သြစတြေးလျ နိုင်ငံသား ၂ ဦး

April 29, 2015

အင်ဒိုနီးရှားတွင် ကွပ်မျက်ခံ နိုင်ငံခြားသား ရုပ်အလောင်းများကို ပြန်သယ်

အင်ဒိုနီးရှားနိုင်ငံ နူစာကမ်ဘန်ဂန်ကျွန်း အကျဉ်းထောင်မှာ သေဒဏ်ပေးကွပ်မျက် ခံလိုက်ရသူတွေရဲ့ ရုပ်အလောင်းတွေကို တင်ဆောင်ထားတဲ့ လူနာတင်ယာဉ်တွေဟာ ဧပြီ ၂၉ ရက်က ထောင်ကနေ ပြန်လည် သယ်ဆောင်သွားပါတယ်။ သေဒဏ်ပေးကွပ်မျက်ခံရသူ ၈ ယောက်ထဲမှာ သြစတြေးလျ၊၊ နိုင်ဂျီးရီးယား၊ ဘရာဇီးလ်၊ အင်ဒိုနီးရှားနိုင်ငံသားတွေ ပါဝင်ပါတယ်။ တချို့အလောင်းတွေကို မီးသင်္ဂြိုဟ်စက်ကို ပို့မှာ ဖြစ်ပြီး၊ တချို့ကိုတော့ ဂျကာတာကနေ တဆင့် သက်ဆိုင်ရာနိုင်ငံတွေကို ပြန်ပို့မှာ ဖြစ်ပါတယ်။ သြစတြေးလျနိုင်ငံသား ၂ ယောက် အခုလို သေဒဏ်ပေးခံလိုက်ရတဲ့အတွက် သြစတြေးလျ ၀န်ကြီးချုပ် တိုနီ အဘော့က အင်ဒိုနီးရှားနိုင်ငံဆိုင်ရာ သြစတြေးလျ သံအမတ်ကြီးကို ပြန်ခေါ်လိုက်ပါတယ်။ ဘရာဇီးလ်နိုင်ငံကလည်း အင်ဒိုနီးရှားနိုင်ငံဆိုင်ရာ သံအမတ်ကြီးကို ပြန်ခန့်ဖို့ အစီအစဉ် မရှိဘူးလို့ တုံ့ပြန်ပါတယ်။ အရင်က ဘရာဇီးနိုင်ငံသားတယောက်ကို အခုလိုပဲ မူးယစ်အမှုနဲ့ သေဒဏ်ပေး ပြီးကတည်းက ဘရာဇီးက သံအမတ်ကြီးကို ပြန်ခေါ်ခဲ့တာ ဖြစ်ပါတယ်။ [gallery ids="90877,90878,90879"]
6 years Ago

March 14, 2015

သေဒဏ်ကျ ၁၀ ဦးကို အတူကွပ်မျက်မည်ဟု အင်ဒိုနီးရှားပြော

အင်ဒိုနီးရှားရှေ့နေချုပ် မူဟာမဒ် ပရာစက်တျိုက မူးယစ်ဆေးမှုနဲ့ သေဒဏ်ကျနေသူ ၁၀ ယောက်ကို တချိန်တည်းမှာ အတူတကွ ကွပ်မျက်မယ်လို့ အတည်ပြုပြောဆိုလိုက်ပါတယ်။ ပြင်ဆင်မှုတွေ အဆင်သင့် ဖြစ်တာနဲ့ တချိန်တည်းမှာ ကွပ်မျက်မှာလို့ မတ် ၁၃ ရက်နေ့က ဝတ်ပြုဆုတောင်းပွဲအပြီးမှာ ရှေ့နေချုပ်က ပြောပါတယ်။ မတ်လ ၁၂ ရက်နေ့က သြစတြေးလျ သေဒဏ်သင့် ၂ ယောက်အတွက် သမ္မတရဲ့ တောင်းဆိုချက်နဲ့ သေဒဏ်စီရင်မယ့်ရက်ကို မတ်လ ၁၉ ရက်နေ့ထိ ရွှေ့ဆိုင်းပေးခဲ့ပါတယ်။ ပြင်သစ်နိုင်ငံသား သေဒဏ်သင့် တယောက်ကလည်း တရားရုံးမှာ အသနားခံမှုကြောင့် မတ်လ ၁၁ ရက်နေ့ကနေ မတ်လ ၂၅ ရက်နေ့ထိ ရွှေ့ဆိုင်းပေးခဲ့ပါတယ်။ သေဒဏ်စီရင်မယ့်ရက်စွဲကိုတော့ တရားရေးကိစ္စအားလုံး အပြီးသတ်ချိန်မှာ မူတည်တယ်လို့ သူက ဆက်ပြောပါတယ်။ သေဒဏ်ကျ ၁၀ ယောက်ထဲက အများစုကို သေနတ်ပစ်တပ်ဖွဲ့နဲ့ စီရင်ဖို့ အကျဉ်းသားတွေထားရာ နုစာကမ်ဘန်ဂံ ကျွန်းဆီကို လွှဲပြောင်းပေးပြီးပါပြီ။ သေဒဏ်ကျ အကျဉ်းသားတွေထဲမှာ သြစတြေးလျ၊ ပြင်သစ်၊ ဘရာဇီး၊ ဖိလစ်ပိုင်၊ ဂါနာ၊ နိုင်ဂျီးရီးယားနဲ့ အင်ဒိုနီးရှား နိုင်ငံသားတွေ ပါဝင်ပါတယ်။ တကယ်လို့ အင်ဒိုနီးရှားအစိုးရက မူးယစ်ကုန်ကူးမှုနဲ့ သေဒဏ်ရင်ဆိုင်နေရတဲ့ သြစတြေးလျ နိုင်ငံသား ၂ ယောက်ကို ပြစ်ဒဏ်လျှော့ပေါ့ပေးပြီး ထောင်ဒဏ်တသက်တကျွန်းကို ပြောင်းလဲ သတ်မှတ်မယ်ဆိုရင် သူတို့အတွက် စရိတ်ကို ပေးမယ်လို့ သြစတြေးလျ နိုင်ငံခြားရေးဝန်ကြီး ဂျူလီဘစ်ရှော့ပ်က မတ် ၁၂ ရက်နေ့က ကမ်းလှမ်းခဲ့ပါသေးတယ်။ ၂၀၀၅ ခုနှစ်က အင်ဒိုနီးရှားနိုင်ငံထဲကို ဘိန်းဖြူကုန်ကူးဖို့ စီစဉ်မှုနဲ့ သေဒဏ်ချခံထားရတဲ့  သူတို့ ၂ ယောက်ရဲ့အသက်ကို ကယ်တင်ဖို့ အစိုးရက လှုပ်ရှားဆွေးနွေးခဲ့တာပါ။ ဒါပေမယ့် အင်ဒိုနီးရှားနိုင်ငံခြားရေး ဝန်ကြီး မာစူဒီက ဒီကမ်းလှမ်းချက်ကို အကြောင်းမပြန်သေးဘူးလို့ ဂျူလီဘစ်ရှော့ပ်က ပြောပါတယ်။ အကျဉ်းသားချင်းဖလှယ်ရေးအဆိုကိုတော့ မာစူဒီက ယဉ်ယဉ်ကျေးကျေး ငြင်းခဲ့တယ်လို့ သူကဆက်ပြောပါတယ်။ အင်ဒိုနီးရှားနိုင်ငံဟာ မူးယစ်ကုန်ကူးမှုအတွက် ကြမ်းတမ်းပြင်းထန်တဲ့ ပြစ်ဒဏ်တွေကို စီရင်လေ့ရှိပါတယ်။ သေဒဏ်ကိုတော့ ၅ နှစ်ကြာ ရပ်ဆိုင်းထားအပြီး  ၂၀၁၃ ခုနှစ်မှာ ပြန်စတင် ကျင့်သုံးခဲ့ပါတယ်။
6 years Ago
Up