ဦးရောဘတ်စန်းအောင်

September 27, 2016

မြန်မာနိုင်ငံ လူ့အခွင့်အရေးကော်မရှင်ကို တရားစွဲခွင့်ပြုမိန့်ထုတ်ပေးရန် သမ္မတထံတောင်းဆို

မြန်မာနိုင်ငံ အမျိုးသားလူ့အခွင့်အရေးကော်မရှင်ကို ရာဇဝတ်ကြောင်းနဲ့ တရားစွဲဆိုခွင့်ပြုမိန့် ထုတ်ပေးဖို့ တရားလွှတ်တော်ရှေ့နေ ဦးရောဘတ်စန်းအောင်က နိုင်ငံတော် သမ္မတဆီကို လျှောက်ထား တောင်းခံလိုက်ပါတယ်။ ကော်မရှင်ဟာ ဥပဒေပြဋ္ဌာန်းချက်တွေကို မျက်ကွယ်ပြုပြီး မှုခင်းကို ထိန်ချန်ခဲ့တယ်လို့ တောင်းဆိုတဲ့ရှေ့နေက စွပ်စွဲပါတယ်။ မကြာခင်က ပေါ်ပေါက်ခဲ့တဲ့ အင်းဝအပ်ချုပ်ဆိုင်ပိုင်ရှင်က အိမ်အကူ မိန်းကလေးငယ်တွေကို ညှဉ်းပန်းနှိပ်စက်ခဲ့တာမှာ ထောင်ဒဏ် ၇ နှစ်၊ ၁၀ နှစ်နဲ့ နှစ် ၂၀ ကျခံစေရနိုင်တဲ့ အမှုတွေကို ကော်မရှင်ဆီ ရောက်လာခဲ့ပေမယ့် ရဲစခန်းတွေကို အကြောင်းမကြားခဲ့ဘူးလို့ လျှောက်ထားစာမှာ ဖော်ပြထားပါတယ်။ ဒါ့အပြင်  ကော်မရှင်ဟာ ရာဇဝတ်မှုကို ဥပဒေနဲ့အညီ ဖြေရှင်းရမယ်ဆိုတာကို မလိုက်နာဘဲ အမှုကို ငွေကြေးနဲ့ ညှိနှိုင်းပေးခဲ့တာဟာလည်း အဂတိလိုက်စားမှု တိုက်ဖျက်ရေး ဥပဒေနဲ့ ငြိစွန်းနေတယ်လို့ ဖော်ပြထားပါတယ်။ ဒါဟာ ထောင်ဒဏ် ၇ နှစ်ကနေ ၁၅ နှစ်အထိ ကျခံရနိုင်တဲ့ ပြစ်ဒဏ်တွေပါလို့ ဖော်ပြထားပါတယ်။ ဒါ့ကြောင့် ကော်မရှင်ဥက္ကဋ္ဌ အပါအဝင် အဖွဲ့ဝင် ၁၁ ဦးလုံးကို ရာဇဝတ်မှုနဲ့ မူလအမှုတွေကို လက်ခံစစ်ဆေးပေးနိုင်မယ့် ရန်ကုန်တိုင်းဒေသကြီး တရားလွှတ်တော်မှာ တရားစွဲဆိုသွားဖို့ စီစဉ်နေတယ်လို့ ဦးရောဘတ်စန်းအောင်က သူ့ရဲ့ လျှောက်ထားစာမှာ ဖော်ပြထားပါတယ်။ မြန်မာနိုင်ငံ အမျိုးသားလူ့အခွင့်အရေးကော်မရှင် အဖွဲ့ဝင် ဦးဇော်ဝင်းကတော့ ဒီအမှုနဲ့ ပတ်သက်ပြီး ဖြစ်ရပ်မှန်ကို လိုအပ်သလို ဖြေရှင်းဆောင်ရွက်ပေးဖို့ ရန်ကုန်တိုင်းဒေသကြီး ရဲတပ်ဖွဲ့ကို အကြောင်းကြားခဲ့တဲ့အကြောင်းနဲ့ နစ်နာမှုတွေကို ကုစားပေးနိုင်ဖို့အတွက် သဘောရိုးနဲ့ ဆောင်ရွက်ခဲ့ခြင်းသာဖြစ်တယ်လို့ မနေ့က ပြည်သူ့လွှတ်တော်မှာ ပြောသွားခဲ့ပါတယ်။
5 years Ago

October 6, 2015

မာတင်အန်နာဆု ဆန်ကာတင်စာရင်း ဦးရောဘတ်စန်းအောင် ရွေးချယ်ခံရ

လူ့အခွင့်အရေးကာကွယ်သူတွေကို ချီးမြှင့်လေ့ရှိတဲ့ ၂၀၁၅ ခုနှစ် မာတင်အန်နာဆု အတွက် နောက်ဆုံး ဆန်ကာတင်စာရင်းမှာ မြန်မာနိုင်ငံက တရားလွှတ်တော်ရှေ့နေ ဦးရောဘတ်စန်းအောင်ကို ရွေးချယ်ထားပါတယ်။ အောက်တိုဘာ ၆ ရက်နေ့ ဆွစ်ဇာလန်နိုင်ငံ ဂျီနီဗာမြို့မှာ ဒီဆုကို ပေးအပ်သွားဖို့ ရှိနေရာ ဦးရောဘတ်စန်းအောင်နဲ့အတူ ဂီနီနိုင်ငံက အက်စ်မာဒီအာလိုနဲ့ အာရပ်စော်ဘွားများ ပြည်ထောင်စုက အာမက် မန်ဆွာတို့လည်း ဆန်ကာတင် ရွေးချယ်ခံထားရပါတယ်။ ၁၉၇၄ ခုနှစ် တက္ကသိုလ် ပထမနှစ် တက်စဉ်ကတည်းက လူ့အခွင့်အရေး မတော်မတရားမှုတွေကို ဆန့်ကျင်ခဲ့သလို ထောင်ဒဏ်ကျခံခဲ့ရပြီး ခြိမ်းခြောက် တိုက်ခိုက်တာတွေ ခံရတယ်လို့ ဦးရောဘတ်စန်းအောင်နဲ့ ပတ်သက်ပြီး မာတင်အန်နာဆုရဲ့ အင်တာနက်စာမျက်နှာမှာ ရေးသားထားပါတယ်။ ဒါ့အပြင် ရှေ့နေလိုက်ခွင့်လည်း တားမြစ်ပိတ်ပင်ခံခဲ့ရသလို ၂၀၁၂ ခုနှစ်ကျမှ ရှေ့နေလိုက်ခွင့် ပြန်ရခဲ့တယ်လို့ ဆိုပါတယ်။ ဒီနောက်မှာတော့ ကလေးစစ်သားတွေ၊ သတ္တုတွင်းဆန္ဒပြမှုအတွက် ထောင်ဒဏ်ချခံရသူတွေ၊ မြေသိမ်းခံရလို့ ငြိမ်းချမ်းစွာ ဆန္ဒပြတဲ့သူတွေနဲ့ ကျောင်းသား တက်ကြွလှုပ်ရှားသူတွေကို  ဦးရောဘတ်စန်းအောင်က ကိုယ်စားပြုခဲ့တယ်လို့ ဆိုပါတယ်။ ဒီဆုကို ရွေးချယ်ပေးအပ်ဖို့အတွက် နိုင်ငံတကာ လူ့အခွင့်အရေး အသိုင်းအ၀န်းက ဆုံးဖြတ်တာဖြစ်ပြီး ဒီအဖွဲ့တွေထဲမှာ နိုင်ငံတကာ လွတ်ငြိမ်းချမ်းသာခွင့်အဖွဲ့၊ လူ့အခွင့်အရေး စောင့်ကြည့်ရေးအဖွဲ့တို့လည်း ပါဝင်နေပါတယ်။ အန္တရာယ်တွေကြားက သတ္တိရှိရှိ ယုံကြည်ချက်အတွက် လူ့အခွင့်အရေးကို ကာကွယ်သူတွေကို ၁၉၉၄ ခုနှစ်ကတည်းက ဒီဆုကို စတင်ပေးအပ်ခဲ့တာ ဖြစ်ပါတယ်။
6 years Ago
Up