှာ အလားတူ ဆန္ဒဖော်ထုတ်မှုကြောင့်  ငြိမ်းစုစီဥပဒေပုဒ်မ ၁၉နဲ့ တရားစွဲဆိုခံခဲ့ရကာ မေလ ၆ ရက်နေ့မှာ ငွေဒဏ်ချမှတ်ခဲ့ပါတယ်။

လက်ရှိအချိန်မှာတော့ နိုင်ငံတော်အကြည်ညိုပျက်စေမှု ပုဒ်မ-၅၀၅(ခ)နဲ့ရော၊ သဘာဝဘေးအန္တရာယ်ဆိုင်ရာစီမံခန့်ခွဲမှု ဥပဒေပုဒ်မ-၂၉နဲ့ပါ ထပ်မံတရားစွဲဆိုခံထားရတဲ့ ကိုကျော်နိုင်ဌေးပါ ၄ ဦးကို  စစ်တွေအကျဉ်းထောင်မှာ  ထိန်းသိမ်းထားတာပါ။

ဖမ်းဆီးခံထားရတဲ့ ကျောင်းသားတွေကို မနေ့က ရုံးထုတ်ရာမှာ တရားလိုပြ သက်သေတွေ မရောက်လို့ မစစ်ဖြစ်ခဲ့ဘဲ  ဇွန်လ ၁၁ ရက်နေ့ကို ပြန်ချိန်းထားပါတယ်။

ကျောင်းသားတွေကို ဖမ်းဆီးတာဟာ ၈ လဝန်းကျင်ရှိနေပြီ ဖြစ်ပေမဲ့ တရားလိုပြသက်သေတွေ မလာလို့ အမှုမှာကြန့်ကြာနေပြီး ဖမ်းဆီးခံနေရတဲ့ကျောင်းသားတွေမှာ များစွာနစ်နာနေရတယ်လို့  ရခိုင်ပြည်ကျောင်းသားသမဂ္ဂက ပြောပါတယ်။

5 months Ago
More News
Up