NCA

September 9, 2021

အရပ်သားအုပ်ချုပ်မှုထံ အာဏာလွှဲပြောင်းရေးအပါအဝင် ရည်မှန်းချက် ၇ ရပ် PPST ချမှတ်

တိုင်းပြည်ရဲ့အာဏာကို အရပ်သားကိုယ်စားလှယ်တွေ အုပ်ချုပ်မှုနဲ့ ဒီမိုကရေစီမူဘောင်ထဲကို မြန်မြန်ပြန်လွှဲပြောင်းရေး ဝိုင်းဝန်းအဖြေရှာရေးအပါအဝင် ရည်မှန်းချက် ၇ ချက် ချမှတ်နိုင်ခဲ့တယ်လို့ အန်စီအေ အပစ်ရပ်တိုင်းရင်းသားလက်နက်ကိုင်အဖွဲ့တွေရဲ့  ငြိမ်းချမ်းရေးလုပ်ငန်းစဉ် ဦးဆောင်အဖွဲ့ (PPST)  စက်တင်ဘာ ၉ ရက် ဒီကနေ့ ကြေညာပါတယ်။

တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ် (အန်စီအေ) လက်မှတ်ရေးထိုးထားတဲ့ တိုင်းရင်းသားလက်နက်ကိုင်တော်လှန်ရေးအဖွဲ့အစည်းတွေ (NCA-S EAO)ရဲ့ ငြိမ်းချမ်းရေးလုပ်ငန်းစဉ်ဦးဆောင်အဖွဲ့(PPST) အစည်းအဝေးကို  စက်တင်ဘာ ၇ ရက်မှ ၉ ရက်အထိ  ၃ ရက်တာ Video Conferencing နဲ့ ကျင်းပရာမှာ အန်စီအေရဲ့ အနှစ်သာရဖြစ်တဲ့ နိုင်ငံရေး ပြဿနာကို  နိုင်ငံရေးနည်းနဲ့ ဖြေရှင်းရေးအတွက် နိုင်ငံရေးရည်မှန်းချက် ၇ ရပ်ကို ချမှတ်လိုက်တာလို့ ဆိုပါတယ်။

ဒီနေ့ အစည်းအဝေးအပြီး PPST) အလုပ်အဖွဲ့ ခေါင်းဆောင် နိုင်အောင်မင်း ကိုယ်စားအဖွဲ့ဝင် ဗိုလ်မှူးကြီး စိုင်းငင်းက “မိမိတို့ PPST အနေနဲ့ အန်စီအေ အနှစ်သာရဖြစ်တဲ့ နိုင်ငံရေးပြဿနာကို နိုင်ငံရေးနည်းနဲ့ ဖြေရှင်းရေး၊ သက်ဆိုင်သူအားလုံးပါဝင်ပြီး အဓိပ္ပာယ်ပြည့်ဝတဲ့ နိုင်ငံရေးဆွေးနွေးပွဲများ ဖြစ်မြောက်ရေး၊ အရပ်သားများအား အကာအကွယ်ပေးရေးတို့ကို အခြေခံလို့ လက်ရှိ နိုင်ငံရေးအကျပ်အတည်း ဖြေရှင်းနိုင်ရေးအတွက် နိုင်ငံရေး ရည်မှန်းချက်များ ၇ ရပ်ကို ချမှတ်နိုင်ခဲ့ပါတယ်” လို့ နိဂုံးချုပ် အမှာစကားပြောသွားပါတယ်။

ရည်မှန်းချက် ၇ ရပ်ထဲမှာ နိုင်ငံ့ခေါင်းဆောင်တွေအပါအဝင်  ဖမ်းဆီးထားတဲ့ပုဂ္ဂိုလ်အားလုံးကို ခြွင်းချက်မရှိအမြန်ဆုံး လွှတ်ပေးပြီး နိုင်ငံရေးမတူညီမှုတွေကို  ဆွေးနွေးအဖြေရှာဖို့၊ အနာဂတ်ငြိမ်းချမ်းရေးဆွေးနွေးပွဲတွေမှာ  သက်ဆိုင်သူအားလုံး ပါဝင်ပြီး နိုင်ငံတကာရဲ့ ကူညီပံ့ပိုးမှုနဲ့ နိုင်ငံရေးနည်းလမ်းနဲ့ အဖြေရှာသွားဖို့ စတာတွေ ပါဝင်ပါတယ်။

ပြီးတော့ တိုင်းပြည် ရေရှည်တည်တံ့ရေး၊ တည်ငြိမ်ရေး၊ သာယာဝပြောရေးတို့ကို ရှေးရှုပြီး လူထုကို ကာကွယ်ပေးတဲ့ လုံခြုံရေး စနစ်တည်ဆောက်သွားဖို့၊ နိုင်ငံတကာအသိုက်အဝန်းမှာ ပြည်ထောင်စု မြန်မာနိုင်ငံ ဂုဏ်သိက္ခာရှိစွာ  ရပ်တည်နိုင်ရေး တိုင်းပြည် အခြေခံအဆောက်အအုံ Institutions တွေကို ပြုပြင်ပေါင်းလဲမှု ပြုလုပ်သွားဖို့စတာတွေလည်း ပါဝင်ပါတယ်။

ဒါ့အပြင် ပြည်သူလူထုရဲ့ အသက်အိုးအိမ်စည်းစိမ်ကို အကာအကွယ်ပေးတာနဲ့  ပြည်သူလူထုတွေရဲ့ ဆုံးရှုံးနစ်နာမှုတွေအတွက် ဘဝ ပြန်လည်ထူထောင်ရေး၊ ကုစားရေးအစီအစဉ်တွေ ဆောင်ရွက်သွားဖို့ နဲ့ ရေရှည်တည်ငြိမ် ငြိမ်းချမ်း သာယာဝပြောဖွံ့ဖြိုးတိုးတက်ရေးကို ဦးတည်ပြီး ဖယ်ဒရယ်ဒီမိုကရေစီ ပြည်ထောင်စုကို တည်ဆော်သွားဖို့ စတဲ့ နိုင်ငံရေးအကျပ်အတည်း ဖြေရှင်းရေးနဲ့ ပတ်သက်လို့ PPST ရဲ့ရပ်တည်ချက်ကို  ရှင်းလင်းပြောဆိုထားပါတယ်။

ဗိုလ်မှူးကြီး စိုင်းငင်းက “ပြီးခဲ့တဲ့ စက်တင်ဘာ ၇ ရက်နေ့မှာ အမျိုးသား ညီညွတ်ရေးအစိုးရ (NUG) က ထုတ်ပြန်တဲ့ အရေးပေါ်အခြေအနေ ကြေညာခြင်းနဲ့ ပတ်သက်လို့ ပြောရမယ်ဆိုရင် ထူးခြားတဲ့ အခြေအနေမှာ နိုင်ငံရေးတောင်းဆိုချက်အရ NUG ရဲ့ နိုင်ငံရေး ကြိုးပမ်းမှုတရပ်ဖြစ်ကြောင်းကို မိမိတို့ PPST အနေနဲ့ ရှုမြင်ကြောင်း အသိပေး ပြောကြားလိုပါတယ်” လို့ ပြောပါတယ်။

ပြည်သူတွေ ကြုံနေရတဲ့ နိုင်ငံရေး၊ စီးပွားရေး၊ လူမှုရေး စတဲ့ အထွေထွေ အကျပ်အတည်းများနဲ့ အတူ ကိုဗစ်-၁၉ ရောဂါ ကာကွယ်ထိန်းချုပ် ကုသရေးဆိုင်ရာ လုပ်ငန်းများအတွက် လိုအပ်တဲ့ အကူအညီ ထောက်ပံ့မှုများရရှိဖို့ ခက်ခဲနေတဲ့ ပြည်သူလူထုအတွက် PPST အနေနဲ့ များစွာ စိုးရိမ်မကင်း ဖြစ်မိတယ်လို့လည်း မိန့်ခွန်းများ ထည့်သွင်း ပြောကြားထားပါတယ်။

အန်စီအေ လက်မှတ်ထိုးထားတဲ့ အဖွဲ့တွေအနေနဲ့ တိုင်ရင်းသား ပြည်သူတရပ်လုံးနဲ့အတူ စစ်အာဏာရှင်စနစ်ချုပ်ငြိမ်းရေးနဲ့ ဖက်ဒရယ် ဒီမိုကရေစီ ပြည်ထောင်စု တည်ဆောက်ရေးတို့ကို တစိုက်မတ်မတ် ကြိုးပမ်းသွားမယ်လို့လည်း ဆိုပါတယ်။

အစည်းအဝေးတက်ရောက်တဲ့ PPST အဖွဲ့ဝင် ပအိုဝ့်အမျိုးသားလွတ်မြောက်ရေးအဖွဲ့ချုပ် PNLO  ဒုတိယဥက္ကဋ္ဌ ဦးခွန်မြင့်ထွန်းကလည်း “ကျနော်တို့က အန်စီအေနဲ့ပတ်သက်ရင် အန်စီအေမှာ ပြဋ္ဌာန်းထားတဲ့အတိုင်းပေါ့နော် ၊ ပြဋ္ဌာန်းထားတဲ့ စကားလုံးအတိုင်း တသွေမတိမ်း အကောင်အထည်ဖော်ဖို့တော့ကျနော်တို့က ဒါကိုဆုပ်ကိုင်ထားတာ မရှိပါဘူး။ ဒါပေမဲ့  အန်စီအေရဲ့ အနှစ်သာရကိုတော့ ကျနော်တို့ ဆုပ်ကိုင်ထားတယ်။ အန်စီအေရဲ့အနှစ်သာရကတော့ နိုင်ငံရေးပြဿနာကို နိုင်ငံရေးနည်းနဲ့ပဲ ဖြေရှင်းရမယ်။ နိုင်ငံရေးပြဿနာကို နိုင်ငံရေးနည်းနဲ့ ဖြေရှင်းရမယ်ဆိုတာ အန်စီအေရဲ့ အနစ်သာရ ဖြစ်ပါတယ်။ နောက်တခုက အန်စီအေထဲမှာ  ပြည်သူလူထုကို အကာအကွယ်ပေးရမယ်ဆိုတဲ့ဟာ ပါပါတယ်။ ဒါကြောင့်မို့လို ဒီနေ့ သဘာပတိရဲ့ နိဂုံးချုပ်မိန့်ခွန်းမှာလည်းပဲ  ကျနော်တို့ ဒီပြည်သူလူထုရဲ့ အသက်အိုးအိမ်စည်းစိမ်ကို အကာအကွယ် ပေးရမယ်ဆိုတဲ့ဟာကို ကျနော်တို့ တိတိလင်းလင်း ကျနော်တို့ဒါကို ဖော်ပြပြီးတော့မှ သဘာပတိရဲ့ မိန့်ခွန်းထဲမှာ ထည့်သွင်းပြောကြားထားတာရှိပါတယ်။ အဲတော့ ဒီကျနော်တို့ တိုင်းပြည်ရဲ့ ပြဿနာကိုတော့ ကျနော်တို့ဒီနိုင်ငံရေးနည်းနဲ့ ဖြေရှင်းနည်းကို  ကျနော်တို့ ဒါကို တော့ ဆုပ်ကိုင်သွားမှာဖြစ်ပါတယ်။” လို့  ဒီဗွီဘီကို ပြောပါတယ်။

ဒါ့အပြင် အာဆီယံအထူးကိုယ်စားလှယ်ရဲ့ လူသားချင်းစာနာမှုဆိုင်ရာ အကူအညီ ထောက်ပံ့မှု ပေးနိုင်ရေးအတွက် ကြိုးပမ်းမှုကို လှိုက်လှဲစွာ ကြိုဆိုပြီး ပူးပေါင်းဆောင်ရွက်နိုင်ရေး ကြိုးပမ်းဆောင်ရွက်သွယ်းမယ်လို့ လည်း  ခွန်မြင့်ထွန်းက ပြောပါတယ်။

PPST အဖွဲ့ဟာ တနိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ် (NCA) ကို လက်မှတ်ထိုးထားတဲ့ တိုင်းရင်းသားလက်နက်ကိုင် တော်လှန်ရေးအဖွဲ့အစည်းတွေရဲ့ ကိုယ်စားလှယ်တွေနဲ့ ဖွဲ့စည်းထားတာ ဖြစ်ပါတယ်။

3 weeks Ago

August 5, 2021

ရွေးကောက်ပွဲရလဒ်ဖျက်သိမ်းမှု ဒီမိုကရေစီအသွင်ပြောင်းရေးဖြစ်စဉ်ကို နောက်ပြန်ဆုတ်စေဟု အပစ်ရပ်အဖွဲ့များကြေညာ

အာဏာသိမ်းစစ်ကောင်စီက ရွေးကောက်ပွဲရလဒ်ကို တဖက်သတ်ဖျက်သိမ်းလိုက်တာဟာ ဒီမိုကရေစီအသွင်ပြောင်းမှုဖြစ်စဉ်ကို နောက်ပြန်ဆုတ်စေပြီး နိုင်ငံရေးပြဿနာကို နိုင်ငံရေးနည်းနဲ့ဖြေရှင်းနိုင်ရေးအတွက် ကြီးမားတဲ့ အဟန့်အတားဖြစ်စေတယ်လို့ အပစ်ရပ်တိုင်းရင်းသားလက်နက်ကိုင်အဖွဲ့အစည်းတွေက သြဂုတ် ၅ ရက်မှာ ထုတ်ပြန်ကြေညာပါတယ်။

တနိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ် (အန်စီအေ) လက်မှတ်ရေးထိုးထားကြတဲ့ တိုင်းရင်းသားလက်နက်ကိုင်အဖွဲ့အစည်းတွေရဲ့ ငြိမ်းချမ်းရေးလုပ်ငန်းစဉ် ဦးဆောင်အဖွဲ့ ( PPST) အစည်းအဝေးကို သြဂုတ် ၄ ရက်နဲ့ ၅ ရက်မှာ နှစ်ရက်ကြာကျင်းပပြီးနောက် သဘောထားထုတ်ပြန်လိုက်တာပါ။

၂၀၂၀ ရွေးကောက်ပွဲရလဒ်တွေကို ပယ်ဖျက်ကြောင်း အာဏာသိမ်း စစ်ကောင်စီလက်အောက်ခံ ပြည်ထောင်စုရွေးကောက်ပွဲကော်မရှင်က ဇူလိုင် ၂၆ ရက်မှာ ကြေညာခဲ့တာဖြစ်ပါတယ်။ ဒါ့အပြင် ရွေးကောက်ပွဲသစ်ကိုကျင်းပပေးမယ်လို့ အာဏာသိမ်းစစ်ခေါင်းဆောင်က ဩဂုတ်လ ၁ ရက်နေ့ ပြောကြားခဲ့သလို ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီအပါအဝင် မဟာမိတ်ပါတီ ၂၈ ပါတီကလည်း ကြိုဆိုထောက်ခံ ကြောင်း ကြေညာထားပါတယ်။

ဒါနဲ့ပတ်သက်ပြီး PPST ‌ပြောခွင့်ရသူ ဦးမျိုးဝင်းက “ကျနော်တို့က မြင်တာကတော့ ဒီလိုမျိုး ကြေညာခြင်းက ဒီမိုကရေစီအသွင်ကူးပြောင်းမှုအတွက် နောက်ပြန်ဆုတ်စေသလို ရွေးကောက်ပွဲ နိုင်ငံရေးလုပ်ငန်းစဉ်ပေါ်မှာလည်း ပြည်သူလူထုယုံကြည်မှု နည်းစေတယ်။ နိုင်ငံရေးဘောင်ကို ချဲ့ရမယ့်နေရာမှာ ရွေးကောက်ပွဲနိုင်ငံရေးလုပ်ငန်းစဉ် ပြည်သူလူထုယုံကြည်မှုကို ပိုပြီးတော့ အားနည်းသွားစေမယ်။ နောက်ပြန်ဆုတ်သွားစေမယ်ဆိုတာလည်း ဖော်ပြတယ်။ ဒီအကျပ်အတည်းကို ဖြေရှင်းဖို့အတွက်ကို နိုင်ငံရေးပြဿနာကိုနိုင်ငံရေးနည်းနဲ့ ဖြေရှင်းဖို့အတွက်ကိုလည်း အကျပ်အတည်းဖြစ်စေလိမ့်မယ်လို့ စိုးရိမ်တာပေါ့နော်။ သက်ဆိုင်ရာ ပါတီတွေက သူတို့သဘောထားကို လွတ်လပ်စွာ သဘောထားကွဲလွဲခွင့်ရှိတယ်။ အမြင်တော့ မတူဘူးပေါ့။ ” လို့ ပြောပါတယ်။

PPST ကြေညာချက်မှာ လက်ရှိ မြန်မာ့နိုင်ငံရေးအကျပ်အတည်းကို ဖြေရှင်းနိုင်ဖို့ ဧပြီ ၂၄ ရက်က ကျင်းပတဲ့ အာဆီယံရဲ့မြန်မာနိုင်ငံဆိုင်ရာ အထူးထိပ်သီးအစည်းအဝေး ဘုံသဘောတူညီချက် ၅ ရပ်ကို အကောင်အထည်ဖော်ဖို့ အာဆီယံအထူးသံတမန်အဖြစ် ဘရူနိုင်းနိုင်ငံ ဒု နိုင်ငံခြားရေးဝန်ကြီး ဧရာဝဏ်ယူဆွတ်ဖ်အား ခန့်အပ်တာကိုလည်း ကြိုဆိုကြောင်း ဖော်ပြပါတယ်။

PPST အနေနဲ့ နိုင်ငံတကာ ကြားဝင်ဖြန်ဖြေတာတွေကို မြန်မာနိုင်ငံရဲ့ ပကတိ နိုင်ငံရေးအခြေအနေနဲ့ လိုက်လျောညီထွေဖြစ်အောင် ကြိုးပမ်းမယ်လို့ လည်း ထုတ်ပြန်ချက်မှာဖော်ပြထားပါတယ်။

ဦးမျိုးဝင်းက “အားလုံးသိတဲ့အတိုင်းပဲ ဆုံးဖြတ်ချက်ချတာနဲ့ လက်တွေ့အကောင်အထည်ဖော်တာ၊ အာဆီယံရဲ့ အထူးကိုယ်စားလှယ် အခုမှ ခန့်အပ်နိုင်တာက သုံးလလောက်ကြာမှ ခန့်အပ်နိုင်တယ်။ ခန့်ပြီးရင် လုပ်ငန်းအကောင်အထည်ဖော်မှာတွေ ချဦးမယ်။ ကျနော်တို့ မြင်တာက တိုင်းပြည်အတွက် ဖြေကို ဖြေရှင်းရမယ့်ကိစ္စ၊ ကိုယ့်အချင်းချင်း ဖြေရှင်းနိုင်ရင်တော့ အကောင်းဆုံးပေါ့။ သက်ဆိုင်သူအားလုံးက ကဲ-ငါတို့အားလုံး အတူတကွ ဖြေရှင်းရအောင်ဆိုပြီး ဖြေရှင်းတာက အကောင်းဆုံး။ ဒါပေမဲ့ အဲဒါကလည်း အခက်အခဲ ရှိနေတယ်။ ဆိုလိုတာက အမြန်ဆုံးဆောင်ရွက်ရမယ့်ဟာကို ယူအန် ကုလသမဂ္ဂလည်းကူပါဦး၊ ဟိုနိုင်ငံကူပါဦး၊ ဒီနိုင်ငံကူပါဦး ကျနော်တို့ အကူအညီတောင်းခံကြတာပဲ။ ဒါပေမဲ့ လက်တွေ့ အခြေအနေအရက နိုင်ငံတကာအသိုင်းအဝိုင်းကတော့ အာဆီယံ ကြားဝင်ဖြေရှင်းရေး နည်းလမ်းကိုပဲ အားလုံးက ဝိုင်းပြီးတော့ တွန်းအားပေးနေကြတာပဲ။ ဒီနည်းလမ်းတခုကလည်းပဲ တိုင်းပြည်အတွက် ဖြေရှင်းဖို့ အထောက်အကူပြုနိုင်တဲ့ နည်းလမ်းတစ်ခုပေါ့။ ဒါပေမဲ့ အာဆီယံကို မယုံကြည်ကြဘူးဆိုတာကလည်းပဲ အမြန်အကောင်အထည်ဖော်ရမယ့်ဟာကို အချိန်ကြာနေတဲ့ အနေအထားရယ်၊ တကယ်လည်း ဖြတ်သန်းခဲ့တဲ့ခရီးတွေအပေါ်မှာ နိုင်ငံတကာရဲ့ပါ၀င်မှုဟာ မြန်မာနိုင်ငံရေးပြသနာဖြေရှင်းရေးမှာ ဘယ်လောက်ထိ အောင်မြင်ခဲ့ဖူးသလဲပေါ့နော်။ အဲဒီပေါ်မှာ မူတည်ပြီးတော့ စိုးရိမ်မှုတော့ရှိတာပေါ့။ ဒါပေမယ့် တဖက်ကတော့ ဘာမှ မရှိတာထက်စာရင် အဲဒီနည်းလမ်းကလည်း ကြိုးပမ်းဖို့အတွက်ကို ပြုနိုင်တယ်ဆိုတဲ့စိတ်နဲ့လည်းပဲ ကြိုဆိုရမှာပေါ့နော်။ သံသယရှိပေမယ့်လည်းပဲ တဖက်က ဆောင်ရွက်လာမှုအခြေအနေကို သတိကြီးကြီးနဲ့ ကြိုဆိုရမှာပေါ့နော်၊ ကြိုးပမ်းကြည့်ရမှာပေါ့။” လို့ ပြောပါတယ်။

ကိုဗစ် -၁၉ ကပ်ရောဂါကာကွယ်၊ ထိန်းချုပ် ကုသရေးဆိုင်ရာ အထောက်အကူပြုပစ္စည်းတွေနဲ့ ကာကွယ်ဆေးတွေကို တိုင်းရင်းသားပြည်သူလူထုအားလုံးအတွက် နိုင်ငံတကာအကူအညီ အမြန်ဆုံးရရေးနဲ့ ပြည်သူ့လက်ဝယ် အမြန်ဆုံးရောက်ရေးအတွက် နယ်စပ်ဖြတ်ကျော် သယ်ဆောင်နိုင်ရေးအပါအဝင် နည်းလမ်းပေါင်းစုံနဲ့ ကြိုးပမ်းသွားမယ်လို့ ဆိုပါတယ်။
တစ်နိုင်ငံလုံးပစ်ခတ်တိုက်ခိုက်မှု ရပ်စဲရေးသဘောတူစာချုပ် (အန်စီအေ) လက်မှတ်ရေးထိုးထားတဲ့ တိုင်းရင်းသားလက်နက်ကိုင်တော်လှန်ရေးအဖွဲ့အစည်းများ (NCA-S EAO) ဟာ အဖွဲ့ဝင် ၁၁ ဦးပါ ကိုဗစ်-၁၉ ထိန်းချုပ်ရေးကော်မတီတရပ်ကို ဇူလိုင် ၁၇ ရက်က ဖွဲ့စည်းပြီး ဆောင်ရွက်နေပါတယ်။
အန်စီအေလက်မှတ်ရေး ထိုးထားသော တိုင်းရင်းသားလက်နက်ကိုင်တော်လှန်ရေးအဖွဲ့အစည်းများ (NCA-S EAO)မှာ မြန်မာနိုင်ငံလုံး ဆိုင်ရာ ကျောင်းသားများဒီမိုကရက် တစ်တပ်ဦး (ABSDF)၊ ရခိုင်ပြည်လွတ်မြောက်ရေးပါတီ (ALP)၊ ချင်းအမျိုးသားတပ်ဦး (CNF)၊ ဒီမိုကရေစီ အကျိုးပြုကရင်တပ်မတော် (DKBA)၊ ကရင်အမျိုးသားအစည်းအရုံး (KNU)၊ ကရင်အမျိုးသားအစည်းအရုံး /ကရင်အမျိုးသား လွတ်မြောက်ရေးတပ်မတော်(ငြိမ်းချမ်းရေးကောင်စီ) (KNU/ KNLA PC)၊ ပအိုဝ်းအမျိုးသား လွတ်မြောက်ရေးအဖွဲ့ချုပ် (PNLO)၊ သျှမ်းပြည်ပြန်လည်ထူထောင်ရေးကောင်စီ/ သျှမ်းပြည်တပ်မတော် (RCSS/ SSA)၊ မွန်ပြည်သစ်ပါတီ (NMSP)၊ လားဟူဒီမိုကရက်တစ် အစည်းအရုံး (LDU) တို့ ပါ၀င်ကြပါတယ်။

2 months Ago
More News
Up