တောရိုင်းတိရစ္ဆာန်

November 16, 2018

တောရိုင်းတိရစ္ဆာန်အစိတ်အပိုင်း ရောင်းဝယ်မှု ထိရောက်စွာအရေးယူပေးရန် အဆိုတင်သွင်း

ဆင်နဲ့ တောရိုင်းတိရစ္ဆာန်တွေရဲ့ အစိတ်အပိုင်းတွေ ရောင်းဝယ်နေတာ ထိရောက်တဲ့ အရေးယူမှု ပြုလုပ်ဖို့ အစိုးရကို တိုက်တွန်းကြောင်းအဆိုကို မွန်ပြည်နယ် လွှတ်တော်ကိုယ်စားလှယ်က အမျိုးသားလွှတ်တော်မှာ တင်သွင်းခဲ့ပါတယ်။ နိုဝင်ဘာ ၁၆ ရက်နေ့ အမျိုးသားလွှတ်တော်အစည်းဝေးမှာ နိုင်ငံရဲ့ သက်ရှိသဘာဝသယံဇာတဖြစ်တဲ့ ဆင်အပါအဝင် အခြားသော တောရိုင်းတိရစ္ဆာန်တွေ မျိုးသုဉ်းခြင်းက ကာကွယ်နိုင်ဖို့ရည်ရွယ်ပြီး ပြည်သူတွေ သတိပြုမှု မြင့်တက်လာစေဖို့နဲ့ ဆင်အပါအဝင် အခြားသော တောရိုင်းတိရစ္ဆာန်တွေနဲ့ အစိတ်အပိုင်းတွေကို ပြောင်ပြောင်တင်းတင် ရောင်းဝယ်ဖောက်ကားနေတာကို ရပ်တန့်နိုင်ဖို့အတွက် ထိရောက်တဲ့ အရေးယူမှုတွေ ပြု လုပ်ခြင်းဖြင့် အချိန်မီကယ်တင်နိုင်ဖို့ အစိုးရကို တိုက်တွန်းကြောင်းအဆိုကို မွန်ပြည်နယ်မဲဆန္ဒနယ်က ဒေါ်သီရိရတနာက တင်သွင်းခဲ့တာပါ။ ဆင်အပါအဝင် အခြားတောရိုင်းတိရစ္ဆာန်တွေလို့ဆိုပေမယ့် အထူးရည်ရွယ်တာက ဆင်တမျိုးတည်းဖြစ်တယ်လို့ အဆိုရှင်က ပြောပါတယ်။ မြန်မာနိုင်ငံမှာ ၁၉၄ဝ ခုနှစ်ဝန်းကျင်မှာ တောဆင်ရိုင်းကောင်ရေ ၁ဝဝဝဝ ကျော်ရှိပြီး ၁၉၉ဝ ပြည့်နှစ်အလွန်မှာတော့ ၅ဝဝဝ ထိ လျော့ကျလာတယ်လို့ ပြောပါတယ်။ ဝန်ကြီးဌာနရဲ့ စာရင်းအရ ဆင်ကောင်ရေ ၁၄ဝဝ နဲ့ ၂ဝဝဝ ကြားမှာပဲ ရှိတော့ကြောင်း စိုးရိမ်ဖွယ်သိရတယ်လို့ အဆိုရှင်က ပြောပါတယ်။ "ဝန်ကြီးဌာနရဲ့ တရားဝင်ထုတ်ပြန်တဲ့ ကိန်းဂဏန်းတွေအရ မြန်မာနိုင်ငံမှာ ၂ဝ၁ဝ ကနေ ၂ဝ၁၆ ခုနှစ်ထိ ဆင်အကောင်ရေ ၁၁၆ ခန့်သတ်ဖြတ်ခံရပြီး ၂ဝ၁၇ ခုနှစ် ၁ နှစ်အတွင်းမှာပဲ သတ်ဖြတ်ခံရတဲ့ တောရိုင်းဆင်ကောင်ရေဟာ အနည်းဆုံး ၃ဝ ထိ ရှိခဲ့တယ်လို့ သတင်းထုတ်ပြန်ထားပါတယ်။ ၂ဝ၁၈ ခုနှစ်ရဲ့ စာရင်းချုပ် မထွက်သေးပေမယ့် သေဆုံးနှုန်းပိုမို မြင့်တက်လာမယ်ဆိုတာ ၂ဝ၁၈ ခုနှစ် အစပိုင်းမှာပဲ အာရှဆင်ရုပ်ကြွင်း ၂ဝ ကျော်ကို ဧရာဝတီတိုင်းတခုတည်းမှာ တွေ့ခဲ့ရတယ်ဆိုတာက သက်သေပြနေပါတယ် " လို့ ဒေါ်သီရိရတနာ က ပြောပါတယ်။ ဆင်ကောင်ရေ စုစုပေါင်း ၁၄ဝဝ နဲ့ ၂ဝဝဝ ကြား ကျန်တော့တဲ့အချိန်မှာ တပတ်ကို အနည်းဆုံး ဆင် ၁ ကောင်နှုန်း သတ်ဖြတ်ခံနေရတယ်လို့ စစ်တမ်းတွေမှာ ဖော်ပြနေပြီး ဒီနှုန်းအတိုင်းဆက်သွားနေရင် ၂ဝ၃ဝ-၃၅ ခုနှစ် လောက်မှာ မြန်မာနိုင်ငံက ဆင်တွေကို တွေ့ဖို့ လွယ်တော့မှာ မဟုတ်ဘူးလို့လည်း ဆိုပါတယ်။ "ဒီလို တပတ် တကောင်နှုန်းနဲ့ ပြည်တွင်းမှာ အသတ်ခံနေရသလို တဖက်မှာလည်း တနှစ်ကို မြန်မာ့ဆင် ၂၅ ကောင်ခန့်ဟာ ပြည်ပ ထိုင်းနိုင်ငံကို တရားမဝင် ရောင်းဝယ်ခံနေရပါတယ်။ တရုတ်နိုင်ငံဆီကိုတော့ အရေအတွက် မခန့်မှန်းနိုင်လောက်အောင် နည်းမျိုးစုံနဲ့ သတ်ဖြတ်ရောင်းဝယ်နေကြတာကို ရင်နာဖွယ် မြင်တွေ့နေရပါတယ်" လို့ ဆိုပါတယ်။ သတ်ဖြတ်ထားတဲ့ အစိတ်အပိုင်းတွေကို ပြည်တွင်းပြည်ပကို ရောင်းချတာမှာ ရန်ကုန်အပါအဝင် နိုင်ငံအတွင်းက မြို့တော်တော်များများနဲ့ အထူးသဖြင့် နယ်စပ်မြို့တွေဖြစ်တဲ့ မူဆယ်၊ မိုင်းလား စတဲ့ဒေသတွေမှာ တောရိုင်းတိရ စ္ဆာန်တွေရဲ့ အစိတ်အပိုင်းတွေကို တရားမဝင် မှောင်ခိုရောင်းဝယ်နေတာ အဆိုးဆုံးအနေအထားမှာရှိတယ်လို့ ပြောပါတယ်။ "ဆင်ရဲ့အစိတ်အပိုင်းတွေကို ဆေးဝါးအနေနဲ့ အသုံးပြုတာကနေ ဒီနေ့ခေတ်မှာ အစားအသောက်နဲ့ လက်ဝတ်ရတနာအနေနဲ့ပါ ချဲ့ထွင်အသုံးပြုနေကြပြီဖြစ်ပါတယ်။ အစားအသောက်အနေနဲ့ ရန်ကုန်၊ မန္တလေးစတဲ့ မြို့ကြီးတွေရဲ့ စားသောက်ဆိုင်ကြီးတချို့မှာ ဆင်နှာမောင်းကို စွပ်ပြုတ်လုပ်ရောင်းနေပြီး ဟင်းတပွဲကို သိန်း ၃ဝ ခန့် ရှိပါတယ်။ ဆင်သားရေနဲ့ လုပ်ထားတဲ့ လည်ဆွဲတခု တန်ဖိုးဟာ အရည်အသွေးသိပ်မကောင်းရင်တောင် ဒေါ်လာ ၁ဝဝ ကျော်လောက် ဈေးပေါက်နေတာကို စစ်တမ်းတွေအရ သိရှိရပါတယ်" လို့ အဆိုရှင် ဒေါ်သီရိရတနာ က ဆိုပါတယ်။ ဒီအဆိုကို ကိုယ်စားလှယ်တဦးက ထောက်ခံခဲ့ပြီး ကန့်ကွက်သူမရှိတဲ့အတွက် လက်ခံဆွေးနွေးဖို့ အမျိုးသားလွှတ်တော်ဥက္ကဋ္ဌက ဆုံးဖြတ်ခဲ့ပါတယ်။
2 years Ago

June 10, 2018

ပြည်မြို့တွင် တောရိုင်းတိရစ္ဆာန် အစိတ်အပိုင်းများ ဖမ်းမိ

ပဲခူးတိုင်း၊ ပြည်မြို့မှာ ဇွန်လ ၉ ရက်နေ့ ညပိုင်းက တောရိုင်း တိရစ္ဆာန် အစိတ်အပိုင်းတွေ ဖမ်းမိခဲ့တယ်လို့ သိရပါတယ်။ သတင်းအရ ပြည်ခရိုင်ရဲတပ်ဖွဲ့ တာဝန်ရှိသူတွေနဲ့ သစ်တောဦးစီးမှူးတွေက အဖွဲ့ ၂ ဖွဲ့ခွဲပြီး ရှောင်တခွင်ဝင်ရောက်ရှာဖွေခဲ့ရာမှ သစ်တောထွက်ပစ္စည်း အမျိုးအမည်ပေါင်းများစွာကို နေရာ ၂ နေရာမှာ ဖမ်းမိခဲ့တယ်လို့ အမှတ် ၁ ရဲစခန်းကနေ သိရပါတယ်။ ပြည်မြို့၊ ကျောင်းကြီးအိုးတန်းရပ်ကွက်၊ တပ်လမ်းနဲ့ ဈေးလမ်းဒေါင့်က ဦးရုံးလီ(ခ) ဦးကျော်ထွန်းနေအိမ်ကနေ ဂျီသားရေ ၁၂ ချပ်၊ လိပ်ခွံ ၂၄၅ ချပ်၊ လိပ်ခွံအပိုင်းအစတွေ၊ ဆတ်ဂျိုမျက်နှာပါ စုစုပေါင်း၂၄ ခု၊ တောင်စိတ်ချို ၅ စုံ၊ နွာနောက်ချို ၁စုံ၊၊ သင်းခွေချပ် ၂ ဒသမ ၂၄ ပိသာ၊ ဖြူဆူး ၁ ဒသမ ၉၀ ပိဿာ၊ ၀က်ဝံလက်သဲ ၇ ခု၊ ဂျီချိုပေါက် ၇ ချောင်း၊ ၀က်စွယ် ၄ ချောင်း၊ တောင်စိတ်ချို ၁ ချောင်းတို့ကို ပြည်ခရိုင်ရဲတပ်ဖွဲ့ရုံး၊ ရဲမှူး ပြုံးလွင်၊ သစ်တောဦးစီး ဦးထိုက်လွင်ဦးတို့အဖွဲ့က ဦးဆောင်ဖမ်းစီးခဲ့တာ ဖြစ်ပါတယ်။ ပြည်မြို့၊ ဗိုလ်ချုပ်လမ်း ရွာဘဲရပ်ကွက် ဦးသိန်းထွန်းရဲ့နေအိမ်ကနေ ဂျီသားရေ ၃ ချပ်၊ ဂျီချို ၅ ခု၊ တောင်ဆိပ်ချို ၄ ခု၊ ပြောင်ချို ၁၉ စုံ၊ လိပ်ဗိုက်ခွံ ၁၇ ခု၊ လိပ်အပေါ်ခွံ ၂ ခု၊ ဖြူဆူး ၁၀ ကျပ်သား၊ ၀က်ဝံရိုး ၃ ချောင်း၊ ဆပ်ဂျို ၁ ချောင်း၊ တောင်ဆိပ်ချို ၂ စုံ၊ ဆပ်ချို ၂ စုံ၊ ပြောင်ချို မျက်နှာပါ ၁ စုံ၊ ပြောင်ချို မျက်နှာမပါ ၁၄ စုံတို့ကို ပြည်မြို့မစခန်းမှူး ဦးမြင့်ဇော် နဲ့ တောအုပ်ကြီးတို့အဖွဲ့က တချိန်တည်းမှာ ဖမ်းဆီးလိုက်တာပါ။ လက်ဝယ်တွေ့သူ ပိုင်ရှင် ၂ ယောက်ကို ပြည်အမှတ် ၁ ရဲစခန်းက ပြည် (မမစ)(ပ) ၄၇၀/၁၈၊ ဇီဝမျိုးစုံ မျိုးကွဲနှင့် သဘာဝထိန်းသိမ်းရေးနယ်မြေများ ကာကွယ်စောင်ရှာက်ခြင်းဆိုင်ရာ ဥပဒေပုဒ်မ ၄၁(က) ၄၀ (က) တို့နဲ့ အမှုဖွင့် ဖမ်းဆီးထားတယ်လို့ သိရပါတယ်။ အဲဒီပုဒ်မတွေက အခု ၂၀၁၈ ခု နှစ်ကျမှ အသစ်ပြောင်းလဲထားတဲ့ ဥပဒေတွေဖြစ်ပြီး၊ ပုဒ်မ ၄၀(က)က ထောင်ဒဏ် ၅ နှစ်အထိနဲ့ ဒဏ်ငွေ ၁၀ သိန်းအထိချဖို့ သတ်မှတ်ထားပြီး၊ အရင်က ချမှတ်ထားတဲ့ ဥပဒေတွေထပ် များစွာပြစ်ဒဏ်တွေမြင့်ထားတယ်လို့ ပြည်မြို့နယ် သစ်တော ဦးစီးမှူး ဦးထိုက်လွင်ဦးက ရှင်းပြပါတယ်။ မင်းညိုပါ
3 years Ago
More News
Up