WMO

November 24, 2020

ဖန်လုံအိမ်ဓာတ်ငွေ့ထုတ်လွှတ်မှု ယမန်နှစ်ကထက် ပိုမြင့်တက်လာဟု WMO ထုတ်ပြန်

ကိုဗစ်-၁၉ ကပ်ရောဂါကြောင့် အသွားအလာထိန်းချုပ် ကန့်သတ်ထားချိန်မှာ ဖန်လုံအိမ် ဓာတ်ငွေ့ ထုတ်လွှတ်မှု ကျဆင်းသွားမယ်လို့ မျှော်လင့်ထားပေမဲ့ ၂၀၁၉ ထက်စာရင် ဒီနှစ်မှာ ပိုတက်လာတယ်လို့ ကမ္ဘာ့ရာသီဥတုအဖွဲ့ကြီး WMO က နိုဝင်ဘာ ၂၃ ရက်မှာ ပြောပါတယ်။ ဒီနှစ်ထဲမှာ ကိုရိုနာဗိုင်းရပ်စ် ကူးစက်ကပ်ဘေးကြောင့် လေယာဉ်တွေ၊ သင်္ဘောတွေ ရပ်ထားရပြီး လမ်းသွားလမ်းလာတွေ အိမ်တွေထဲမှာ ပိတ်မိနေလို့ နှစ်စဉ် ကာဗွန်ထုတ်လွှတ်မှုနှုန်း အများဆုံး ကျဆင်းမယ်လို့ သိပ္ပံပညာရှင်တွေက ထင်ကြေးပေးထားခဲ့တာပါ။ ကိုဗစ်-၁၉ ကြောင့် အသွားအလာ ထိန်းချုပ်မှုဟာ ကာလတို သက်ရောက်မှု ဖြစ်လို့ သဘာဝ ပြောင်းလဲမှုကနေ ကာလတိုမှာတော့ ကိုဗစ်-၁၉ ဆိုင်ရာ ကန့်သတ်ချက်ရဲ့ သက်ရောက်မှုက သဘာဝပြောင်းလဲမှုကို အောင်နိုင်မှာမဟုတ်ဘူးလို့ WMO ရဲ့ ဖန်လုံအိမ်ဓာတ်ငွေ့ဆိုင်ရာ တရားဝင် ထုတ်ပြန်ကြေညာချက်က ဆိုပါတယ်။ ဂျီနီဗာအခြေစိုက် ကုလ မိုးလေဝသအေဂျင်စီဟာ နိုက်ထရပ်စ်အောက်ဆိုဒ်၊ မီသိန်းနဲ့ ကာဗွန်ဒိုင်အောက်ဆိုဒ်ဓာတ်ငွေ့တွေ လေထုထဲမှာရှိတဲ့ သိပ်သည်းဆကို တိုင်းတာပြီး နှစ်စဉ် အစီရင်ခံစာ ထုတ်ပြန်ခဲ့တာပါ။ ဒီဓာတ်ငွေ့တွေဟာ အစွန်းရောက် ရာသီဥတုကို ဖြစ်စေပြီး ကမ္ဘာကြီးကို ပူနွေးစေတယ်လို့ သိပ္ပံပညာရှင်တွေက ဆိုပါတယ်။ ရုပ်ကြွင်းလောင်စာတွေဖြစ်တဲ့ ကျောက်မီးသွေး၊ ရေနံ စတာတွေကို လောင်မြိုက်လို့ ထွက်လာတဲ့ ကာဗွန်ဒိုင်အောက်ဆိုဒ်အဆင့်ဟာ ကမ္ဘာကြီး ပူနွေးမှုကို ဖြစ်စေတဲ့ အကြီးဆုံး အကြောင်းရင်း ဖြစ်ပြီး ၂၀၁၉ မှာ စံချိန်သစ်တင်ခဲ့တယ် နှစ်စဉ် တိုးနှုန်းက မနှစ်ကထက် ပိုများလာပြီး ကျန်ခဲ့တဲ့ ဆယ်စုနှစ်အတွင်း ပျမ်းမျှနှုန်းထက် ကျော်လွန်နေတယ်လို့ WHO အစီရင်ခံစာက ဆိုပါတယ်။ ၂၀၂၀ အတွက် ကမ္ဘာလုံးဆိုင်ရာ သတင်းအချက်အလက်တွေ မရသေးပေမယ့် သိပ်သည်းဆ တိုးလာတဲ့ လမ်းကြောင်းက အရင်အတိုင်း ခြေရာလက်ရာ မပျက်ဘူးလို့ WMO က ပြောပါတယ်။ ဒီကနေ ကာဗွန်ထုတ်လွှတ်မှု ထိန်းချုပ်တာနဲ့ မဆိုင်သေးဘဲ ကျန်ခဲ့တဲ့ ဆယ်စုနှစ်တွေက ထုတ်လွှတ်ခဲ့တဲ့ ကာဗွန်ဒိုင်အောက်ဆိုဒ် ဓာတ်ငွေ့တွေ အများအပြားဟာ လေထုထဲမှာ ရှိနေဆဲ ဖြစ်ပြီး ကမ္ဘာကြီး ပူနွေးမှုကို ပိုတိုးစေတယ်လို့ ရာသီဥတုဆိုင်ရာ သိပ္ပံပညာရှင်တွေက ပြောထားပါတယ်။
6 months Ago

April 24, 2020

ကာဗွန်ထုတ်လုပ်မှု ကျဆင်းနေသော်လည်း ကမ္ဘာ့ရာသီဥတုပြောင်းလဲမှုကို မရပ်နိုင်ဟု WMO ပြေ

လတ်တလော COVID-19 ဗိုင်းရပ်စ်ကူးစက်မှုကြောင့် ဒီနှစ်မှာ ကာဗွန်ဒိုင်အောက်ဆိုဒ် ဓာတ်ငွေ့ ထုတ်လွှတ်မှု ၆ ရာခိုင်နှုန်း ကျဆင်းခဲ့တာဟာ ယာယီသာဖြစ်ပြီး ကမ္ဘာ့ရာသီဥတု ပြောင်းလဲမှုကို ရပ်တံ့နိုင်မှာ မဟုတ်ဘူးလို့ ကမ္ဘာ့မိုးလေဝသအဖွဲ့ WMO က ဧပြီ ၂၂ရက်မှာ ပြောပါတယ်။  ကမ္ဘာ့ကပ်ရောဂါအကြပ်အတည်း မတိုင်ခင်ကထက်ပိုပြီး ဓာတ်ငွေ့ ထုတ်လွှတ်မှု ပိုများ လာနိုင်သေးတယ်လို့လည်း ကုလသမဂ္ဂလက်အောက်ခံ WMO က သတိပေးပါတယ်။  ဓာတ်ငွေ့ထုတ်လွှတ်မှုလျော့ကျတာဟာ ၂၀၁၅ ပါရီသဘောတူညီချက် ပန်းတိုင်ကို ရောက်မယ့် လမ်းကြောင်းပေါ်တောင် ပြန်ရောက်နိုင်လောက်အောင် မလုံလောက်သေးဘူး လို့လည်း WMO အတွင်းရေးမှူးချုပ် ပတ်တာရီတာလတ်စ်က ညီလာခံမှာ ပြောပါတယ်။  သဘောတူညီချက်အရဆိုရင် တနှစ်ကို ကာဗွန်ထုတ်လွှတ်မှု ၇ ရာခိုင်နှုန်းထက်မနည်း လျော့ကျဖို့ လိုမယ်လို့လည်း သူက ပြောပါတယ်။  WMO ဟာ သူ့ရဲ့ ကမ္ဘာ့ရာသီဥတု အစီရင်ခံစာကို ဧပြီ ၂၂ရက်က ဖြန့်ချိလိုက်တာပါ။ ၂၀၁၅-၂၀၁၉ ငါးနှစ်တာကာလဟာ မှတ်တမ်းတင်ထားသမျှ အပူနွေးဆုံးကာလလို့ ရှာဖွေတွေ့ရှိချက်က အတည်ပြုထားပါတယ်။  ကမ္ဘာ့ပျမ်းမျှ အပူချိန်ဟာ စက်မှုခေတ်မတိုင်ခင်က ထက် ၁ ဒသမ ၁ ဒီဂရီဆဲလ်စီးယပ်စ် ပိုနေတယ်လို့လည်း ဖော်ပြထားပါတယ်။  ဒါ့အပြင် ဒီနှစ် တလချင်းရဲ့ ကမ္ဘာ့အပူချိန်ဟာ မှတ်တမ်းအရ အပူဆုံး ဒါမှမဟုတ် ဒုတိယ အပူဆုံးတွေဖြစ်နေခဲ့တယ်လို့ WMOရဲ့ ပြောခွင့်ရက ပြောပါတယ်။  ကာဗွန်ဒိုင်အောက်ဆိုဒ်ဓာတ်ငွေ့ဟာ လေထုထဲမှာ ရာစုနှစ်တွေချီ ကျန်ရစ်နေပြီး ထုတ်လွှတ်မှု ကျဆင်းတာဟာလည်း ရာသီဥတုအပေါ် ချက်ချင်း သက်ရောက်တာ မဟုတ်လို့ ဓာတ်ငွေ့ ထုတ်လွှတ်မှု လျော့ကျတာက ရာသီဥတုပေါ် သက်ရောက်တဲ့အထိ အချိန်အကြာကြီး ထိန်းထား နိုင်ဖို့ လိုပါတယ်၊  ကာဗွန်ဒိုင်အောက်ဆိုဒ် ဓာတ်ငွေ့ ထုတ်လွှတ်မှု ၂၆ရာခိုင်နှုန်း မြင့်တက်အပြီးမှာ ကမ္ဘာ့ အပူချိန် ဝ ဒသမ ၈၆ ဒီဂရီဆဲလ်စီးယပ်စ် ပိုမြင့်လာခဲ့တယ်လို့ နှစ် ၅၀ ပြည့် မြေကမ္ဘာနေ့မှာ WMO က  ပြောခဲ့ပါတယ်။
1 year Ago
Up