COVID-19 ကူးစက်ခံရ

April 30, 2020

ရုရှားရောက် မြန်မာတပ်မတော်သင်တန်းသားအရာရှိ ၃ ဦး COVID-19  ကူးစက်ခံရ

ရုရှားဖက်ဒရေးရှင်းနိုင်ငံမှာ သင်တန်းတက်ရောက်နေတဲ့ မြန်မာ့တပ်မတော်မှ သင်တန်းသား  ၃ ဦးမှာ COVID-19 ရောဂါပိုးတွေ့ရှိရတယ်လို့ ကာကွယ်ရေးဦးစီးချုပ်ရုံးက သတင်းထုတ်ပြန်ပါတယ်။ ရုရှားနိုင်ငံမှာ သင်တန်းတက်ရောက်နေတဲ့ မြန်မာ့တပ်မတော်က ပညာတော်သင် သင်တန်းသား အရာရှိတွေအနက် မော်စကိုမြို့ရှိ Russian University of Transport  တက္ကသိုလ်မှ သင်တန်းသား ၂ ဦးနဲ့ Moscow Power Engineering Institute တက္ကသိုလ်မှ သင်တန်းသား ၁ ဦးတို့မှာ ဧပြီ ၂၇ ရက်နေ့က COVID-19 ရောဂါပိုး စစ်ဆေးတွေ့ရှိတာလို့ ဆိုပါတယ်။ လက်ရှိအခြေအနေအရ ရောဂါပိုးကူးစက်ခံထားရတဲ့ မြန်မာ့တပ်မတော်မှ သင်တန်းသား အရာရှိ ၃ ဦးရဲ့ ကျန်းမာရေးအခြေအနေမှာ ထူးခြားတဲ့ ဖျားနာဝေဒနာ ခံစားရမှုမျိုးမရှိဘဲ ကောင်းမွန်နေပြီး ရုရှားကျန်းမာရေးဌာနရဲ့ ညွှန်ကြားချက်အရ အဆောင်မှာ သီးခြားနေထိုင် ဆေးကုသမှုခံယူနေတယ်လို့ တပ်မတော်သတင်းမှာဖော်ပြပါတယ်။  မြန်မာ စစ်သံ(ကြည်း၊ ရေ၊ လေ)ရုံးမှ အဆိုပါ ကျောင်းသားတွေနဲ့ ဆက်သွယ်မှုရယူကာ လိုအပ်တဲ့ ကူညီစောင့်ရှောက်မှုတွေ ပြုလုပ်ပေးနေတယ်လို့ သိရပါတယ်။  ရုရှားနိုင်ငံမှာ COVID-19 ရောဂါပြန့်ပွားမှုကြောင့် MIIT တက္ကသိုလ်မှာ တက်ရောက်နေတဲ့ မြန်မာ့တပ်မတော်မှ ပညာတော်သင် သင်တန်းသားအရာရှိတွေအပါအဝင် ကျောင်းသားအားလုံးဟာ ၂၀၂၀ ပြည့်နှစ်၊ မတ်လ ၁၉ ရက်ကတည်းက သက်ဆိုင်ရာအဆောင်တွေကနေ အဝေးရောက်သင်ကြားမှုစနစ်နဲ့ ပညာသင်ယူနေကြတယ်လို့လည်း သိရပါတယ်။ မြန်မာနိုင်ငံအတွင်းမှာတော့  တပ်မတော်သားတွေအထဲက COVID-19 ကူးစက်ခံရသူ တဦးမှ မရှိသေးဘူးလို့ တပ်မတော် သတင်းမှန်ပြန်ကြားရေးအဖွဲ့က ပြောထားပါတယ်။
1 year Ago

April 7, 2020

ဘီယာအတူသောက်ခဲ့ကြသည့် ထိုင်းမိန်းကလေး ၄ ဦးလုံး COVID-19 ကူးစက်ခံရ

ထိုင်းနိုင်ငံအရှေ့ပိုင်း ပရကျင်းပူရီခရိုင်ထဲက မိန်းကလေး ၁ ဦးဟာ သူငယ်ချင်း ၄ ယောက်နဲ့ ဘီယာအတူသောက်ခဲ့ပြီးနောက် ၄ ဦးလုံး  COVID-19 ကူးစက်ခံထားရတယ်လို့ အဲန် (အမည်ရင်းမဟုတ်) ဆိုတဲ့ မိန်းကလေးက သူ့ရဲ့ လူမှုကွန်ရက်ကနေတဆင့် ဖွင့်ဟဝန်ခံခဲ့ပါတယ်။  အဲန်မှာ အသက် ၂၂ နှစ်ရွယ်ရှိပြီး ပရကျင်းပူရီခရိုင်ရဲ့ ၅ ယောက်မြောက် COVID-19 ကူးစက်ခံရသူဖြစ်ကြောင်း ပရကျင်းပူရီခရိုင် ကျန်းမာရေးဦးစီးဌာန COVID-19 ကာကွယ်တားဆီးရေးကော်မတီက ပြီးခဲ့တဲ့ ရက်ပိုင်းက ကြေညာခဲ့ပါတယ်။  အဲန်ဟာ ဘန်ကောက်ရာ့ချ်ဒါးနယ်မြေရှိ ဘားဆိုင်တဆိုင်မှာ အလုပ်လုပ်နေတာဖြစ်ပြီး ပြီးခဲ့တဲ့ မတ်လ ၁၈ ရက်က အဖော် ၄ ယောက်နဲ့ ဘီယာကို ပိုက်တခုတည်း ပုလင်းတလုံးတည်း အတူသောက်ခဲ့ကြတယ်လို့ ဆိုပါတယ်။  အဲဒီနောက် သူမဟာ ပရကျင်းပူရီခရိုင် ကဘင်မြို့ရှိ နေအိမ်ကို ကိုယ်ပိုင်ကားနဲ့  ပြန်ရောက်ပြီး ဧပြီလ ၂ ရက်နေ့က ဘန်ကောက်က သူငယ်ချင်းတွေနဲ့ ဖုန်းဆက်စကားပြောရာမှာ သူနဲ့အတူ ဘီယာသောက်ခဲ့တဲ့ ၃ ယောက်လုံး COVID-19 ကူးစက်ခံရကြောင်း သိရတယ်လို့ ဆိုပါတယ်။  ဒါကြောင့် သူမဟာ ချက်ချင်း ဆေးရုံသွားပြီး COVID-19 စစ်ဆေးကြည့်ခဲ့ကြောင်း၊ ဧပြီလ ၃ ရက်နေ့ ဆေးရုံက ဆေးစစ်ချက် ထွက်လာတော့ သူမမှာလည်း COVID-19 ကူးစက်ခံထားရတာကို သိလိုက်ရတယ်လို့ ဆို ပါတယ်။  ဒီမတိုင်ခင် မတ်လ ၂၅ ရက်နေ့က သူမဟာ ရေအိမ်ဝင်တာ ဘာအနံ့မှ မရကြောင်း၊ ထမင်း ဟင်း စားစဉ် ဘာအနံ့အရသာမှမရဘဲ ဆားကို တို့ကြည့်တာတောင် ငန်တယ်လို့ မခံစားရဘူး ဆိုတာကို သတိထားမိတယ်လို့ ဆိုပါတယ်။   ဒါပေမဲ့ သူမမှာ ဖျားနာတာမရှိဘဲ ပုံမှန်ဖြစ်နေလို့ ကားသွားပြင်တာ၊ ဈေးဝယ်တာတွေ ပုံမှန်လုပ်နေပြီး ၂၈ ရက်မှာ  ဗိုက်နာလို့ ကဘင်မြို့နယ်ဆေးရုံသွားခဲ့ကြောင်း၊ အဲဒီတုန်းကလည်း သာမန်ဗိုက်နာကြောင်းသာ ပြောဆိုပြီး ပြင်ပလူနာအနေနဲ့ သာ ကုသခဲ့တယ်လို့ ဆိုပါတယ်။  COVID-19 အဖြေထွက်ပြီးတဲ့နောက် သူမဟာ မြို့နယ်ဆေးရုံကနေ ကျောက်ဖယား အဖိုင်းဖူးဘစ် ဆေးရုံကြီးကို လွှဲပြောင်း တက်ရောက်ကုသခံနေရပြီး သူမနဲ့ တအိမ်တည်းနေတဲ့ မိသားစုဝင် ၇ ဦးလုံးလည်း ရောဂါကူးစက်မယ့်အခြေအနေ စောင့်ကြည့်ခံနေရပါတယ်။  ဒါ့အပြင် သူမဟာ ဘန်ကောက်က ပြန်ရောက်လာတာနဲ့ အိမ်မှာမနေဘဲ ကားဝပ်ရှော့ ဆိုင်သွားတာ၊ ကုန်တိုက်မှာ ဈေးဝယ်တာ၊ ရပ်ကွက်ဈေးသွားတာ၊ အိမ်မှာ ဧည့်သည်တွေကို လက်ခံ စကားပြောခဲ့တာ၊ ဆာကျောက်ခရိုင်သို့ ခရီးထွက်ခဲ့တာတွေ လုပ်ခဲ့လို့ သူနဲ့ တွေ့ဆုံကြုံခဲ့ရသူ လူ ၄၀ ကျော် မိမိကိုယ်မိမိ သတိထားပြီး ထူးခြားမှုရှိက သက်ဆိုင်ရာ ဆေးရုံမှာ သွားရောက်စစ်ဆေးကြဖို့ ခရိုင်ကျန်းမာရေးဌာနက တိုက်တွန်းနှိုးဆော်ထားပါတယ်။  ကိုးကား - ထိုင်းရတ် / ချနယ်လ် ၃ ထိုင်းတီဗွီ / ဒေလီနယူးစ်
1 year Ago
Up