ဦးဝင်းမြင့်

May 10, 2019

သမ္မတဦးဝင်းမြင့် ဗီယက်နမ်နိုင်ငံသို့ အလုပ်သဘော ခရီးထွက်ခွာ

နိုင်ငံတော်သမ္မတ ဦးဝင်းမြင့်ဟာ တရားဝင် အလုပ်သဘော ခရီးအဖြစ် ဗီယက်နမ်နိုင်ငံကို  နေပြည်တော်ကနေ ဒီနေ့ ထွက်ခွာသွားပါတယ်။ သမ္မတရဲ့ ဗီယက်နမ်ခရီးစဉ်အတွင်း ဗီယက်နမ်နိုင်ငံ ဟနမ်ပြည်နယ်မှာ ကျင်းပမယ့် ၁၆ ကြိမ်မြောက် ကုလသမဂ္ဂ ဗုဒ္ဓနေ့ အခမ်းအနားကို တက်ရောက်မယ်လို့ သမ္မတရုံးသတင်းမှာ ဖော်ပြထားပါတယ်။ သမ္မတဦးဝင်းမြင့်ဟာ ဗီယက်နမ်သမ္မတ ငုယင်ဖူးကျောင့်နဲ့ ဇနီးတို့ရဲ့ ဖိတ်ကြားချက်အရ ဗီယက်နမ်နိုင်ငံကို သွားရောက်တာဖြစ်ပါတယ်။ သမ္မတနဲ့ ဇနီးဖြစ်သူ၊ သာသနာရေးနှင့် ယဉ်ကျေးမှုဝန်ကြီးဌာန ပြည်ထောင်စုဝန်ကြီး သူရဦးအောင်ကို၊ အပြည်ပြည်ဆိုင်ရာ ပူးပေါင်းဆောင်ရွက်ရေး ဝန်ကြီးဌာန ပြည်ထောင်စုဝန်ကြီး ဦးကျော်တင်၊ စီမံကိန်းနှင့် ဘဏ္ဍာရေးဝန်ကြီးဌာန ဒုတိယဝန်ကြီး ဦးဆက်အောင်၊ နိုင်ငံတော်သမ္မတရုံးနှင့် နိုင်ငံခြားရေးဝန်ကြီးဌာနမှ အဆင့်မြင့်အရာရှိကြီးတွေ လိုက်ပါသွားကြပါတယ်။
2 years Ago

December 7, 2018

အဂတိလိုက်စားမှု တိုက်ဖျက်ရေး နိုင်ငံရေးဆန္ဒ ပြင်းပြစွာဖြင့် လုပ်မည်ဟု သမ္မတ ကတိပေး

အဂတိလိုက်စားမှု တိုက်ဖျက်ရေးအတွက် နိုင်ငံရေးဆန္ဒ (Political Will) ပြင်းပြစွာရှိပြီး ဇွဲလုံ့လ ဝီရိယနဲ့ လုပ်ဆောင်ဖို့ သန္နိဋ္ဌာန်ချထားပြီးဖြစ်တယ်လို့ သမ္မတ ဦးဝင်းမြင့်က ပြောပါတယ်။ ဒီကနေ့ကျရောက်တဲ့ အပြည်ပြည်ဆိုင်ရာ အဂတိလိုက်စားမှု တိုက်ဖျက်ရေးနေ့ အထိမ်းအမှတ် အခမ်းအနားကို ပေးပို့တဲ့ သဝဏ်လွှာမှာ ပြောဆိုခဲ့တာ ဖြစ်ပါတယ်။ နိုင်ငံတော်အစိုးရအနေနဲ့ အဂတိလိုက်စားမှု တိုက်ဖျက်ရေးကို အမျိုးသားရေးတာဝန်တရပ်အဖြစ် ဆောင်ရွက်ဖို့၊ သန့်ရှင်းတဲ့အစိုးရ ကောင်းမွန်တဲ့အုပ်ချုပ်ရေး ဖြစ်ထွန်းပေါ်ပေါက်စေဖို့၊ တာဝန်ယူမှု တာဝန်ခံမှုနဲ့ ပွင့်လင်းမြင်သာမှု ပိုမိုရှိစေဖို့ ကြိုးပမ်း အကောင်အထည် ဖော်နေတယ်လို့လည်း သမ္မတရဲ့ သဝဏ်လွှာမှာ ဖော်ပြပါရှိပါတယ်။ ဒါ့အပြင် နိုင်ငံတော်ဘဏ္ဍာငွေ လေလွင့်ဆုံးရှုံးမှု မရှိစေဖို့၊ ပြည်သူလူထုရဲ့ အကျိုးစီးပွား ဆုံးရှုံးနစ်နာမှု မရှိစေဖို့၊ အသိပညာနဲ့ ကိုယ်ကျင့်သိက္ခာ မြှင့်တင်စေဖို့၊ အဂတိလိုက်စားမှုကို ထိရောက်စွာ အရေးယူဖို့၊ အဂတိကင်းစင်တဲ့ လူ့အဖွဲ့အစည်း ဖြစ်စေဖို့လည်း ကြိုးပမ်း အကောင်အထည် ဖော်နေတယ်လို့ သမ္မတ သဝဏ်လွှာက ဆိုပါတယ်။ အဂတိလိုက်စားမှု တားဆီးကာကွယ်ရေးနဲ့ တိုက်ဖျက်ရေးလုပ်ငန်းတွေကို မြှင့်တင်ကြိုးပမ်း ဆောင်ရွက်ရာမှာ အစိုးရဝန်ကြီးဌာန အဖွဲ့အစည်းတွေ၊ အစိုးရမဟုတ်သော အဖွဲ့အစည်းတွေ၊ အရပ်ဘက် လူ့အဖွဲ့အစည်းတွေ၊ သတင်းမီဒီယာတွေ အပါအဝင် ပြည်သူလူထု တရပ်လုံးကလည်း စုပေါင်းအင်အားနဲ့ ဝိုင်းဝန်းပူးပေါင်း ဆောင်ရွက်ပေးကြဖို့လည်း သမ္မတက နှိုးဆော်လိုက်ပါတယ်။ ဌာနဆိုင်ရာ အတော်များများမှာ ဓလေ့သဖွယ် စွဲကပ်နေတဲ့ အဂတိလိုက်စားမှုကို ပိုမိုတိုက်ဖျက်ရာမှာ ဝန်ထမ်းတွေရဲ့ ရပိုင်ခွင့် အခွင့်အရေးနဲ့ တာဝန်ကို ဘက်ညီမျှတစေရေး ပြန်လည်သုံးသပ်ပြီး ဌာနဆိုင်ရာ တခုချင်းက အသီးသီး တာဝန်ခံ ဆောင်ရွက်ရမယ်လို့လည်း သမ္မတက ထောက်ပြထားပါတယ်။ အခုနှစ် အပြည်ပြည်ဆိုင်ရာ အဂတိလိုက်စားမှု တိုက်ဖျက်ရေးနေ့ အထိမ်းအမှတ် ကုလသမဂ္ဂ ဆောင်ပုဒ်က ''အဂတိလိုက်စားမှုဆန့်ကျင်ဖို့ ညီညွတ်ကြပါစို့'' ဖြစ်ပါတယ်။
3 years Ago
More News
Up