ဩစတြေးလျ

December 16, 2020

ဩစတြေးလျ စားသုံးသူရေးရာကော်မရှင်က Facebook ကုမ္ပဏီကို တရားစွဲ

သြစတြေးလျ ယှဉ်ပြိုင်မှုနဲ့ စားသုံးသူရေးရာကော်မရှင် (ACCC) က Facebook နိုင်ငံတကာ ကော်ပိုရေးရှင်းကို သတင်းအချက်အလက် သုံးစွဲမှုနဲ့ပတ်သက်ပြီး ဒီဇင်ဘာ ၁၆ ရက်မှာ တရားစွဲလိုက်ပါတယ်။ သုံးစွဲသူတွေပေးတဲ့ သတင်းအချက်အလက်တွေကို ကိုယ်ရေးကိုယ်တာအဖြစ် ထားတယ်လို့ အခိုင်အမာ ပြောနေချိန်မှာပဲ လုံခြုံရေး ဆော့ဖ်ဝဲလ်တရပ်ဆီကနေ သုံးစွဲသူတွေရဲ့ သတင်းအချက်အလက်တွေကို စုဆောင်းနေတယ်လို့ (ACCC) က Facebook ကို စွပ်စွဲ ထားပါတယ်။ သုံးစွဲသူတွေရဲ့ သတင်းအချက်အလက်တွေကို သိမ်းဆည်းကာကွယ် ဆင်ခြင်တိုင်းတာဖို့ နည်းလမ်းအဖြစ် အွန်လိုင်း ကိုယ်ရေးကိုယ်တာ ကွန်ရက်ကို Facebook ဟာ အရောင်းမြှင့်တင် နေပေမဲ့ အချက်အလက်တွေကို သိုမှီးထားဖို့ စုဆောင်းကောက်ယူထားတဲ့အတွက် Facebook ကို ဒဏ်ငွေတပ်ဖို့ ကြိုးစားနေတယ်လို့လည်း ကော်မရှင်က ပြောပါတယ်။ တရားစွဲပုံဟာ အမေရိကန်ပြည်ထောင်စု ကုန်သွယ်ရေးကော်မရှင် FTC က မှတ်လောက် သားလောက် တရားစွဲပုံနဲ့ တူနေတယ်လို့ ရိုက်တာသတင်းဌာနက ရေးသားထားပါတယ်။ Facebook ဟာ ဓာတ်ပုံတွေ မျှဝေတဲ့ အပလီကေးရှင်း Instagram ၊ စာတိုပေးပို့တဲ့ အပလီကေးရှင်း Whatsapp တို့ အပါအဝင် ကိရိယာတွေကို သုံးပြီး ပစ်မှတ်တွေကို ဆုံးဖြတ်ဖို့၊ သုံးစွဲသူတွေရဲ့ သတင်းအချက်အလက်တွေကို အသုံးချပြီး ဈေးကွက် လွှမ်းမိုးမှုကို ထိန်းထားတယ်လို့ FTC က ဖေ့စ်ဘွတ်ကို စွပ်စွဲတိုင်ထားတာပါ။  ACCCရဲ့ ဥက္ကဋ္ဌက “FTC က လုပ်ခဲ့တာနဲ့ ပတ်သက်မှုရှိပေမယ့် သူတို့က ဈေးကွက် ယှဉ်ပြိုင်မှုကိစ္စဘက်ကို ကြည့်ခဲ့တာ၊ ကျနော်တို့ကတော့ စားသုံးသူရေးရာ ကိစ္စဘက်ကို ကြည့်ခဲ့တာ” လို့  သတင်းစာရှင်းလင်းပွဲမှာ ပြောပါတယ်။ Facebook နဲ့ Google တို့က သူတို့ရဲ့ အင်တာနက် စာမျက်နှာပေါ်မှာ တင်လာမယ့် ပါဝင်တဲ့ အကြောင်းအရာတွေအတွက် ပြည်တွင်းမီဒီယာဌာနအနေနဲ့ ပေးဆောင်စရာ ရှိတာတွေ ပေးဆောင်ဖို့ အစီအစဉ်တွေကို သြစတြေးလျက ဒီလအစောပိုင်းမှာ ရှေ့တိုး လုပ်ဆောင်နေပါတယ်။
5 months Ago

December 14, 2020

နယူးဇီလန်နှင့် ဩစတြေးလျ ရောဂါခြေချုပ်ကင်းမဲ့ ခရီးသွားလုပ်ငန်းစတင်ရန် သဘောတူ

နယူးဇီလန်နဲ့ သြစတြေးလျ နှစ်နိုင်ငံကြား ရောဂါခြေချုပ်ကင်းမဲ့ ခရီးသွားလုပ်ငန်းကို ၂၀၂၁ ပထမ ၃ လပတ်မှာ စတင်ခွင့်ပြုဖို့ ဒီဇင်ဘာ ၁၄ ရက်မှာ သဘောတူလိုက်ပါတယ်။ ကိုရိုနာဗိုင်းရပ်စ် ကူးစက်ကပ်ဘေးကနေ ကာကွယ်ဖို့ နယ်စပ်တွေကို ပိတ်ထားအပြီး ၁ နှစ်နီးပါးအကြာမှာ ပြန်ဖွင့်ဖို့ စီစဉ်နေတာပါ။ နယူးဇီလန် ဝန်ကြီးချုပ် ဂျာစင်ဒါအာဒန်က “အစိုးရအဖွဲ့ဟာ တက်စ်မေးနီးယား ဖြတ်ကျော် ရောဂါခြေချုပ်ကင်းမဲ့ ခရီးသွားနိုင်ရေးအတွက် စည်းမျဉ်းတွေကို သြစတြေးလျ အစိုးရအဖွဲ့ အတည်ပြုချက်နဲ့ သဘောတူခဲ့ပြီးပြီ။ သိသာတဲ့ အပြောင်းအလဲက အိမ်နီးချင်းနိုင်ငံ နှစ်ဘက်စလုံးမှာ မရှိဘူး” လို့ ပြောပါတယ်။ နယူးဇီလန်နိုင်ငံဟာ ၁ နှစ်ပတ်လုံးနီးပါး နိုင်ငံခြားသားတွေ အားလုံးကို နယ်စပ်တွေကနေ မဝင်ရအောင် ပိတ်ထားပြီး တင်းကျပ်တဲ့ အသွားအလာပိတ်ဆို့ ကန့်သတ်ချက်ကို အကောင်အထည်ဖော်ခဲ့လို့ ကိုဗစ်-၁၉ ကပ်ရောဂါကူးစက်မှု မရှိတော့သလောက် ဖြစ်နေတာ ကြာပါပြီ။ နယူးဇီလန် ဝန်ကြီးချုပ်က “ဘေးကင်းကင်း ခရီးသွားနိုင်တာ သေချာအောင် ပိုအလုပ်လုပ်ဖို့ လိုသေးတယ်။ နယူးဇီလန်ဟာ လေကြောင်းလိုင်း ဝန်ထမ်းတွေကို စီမံခန့်ခွဲရေး၊ ခရီးသည်တွေကို တခြားလူတွေနဲ့ သီးခြားခွဲထားရေး စတဲ့ အစီအစဉ်တွေကို အပြီးသတ် လုပ်ဆောင်မယ်” လို့လည်း ပြောပါတယ်။ သြစတြေးလျ အစိုးရဟာလည်း ကပ်ဘေးအစောပိုင်းကတည်းက သူ့ရဲ့ နိုင်ငံတကာ နယ်စပ်တွေကို ပိတ်ထားခဲ့တာပါ။  သြစတြေးလျ နိုင်ငံသားတွေကိုသာ ကိုယ့်နိုင်ငံကိုယ် ပြန်ခွင့်ပေးထားတာဖြစ်ပြီး အခုတော့ နယူးဇီလန် နိုင်ငံသားတွေကလွဲလို့ တခြားသူတွေကို ဝင်ခွင့်မပေးသေးပါဘူး။
5 months Ago
More News
Up