ဦးမင်းသူ

March 9, 2021

နာကူအသင်းဥက္ကဋ္ဌ ဦးကျော်သူနှင့်ဇနီး၊ ဦးမင်းသူ၊ ဒေါက်တာအာကာမိုးသူတို့ကို ပုဒ်မ ၅၀၅ (က) ဖြင့် အမှုဖွင့်

နာရေးကူညီမှုအသင်း(ရန်ကုန်) ဥက္ကဋ္ဌဖြစ်သူ ဦးကျော်သူ၊ ဇနီး ရွှေဇီးကွက်၊ နေပြည်တော် စည်ပင်သာယာရေးကော်မတီဝင် ဦးမင်းသူ၊ ရန်ကုန်တက္ကသိုလ်၊ အရှေ့တိုင်းပညာဌာနမှ ပါမောက္ခ ဒေါက်တာ အာကာမိုးသူတို့ကို ရာဇသတ်ကြီး ပုဒ်မ ၅၀၅(က)နဲ့ အမှုဖွင့်ထားတယ်လို့ အာဏာသိမ်းစစ်ကောင်စီ မီဒီယာတွေကနေ ထုတ်ပြန်ပါတယ်။

နာရေးကူညီမှုအသင်း (ရန်ကုန်)ရဲ့ ဘဏ္ဍာရေးမှူး ဒေါ်မြင့်မြင်ခင်ဖေ(ခ)ဒေါ်ရွှေဇီးကွက်ဟာ CDM မှာ ပါဝင်လှုပ်ရှားနေတဲ့ နိုင်ငံ့ဝန်ထမ်းတွေကို အားပေးအားမြှောက်လုပ်တယ်ဆိုပြီး ဖေဖော်ဝါရီ ၂၅ ရက်နေ့က မရမ်းကုန်း မြို့မရဲစခန်းမှာ အမှုဖွင့်တိုင်ကြားခဲ့ကာ ဦးကျော်သူကိုတော့ မတ် ၄ ရက်က မရမ်းကုန်း မြို့မရဲစခန်းမှာ အမှုဖွင့်ထားတယ်လို့ ဆိုပါတယ်။

မတ် ၃ ရက်နေ့က နာရေးကူညီမှုအသင်း(ရန်ကုန်)ကို ဝင်ရောက်ရှာဖွေခဲ့ရာမှာ ဒေါ်မြင့်မြင့်ခင်ဖေ (ခ)ဒေါ်ရွှေဇီးကွက်ကို မတွေ့ဘဲ စာရွက်စာတမ်းတွေကို သိမ်းဆည်းသွားပြီး CDM လှုပ်ရှားနေတဲ့ နိုင်ငံ့ဝန်ထမ်းတွေကို ထောက်ပံ့ပေးနိုင်ရေးအတွက် ပြည်တွင်းပြည်ပက ပေးပို့ လှူဒါန်းငွေ စုစုပေါင်းငွေကျပ် ၆၁၃,၃၉၄,၃၅၀ (ငွေကျပ်သိန်းပေါင်းခြောက်ထောင့်တရာကျော်) နဲ့ အမေရိကန်ဒေါ်လာ ၂၀,၆၇၀ လက်ခံရရှိခဲ့တာနဲ့ သိန်းပေါင်း ၂ သောင်းထည့်ထားတဲ့ ဘဏ်အကောင့် ၆ ခုကိုလည်း စစ်ဆေးတွေ့ခဲ့ရတယ်လို့ ဆိုပါတယ်။

ဒီငွေတွေနဲ့ တိုင်းနဲ့ပြည်နယ် ၇ ခုက CDM မှာ ပါဝင်နေတဲ့ ဝန်ထမ်း ၂,၀၀၀ ကျော်ဆီကို တယောက်ကို ကျပ် ၁ သိန်းကနေ ၂ သိန်းအထိ၊ စုစုပေါင်းငွေကျပ် ၂၈၅,၆၃၀,၀၀၀ (သိန်းပေါင်း နှစ်ထောင့် ရှစ်ရာကျော်) ကို ထောက်ပံ့ပေးအပ်ခဲ့တဲ့အပြင် ရန်ကုန်မြို့က ကွန်တိန်နာ ယာဉ်မောင်းတွေ၊ မီးရထား ဝန်ထမ်းတွေကို ထောက်ပံ့ခဲ့တယ်လို့ ဆိုပါတယ်။

ရန်ကုန်တက္ကသိုလ်၊ အရှေ့တိုင်းပညာဌာနမှ ပါမောက္ခ ဒေါက်တာ အာကာမိုးသူကိုတော့ CDM လှုပ်ရှားမှုမှာ အဓိက ဦးဆောင်ပါဝင်တယ်ဆိုပြီး မတ် ၂ ရက်က MICT ဝန်းဝမှာ တက္ကသိုလ်ပေါင်းစုံ ဆရာ/ဆရာမတွေနဲ့ ဝန်ထမ်းတွေ စုပေါင်း ဆန္ဒပြဖို့ စုဝေးနေတုန်း ဖမ်းဆီးခဲ့ပြီး ဒဂုံမြို့သစ် (မြောက်ပိုင်း) မြို့မရဲစခန်းမှာ အမှုဖွင့်လှစ်ခဲ့ပါတယ်။

ဒါ့အပြင် ရန်ကုန်တက္ကသိုလ်၊ ရန်ကုန်နည်းပညာတက္ကသိုလ်၊ ရန်ကုန်အရှေ့ပိုင်းတက္ကသိုလ်၊ ဒဂုံတက္ကသိုလ်၊ ရန်ကုန်အဝေးသင်တက္ကသိုလ်တို့က ပါမောက္ခနဲ့ ကထိက ၁၅ ယောက်တို့ ဦးဆောင်ဖွဲ့စည်းပြီး CDM လှုပ်ရှားတာကိုဆောင်ရွက်ခဲ့တာကြောင့် ကျန်တဲ့ ၁၄ ယောက်ကိုလည်း အမှုဖွင့် ဖမ်းဆီးဖို့ ကြိုးစားနေတယ်လို့ ဆိုပါတယ်။

သူတို့ကတော့ ဒေါက်တာ ဝေယံလင်း(ပါမောက္ခ၊ ရန်ကုန်တက္ကသိုလ်၊ ဒဿနိကဗေဒဌာန)၊ ဒေါက်တာ နန်းနွယ်(တွဲဖက်ပါမောက္ခ၊ ရန်ကုန်တက္ကသိုလ်၊ ဒဿနိကဗေဒဌာန)၊ ဒေါက်တာ အောင်ကျော်စွာ(တွဲဖက်ပါမောက္ခ၊ ရန်ကုန်တက္ကသိုလ်၊ ဓာတုဗေဒဌာန)၊ ဦးကြည်ထင်ပေါ် (တွဲဖက်ပါမောက္ခ၊ ရန်ကုန်နည်းပညာတက္ကသိုလ်၊ သင်္ချာဌာန)၊ ဒေါက်တာ ဝင်းပပထွန်း (တွဲဖက် ပါမောက္ခ၊ ရန်ကုန်အဝေးသင်တက္ကသိုလ်၊ စိတ်ပညာဌာန)၊ ဦးလှမျိုး(ကထိက၊ ဒဂုံတက္ကသိုလ်၊ မနုဿဗေဒဌာန)၊ ဒေါက်တာ ကျော်သန်းမိုး (ကထိက၊ ဒဂုံတက္ကသိုလ်၊ ရူပဗေဒဌာန)၊ ဒေါက်တာ ယဉ်ယဉ်ဝင်း(ကထိက၊ ရန်ကုန်တက္ကသိုလ်၊ ဥပဒေဌာန)၊ ဦးတင်အောင်မိုး (ကထိက၊ ရန်ကုန်တက္ကသိုလ်)၊ ဒေါက်တာ သန်းလွင်ဦး(ကထိက၊ ရန်ကုန်တက္ကသိုလ်၊ နိုင်ငံတကာ ဆက်ဆံရေးဌာန)၊ ဦးသန်းထိုက်အောင်(ကထိက၊ ရန်ကုန်အရှေ့ပိုင်းတက္ကသိုလ်၊ သမိုင်းဌာန)၊ ဦးအောင်ကျော်စိုး(ကထိက၊ ရန်ကုန်အနောက်ပိုင်းတက္ကသိုလ်၊ သတ္တဗေဒဌာန)၊ ဒေါက်တာ တိုးတိုးကျော်(ကထိက၊ ရန်ကုန်အရှေ့ပိုင်းတက္ကသိုလ်) နဲ့ ဒေါက်တာ သုလင်းဝေ(ကထိက၊ ရန်ကုန်အရှေ့ပိုင်းတက္ကသိုလ်)တို့ ဖြစ်တယ်လို့ ဆိုပါတယ်။

နေပြည်တော်စည်ပင်သာယာရေးကော်မတီဝင်ဟောင်း ဦးမင်းသူကိုတော့ ပုဗ္ဗသီရိမြို့နယ် ပတ္တာနယ်မြေရဲစခန်းမှာ  မတ် ၈ ရက်က ရာဇသတ်ကြီးပုဒ်မ ၅၀၅-က နဲ့ ဖမ်းဆီးထားပါတယ်။

သူကတော့ နေပြည်တော်ကောင်စီနယ်မြေက ဝန်ထမ်းတွေကို CDM မှာပါဝင်လာစေဖို့ အဓိက ကြိုးကိုင်တယ်လို့ စွပ်စွဲထားပြီး သူနဲ့ ဆက်စပ်လို့ မတ် ၁ ရက်မှာ ဦးကျော်မင်းလှိုင်၊ မတ် ၂ ရက်မှာ ဦးသန့်ဇင်ထွန်းတို့ကိုဖမ်းဆီးပြီး ရာဇသတ်ကြီး ပုဒ်မ ၅၀၅-က နဲ့ အမှုဖွင့်ထားတယ်လို့ ထုတ်ပြန်ပါတယ်။

2 months Ago

August 17, 2020

ပြည်သူများ မဲပေးပိုင်ခွင့် မဆုံးရှုံးစေရန် ဆောင်ရွက်နေဟု ပြည်ထောင်စုဝန်ကြီးပြော

ဆန္ဒမဲပေးပိုင်ခွင့်ရှိတဲ့ ပြည်သူတွေ မဲပေးခွင့်ဆုံးရှုံးခြင်းမဖြစ်ရလေအောင် ပြည်သူလူထုရဲ့ အသံကို အောက်ခြေဆင်းပြီး နားထောင်ခိုင်းထားတယ်လို့ ပြည်ထောင်စုအစိုးရအဖွဲ့ရုံး ပြည်ထောင်စုဝန်ကြီး ဦးမင်းသူက ပြောပါတယ်။ ဇူလိုင် ၂၅ ရက်ကနေ စတင်ကပ်ခဲ့တဲ့ ပထမအကြိမ် မဲစာရင်းထဲကို လာရောက်ကြည့်ရှုခဲ့တဲ့ ပြည်သူတွေအကြားမှာ မဲစာရင်းတွေမှားယွင်းတဲ့ အသံတွေ ထွက်ပေါ်ခဲ့ပါတယ်။ မဲစာရင်းမှားယွင်းမှုတွေကို လက်တွေ့ကြုံနေရတဲ့ ပြည်သူတွေရဲ့ အသံကို အောက်ခြေအထိ ဆင်းနားထောင်ခိုင်းထားပြီး ပြည်သူတွေရဲ့ မဲပေးပိုင်ခွင့်မဆုံးရှုံးရအောင် ဆောင်ရွက်နေတယ်လို့ ပြည်ထောင်စုဝန်ကြီး ဦးမင်းသူက ဩဂုတ် ၁၇ ရက်က ဇမ္ဗူသီရိမြို့နယ် ရွေးကောက်ပွဲ ကော်မရှင်၊ လဝက၊ ထွေအုပ် ဝန်ထမ်းတွေနဲ့ တွေ့ဆုံအပြီးမှာ ပြောပါတယ်။  “အောက်ခြေမှာလည်း တကယ်ဘာတွေဖြစ်နေလဲ၊ အောက်ခြေမှာ ဖြစ်နေတဲ့ဟာတွေ ပြည်သူလူထုရဲ့ အသံကိုဆင်းပြီး နားထောင်ခိုင်းထားပါတယ်။ အဖွဲ့တစ်ဖွဲ့လည်း လွှတ်ထားပါတယ်။ အခုဆိုလို့ရှိရင် မန္တလေးတိုင်း၊ စစ်ကိုင်းတိုင်း နောက်မုံရွာပေါ့။ နောက်တနင်္သာရီလည်း ဆင်းပြီးပါပြီ။ ဧရာဝတီတိုင်းမှာကို အခုလက်ရှိ ရောက်နေပါပြီ။ ပြည်သူလူထုအသံကို ဆင်းနားထောင်ခိုင်းထားတာ၊ အောက်ခြေမှာ တကယ် ဘာတွေ အခက်အခဲဖြစ်နေလဲ။ အဓိကကတော့ မဲပေးခွင့်ရှိတဲ့ လူတွေ မဲပေးပိုင်ခွင့်မဆုံးရှုံးရလေအောင် အဲဒါလေးကို အလေးအနက်ထားပြီး ဆောင်ရွက်နေပါတယ်” ပထမအကြိမ် မဲစာရင်းကို ဇူလိုင် ၂၅ ရက်ကနေ ဩဂုတ် ၇ ရက်နေ့အထိ ရွေးကောက်ပွဲ ကော်မရှင်ရုံးခွဲတွေမှာ ကြော်ငြာကပ်ထားခဲ့ပေမယ့် လာရောက်ကြည့်ရှုသူ ရာခိုင်နှုန်း နည်းပါးလွန်းတာကြောင့် ဩဂုတ် ၁၄ ရက်နေ့အထိ နောက်ထပ် တပတ်ထပ်တိုးပေးခဲ့တာပါ။ ဒုတိယအကြိမ် မဲစာရင်းကပ်ရာမှာတော့ အမှားအယွင်းနည်းစေဖို့အတွက် အခုလို ဝန်ထမ်းတွေနဲ့ လာရောက်တွေ့ဆုံရတာ ဖြစ်တယ်လို့လည်း ဆိုပါတယ်။ “မဲစာရင်းမှားတာနဲ့ပတ်သက်လို့တော့ ဟိုးတုန်းကလည်း မှားခဲ့တာတွေ ရှိပါတယ်။ ဒါကတော့ အခုပိုပြီးတော့ ပွင့်လင်းမြင်သာတဲ့ခေတ်ပေါ့။ အခုခေတ်မီဒီယာတွေက ပိုပြီးပွင့်လင်းမြင်သာလာတဲ့ အချိန်ကျတော့ ပြည်သူလူထုကလည်း ပိုသိလာတယ်။ လူတွေကလည်း ကိုယ့်အမြင်အရတော့ ရွေးကောက်ပွဲကို ပြည်သူလူထုက စိတ်ဝင်စားလို့ လာကြည့်တဲ့အခါမှာ ဒီအမှားအယွင်းလေးတွေလည်း ပိုပြီးတွေ့တာပေါ့” လို့လည်း ဦးမင်းသူက ပြောပါတယ်။ ဒုတိယအကြိမ် မဲဆန္ဒရှင် စာရင်းတွေကိုတော့ လာမယ့် အောက်တိုဘာလအတွင်း ကပ်သွားဖို့ ရှိနေပြီး ရက်အတိအကျ ကိုတော့ ပြည်ထောင်စုရွေးကောက်ပွဲကော်မရှင်က ထုတ်ပြန်ကြေညာတာ မရှိသေးပါဘူး။ ပထမအကြိမ် မဲစာရင်းကပ်ထားရာမှာ  အမည်တွေမပါဝင်တာ၊ အမည်တွေမှားနေတာ၊  မိဘအမည်မှားနေတာ၊ မှတ်ပုံတင်အမှတ်တွေမှားတာ၊ နေရပ်လိပ်စာမှားတာတွေရှိနေပြီး လူတဦး  မဲစာရင်းတွေ တစ်နေရာထက်ပိုပြီး ပါဝင်နေတာတွေ့ရှိပြင်ဆင်ခဲ့ကြရတာပါ။ နိုင်ငံတော်အတိုင်ပင်ခံပုဂ္ဂိုလ်ရဲ့ အမည်ဟာလည်း မြို့နယ် ၂ မြို့နယ်မှာ ပါဝင်နေသလို ပြည်ထောင်စုဝန်ကြီးတချို့နဲ့ လွှတ်တော်အမတ်တချို့ရဲ့ မိသားစုတွေလည်း မဲစာရင်းမှာ မပါတာတွေလည်း ရှိခဲ့ပါတယ်။ ဖြိုးသက်ပိုင်မြင့် (နေပြည်တော်)
9 months Ago
More News
Up