မြေလွတ်မြေလပ်မြေရိုင်း

January 1, 2019

မြေလွတ်မြေလပ်မြေရိုင်းဥပဒေကြောင့် ရိုးရာဓလေ့ပျောက်ကွယ်ပြီး သခင်ကနေ ကျွန်ဖြစ်နိုင်

ပြင်ဆင်ထားတဲ့ မြေလွတ်၊ မြေလပ်၊ မြေရိုင်းများစီမံခန့်ခွဲမှုဥပဒေမှာ မြေယာလုပ်ကိုင်မယ့် သူတွေကို လုပ်ပိုင်ခွင့်နဲ့ မဟုတ်ဘဲ ခွင့်ပြုမိန့်နဲ့ပေးထားတာကြောင့် ရိုးရာဓလေ့မြေတွေပျောက် ကွယ်နိုင်ပြီး မှတ်ပုံမတင်တဲ့သူတွေဟာ ထောင်ကျနိုင်တယ်လို့  ဒို့မြေကွန်ရက်က ပြောပါတယ်။ ဒို့မြေကွန်ရက်ရဲ့ အထွေထွေအတွင်းရေးမှူး ဦးစည်သူက “ကိုယ်ပိုင်တဲ့မြေကို ရော့ မင်းတို့ ယူလိုက်ဆိုပြီးတော့ပေးပြီးတော့ သူ့ဘက်ကသနားလို့ ပြန်ငှားလို့လုပ်ရတဲ့ဘဝကို ရောက်သွားတာ။ သခင်ကနေ ကျွန်ဖြစ်သွားတဲ့ဟာ၊ လက်ရှိကနေ လက်မဲ့ဖြစ်သွားတဲ့ဟာ၊ မြေပိုင်ဘဝကနေ မြေမဲ့ဘဝရောက်သွားတဲ့ဟာ၊ ပြီးရင် နှစ်အကန့်အသတ်နဲ့ နှစ်သုံးဆယ်ပဲ ဖြစ်တယ်။ ဒါကြောင့် မှတ်ပုံတင်လိုက်ရင် ပိုင်တယ်လို့ ထင်နေတဲ့ဟာ လုံးဝမှားတဲ့ကိစ္စဖြစ်ပါတယ်။ မှတ်ပုံတင်လိုက်ရင် ရိုးရာဓလေ့မြေတွေပျောက်သွားပြီး ကျွန်ဖြစ်သွားမှာ ဖြစ်ပါတယ်။ ကျနော်တို့ ပြောပြောနေတဲ့ ဖက်ဒရယ်နဲ့ အရမ်းကိုဝေးသွားမှာဖြစ်ပါတယ်။ ဒါကြောင့် မှတ်ပုံတင်တာဟာ ပြဿနာ အရမ်းကြီးတယ်လို့ ပြောရ ခြင်းဖြစ်ပါတယ်” လို့ ရှင်းပြပါတယ်။ အမျိုးသားလွှတ်တော်၊ တောင်သူလယ်သမားရေးရာကော်မတီရဲ့ ဥက္ကဋ္ဌ ဦးဘမျိုးသိန်းကတော့ ၆ လ အတွင်း မှတ်ပုံတင် လျှောက်မယ်ဆိုရင်  ဥပဒေနဲ့ညီသွားမှာ ဖြစ်သလို ကိုယ်တိုင်စိုက်ပျိုးနေတဲ့ မြေယာတွေလည်း တရားဝင်သွားမယ်၊ အဲဒီလို တရားဝင်အသိမှတ်မြေဖြစ်အောင် ပြန်ပြီးတော့ လျှောက်ခိုင်းရတာဖြစ်တယ်လို့ ပြောပါတယ်။ မူရင်းဥပဒေထဲမှာ ၆ လဆိုတဲ့အချိန်ကို ထည့်သွင်းသတ်မှတ်ပြဋ္ဌာန်းထားတာဟာ နောင်မှာ ပြဿနာရှိနိုင်တယ်လို့ ကယားပြည်နယ်၊ ဥပဒေပညာရပ်ဆိုင်ရာအသင်းရဲ့ ဥက္ကဋ္ဌ အထက်တန်း ရှေ့နေ ဦးကျော်ဝဏ္ဏအောင် ကသုံးသပ်ပြောပါတယ်။ “၆ လဆိုတဲ့သတ်မှတ်ချက်ကို ပြင်လွယ်၊ ဖြည့်လွယ်လို့ရအောင် နည်းဥအရဖြစ်ဖြစ်၊ ဒါမှမဟုတ် အစိုးရရဲ့ အမိန့်ညွှန်ကြားလွှာ ဖြစ်ဖြစ် သီးသန့်အနေနဲ့ သတ်မှတ်သင့်တာပေါ့၊ အခုတော့ဥပဒေထဲမှာလာပြီး အတည်သတ်မှတ်လိုက်တော့ အခုအချိန်မှာ ၆ လ မဟုတ်တော့ဘူး၊ တစ်နှစ်သက်တမ်းတိုးပေးချင်တယ်ဆိုရင် လုပ်စရာက ဥပဒေကိုသွားပြီးတော့ ပြင်ရတော့မယ်။ မပြင်ရင် မရတော့ဘူး။ ဥပဒေဆိုတဲ့ အရာမျိုးကလည်း ဥပဒေထဲမှာ ၆ လလို့ထည့် ထားပေမယ့် ငါတို့ဒီလိုနည်းနဲ့ လုပ်လို့ရပါတယ်လို့ လုပ်လို့မရဘူး။ ဥပဒေဆိုတာ လိုက်နာရတော့မှာလေ၊ အဲဒါဟာ ပြဿနာတက်မယ်” လို့ ပြောပါတယ်။ ပြင်ဆင်ထားတဲ့ မြေလွတ်၊ မြေလပ်နှင့် မြေရိုင်းများစီမံခန့်ခွဲမှုဥပဒေကို ၂၀၁၈ စက်တင်ဘာ ၁၂ရက်က အတည်ပြုပြဋ္ဌာန်းခဲ့ပါတယ်။ ဒါ့အပြင် မြေလွတ်မြေလပ်၊ မြေရိုင်းများ စီမံခန့်ခွဲမှု ဗဟိုကော်မတီကလည်း သူတို့ဆီက ခွင့်ပြုချက်မယူ၊ မှတ်ပုံမတင်ဘဲ အဲဒီမြေတွေကို အသုံးပြုတဲ့သူတွေကို ၂ နှစ်ထက်မပိုတဲ့ထောင်ဒဏ်နဲ့ ငွေဒဏ် ၅ သိန်းကို ပေးဆောင်ရမယ်လို့ ၂၀၁၈ ခုနှစ် အောက်တိုဘာ ၃၀ ရက်က ထုတ်ပြန်ထားပါတယ်။ ဒါကြောင့် အဲဒီ မြေလွတ်မြေလပ်၊ မြေရိုင်းဥပဒေကို ဖျက်သိမ်းပေးဖို့ အရပ်ဖက် အဖွဲ့အစည်း ပေါင်း ၃၀၀ ကျော်နဲ့ ကရင်အမျိုးသားအစည်းအရုံး၊ စည်းလုံးညီညွတ်သော တိုင်းရင်းသားလူမျိုးများမဟာမိတ်အဖွဲ့နဲ့ မိတ်ဖက်အဖွဲ့အစည်းတွေကလည်း ကြေညာချက်တွေ ထုတ်ပြီး တောင်းဆိုထားပါတယ်။
2 years Ago

December 16, 2018

မြေလွတ်မြေလပ်မြေရိုင်းဥပဒေ ပယ်ဖျက်ပေးရန် ကေအန်ယူ တောင်းဆို

ဌာနေတိုင်းရင်းသားတွေရဲ့ အခွင့်အရေးကို အလေးထားခြင်းမရှိတဲ့ မြေလွတ်မြေလပ်နဲ့ မြေရိုင်းများ စီမံခန့်ခွဲရေးဥပဒေကို ပယ်ဖျက်ပေးဖို့ ကရင်အမျိုးသားအစည်းအရုံး (ကေအန်ယူ) က ကြေညာချက်ထုတ်ပြန် တောင်းဆိုလိုက်ပါတယ်။ ဒီဇင်ဘာ ၁၅ ရက်ထုတ်ပြန်ချက်မှာ အစိုးရက ၂၀၁၈ ခုနှစ်၊ စက်တင်ဘာအတွင်း အတည်ပြုခဲ့တဲ့ မြေလွတ်မြေလပ်မြေရိုင်းများ စီမံခန့်ခွဲရေးဥပဒေဟာ အရင်အစိုးရအဆက်ဆက် ကျင့်သုံးခဲ့တဲ့ တင်းကျပ်တဲ့ ဗဟိုချုပ်ကိုင်မှုပုံစံ ဖြစ်နေတယ်လို့လည်း ဖော်ပြထားပါတယ်။ ဒါ့အပြင် အဲ့ဒီဥပေဒဟာ ကရင်အမျိုးသားအစည်းအရုံးရဲ့ မြေယာမူဝါဒ၊ ကရင်တမျိုးသားလုံးရဲ့ သဘောထားနဲ့ ကိုက်ညီမှု မရှိတဲ့အပြင် ဌာနေတိုင်းရင်းသားတွေရဲ့ အခွင့်အရေး၊ လူ့အခွင့်အရေး စံချိန်စံညွှန်းတွေ ဒီမိုကရေစီနဲ့ ဖက်ဒရယ် စံချိန်စံညွှန်းတွေကို အလေးထားခြင်း မရှိဘူးလို့လည်း ကေအန်ယူထုတ်ပြန်ချက်က ဆိုပါတယ်။ ဒီဥပဒေကြောင့် ယုံကြည်မှုတည်ဆောက်ရေး၊ အနာဂတ်ဖက်ဒရယ်ပြည်ထောင်စုတည်ဆောက်ရေးနဲ့ ငြိမ်းချမ်းရေး တည်ဆောက်မှု လုပ်ငန်းတွေကိုပါ ထိခိုက်စေတယ်လို့ ကေအန်ယူ ကြေညာချက်မှာ ဖော်ပြပါတယ်။ ပြည်ထောင်စုအစိုးရ ပြင်ဆင်ခဲ့တဲ့ မြေလွတ်မြေလပ်မြေရိုင်း စီမံခန့်ခွဲရေးဥပဒေအရ ၂၀၁၂ ခုနှစ်၊ ဧပြီလ ၆ ရက်က ကေအန်ယူနဲ့ အစိုးရအကြား ပဏာမ အပစ်အခတ်ရပ်စဲရေး သဘောတူဆုံးဖြတ်ချက် အမှတ် ၉၊၁၀၊၁၁ အပြင် အစိုးရ၊ တပ်မတော်နဲ့ တိုင်းရင်းသားလက်နက်ကိုင် အဖွဲ့အစည်းများအကြား သဘောတူလက်မှတ်ရေးထိုးထားတဲ့ တနိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် အန်စီအေ အခန်း ၃ အပိုဒ် ၉ ပါ အရပ်သားများကို ကာကွယ်စောင့်ရှောက်ရေးဆိုင်ရာအချက်များနဲ့ အခန်း ၆ အပိုဒ် ၂၅ က (၁)တို့ကို ချိုးဖောက်နေတယ်လို့လည်း ဖော်ပြပါရှိပါတယ်။ ဒါကြောင့် ပြဿနာနဲ့ ပဋိပက္ခတွေကို ပိုပြီး ဖြစ်ပွားစေမယ့် မြေလွတ်မြေလပ်နဲ့မြေရိုင်းများ စီမံခန့်ခွဲရေးဥပဒေကို ပယ်ဖျက်ပေးပါလို့ ကေအန်ယူက တောင်းဆိုလိုက်ပါတယ်။ အငြင်းပွားဖွယ်ရာ ဒီဥပဒေကြောင့် ငြိမ်းချမ်းရေးလုပ်ငန်းစဉ်တည်ဆောက်ဖို့ ၀ိဝါဒကွဲပြားစေလို့ ဥပဒေပြုလွှတ်တော်များအနေနဲ့ အန်စီအေကို အခြေခံတဲ့ နိုင်ငံပြန်လည်တည်ဆောက်ရေးဆိုင်ရာ အခြေခံတွေကို ဦးတည်တဲ့ ဥပဒေတွေကို စတင်ပြဋ္ဌာန်းဖို့လိုပြီလို့လည်း ကေအန်ယူက ဆိုပါတယ်။ ပြီးခဲ့တဲ့ နိုဝင်ဘာလအတွင်းကလည်း အရပ်ဘက်အဖွဲ့အစည်း ၃၀၀ ကျော်က မြေလွတ်မြေလပ်မြေရိုင်းစီမံခန့်ခွဲရေးဥပဒေ ပယ်ဖျက်ပေးဖို့ တောင်းဆိုခဲ့ကြပါသေးတယ်။
2 years Ago
Up