ကျောက်တော်

May 20, 2019

ကျောက်တော်တွင် ပစ်ခတ်မှုဖြစ် မိန်းကလေးငယ် ၁ဦးသေဆုံး၊ ၅ ဦးဒဏ်ရာရ

ရခိုင်ပြည်နယ်၊ ကျောက်တော်မြို့နယ်၊ မျောက်တောင်ကျေးရွာနဲ့ မာလာကျေးရွာကြားမှာ မေလ ၁၉ ရက် ညနေက ပစ်ခတ်မှုဖြစ်ပွားလို့ ဒေသခံ မိန်းကလေးငယ် ၁ ဦး လက်နက်ကြီးကျည်ထိမှန် သေဆုံးပြီး  ကလေးငယ် ၃ ဦးနဲ့ လူကြီး ၂ ဦးတို့ ဒဏ်ရာသွားပါတယ်။ မနေ့ညနေ ၆ နာရီလောက်မှာ စတင်ပစ်ခတ်မှု ဖြစ်ပွားခဲ့တာဖြစ်ပြီး တပ်မတော်ယာဉ်တန်းက ကျေးရွာအနီးကို ရောက်ရှိလာချိန်မှာ ပေါက်ကွဲ သံတခု ထွက်ပေါ်ပြီးနောက် ပစ်ခတ်မှုတွေ ဖြစ်ပေါ်ခဲ့တာလို့ ဒေသခံတွေက ပြောပါတယ်။ “ကားကတော့ ခဘောင်ရွာဘက်ကဖြတ်သန်းလာပြီးတော့ မာလာရွာကို ချိုးပြီးတောင်နားကို ရောက်တာနဲ့ စပြီးတော့ အသံထွက်ပါတယ်၊ သေနတ်ပစ်သံ။ အဲဒီမှာ စစ်သားတချို့က ရွာဘက်ကိုကပ်ပြီး ရွာကြားထဲက ဝင်ပြီးပစ်တော့ အိမ်နားမှာ လက်နက်ကြီးကျပြီးတော့ ဒဏ်ရာရတာတွေ ဖြစ်တာပေါ့”လို့ အမည်မဖော်လိုတဲ့ မာလာကျေးရွာသား တဦးက ပြောပါတယ်။ မျက်တောင်ကျေးရွာက ကလေးငယ် မောင်နှမနှစ်ဦးဟာ ရွာအနီးတောင်ပေါ်က ဘုရားမှာရှိတဲ့ ဘုန်းတော်ကြီးထံ သွားရောက်ပြီး ပြန်လာရာလမ်းမှာ ပစ်ခတ်မှုတွေဖြစ်ခဲ့လို့ ညီမဖြစ်တဲ့ အသက် ၁၀ နှစ်အရွယ် ၄ တန်းကျောင်းသူမှာ  လက်နက်ကြီး ထိမှန်သေဆုံးသွားပြီး အကိုဖြစ်တဲ့ အသက် ၁၃ နှစ်အရွယ် ယောက်ျားလေးကတော့ ထွက်ပြေးလို့ အသက်ဘေးက လွတ်မြောက်လာတာလို့ ဆိုပါတယ်။ မာလာတောင်ရွာထဲကိုလည်း  လက်နက်ကြီးတွေကျရောက်ပေါက်ကွဲတာကြောင့် နေအိမ် တအိမ်မှာရှိနေတဲ့ ၃ နှစ်အရွယ်ကလေးငယ် ဒဏ်ရာအပြင်းအထန်ရခဲ့သလို သူရဲ့မိခင်၊ အစ်ကိုနှစ်ယောက်နဲ့ ရွာထဲက အသက် ၇၅ နှစ်အရွယ် အမျိုးသားတဦးလည်း အနည်းငယ်စီ ထိခိုက်ဒဏ်ရာရှိခဲ့ကြတယ်လို့  နာရေးကူညီမှုနေသူ တွေက ပြောပါတယ်။ အဆိုပါ ပစ်ခတ်မှုနဲ့ ပတ်သတ်ပြီးတော့ မြန်မာ့တပ်မတော်ဘက်ကို  မေးမြန်းရာမှာတော့ အဲဒီကျေးရွာနှစ်ရွာကြားမှာ တပ်မတော်နဲ့ အေအေတိုက်ပွဲဖြစ်ပွားခဲ့တဲ့အကြောင်းနဲ့ ဒေသခံတွေ ထိခိုက်သေဆုံးမှု ရှိမရှိကို မသိဘူးလို့ ပြောပါတယ်။ ဒါ့အပြင် ဒဏ်ရာရတာရှိခဲ့ရင်လည်း နှစ်ဖက်ပစ်ခတ်မှုဖြစ်တဲ့အတွက် ဘယ်သူ့ လက်ချက်ကြောင့် ဖြစ်တယ်ဆိုတာကို ပြောဖို့ခက်တယ်လို့ အနောက်ပိုင်းတိုင်းစစ်ဌာနချုပ် ပြောရေးဆိုခွင့်ရပုဂ္ဂိုလ် ဗိုလ်မှူးကြီး ဝင်းဇော်ဦးက ပြောပါတယ်။ “ရွာထဲကနေပြီး ပစ်တဲ့ကိစ္စက သူပစ်ကိုယ်ပစ်တဲ့အခါမှာ တပ်ကကျည်လား။ သောင်းကျန်းအေအေရဲ့ ကျည်လား။ ဘယ်သူမှ မဝေခွဲနိုင်ဘူးလေ။ ရွာထဲမှာ မဖြစ်စေချင်ရင် ရွာထဲကို အေအေလာတာ လက်မခံနဲ့လေ။ ရွာထဲကနေ အပစ်မခံနဲ့။ ရွာထဲက ပစ်လို့ရှိရင်တော့ ဒီလိုမျိုး သူပစ်ကိုယ်ပစ် ပစ်တဲ့အခါမှာ ဘယ်ကျည်ကြောင့်မှန် သလဲဆိုတာ ကျနော်တို့က ဂဃနဏ မပြောနိုင်ဘူး။ ဝေခွဲရခက်တယ်” လို့ ပြောပါတယ်။ ရက္ခိုင့်တပ်မတော် (အေအေ) ဘက်ကတော့ တိုက်ပွဲတွေ ဖြစ်ပွားခဲ့ခြင်းမရှိဘူးလို့ ပြန်ကြားရေးတာဝန်ခံ ခိုင်သုခက ပြောပါတယ်။ “အဲဒီမှာ ကျနော်တို့ တိုက်ပွဲဖြစ်တာ မဟုတ်ဘူးဗျ။ တိုက်ပွဲဖြစ်တဲ့ နေရာမဟုတ်ဘဲနဲ့ ဗမာစစ်တပ်က ရွာကိုလာပြီးတော့ တမင်သက်သက် ပစ်တာ။ ရွာမှာ ကျနော်တို့နဲ့ တိုက်ပွဲဖြစ်တာ မရှိဘူး။ တိုက်ပွဲဖြစ်တဲ့ဥစ္စာက တခြားနေရာတွေမှာ အရင်နေ့တွေကဖြစ်တာ။” သေဆုံးသွားတဲ့ မိန်းကလေးငယ်ကို ကျောက်တော်မြို့ သုသာန်ကို ယူဆောင်ပြီး ဒီကနေ့ နေ့လယ်ပိုင်းမှာပဲ သင်္ဂြိုဟ်ခဲ့တယ်။ ဒဏ်ရာရသူတွေကိုလည်း စစ်တွေနဲ့ ကျောက်တော်က မြို့နယ် ဆေးရုံတွေကို ပို့ဆောင်ပြီး ဆေးကုသမှုခံနေကြရတယ်လို့ ကျောက်တော်မြို့ အရေးပေါ်နာရေးကူညီမှုအသင်း ဥက္ကဋ္ဌ ဦးမောင်မဲစိန်က ပြောပါတယ်။ သတင်း-ဝဏ္ဏခွာညို၊ ဓာတ်ပုံ - ကျော်လှမြင့်
2 years Ago

May 10, 2019

ကျောက်တော်တွင် သေနတ်ကျည်ထိမှန်သဖြင့် အရပ်သား ၁ ဦး သေဆုံး၊ ၁ ဦး ဒဏ်ရာရ

ရခိုင်ပြည်နယ် ကျောက်တော်မြို့နယ်မှာ ဒီကနေ့မနက် အစောပိုင်းက သေနတ်ကျည်ထိမှန်တာကြောင့် ဆိုင်ကယ်ကယ်ရီသမားတဦး သေဆုံးသွားပြီး ကူးတို့လှေ ပြေးဆွဲနေတဲ့ အရပ်သားတဦးလည်း ဒဏ်ရာရခဲ့ပါတယ်။ သေဆုံးသွားသူမှာ ကျောက်တော်မြို့နယ် ဘုရားပေါင်းကျေးရွာက ဦးမောင်မောင်လှ (၃၄ နှစ်) ဖြစ်ပါတယ်။ လူမှုကယ်ဆယ်ရေးတွေ လုပ်ကိုင်နေတဲ့ ကျောက်တော်ဒေသခံ ကိုဇော်ဝင်းက “ဘုရားပေါင်းက မောင်မောင်လှလို့ ခေါ်တယ်။ ကယ်ရီမောင်းတယ်။ မနက်စောစောကလည်း ကယ်ရီမောင်းလို့ ဒီကို (ကျောက်တော်) တခါ ရောက်လာသေးတယ်တဲ့။ ကျောက်တော်နဲ့ ဘုရားပေါင်းက နီးတော့ မနက်ဆိုရင် ကယ်ရီပြေးဆွဲနေတယ်။ မြို့ပေါ်ကိုဆွဲရတာပေါ့။ ရွာမှာဆွဲလို့လည်း ဘယ်လိုရမလဲ။ မနက်စောစော မိန်းမကိုလည်း ဒီကိုလာပို့လာသေးတယ်တဲ့။ ပစ္စည်းမေ့ကျန်ခဲ့လို့ ရွာကသွားယူတာ။ အဲမှာဖြစ်သွားတာ” လို့ ပြောပါတယ်။ ဒါ့အပြင် ဒီကနေ့မနက်ပိုင်းကလည်း ကျောက်တော်မြို့နယ် တောင်ပေါက်ရွာက ကိုဦးတင်ဝင်း အသက် (၂၈ နှစ်) ဟာ ကူးတို့ (စက်လှေ) ကူးလို့အပြီး လှေကို ဆိပ်ကမ်းမှာ ရပ်နားနေတဲ့အချိန် သေနတ်ကျည် ထိမှန်ခဲ့တယ်လို့ ကိုဇော်ဝင်းက ပြောပါတယ်။ လူမှုကယ်ဆယ်ရေးတွေ လုပ်ကိုင်နေတဲ့ ကျောက်တော်ဒေသခံ ကိုဇော်ဝင်းက “တောင်ပေါက်ရွာက အသက် ၂၈ နှစ်ရှိတဲ့ ကိုဦးတင်ဝင်းက ကူးတို့သည်။ ကူးတို့ကူးလို့ လူပို့လို့ စစ်အောင်ကျေးရွာဘက်ကို ရောက်တယ်။ ရောက်တော့ လှေကို ထိုးဝါးစိုက်တယ်။ ထိုးဝါးစစ်နေတဲ့အချိန် နဖူးမှာ ကျည်ထိသွားတယ်။ သေနတ်ထိတယ်လို့ သူကိုယ်တိုင် မနက်စောစောက ဓာတ်မှန်ဆောင်မှာ ဓာတ်မှန်ရိုက်နေတုန်း ပြောလိုက်တာ” လို့ ပြောပါတယ်။ သေဆုံးသွားတဲ့ ရုပ်အလောင်းကိုတော့ နယ်မြေခံရဲတွေက ကျောက်တော်မြို့နယ် ဆေးရုံရဲ့ ရင်ခွဲရုံကို ပို့ဆောင်ထားပြီး လက်ရှိမှာ စစ်ဆေးမှုတွေ ပြုလုပ်နေတယ်လို့ ဘုရားပေါင်းကျေးရွာ အုပ်ချုပ်ရေးမှူးက ပြောပါတယ်။ ကိုဦးတင်ဝင်းမှာလည်း နဖူးပေါ်ရသွားတဲ့ ဒဏ်ရာပြင်းထန်တာကြောင့် ကျောက်တော်ဆေးရုံမှာ ဆေးကုသမှု ခံနေရပါတယ်။ မြန်မာ့တပ်မတော်နဲ့ ရက္ခိုင့်တပ်မတော်တို့အကြား ဖြစ်ပွားနေတဲ့ တိုက်ပွဲတွေကြောင့် ရခိုင်ပြည်နယ်အတွင်း အရပ်သားတွေ ပစ်သတ်ခံရတာ၊ မိုင်းထိသေဆုံးတာ၊ ပျောက်ဆုံးတာတွေ မကြာခဏ ဖြစ်ပေါ်နေပါတယ်။ ကျောက်တော်မြို့နယ်မှာ ဒီနေ့မနက် တပ်မတော်နဲ့ အေအေအဖွဲ့တို့ တိုက်ပွဲဖြစ်ပွားတာ ရှိမရှိ အနောက်ပိုင်းတိုင်း စစ်ဌာနချုပ် ပြောရေးဆိုခွင့်ရပုဂ္ဂိုလ် ဗိုလ်မှူးကြီး ဝင်းဇော်ဦးကို ဆက်သွယ်ခဲ့ပေမယ့် လက်ခံဖြေကြားတာ မရှိခဲ့ပါဘူး။ အေအေပြောခွင့်ရ ခိုင်သုခကတော့ ဒီနေ့မနက် တိုက်ပွဲဖြစ်ပွားတာ မရှိဘူးလို့ ပြောပါတယ်။ မေလ ၉ ရက်နေ့ကလည်း ကျောက်တော်မြို့နယ်က စစ်ဘေးရှောင်တဦးနဲ့ အရပ်သားတဦးတို့ ဝါးသွားခုတ်စဉ် မိုင်းနင်းမိတာကြောင့် အပြင်းအထန် ဒဏ်ရာရခဲ့ကြပါတယ်။ သတင်း-ဝဏ္ဏခွာညို၊ ဓာတ်ပုံ - ကျော်လှမြင့်
2 years Ago
More News
Up