DVB သတင်းထောက်

March 3, 2021

ပြည်မြို့အခြေစိုက် DVB သတင်းထောက် ၁ ဦးကို ရဲက အကြမ်းဖက်ရိုက်နှက် ဖမ်းဆီး

ပဲခူးတိုင်း၊ ပြည်မြို့အခြေစိုက် ဒီဗွီဘီ သတင်းထောက်ကိုမင်းညိုကို  ဒီနေ့ မတ်လ ၃ ရက်  နေ့လယ်ပိုင်းက ပြည်မြို့ နာရီစင်နားမှာ  ရဲတပ်ဖွဲ့က အကြမ်းဖက်ရိုက်နှက် ဖမ်းဆီးသွားပါတယ်။

ဒီနေ့ပြည်မြို့မှာ စစ်အာဏာရှင်ဆန့်ကျင်ရေး သပိတ်မစခင်မှာ ရဲအင်အား၊ စစ်သားအင်အားအများအပြားနဲ့ လာရောက်ခဲ့ပြီး သပိတ်ကို ဖြိုခွဲခဲ့တယ်လို့ သိရပါတယ်။

သတင်းထောက် ကိုမင်းညိုနဲ့ ဆန္ဒပြသူ တချို့ဟာ အနီးနားမှာရှိတဲ့ အိမ်တအိမ်မှာ ဝင်ရောက်ပုန်းခိုနေတုန်း အိမ်တံခါးကို အတင်းတွန်းဝင်လာပြီး အိမ်ပေါက်ဝ အရှေ့ဆုံးမှာ ရှိနေတဲ့ ကိုမင်းညိုကို ရိုက်နှက် ခေါ်ဆောင်သွားတယ်လို့ မျက်မြင်တယောက်က ပြောပါတယ်။ နဖူးကိုရိုက်တာ ပေါက်သွားပြီး မျက်နှာမှာလည်း သွေးအပြည့် တွေ့ရတယ်လို့ ပြောပါတယ်။

အချုပ်ကားပေါ် ရောက်နေချိန်မှာ ကိုမင်းညို ကိုယ်တိုင် မိသားစုဆီ ဖုန်းဆက်ပြီး သူ့ကိုခေါ်သွားကြောင်း အကြောင်းကြားခဲ့ပါတယ်။

ဒီဗွီဘီ သတင်းထောက် ကိုမင်းညိုနဲ့အတူ ဆန္ဒပြနေတဲ့ ပြည်သူ ၂ ယောက်ကိုလည်း ရိုက်နှက်ဖမ်းဆီးပြီး ကားပေါ်တင်သွားတာကို တွေ့လိုက်ကြောင်း ဆန္ဒပြပွဲနေရာကို ရောက်နေသူ တယောက်က ပြောပါတယ်။

2 months Ago

March 2, 2021

DVB သတင်းထောက်ကို စစ်တပ်က မည်သည့်နေရာ၌ ဖမ်းဆီးထားမှန်းမသိရသဖြင့် မိသားစု စိုးရိမ်

DVB သတင်းဌာနရဲ့ မြိတ်မြို့အခြေစိုက် သတင်းထောက် ကိုကောင်းမြတ်လှိုင် (ခေါ်) ကိုအောင်ကျော်ကို စစ်တပ်က မနေ့ညကတည်းက ဖမ်းဆီးခေါ်ဆောင်သွားပြီး ခုအချိန်အထိ ဘယ်နေရာမှာ ဖမ်းဆီးထားတယ်ဆိုတာ မသိရသေးလို့ မိသားစုက စိုးရိမ်ပူပန်နေပါတယ်။

ကိုအောင်ကျော်ကိုဖမ်းဆီးသွားတဲ့အတွက် မြိတ်မြို့နယ်မြေ ရဲစခန်းမှာ မိသားစုက လူပျောက်တိုင်ကြားရာမှာလည်း ရဲတပ်ဖွဲ့က  အမှုလက်ခံခြင်းမရှိပဲ  ငြင်းပယ်ခဲ့တယ်လို့ သိရပါတယ်။

ကိုအောင်ကျော်ရဲ့ ဇနီး မနေခြည်မိုးထက်က “ ညီမ ဒီမနက်ကျတော့ ရဲစခန်းကို ညီမသွားတယ်။ စခန်းမှူးကိုသွားတွေ့တယ်။  မနေ့က ဖြစ်စဉ်နဲ့ပတ်သက်လို့ လူပျောက်တိုင်ချင်တယ်လို့ ပြောတယ်။ စခန်းမှူးကိုယ်တိုင်နဲ့တွေ့ရပြီးတော့ စခန်းမှူးက ဒီလိုမျိုးအိမ်မှာ ဝင်ရောက်ဖမ်းဆီးသွားတာသည် လူပျောက်တိုင်လို့ရတဲ့အမှုမဟုတ်ဘူးလို့ ပြောတယ်။ သူတို့ စစ်ဆေးမေးမြန်းချင်လို့ ခေါ်သွားတာလို့ ပြောတယ်။ အဲတော့ ညီမက စစ်ဆေးမေးမြန်းချင်လို့ခေါ်သွားတာဆိုရင် ဘယ်ကိုခေါ်သွားလဲ။ မိသားစုဝင်နဲ့တွေ့ခွင့်မပေးဘူးလား။ သူ့ဇနီးတယောက်အနေနဲ့ တွေ့ခွင့်မရှိဘူးလားလို့ ပြောတော့.. အဲလို တွေ့ခွင့်မရှိပါဘူးလို့ပြောတယ်။ ”

မြိတ်ရဲစခန်းကို ဒီနေ့မွန်းလွဲ ၂ နာရီ ကျော်လောက်မှာ ဒီဗွီဘီက ဆက်သွယ်မေးမြန်းရာမှာလည်း ကိုအောင်ကျော်ကို ဘယ်မှာဖမ်းတားတယ်ဆိုတာ မသိဘူးလို့ တာဝန်ကျ ရဲတပ်ဖွဲ့ ဝင် တစ်ဦးကဖြေပါတယ်။

သားဖြစ်သူ ကိုအောင်ကျော်ဖမ်းဆီးခံရတာနဲ့ ပတ်သက်ပြီး  မိခင်ဖြစ်သူ ဒေါ်သန်းသန်းဝင်းက “ရှင်းရှင်းပြောရရင် ကျမသားက သတင်းသမားဆိုတော့ သတင်းကတော့ပို့မှာပေါ့။ ဒါမတရားလုပ်တာလေ။ ကျမ ဘယ်လိုလုပ်ပြီးတော့ ခံနိုင်မှာလဲ။ (...ငိုနေ..) ကျမ ရင်ထဲမှာ ဘယ်လောက်ဆိုးနေတယ်ဆိုတာ ကျမဘာပြောရမှန်းမသိတော့ပါဘူး။ ဘာဖြစ်လို့လဲဆိုတော့ ညကတည်းက သူတို့ဖမ်းသွားတဲ့ဥစ္စာတွေက အထဲမှာ အသံလေးကြားနေရတာကို ကျမနားထဲမှာ မထွက်ဘူးဖြစ်နေတာ။ အော်သံတွေကို ၊ အော်သံတွေကြားနေတာ ကျမ ရင်ထဲမှာ ဘယ်လိုလို့ ကောင်းမလဲ။ အမေလေ..”

ကိုအောင်ကျော်ရဲ့ဖခင်  ဦး‌အေးသောင်းကလည်း “သူတို့မတရားလုပ်ထားက ကိုယ်က သိတယ်လေ။ ဘယ်ခံချင်ပါ့မလဲဗျာ။  ဟုတ်တယ်မဟုတ်လား မတရားလုပ်တာကြီးကို”၊ “ သားနဲ့ပတ်သက်လို့ကတော့ လွတ်လာရင်တော့ ကောင်းတာပေါ့” “ အခုကတော့ ဘယ်မှာမှန်းကိုမသိဘူး။ ကျနော်ကြားတာကတော့ မြို့မရဲစခန်းနဲ့ အချုပ်ထောင်လို့ ကြားတာပဲ အတိအကျတော့ မသိသေးဘူး။” လို့ပြောပါတယ်။

သတင်းထောက် ကိုအောင်ကျော်ကို မနေ့ ည ၁၀ နာရီခွဲကျော်လောက်မှာ  အာဏာသိမ်း စစ်ကောင်ရဲ့ လုံခြုံရေးတပ်သားတွေက နေအိမ်ကနေ အတင်းအဓမ္မ ဖမ်းဆီးခေါ်ဆောင်သွား ခဲ့တာပါ။ 

ဖမ်းဆီးရာမှာ နေအိမ်ကို ကျောက်ခဲတွေနဲ့ ပစ်ပေါက်တာ၊ သေနတ်ပစ်ဖောက် ခြိမ်း‌ခြောက်တာ၊ ဖမ်းဝရမ်းမပြသတာ၊  စစ်ကား ၆ စီး ၇ စီး အပါအဝင် လုံခြုံရေးတပ်သားများစွာနဲ့  ဝိုင်းထားတာ၊ နေအိမ်ကို အတင်းချိုးဖျက်ဝင်ရောက်တာ စတဲ့ အကြမ်းဖက် နည်းလမ်းတွေကို အသုံးပြုခဲ့ပါတယ်။ 

သတင်းပေးပို့တဲ့ အလုပ်ကို တရားဝင်လုပ်ဆောင်နေတဲ့ သတင်းထောက်တစ်ဦးကို အခုလို အဓမ္မအကြမ်းဖက် ဖမ်းဆီးခေါ်ဆောင်တာကို DVB  သတင်းဌာနက ပြင်းထန်စွာ ကန့်ကွက်ရှုတ်ချတယ်လို့ ထုတ်ပြန်ကြေညာထားပါတယ်။ 

သတင်းထောက် ကိုအောင်ကျော်အပါအဝင် မတရားဖမ်းဆီးထိန်းသိမ်း ခံနေရတဲ့ သတင်းထောက်တွေ အားလုံးကို  ခြွင်းချက်မရှိ ချက်ချင်း  ပြန်လွှတ်ပေးဖို့ကိုလည်း ဒီဗွီဘီက တောင်းဆိုထားပါတယ်။ 

2 months Ago

DVB သတင်းထောက်အပါအဝင် ဖမ်းဆီးခံသတင်းထောက်များအားလုံးကို ပြန်လွှတ်ပေးရန်အတွက်တောင်းဆိုချက် ထုတ်ပြန်ခြင်း

နေ့စွဲ - ၁ မတ်လ ၂၀၂၁

DVB သတင်းထောက်အပါအဝင် ဖမ်းဆီးခံသတင်းထောက်အားလုံးကို ပြန်လွှတ်ပေးရန်အတွက် တောင်းဆိုချက် ထုတ်ပြန်ခြင်း။

DVB သတင်းဌာန၏ မြိတ်မြို့အခြေစိုက် သတင်းထောက် ကိုကောင်းမြတ်လှိုင် (ခေါ်) ကိုအောင်ကျော်ကို ယနေ့ ( ၂၀၂၁၊ မတ်လ၊ ၁ရက်) ည ၁၀ နာရီ ၃၀မိနစ်တွင် အာဏာသိမ်းစစ်ကောင်စီ၏ လုံခြုံရေးတပ်သားများက နေအိမ်မှ အတင်းအဓမ္မ ဖမ်းဆီးခေါ်ဆောင်သွားပါသည်။

ဖမ်းဆီးရာတွင် ( နေအိမ်ကို ကျောက်ခဲများဖြင့် ပစ်ပေါက်ခြင်း၊ သေနတ်ပစ်ဖောက်၍ ခြိမ်း‌ခြောက်ခြင်း၊ ဖမ်းဝရမ်းမပြသခြင်း၊ စစ်ကား ၆ စီးအပါအဝင် လုံခြုံရေးတပ်သားများစွာဖြင့် ဝိုင်းထားခြင်း၊ နေအိမ်ကို အတင်းချိုးဖျက်ဝင်ရောက်ခြင်း) စသည့် အကြမ်းဖက် နည်းလမ်းများကို အသုံးပြုခဲ့ပါသည်။

သတင်းပေးပို့ခြင်းအလုပ်ကို တရားဝင်လုပ်ဆောင်နေသော သတင်းထောက်တစ်ဦးအား ယင်းကဲ့သို့ အဓမ္မအကြမ်းဖက်၍ ဖမ်းဆီးခေါ်ဆောင်သွားခြင်းကို DVB  သတင်းဌာနက ပြင်းထန်စွာ ကန့်ကွက်ရှုတ်ချပါသည်။

ကိုကောင်းမြတ်လှိုင်အပါအဝင် မတရားဖမ်းဆီးထိန်းသိမ်းခြင်း ခံနေရသော သတင်းထောက်များအားလုံးကို  ခြွင်းချက်မရှိ ချက်ချင်း  ပြန်လွှတ်ပေးပါရန် တောင်းဆိုပါသည်။

DVB သတင်းဌာန

Email: [email protected]

Immediate Release

1 March 2021

DVB's Reporter arrested at his home in Myeik, Tanitharyin Divison

Several Local police in Myeik arrested DVB's reporter Kaung Myat Naing (a) Aung Kyaw (31) at his home at 10:30 pm, 1st March 2021.  The police bang his front door, shouting at him to come out while a few gunshots were clearly heard from outside at the same time.  He asked for the reason to come out, whether they have a warrant and be peaceful and if he would come out.They finally broke into his house and took him away.  

As of this statement, DVB has no knowledge of where he was taken away and which military authority took him away.  He has been reporting to DVB daily on the anti-military coup demonstration in Myeik since the military overthrew the elected civilian government on the 1st of Feb.  His latest reports were a fatal military crackdown on demonstrators in Myeik on 28th Feb and continued demonstration today.

He joined DVB in 2015 and currently working as a local reporter in Myeik.  

We demand the military authority to release Kaung Myat Naing(a) Aung Kyaw immediately.  We also ask for the immediate release of all the journalists who have been detained recently.

They are all doing their professional job as journalists.

2 months Ago
More News
Up