SSPP

July 13, 2021

အရေးထဲမှာ အရာပေါ်နေတဲ့ ရှမ်းနိုင်ငံရေး

နွေဦးတော်လှန်ရေး အရှိန်ရဖို့ တာစူနေတုန်းမှာပဲ ရှမ်းပြည်နယ်အတွင်းက ပဋိပက္ခတွေကလည်း သည်းသန်လာပါတယ်။ လက်နက်ကိုင်အဖွဲ့ပေါင်း ၁၀ ဖွဲ့လောက်ရှိနေတဲ့ ရှမ်းပြည်နယ်ကြီးမှာ ပင်မ ရှမ်းလက်နက်ကိုင်အဖွဲ့ကြီးနှစ်ဖွဲ့ ဖြစ်တဲ့ SSPP နဲ့ RCSS တို့အကြား ပဋိပက္ခကနေ ‘ဝ’ နဲ့ ပလောင်တို့ပါ ပါဝင်လာတဲ့ ပတ်လည်စစ်ပွဲကြီး ဖြစ်လာနိုင်ခြေတွေ တိုးပွားများနေတာ ဖြစ်တယ်။ ဒါထက်ပိုတဲ့ နောက်ကွယ်က ပါဝင်နေနိုင်တဲ့ အင်အားကြီးနှစ်ခု ရှိပါသေးတယ်။ အဲဒါကတော့ တရုတ်နဲ့ ဗမာစစ်တပ်ရဲ့ ပါဝင်မှုတွေပဲ ဖြစ်ပါလိမ့်မယ်။

ရှမ်းပြည်နယ်ဟာ လက်နက်ကိုင်အဖွဲ့အစည်း အတော်များများ စတင်ပေါက်ဖွားရာဒေသကြီး ဖြစ်ပါတယ်။ ၁၉၅၈ အိမ်စောင့်အစိုးရလက်ထက်လောက်ကတည်းက ရှမ်းလက်နက်ကိုင် အင်အားကလေးတွေ စတင်ခဲ့တာ ဖြစ်တယ်။ သမ္မတစဝ်ရွှေသိုက်ရဲ့ တရုတ်ပြည် အလည်အပတ်ခရီးစဉ်မှာ သူကိုယ်တိုင်က ရှမ်းပြည်နယ်ဟာ ဗမာပြည်ကနေ ခွဲထွက်နိုင်တယ်။ သီးခြားလွတ်လပ်တဲ့နိုင်ငံ ထူထောင်လိုတယ်။ ဒီနိုင်ငံဟာ တရုတ်နဲ့လည်း ပေါင်းချင်ပေါင်းသွားနိုင်တယ် ဆိုပြီး တရုတ်အစိုးရဘက်ကို ပြောခဲ့တာ ရှိပေမဲ့ တရုတ်က ဒီအကြံအစည်ကို လုံးဝလက်မခံ၊ အားမပေးခဲ့ဘူးလို့ ဆိုတယ်။ ဒီအကြောင်းက သမ္မတစဝ်ရွှေသိုက်ရဲ့ ခရီးစဉ်အတွင်း ဘာသာပြန်လုပ်ပေးခဲ့တဲ့ တရုတ်ရဲဘော်က ပြန်ရေးတဲ့ မှတ်တမ်းမှာ ဖော်ပြထားတာပါ။ ဒါကြောင့် ဗိုလ်နေဝင်း အာဏာသိမ်းအပြီး သမ္မတစဝ်ရွှေသိုက်ကို ဖမ်းဆီးထားချိန်ကတည်းက မဟာဒေဝီရဲ့ လူတွေက လက်နက်ကိုင်တော်လှန်ရေးကို အစပျိုးခဲ့တာ အဆန်းမဟုတ်တော့ပါဘူး။

KIA စတင်ပေါ်ပေါက်တာကလည်း ကချင်ပြည်နယ်ထဲမှာ မဟုတ်ဘဲ ရှမ်းပြည်က ကွတ်ခိုင်ခရိုင်ထဲမှာ ဖြစ်ပါတယ်။ ၁၉၅၀ ခုလောက်က တရုတ်နိုင်ငံကို ခိုဝင်သွားခဲ့တဲ့ ဗိုလ်နော်ဆိုင်းတပ်က ကျန်ရစ်ခဲ့တဲ့ ဗိုလ်ဇော်ဆိုင်းနဲ့ ရန်ကုန်တက္ကသိုလ်က ကျောင်းသား ၇ ဦး၊ အစိုးရတပ်က ထွက်လာတဲ့ ကချင်တချို့ပေါင်းပြီး ထူထောင်ခဲ့ကြတာ ဖြစ်တယ်။ ကယန်းပြည်သစ်ပါတီကို စတင်တဲ့ထဲမှာပါတဲ့ ဦးရွှေအေးဟာလည်း ၆၂ ခုနှစ် ရန်ကုန် တက္ကသိုလ်ကျောင်းသားအရေးကို မီတဲ့ပုဂ္ဂိုလ်ပဲ ဖြစ်တယ်။ သူဟာ အဲဒီအချိန်က ရန်ကုန်တက္ကသိုလ် လူမျိုးစုကျောင်းသားသမဂ္ဂရဲ့ အတွင်းရေးမှူးတာဝန်ယူခဲ့သူပါပဲ။ အခု SSPP နာယကကြီး ဦးဆေထင်ဟာလည်း တက္ကသိုလ်ကျောင်းသားက တောခိုလာတာဖြစ်ပြီး တောထဲရောက်မှ ‘ဆေ’ ဆိုတဲ့ ကျားဘွဲ့ခံယူပြီး နောက်ပိုင်းမှာ ‘စဝ်’ ဆိုတဲ့ စော်ဘွားတွေ ခံယူတဲ့ နာမည်မျိုး ယူကာ ’ စဝ်ဆေထင်’ ဆိုပြီး ဖြစ်လာပါတယ်။

အစောပိုင်း ရှမ်းခေါင်းဆောင် အတော်များများဟာ ရှမ်းစော်ဘွားများကဲ့သို့ ‘စဝ်’ ဆိုတဲ့ နာမည်ခံယူကြတာ ဖြစ်တယ်။ အဲဒီအချိန်က စတင်ကြတဲ့ လက်နက်ကိုင်တွေ အများစုရဲ့ ရည်မှန်းချက်က သီးခြားနိုင်ငံထူထောင်ရေးပဲ ဖြစ်တယ်။ ကရင်နီခေါင်းဆောင်ပိုင်းက လက်ဝဲယိမ်းသလိုဖြစ်တဲ့ လူငယ်ခေါင်းဆာင် ကိုသန်းညွန့်ကို ဖမ်းပြီး သတ်ပစ်လိုက်ချိန်မှာ ကရင်နီလူမျိုးပေါင်းစုံ လွတ်မြောက်ရေးအဖွဲ့ဆိုတဲ့ ‘ကလလတ’ အဖွဲ့နဲ့ KNPP ကြား ကမ္ဘာရန်ဖြစ်သွားပါတယ်။ 

အခု ဦးထွန်းကျော် ခေါင်းဆောင်တဲ့အဖွဲ့ဟာ အစိုးရနဲ့ ငြိမ်းချမ်းရေးယူထားရာက နွေဦးတော်လှန်ရေးမှာ ပါဝင်သလို ဖြစ်လာတယ်။ KNPP ကလည်း PDF တွေကို သင်တန်းတွေ ပေးနေတယ်လို့ သတင်းများအရ သိကြရတာဖြစ်တယ်။ ကယန်းပြည်သစ်ပါတီ ခေါင်းဆောင်ကတော့ လက်ရှိအချိန်မှာ ကြားနေသလို လုပ်နေတာ ဖြစ်တယ်။

၁၉၉၀ မှာ ဗကပ ပြိုကွဲသွားတဲ့အတွက် ရှမ်းပြည်နယ်မှာ မူလလက်နက်ကိုင်များအပြင် ‘ဝ’ ကိုးကန့်နဲ့ မိုင်းလားအဖွဲ့တွေပါ တိုးလာပါတယ်။ လက်ရှိ ဗကပ ခေါင်းဆောင် ပေါက်ယိုချမ်းဟာ တပ်မဟာ ၆၈၃ ဆိုတာနဲ့ အတူ ရှမ်းလက်နက်ကိုင်တွေနဲ့တွဲပြီး ရှမ်းပြည်အလယ်ပိုင်းမှာ ၇၆ ခုနှစ်လောက်ကနေ ‘ဝ’ အာဏာသိမ်းချိန်လောက်အထိ လှုပ်ရှားခဲ့တာဖြစ်တယ်။ SSPP ဟာ ‘ဝ’ တပ်နဲ့ ရင်းနှီးတဲ့ ဆက်ဆံမှုရှိခဲ့တာပါ။ အဲဒီအချိန်မှာ ခွန်ဆာရဲ့တပ်က ဘိန်းတန်းတွေဟာ ရှမ်းပြည်အလယ်ပိုင်းကနေ နယ်စပ်ကို ကူးသန်းနေတာ ဖြစ်ပါတယ်။ ဗမာစစ်တပ်က ခွန်ဆာကို မတိုက်ဘဲ ဗကပနဲ့ SSPP ကိုပဲ တိုက်ပါတယ်။ ခွန်ဆာဘိန်းတန်းဟာ တပ်စုတစုကို စကားပြောစက်တလုံးစီ ထားနိုင်တဲ့ အဆင့်မြင့်တပ် ဖြစ်နေပါတယ်။ ‘ဝ’တပ်က ခွန်ဆာကို တိုက်နိုင်ပြီဆိုရင် ဘိန်းတွေနဲ့ အဖိုးတန်ပစ္စည်းတွေ ရပါတယ်။ ဗကပတပ်က ခွန်ဆာကို မတိုက်ရတဲ့အကြောင်းက CIA က ဖိအားပေးထားလို့ ဖြစ်တယ်လို့လည်း ဆိုကြတာ ဖြစ်တယ်။ ခွန်ဆာဟာ တပ်အင်အားတွေ တိုးပွားလာပြီး နယ်စပ်ဌာနချုပ်မှာ ရှမ်းနိုင်ငံရဲ့ သမ္မတကြီးအဖြစ်တောင် ခံယူခဲ့ပါသေးတယ်။

၁၉၈၅ ခုမှာ ဗကပကို တရုတ်ပြည်က အကူအညီအားလုံး ဖြတ်တောက်လိုက်ချိန်မှာ ဗကပဟာ ဘိန်းစီးပွားရေးထဲ ပါဝင်လာပါတယ်။ ဗကပဘိန်းတန်းတွေက ထိုင်းနယ်စပ်မှာ နယ်မြေအပိုင်တစ်ခု လိုအပ်လာတဲ့အတွက် ခွန်ဆာရဲ့လွယ်လန်းစခန်းတွေကို အင်အားအလုံးအရင်း သုံးပြီး တိုက်ခိုက်သိမ်းယူခဲ့ပါတယ်။ အဲဒီအချိန်ကစလို့ ဗကပ ‘ဝ’တပ်နဲ့ ခွန်ဆာက ကမ္ဘာ့ရန်ဖြစ်လာတာပါပဲ။ ကိုးကန့်ခေါင်းဆောင် ဖုန်ကျားစင်းက ဘိန်းလမ်းကြောင်းအတွက် ခွန်ဆာနဲ့ နီးကပ်တဲ့ ဆက်ဆံမှုတွေ လုပ်လာတယ်။ ခွန်ဆာရဲ့နာမည်ကြီးတပ်မှူးတချို့ ကိုးကန့်ထဲကို ရောက်လာတာတွေ ရှိလာပါတယ်။ 

ဒါကြောင့် ၁၉၉၂ လောက်မှာ ‘ဝ’ က တပ်ရင်း ၄ ရင်း လွှတ်ပြီး ကိုးကန့်ကို ခဏထိန်းထားခဲ့ဖူးပါတယ်။ နောက်ပိုင်း ဖုန်ကျားစင်းဟာ ခွန်ဆာနဲ့ အဆက်ဖြတ်ခဲ့ရပါတယ်။ ခွန်ဆာဟာ DEA ရဲ့ ဖမ်းဝရမ်းထုတ်ခံရပြီးနောက် နဝတလက်အောက် ခိုလှုံသွားပါတယ်။ ခွန်ဆာတပ်ကို ဖျက်သိမ်းခဲ့ပေမဲ့ လက်ကျန်အင်အားစုများကို ခေါင်းဆောင်ပြီး ယွက်စစ်က RCSS ဆိုတာကို ထူထောင်ခဲ့တာ ဖြစ်ပါတယ်။ လက်နက်ကိုင်တပ်တခုကို ဖျက်သိမ်းရာမှာ စစ်သားလုပ်တာ တစ်ခုပဲ သိတော့တဲ့ အောက်လက်ငယ်သားတွေအတွက် အစီအစဉ်တခုမှ မပါတဲ့အတွက် လက်ကျန်တပ်တွေက RCSS ထူထောင်ဖို့ လိုလောက်တဲ့ အင်အားဖြစ်လာခဲ့တာပါပဲ။ RCSS ဟာ နှစ်နှစ်ကျော်လောက်အတွင်းမှာ အင်အား ငါးထောင်၊ ခြောက်ထောင်လောက် ကြီးထွားလာတာလို့ ဆိုကြပါတယ်။

ထူးခြားတဲ့ဖြစ်စဉ်တခုဖြစ်ပြီး အခုချိန်ထိ ဆိုးကျိုးတွေ သက်ရောက်လာစေတဲ့ ကိစ္စတခု ပြောပါဦးမယ်။ အဲဒါကတော့ ၂၀၀၀ ပြည့်လောက်မှာ RCSS က ထိုင်းနိုင်ငံဘက်ကနေ ပတ်ပြီး တာချီလိတ်အောက်ဘက် လွယ်လန်းတောင်ကြောက စခန်းကုန်း ၇ ကုန်းကို တပြိုင်နက် ဝင်သိမ်းတာပါ။ အဲဒီမှာ ‘ဝ’တပ်ထိုင်ထားတဲ့ ကုန်းတခုကလွဲလို့ ကျန်ကုန်းတွေ အကုန်ကျသွားပါတယ်။ အဲဒီအချိန်က တိုင်းမှူးဗိုလ်ချုပ်ခင်ဇော်ရဲ့တပ်တွေက ရှမ်းတပ်ကို ပြန်တိုက်မထုတ်နိုင်တဲ့အတွက် ‘ဝ’တပ်ကို အကူအညီတောင်းပါတယ်။ ‘ဝ’တပ်ကို ၁၂၀ မမ မော်တာကြီး ၄ လက်နဲ့ ကျည် ကြိုက်သလောက်သုံးဖို့ ပုံပေးပြီး တိုက်စေတာပါ။ ‘ဝ’တပ်က အကျအဆုံး အများကြီးခံပြီး ကုန်း ၅ ကုန်းကို ရအောင်ပြန်သိမ်းပေးခဲ့တာပါ။ လူမရှိတော့တဲ့ နောက်ဆုံးကုန်းကို ဗမာတပ်က တက်သိမ်းခဲ့တာပါ။ အဲဒီရဲ့အကျိုးဆက်အဖြစ် အဲဒီနယ်မြေကို ‘ဝ’တပ်ကို အပိုင်စားပေးခဲ့တာပါ။ လူဦးရေ သိပ်သည်းလွန်းပြီး ရိက္ခာမလောက်ဖြစ်နေတဲ့ ‘ဝ’နယ်က ရွာသားတွေကို တောင်ပိုင်းကိုရွှေ့ပြောင်းစေပြီး အခု ၁၇၁ လို့ခေါ်တဲ့ စစ်ဒေသကို ထူထောင်ခဲ့တာ ဖြစ်တယ်။ ဒီဒေသဟာ လူမနေတဲ့ လွတ်နေတဲ့ဒေသ မဟုတ်ဘဲ မူလက ရှမ်းနဲ့ လားဟူတွေ နေခဲ့ကြတာ ဖြစ်တယ်။ စစ်ဘေးဒဏ်ကြောင့် ထိုင်းနိုင်ငံဘက်ကို တိမ်းရှောင်နေရတဲ့ အချိန်မှာ ‘ဝ’ စစ်ဒေသဖြစ်သွားခဲ့ရတာပါပဲ။ အခုတော့ ‘ဝ’က အဆိုပြုထားတဲ့ ‘ဝ’ ပြည်နယ်မှာ ကျိုင်းတုံ၊ တာချီလိတ်နဲ့ လွယ်လန်းကြော ၁၇၁ စစ်ဒေသတွေ အကုန်ပါဝင်နေတာပါ။ နိုင်ငံသုံးနိုင်ငံ (တရုတ်၊ လာအို၊ ထိုင်း) ကို ခွထားလို့ရတဲ့နေရာရဲ့ အကျိုးကျေးဇူးကို ‘ဝ’ တွေ ကောင်းကောင်း သဘောပေါက်လာခဲ့တာပါပဲ။

‘ဝ’ တွေက ၁၇၁ စစ်ဒေသကို ထူထောင်လိုက်တဲ့အတွက် RCSS ရဲ့ မြောက်ဘက် ထွက်ပေါက်တွေကို ပိတ်လိုက်သလို ဖြစ်စေပါတယ်။ ဘေးမှာလည်း ဗမာတပ်ရှိတဲ့အတွက် RCSS ဟာ ပတ်လည်ဝိုင်းခံထားရတာပါ။ ဒီအခြေအနေကို ပြောင်းလဲဖို့အတွက် အခွင့်အလမ်းတစ်ခု ရခဲ့တယ်။ အဲဒါကတော့ ‘ဝ’ နဲ့ SSPP က NCA မထိုးဘဲ တင်းခံနေကြချိန် တောင်ကုန်းတနေရာနဲ့ ပတ်သက်ပြီး SSPP နဲ့  ဗမာတပ်နဲ့ စစ်ရေးတင်းမာမှု ဖြစ်ပါတယ်။ တပ်က SSPP ဌာနချုပ် ဝမ်ဟိုင်းနဲ့ အမြောက်တကမ်းမီတဲ့နေရာအထိ တက်သိမ်းလိုက်တယ်။ မြောက်ပိုင်းမှာ စခန်းသစ်ဖွင့်လိုတဲ့ RCSS အင်အားများစွာကိုလည်း စစ်ကားတွေနဲ့ ရွှေ့ပြောင်းပေးခဲ့တာပါ။ ဒီကိစ္စကို ‘ဝ’ ရော အခြားလက်နက်ကိုင်တွေကပါ ကန့်ကွက်ခဲ့ကြတာ ဖြစ်တယ်။ အဲဒီအချိန်ကစပြီး SSPP + TNL နဲ့ RCSS ကြား နယ်မြေလုတိုက်ပွဲတွေ ဖြစ်နေခဲ့တာပါ။ ဒါတွေက ဗမာစစ်တပ်ရဲ့ ရေတိုအကျိုးစီးပွား၊ တနပ်စားဉာဏ်တွေနဲ့ လုပ်လေ့ရှိတာတွေရဲ့ အကျိုးဆက်တွေပဲ ဖြစ်ပါတယ်။

အခုတော့ ပြဿနာက တမျိုး ဖြစ်လာပြန်ပါပြီ။ နမ့်ခမ်းကနေ ကျောက်မဲ၊ သီပေါ ခွင်တွေအထိ RCSS အင်နဲ့အားနဲ့ ရှိလာတာကို တရုတ်ကြီးက မလိုလားဘဲဖြစ်လာတာပါ။ SSPP ဆိုတာက တရုတ်ရဲ့လူရင်း ‘ဝ’ နဲ့ မဟာမိတ်ပါ။ SSPP နဲ့ ဗမာတပ် တင်းမာနေတုန်း (NLD) အစိုးရသက်တမ်း စခါစအချိန်လောက်) က ‘ဝ’ တပ်ရင်း ၂ ရင်း SSPP ကို ကူညီဖို့ သံလွင်ကို ဖြတ်ပြီး ပို့ပေးခဲ့သေးတာပါ။ ဒါကြောင့် တရုတ်အဖို့ ‘ဝ’ ကတဆင့် SSPP + TNLA ကိုပါ လွှမ်းမိုးထားနိုင်ရင် ရှမ်းပြည်နယ်ဟာ သူ့ရဲ့ မြန်မာဆိုင်ရာ ပေါ်လစီပုံသွင်းရေးမှာ အရေးပါတဲ့ နေရာ ဖြစ်လာမှာပါ။

RCSS ကတော့ တရုတ်အဖို့ ပြောရင် ထိုင်းနယ်စပ်မှာရှိတဲ့ နောက်ကြောင်းမရှင်းတဲ့အဖွဲ့ ဖြစ်နေပါတယ်။ ဒါကြောင့် အခုရှမ်းပြည်နယ်စစ်ပွဲဟာ SSPP + ဝတပ် + TNLA နဲ့ RCSS ကြားက နယ်မြေလုစစ်ပွဲကြီး ဖြစ်လာပါတယ်။ ဒါပေမဲ့ သူတို့သုံးဖွဲ့ရဲ့ နောက်ကွယ်မှာ တရုတ်နဲ့ ဗမာစစ်တပ် ရှိနေပါတယ်။ RCSS က ပရိုနွေဦးတော်လှန်ရေး ဖြစ်ချင်သယောင် ရှိပေမဲ့ သူဟာ မလှုပ်သာ မလှည့်သာအခြေအနေမှာ ရှိပါတယ်။ ရှမ်းပြည်နယ်ဟာ အသစ်ပေါ်လာမဲ့ PDF တွေကိုပဲ အားကိုးရစရာရှိပါတယ်။ ရှမ်းမြောက်မှာ ပရိုချိုင်းနားအဖွဲ့တွေ များနေလို့ PDF ပေါ်ဖို့ ခက်ပေမဲ့ ရှမ်းတောင်မှာတော့ PDF ၅ ဖွဲ့လောက် ပေါ်လာတာ တွေ့ရပါတယ်။

ရှမ်းပြည်နယ်မှာ ရှမ်း ၃၆ ရာခိုင်နှုန်း၊ ဗမာ ၁၁ ရာခိုင်နှုန်းနဲ့ ကျန်လူမျိုး ၅၃ ရာခိုင်နှုန်း ရှိပါတယ်။ လူမျိုးကိုယ်စားပြု လက်နက်ကိုင်အဖွဲ့ပေါင်း ၁၀ ဖွဲ့ကျော်ရှိတဲ့အတွက် ပင်ကိုကတည်းက ရှုပ်ထွေးမှုရှိနေခဲ့ပါတယ်။ ဒီကြားထဲမှာ ဗကပ ပြိုကွဲမှု၊ တရုတ်ရဲ့ စွက်ဖက်မှုနဲ့ ဗမာစစ်တပ်ရဲ့ တနပ်စားဉာဏ်၊ ရေတိုအမြင်နဲ့ လုပ်ဆောင်မှုတွေကြောင့် ရှမ်းပြည်နယ်အရေးဟာ သမိုင်းမှာ မကြုံဖူးလောက်အောင် ပြဿနာကြီးမားလာပါပြီ။

ဒီအရှုပ်အထွေးတွေဟာ NLD သက်တမ်း ၄ ၊ ၅ နှစ်လောက်နဲ့ ဖြေရှင်းနိုင်မှာမဟုတ်တာ သေချာပါတယ်။ ဒီရက်ပိုင်းမှာ Foreign Policy မှာပါတဲ့ ဆောင်းပါးတစောင်မှာ အခု နွေဦးတော်လှန်ရေးမှာ EAO တချို့ ပါဝင်ဖို့ လက်တွန့်နေတာဟာ NLD အစိုးရလက်ထက်က ပေါ်လစီအမှားတွေကြောင့် ဖြစ်နိုင်တယ်လို့ သုံးသပ်ထားတာတွေ့ရလို့ အလွန်စိတ်ပျက်ရပါတယ်။ နိုင်ငံခြား ဝေဖန်သုံးသပ်သူ အများစုဟာ မြန်မာ့နိုင်ငံရေးကို တစ်စွန်းတစ်စ အသိအမြင်တွေနဲ့ အဆုံးအထိ ကောက်ချက်ဆွဲရေးသားနေကြတာ များနေပါပြီ။ မြန်မာ့အရေးကို ပိုပြိးသိမယ်လို့ ယူဆရတဲ့ ပြည်တွင်းဝေဖန်ရေးသမားများတောင် အလွဲလွဲအမှားမှား သုံးသပ်တာတွေရှိခဲ့ကြတော့ နိုင်ငံခြားသားများ မှားတာ ဘာဟုတ်သေးလို့လဲလို့ပဲ ထင်စရာဖြစ်လာပါတယ်။

ဒီဆောင်းပါးကို ရေးဖြစ်တဲ့အကြောင်းကတော့ လူမှုကွန်ရက်မှာ ရခိုင်အရေး စဖြစ်ချိန်တုန်းကလို အစွန်းနှစ်ဖက်ကွဲပြားလာတဲ့ ဝေဖန်ဆဲဆိုမှုတွေ စိတ်မကောင်းစွာ တွေ့မြင်လာရလို့ ဖြစ်ပါတယ်။ တဘက်ကလည်း နိုင်ငံတကာ ဆောင်းပါးရှင်များရဲ့ နွေဦးတော်လှန်ရေးအတွက် အကျိုးမပြုတဲ့၊ အပျက်သဘော ရှုမြင်ချက်တွေနဲ့ ရေးသားတာတွေ တွေ့ရတာကြောင့်လည်း ပါပါတယ်။ တပြိုင်နက်မှာပဲ ဒီအခြေအနေကို ပြောင်းလဲပစ်လိုတဲ့ ရှမ်းလူငယ်တွေကို ပြည်ပမှာရော ပြည်တွင်းမှာပါ တွေ့မြင်နေကြရပါတယ်။ EAO မဟုတ်တဲ့ ရှမ်း နိုင်ငံရေးပါတီတွေကလည်း အခြေအနေအရ နှုတ်ဆိတ်နေကြတာ တွေ့ရတယ်။ လက်နက်ကိုင်အချင်းချင်း ညှိနှိုင်းဖြေရှင်းသွားကြတဲ့ နိုင်ငံရေးဟာ ဘယ်တော့မှ အမှန်ကို မရနိုင်ဘူးဆိုတာ သမိုင်းအတွေ့အကြုံတွေ များစွာ ရှိထားပြီးဖြစ်တဲ့အတွက် သူတို့ကလည်း ဓမ္မဘက်က ရပ်ပြီး Speak Out လုပ်ကြဖို့ လိုနေပါပြီ။

တရုတ်ဘက်ကလည်း သူ့အလိုကျမဖြစ်ရင် Proxy war အထိဖြစ်အောင် လုပ်လို့ရတယ် ဆိုတာကို အမြည်းအနေနဲ့ ပေးနေတာဖြစ်တယ်။ အာဏာလက်မလွတ်ရေးသာ အဓိက ဦးစားပေးဖြစ်တဲ့ ပြည်တွင်း တနပ်စားအုပ်စုက လေယူရာယိမ်းပြီး မတည့်သူမရှိ ကြုံရာလူနဲ့ပေါင်းဖို့ ဝန်မလေးကြောင်း ဖော်ပြနေမှာပဲ ဖြစ်တယ်။ ဒီအချိန်မှာ ရှမ်းပြည်နယ်မှာ ဓမ္မဘက်ကလိုက်တဲ့ လူငယ်အင်အားစုတွေ၊ PDF တွေပေါ်ဖို့ အရေးကြီးလာပါတယ်။ ဒီဆောင်းပါးမှာ အဖြစ်အပျက်အကြောင်းအရာတွေရဲ့ အချိန်၊ နေရာ အတိအကျ၊ ပုဂ္ဂိုလ်အမည်၊ အင်အားအချိုးအစားတွေကို အလေးထား ဖော်ပြတာမဟုတ်ဘဲ ဖြစ်စဉ်တွေကိုပဲ ရုပ်လုံးပေါ်အောင် ဦးစားပေး ဖော်ပြတာဖြစ်တယ်။ ဒီဖြစ်စဉ်တွေကမှ လိုအပ်တဲ့နိုင်ငံရေး အကောက်အယူတွေ ကောက်ယူလို့ရနိုင်တာ ဖြစ်ပါတယ်။

ဒီအကောက်အယူတွေကို အားဖြည့်ပေးနိုင်တဲ့ အသေးစိတ်အချက်အလက် အမြောက်အမြားရှိပေမဲ့ ဒီဆောင်းပါးမှာ ဖော်ပြနိုင်မှာ မဟုတ်ပါဘူး။ မြန်မာ့အရေးဟာ အလုံးစုံပြောင်းလဲရေးကို သွားမလား၊ စစ်ကျွန်ဘဝကိုပဲ ပြန်သွားမလားဆိုတာ ရွေးချယ်စရာ ဖြစ်နေပါတယ်။ ဖိနှိပ်သတ်ဖြတ်ခံနေရတဲ့ ပြည်သူအများစုကြီးအဖို့ ဒါက မေးခွန်းမဟုတ်ပေမဲ့ ကိုယ်ကျိုးစီးပွားပဲ ဦးထိပ်ထားနေတဲ့ အဖွဲ့အစည်းတချို့အတွက်တော့ မေးခွန်းအကြီးစား ဖြစ်နေပါတယ်။ တချို့သောအဖွဲ့များဟာ အကျိုးစီးပွားတွေ အရင်ဖြေရှင်းပြီးမှ မေးခွန်းကို ဖြေဆိုနိုင်မယ်လို့ ယူဆကြမှာဖြစ်တဲ့အတွက် နွေဦးမှာ တချို့ကို ချန်ထားခဲ့ရမှာဖြစ်သလို အင်အားသစ်တွေကို မွေးဖွားနိုင်ရမှာပဲ ဖြစ်ပါတယ်။ ခုနစ်ဆွေး ရှစ်ဆွေးကြာလာနေပြီဖြစ်တဲ့ ပြည်တွင်းစစ်ကြီး၊ ပဋိပက္ခကြီးထဲမှာ တချို့ဟာ တချို့တိုးတက်ပြုပြင်လာနိုင်ကြမှာ မဟုတ်တော့ပါဘူး။ ဒီလိုအခြေအနေတွေက ပြည်ပစွက်ဖက်မှုကို ဖိတ်ခေါ်နေသလိုဖြစ်တဲ့အတွက် သတိထားကြဖို့ လိုသော်လည်း သတိထားလောက်တဲ့ ဉာဏ်ပညာကို အကျိုးစီးပွားတွေကပဲ ဖုံးအုပ်နေမှာဖြစ်တဲ့အတွက် မြန်မာ့အရေးဟာ Proxy war မဖြစ်ရင် ကံကောင်းလို့ မှတ်ယူရစရာ ရှိပါတယ်။

ဒါပေမဲ့ ပြည်သူတရပ်လုံးရဲ့ ညီညွတ်တဲ့အားနဲ့သာ အရာရာကို ကျော်ဖြတ်နိုင်မှာဖြစ်ကြောင်း ပြသနိုင်ဖို့ပဲ ကြိုးစားကြရမှာ ဖြစ်ပါတယ်။

အရင်ကတော့ ရှမ်းပြည်နယ်တွင်း ပြဿနာတွေ ဖြေရှင်းနိုင်ရင် မြန်မာ့တိုင်းရင်းသားဆိုင်ရာ အရေးများအတွက် စံပြဖြစ်လာနိုင်တယ်ဆိုတဲ့ ယူဆမှုများ ရှိခဲ့ကြပေမဲ့ အခုအခါမှာတော့ ကချင်ပြည်နယ်၊ စစ်ကိုင်းတိုင်း၊ ချင်း၊ မကွေး၊ ပဲခူးတိုင်း၊ ဧရာဝတီတိုင်းရဲ့ အမာခံအုံကြွမှုများနဲ့အတူ ရှမ်းမပါဘဲ မြန်မာ့အရေး ဖြေရှင်းသွားတာမျိုးလည်း ဖြစ်လာနိုင်ပါတယ်။

စစ်သွေးမိုးဦး

(ဤဆောင်းပါးတွင်ဖော်ပြထားသည့် သဘောထားအမြင်များသည် ဆောင်းပါးရှင်၏ အာဘော်သာဖြစ်ပါသည်။ ဤဆောင်းပါးကို ရေးသားသူသည် စာရေးဆရာ ညီပုလေးမဟုတ်ပါ။ မူလဖော်ပြထားသည့် ဆောင်းပါးရှင်အမည် ငြိမ်းချမ်းစိမ်းလန်းသည် ဆရာညီပုလေး၏ ကလောင်ခွဲတစ်ခုနှင့် ဆင်တူနေပါသဖြင့် ကလောင်နာမည်ကို ပြန်ပြောင်းလဲထားပါသည်။)

2 weeks Ago

ရှမ်းပြည်တပ်မတော်ချင်း တိုက်ပွဲကြောင့် မိုင်းကိုင်တွင် စစ်ဘေးရှောင် ၇၀၀ ကျော်ထပ်မံရောက်ရှိ

ရှမ်းပြည်တောင်ပိုင်း ကျေးသီးမြို့နယ်၊ လွိုင်ဟွန်းတောင်ကြောတလျှောက်မှာ ပြီးခဲ့တဲ့ အပတ်က ရှမ်းပြည်တပ်မတော် RCSS နဲ့ SSPP  တို့အကြား တိုက်ပွဲဖြစ်လို့ ဒေသခံရွာသားထောင်ချီ စစ်ဘေးတိမ်းရှောင်ထွက်ပြေးနေရပါတယ်။

လွိုင်ဟွန်းတောင်ကြောအရှေ့ဘက် ကျေးသီးမြို့နယ်ထဲက ရွာသား ၂၀၀၀ ကျော် ကျေးသီးမြို့နယ်ရှိ ဘုန်းကြီးကျောင်းတွေမှာ ထွက်ပြေးခိုလှုံနေသလို တောင်ကြောအနောက်ဘက် မိုင်းကိုင်မြို့ နယ်ထဲက ရွာသား ၇၀၀ ကျော်ဟာလည်း ဟွေ့လုံကျေးရွာအုပ်စုမှာ လာရောက်တိမ်းရှောင်နေ ကြပါတယ်။ 

ကျေးသီးမြို့နယ်ထဲက စစ်ဘေးရှောင်တွေဟာ ပြီးခဲ့တဲ့ ဇွန်လဆန်းပိုင်းကတည်းက တိမ်းရှောင်ခဲ့ပြီး မိုင်းကိုင်မြို့နယ်ထဲမှာတော့ ဒီဇူလိုင်လ ၆ ရက်နေ့ကမှ စရောက်လာတာဖြစ်ပါတယ်။ 

အဲဒီနေ့ကစ ရွာသားတွေ တစစတိမ်းရှောင်လာရာမှာ မနေ့ကအထိ ၇၀၀ ကျော်သွားပြီလို့ စစ်ဘေးရှောင်တွေကို သွားရောက်ကူညီခဲ့တဲ့ မိုင်းကိုင်ဒေသခံ စိုင်းဆိုင်ဟန်က ဒီဗွီဘီကို ပြောပါတယ်။ 

“ကျနော်တို့က ဒေသခံဆိုတော့ လာကူတဲ့အဖွဲ့တွေကို လိုက်ပို့တာပါခင်ဗျ၊ မနေ့က ကျနော်တို့ ရောက်သွားတော့ စစ်ဘေးရှောင် ရွာသားတွေဟာ ဟွေ့လုံကျေးရွာအုပ်စုက ဝမ်လျန့် ၊ ဟွေ့လုံနဲ့ နောင်လီဘုန်းကြီးကျောင်းမှာရော ဟွေ့လုံကျေးရွာစာသင်ကျောင်းတွေမှာပါ ခိုလှုံနေကြပါတယ်၊ စုစုပေါင်း ၇၀၀ ကျော်ရှိသွားပြီ၊ သူတို့က တိုက်ပွဲဖြစ်တဲ့ လွိုင်ဟွန်းတောင်ခြေ အနောက်တကြော မိုင်းခွန်ကျေးရွာအုပ်စုထဲကပါ။ ရွာတွေက အများကြီးပါ။ ဖတ်းဖစ်၊ လွိုင်ဟွန်း၊ ပန်လော့၊ ကုန်းမုန့်၊ နမ့်တောက်၊ မတ်ခီနူ စတဲ့ရွာတွေပေါ့။ တိုက်ပွဲက မနေ့နဲ့ ဒီကနေ့ ငြိမ်နေတယ်၊ တမြန်နေ့ညထိတော့ သေနတ်သံ ကြားရတယ်လို့ ပြောတယ်။”

တိုက်ပွဲရှောင်ရွာသားတွေကို SNLD ပါတီက အလှူရှင်တွေထံက ထောက်ပံ့ကူညီရေးတွေ စုစည်းပေးအပ်ခဲ့ပြီး တခြားအဖွဲ့တွေလည်း သွားရောက်ကူညီနေတယ်လို့ ဆိုပါတယ်။ 

RCSS နဲ့ SSPP နှစ်ဘက်တပ်တွေဟာ နယ်မြေစိုးမိုးရေးနဲ့ ပတ်သက်ပြီး အဆိုပါ လွိုင်ဟွန်းတောင်ခြေတဝိုက်မှာ ပစ်ခတ်နေတာ တစ်လကျော်ကြာမြင့်ခဲ့ပါတယ်။ တိုက်ပွဲအခြေ အနေနဲ့ ပတ်သက်ပြီး နှစ်ဘက်တပ်ပြောရေးဆိုခွင့်ရှိသူတွေကို ဆက်သွယ်မေးမြန်းလို့ မရသေးပါဘူး။

SSPP တာဝန်ရှိသူတယောက်ကတော့ လွိုင်ဟွန်းတောင်တိုက်ပွဲ ဇူလိုင်လ ၁၀ ရက်နေ့က ပြီးဆုံး သွားတဲ့အကြောင်း သူ့ရဲ့ ကိုယ်ပိုင်လူမှုကွန်ရက်မှာ ရေးသားထားပါတယ်။ အဲဒီနောက် တောင်ထိပ်မှာ SSPP ဝင်ရောက်နေရာယူပုံတွေ ထွက်ပေါ်နေပါတယ်။ 

RCSS ဘက်ကတော့ လတ်တလောတိုက်ပွဲတွေကြောင့် ဒေသခံကျေးလက်ပြည်သူတွေ ဆင်းရဲဒု က္ခရောက်နေရတဲ့အပေါ် စိတ်မကောင်းဖြစ်မိကြောင်း၊ နိုင်ငံရေးပြဿနာကို ငြိမ်းချမ်းစွာ တွေ့ဆုံဆွေးနွေးတဲ့နည်းလမ်းနဲ့အဖြေရှာဖို့ ဇူလိုင်လ ၈ ရက်နေ့စွဲနဲ့ ထုတ်ပြန်ထားပါတယ်။

လွိုင်ဟွန်းတောင်တိုက်ပွဲမှာ  RCSS  ဘက်က နောက်ဆုတ်ပေးလိုက်တယ်လို့ ကျေးသီးမြို့ ခံက ပြောပါတယ်။ 

2 weeks Ago

June 28, 2021

SSPP ရှမ်းလက်နက်ကိုင်အဖွဲ့အား ဆန္ဒပြစဉ် ဗုံးပေါက်ကွဲမှုဖြစ်၊ ၁ ဦးသေဆုံး ၅ ဦး ဒဏ်ရာရ

ရှမ်းပြည်မြောက်ပိုင်း မူဆယ်ခရိုင် နမ့်ခမ်းမြို့ထဲမှာ ဒီကနေ့ နေ့ခင်းပိုင်းက ပြည်သူတွေက SSPP ရှမ်းလက်နက်ကိုင်အဖွဲ့ကို ဆန့်ကျင်ဆန္ဒပြနေစဉ် ဗုံးပေါက်ကွဲမှု အနည်းဆုံး ၃ ကြိမ်ခန့် ဖြစ်ပွားပြီး အမျိုးသား ၁ ဦး သေဆုံးကာ အမျိုးသမီး ၄ ဦးနဲ့ အမျိုးသား ၁ ဦး ဒဏ်ရာပြင်းစွာ ရရှိခဲ့ပါတယ်။ 

နမ့်ခမ်းမြို့ မန့်ဆွမ်းကျေးရွာက ရှမ်းလူငယ်အဖွဲ့ခေါင်းဆောင် ၁ ဦးကို SSPP လက်နက်ကိုင်အဖွဲ့က ဖမ်းဆီးသွားပြီး သူတို့လက်ထဲ သေဆုံးသွားတဲ့အပေါ်မကျေနပ်လို့ ဒေသခံတွေဟာ မနေ့ညက မန့်ဆွမ်းရွာမှာ တစ်ကြိမ်ဆန္ဒပြခဲ့ပြီး ဒီကနေ့ မွန်းလွဲ ၁ နာရီလောက်မှာလည်း လူအင်အား ၁၀၀၀ ကျော်နဲ့ နမ့်ခမ်းမြို့လယ်ကောင် ပြည်ထောင်စုလမ်းမကြီးပေါ်  ချီတက်ဆန္ဒပြလာခဲ့ကြပါတယ်။ 

ဆန္ဒပြစစ်ကြောင်းဟာ နမ့်ခမ်းဈေးကြီးနား ရောက်ခါနီးမှာတော့ အရှေ့မှာ ပေါက်ကွဲသံတွေ ဆက်တိုက်ကြားရတယ်လို့ ဆန္ဒပြတဲ့ထဲပါဝင်သူ ပြည်သူ ၁ ဦးက ဒီဗွီဘီကို ပြောပါတယ်။ 

“ပေါက်ကွဲတာက ကျနော်တို့ရှေ့နားလေးတင် ပေ ၂၀ - ၃၀ လောက်အကွာ ဈေးထောင့်မှာ ဖြစ်သွားတာပါခင်ဗျ။ ကျနော်တို့က အနောက်ဘက်လောက်မှာဆိုတော့ ဖြစ်စဉ်ကို မတွေ့ဘူး။ ပေါက်ကွဲသံတော့ ၆ ခါလောက် ကြားရတယ်။ အဲဒီလိုဖြစ်တော့ ဆန္ဒပြတဲ့လူစုလည်း ကွဲသွားတယ်။ အဲဒီနားက လူတွေ မေးကြည့်တာတော့ ဗုံးခွဲတဲ့လူက ၄ ယောက်ရှိတယ်။ ဆိုင်ကယ် ၂ စီးနဲ့ လာတယ်။ ဆိုင်ကယ်ပေါ်ကနေ ပစ်ချတဲ့သဘော၊ ဒါပေမဲ့ ၁ စီးက သူတို့လည်းဗုံးထိပြီး ၁ ယောက်သေ ၁ ယောက်ဒဏ်ရာပြင်းတယ်၊ တချို့လည်း ၂ ယောက်လုံး သေတယ်လို့ပြောတယ်။ ဘာလို့လဲဆိုတဲ့ အဲဒီ ၂ ယောက်မှာ သေနတ်ပါတယ်၊ မပေါက်သေးတဲ့ဗုံးလည်း ပါတယ်တဲ့၊ သူတို့ကို စစ်တပ်က လာသယ်သွားတော့ နောက်ဆက်တွဲမသိရဘူး။”

ဒါ့အပြင် အဆိုပါပေါက်ကွဲမှုကြောင့် ဈေးရှေ့မှာ ရွှေရင်အေး ရောင်းနေတဲ့ မိန်းကလေး ၂ ယောက် ထိခိုက်ဒဏ်ရာရသွားသလို ဈေးနဲ့ တပြလောက်သာကွာဝေးတဲ့ မြို့လယ်ဘုရားနားမှာလည်း Vigo  အဖြူရောင်ကား ၁ စီးပေါ်ကနေ  ဗုံးပစ်ချသွားလို့ ဆိုင်ကယ်စီးလာတဲ့ အမျိုးသမီး ၂ ဦး ထိခိုက်ဒဏ်ရာရပြီး ၁ ဦးမှာ ခြေထောက်တစ်ဖက် ပြတ်သွားတယ်လို့ ဆိုပါတယ်။ 

ဒဏ်ရာရ အရပ်သားပြည်သူတွေကို ပရဟိတလူမှုကူညီရေးအဖွဲ့က ဆေးရုံကို ပို့ပေးပြီး ဆိုင်ကယ်စီး လက်နက်ကိုင် ၂ ဦးကိုတော့ စစ်တပ်နဲ့ ရဲတွေ လာသယ်သွားတယ်လို့ ဆိုပါတယ်။ 

ဖောက်ခွဲမှု ကျူးလွန်သူတွေဟာ မည်သူမည်ဝါဖြစ်တယ်ဆိုတာတော့ မသိရဘဲ ဒေသခံ တချို့ကတော့ SSPP အဖွဲ့ကပဲ ဖြစ်လိမ့်မယ်လို့ သုံးသပ်နေကြပါတယ်။ 

မူဆယ်နဲ့ နမ့်ခမ်းမြို့နယ်ထဲမှာ ခုရက်ပိုင်းအတွင်း SSPP/SSA ဘက်က လူသစ် စုဆောင်းတာ၊ RCSS အဖွဲ့နဲ့ ဆက်စပ်တယ်ဆိုပြီး ဖမ်းဆီးမှုတွေရှိနေရာက အဖမ်းခံရသူ လူငယ်ခေါင်းဆောင် ၁ ဦး သေဆုံးသွားတာတွေကြောင့် ပြည်သူတွေကြား မကျေနပ်မှုတွေ မြင့်တက်နေပြီး ခုလို လမ်းပေါ်ထွက် ဆန္ဒပြတဲ့ထိဖြစ်လာရတယ်လို့ ဒေသခံတွေက ပြောသွားပါတယ်။ 

1 month Ago

SSPP ဖမ်းသွားသည့် နမ့်ခမ်းရှမ်းလူငယ်အဖွဲ့ဒုဥက္ကဋ္ဌ သေဆုံး၊ အလောင်းပြန်ရရေး တောင်းဆို ဆန္ဒပြ

SSPP တပ်ဖွဲ့က ဖမ်းသွားတဲ့ နမ့်ခမ်းရှမ်းလူငယ်အဖွဲ့ဒုဥက္ကဋ္ဌ သေဆုံးသွားပြီး အလောင်းပြန်ရရေးအတွက် မိသားစုဝင်တွေနဲ့ရွာသားတွေက တောင်းဆိုဆန္ဒပြခဲ့ကြပါတယ်။

ရှမ်းပြည်မြောက်ပိုင်း၊ မူဆယ်ခရိုင်၊ နမ့်ခမ်းမြို့နယ်ထဲမှာ SSPP/SSA ရှမ်းပြည်တပ်မတော်က တစ်လနီးပါး ဖမ်းဆီးထားတဲ့ နမ့်ခမ်းရှမ်းလူငယ်အဖွဲ့ ဒုဥက္ကဋ္ဌ စိုင်းဆန်ခမ်းအိုက်ဟာ ဇွန် ၂၆ ရက်နေ့က သွေးတိုးရောဂါနဲ့ သေဆုံးသွားတယ်လို့ သက်ဆိုင်ရာအဖွဲ့အစည်းက မိသားစုထံ  ဇွန်လ ၂၇ ရက်မှာ အကြောင်းကြားလာပါတယ်။ 

ဒါပေမဲ့ စိုင်းဆန်ခမ်း အိုက်သေဆုံးတာကို မိသားစုဝင်တွေက မတွေ့မမြင်ရလို့ သွေးတိုးရောဂါနဲ့ဆုံးတယ်ဆိုတာကို လက်မခံနိုင်တဲ့အပြင် သူ့အလောင်းကို ထုံးတမ်းစဉ်လာအရ ကောင်းမွန်စွာ ပြုစုသင်္ဂြိုဟ်ပေးလိုတဲ့အတွက် မိသားစုဝင်နဲ့ ရွာသား ၂၀၀ ကျော်လောက်ဟာ ဇွန် ၂၇ ရက် ည ၇ နာရီက နမ့်ခမ်းမြို့ မန့်ဆွမ်းရွာရှိ SSPP အဖွဲ့ဝင်တွေ လာရောက်တည်းခိုနေတဲ့ အိမ်ကိုသွားရောက်ပြီး အလောင်းပြန်ရဖို့ ဆန္ဒပြတောင်းဆိုခဲ့တယ်လို့  မန့်ဆွမ်းရွာသား တစ်ယောက်က ဒီဗွီဘီကို ပြောပါတယ်။

“သူ့ကိုဖမ်းသွားတာက မေလ ၃၁ ရက်နေ့ကပါ။ RCSS/SSA နဲ့ ပတ်သက်တယ်လို့ပြောပြီး ခေါ်သွားတာ၊ အမှန်က သူက RCSS အဖွဲ့ဝင်မဟုတ်ဘူးဆိုတာကို ရွာသူကြီးရော ရွာသားတွေရော လက်မှတ်ထိုးပြီး ထောက်ခံထားတယ်၊ သက်သေမရှိဘဲ ဖမ်းခေါ်သွားလို့ မိသားစုတွေက မကျေနပ်ဘူးပေါ့နော်၊ ပြီးတော့ တရားရုံးမှာ စစ်မယ်ပြောပြီး ခုလို သေဆုံးသွားရတဲ့အပေါ်မှာ တာဝန်ရှိသူကို စုံစမ်းစစ်ဆေးဖို့ တရားမျှတမှုရှိဖို့လည်း တောင်းဆိုတယ်။”

ဒါ့အပြင် နောက်ကို ခုခံနိုင်စွမ်းမရှိတဲ့ ရွာသားတွေကို အနိုင်မကျင့်ဖို့၊ ရွာသားတွေကို သံသယရှိရုံနဲ့ ဖမ်းဆီးသတ်ဖြတ်တာတွေမလုပ်ဖို့ တောင်းဆိုချက်တွေကို တာဝန်ရှိသူတွေဆီ စာနဲ့လည်း အကြောင်းကြားထားတယ်လို့ ဆိုပါတယ်။ 

ဒါပေမဲ့ ရွာသားတွေ သွားရောက်ဆန္ဒပြတဲ့အခါ နယ်မြေခံ SSPP တာဝန်ရှိသူကို မတွေ့ရဘဲ လက်အောက်တပ်ဖွဲ့ဝင် ၁၀ ဦးခန့်သာတွေ့ရပြီး သူတို့က အော်ဟစ်ငေါက်ငမ်းလိုက်တဲ့အပြင် သေနတ်နဲ့ပစ်ဖောက် ခြိမ်းခြောက်ခဲ့လို့ ရွာသားတွေ ပြန်လှည့်လာခဲ့ရတယ်လို့ ပြောပါတယ်။ 

သေဆုံးသူ စိုင်းဆန်ခမ်းအိုက်မှာ အသက် ၅၀ လောက်ရှိပြီး ရပ်ရေးရွာရေးမှာ တက်ကြွစွာ ပါဝင်ကူညီလေ့ရှိသူဖြစ်ကြောင်း၊ ယခင်က မန့်ဆွမ်းရွာသူကြီးဟောင်းဖြစ်ခဲ့ဖူးပြီး လက်ရှိ နမ့်ခမ်း ရှမ်းလူငယ်အဖွဲ့ TYO ဒုဥက္ကဋ္ဌနဲ့ လွိုင်ဟိုဆေဒေသ လူငယ်ခေါင်းဆောင်ဖြစ်ကာ ဇနီးနဲ့ ကလေး ၃ ယောက်ကျန်ရစ်ပါတယ်။ 

မူဆယ်နမ့်ခမ်းဒေသမှာ ဒီလထဲ SSPP တပ်ဖွဲ့က ရွာသားတွေကို ဖမ်းဆီးမှုတွေရှိနေကြောင်း၊ ပြီးခဲ့တဲ့ ၂၆ ရက်နေ့ကလည်း ကွန်လုံရွာသား ၂ ယောက်နဲ့ နောင်ဟင်ရွာသား ၂ ယောက် ထပ်မံအဖမ်းခံရပြီး ဘာကြောင့်ဖမ်းသွားလဲဆိုတာတော့ မသိရသေးဘူးလို့ နမ့်ခမ်းဒေသခံက ပြောပါတယ်။

1 month Ago
More News
Up