အွန်လိုင်းစနစ်

August 25, 2020

တောင်ကိုရီးယားတွင် ကျောင်းအများစုပိတ်ပြီး အွန်လိုင်းစနစ်ဖြင့် သင်ကြားရန် အမိန့်ထုတ်

တောင်ကိုရီးယားနိုင်ငံ ဆိုးလ်မြို့တော်နဲ့ ပတ်ဝန်းကျင်ဒေသတွေက ကျောင်းအများစုကို ပိတ်ဖို့နဲ့ စာသင်ခန်းတွေကို အွန်လိုင်းကနေပဲ သင်ကြားဖို့ သြဂုတ် ၂၅ ရက်မှာ အမိန့်ထုတ်လိုက်ပါတယ်။ ကိုရိုနာဗိုင်းရပ်စ် ကူးစက်မှု တကျော့ပြန် လှိုင်းထလာလို့ ကြိုတင်ကာကွယ်ချက်တွေ တသီတသန်းကြီး ဆောင်ရွက်တဲ့အထဲမှာ ဒါက နောက်ဆုံးပေါ် လုပ်ဆောင်ချက်ပါ။ ဆိုးလ်မြို့တော်၊ အင်ချုံနဲ့ ဂျောင်ဂီခရိုင်တွေက မူကြို၊ မူလတန်း၊ အလယ်တန်းနဲ့ အထက်တန်းကျောင်းတွေသာမက အထူးကျောင်းတွေကိုပါ သြဂုတ် ၂၆ ရက်ကစပြီး စက်တင်ဘာ ၁၁ ရက်အထိ အဝေးသင်စနစ်နဲ့ အပြည့်အဝ သင်ကြားဖို့ အစီအစဉ် ပြောင်းလိုက်တယ်လို့ ပညာရေးဝန်ကြီးက ဩဂုတ် ၂၅ ရက် မနက် သတင်းစာရှင်းလင်းပွဲမှာ ပြောပါတယ်။ သြဂုတ် ၂၄ ရက် ညသန်းခေါင်ထိ ၂၄ နာရီအတွင်း ကူးစက်ခံ လူနာသစ် အယောက် ၂၈၀ ရှိတယ်လို့ ကိုရီးယား ရောဂါကာကွယ်ရေးနဲ့ ထိန်းချုပ်ရေးဌာနက အစီရင်ခံပါတယ်။ ဒါကြောင့် တောင်ကိုရီးယားမှာ ကိုဗစ်-၁၉ ကမ္ဘာ့ကပ်ရောဂါ ကူးစက်ခံလူနာ ၁၇,၆၄၅ ဦး ရှိပြီး ကူးစက်ခံ သေဆုံးသူဦးရေ ၃၁၀ လောက် ရှိနေပါပြီ။
9 months Ago

July 18, 2020

ကုမ္ပဏီများ၏အခွန် အောက်တိုဘာ ၁ ရက်မှစ၍ အွန်လိုင်းက ပေးချေရမည်

လာမယ့် အောက်တိုဘာ ၁ ရက်ကစပြီး ရန်ကုန်မှာရှိတဲ့ ကုမ္ပဏီတွေအနေနဲ့ အခွန်တွေကို အွန်လိုင်းကပဲ ပေးချေကြရတော့မှာ ဖြစ်ပါတယ်။ တခြား အခွန်ထမ်းမှတ်ပုံတင်အမှတ်ရထားတဲ့ ကုမ္ပဏီတွေအနေနဲ့လည်း အွန်လိုင်းကပဲ ပေးချေကြဖို့ ပြည်တွင်းအခွန်များဦးစီးဌာနက အသိပေးလိုက်ပါတယ်။ ပြည်တွင်းအခွန်များဦးစီးဌာန ညွှန်ကြားရေးမှူးချုပ် ဦးမင်းထွဋ်က “TIN နံပါတ် (အခွန်ထမ်းမှတ်ပုံတင်အမှတ်) ရထားတဲ့ ရန်ကုန်က ကုမ္ပဏီတွေအနေနဲ့ အောက်တိုဘာ ၁ ရက်ကစပြီး အွန်လိုင်းကပဲ ပေးချေဖို့ လာမယ့်အပတ်ထဲမှာ ကြေညာမှာပါ။ လတ်တလောမှာတော့ ဘဏ် ၅ ဘဏ်နဲ့ ချိတ်ဆက်ပေးဆောင်နိုင်ပါပြီ။ နောက်ထပ်ဘဏ်တွေလည်း လုပ်နေပါတယ်” လို့ ပြောပါတယ်။ ဒါ့အပြင် ဝန်ထမ်းတွေရဲ့ လစာဝင်ငွေခွန်ပေးဆောင်တာကိုလည်း အခွန်ရုံးတွေမှာ သွားပေးရတဲ့အစား အီလက်ထရောနစ်ငွေချေစနစ်ကို သုံးမှာ ဖြစ်သလို အခွန်မှတ်တမ်းစာအုပ်တွေ ထုတ်မပေးတော့ဘဲ ဖုန်းအက်ပလီကေးရှင်းကနေ အချက်အလက်တွေ ကြည့်နိုင်အောင်လုပ်မယ်လို့ ဆိုပါတယ်။ ပြည်တွင်းအခွန်များဦးစီးဌာနကို ပေးဆောင်ရတဲ့ ဝင်ငွေခွန်၊ ကုန်သွယ်လုပ်ငန်းခွန်၊ အထူးကုန်စည်ခွန်တွေနဲ့ တံဆိပ်ခေါင်းခွန်တွေကို MPU ကတ်နဲ့ ပေးချေနိုင်သလို ချိတ်ဆက်ထားတဲ့ ဘဏ်တွေရဲ့ အွန်လိုင်းငွေချေစနစ်တွေကနေလည်း ပေးချေနိုင်တာ ဖြစ်ပါတယ်။ MPU ကတ်နဲ့ ပေးချေမယ်ဆိုရင်တော့ ပြည်တွင်းအခွန်များဦးစီဌာနရဲ့ ဝက်ဘ်ဆိုဒ် www.ird.gov.mm ရဲ့ Start Your Tax Online Payment ကနေ ပေးချေရတာ ဖြစ်ပါတယ်။ ဘဏ်တွေရဲ့ အွန်လိုင်းငွေချေစနစ်မှာတော့ အက်ပလီကေးရှင်းမှာပါတဲ့ သက်ဆိုင်ရာ အခွန်ကို ရွေးချယ်ပြီး အခွန်ထမ်းမှတ်ပုံတင်အမှတ် (TIN) ကို ထည့်သွင်းလို့ ငွေချေနိုင်တာ ဖြစ်ပါတယ်။ အွန်လိုင်းဘဏ်စနစ်ကနေ ငွေချေရင် အဲဒီဘဏ်တွေမှာ ဖွင့်ထားတဲ့ ပြည်တွင်းအခွန်များ ဦးစီးဌာနရဲ့ ငွေစာရင်း၊ အဲဒီကတဆင့် ဗဟိုဘဏ်၊ အဲဒီကတဆင့် မြန်မာ့စီးပွားရေးဘဏ်၊ ဘဏ်ခွဲတွေမှာရှိတဲ့ သက်ဆိုင်ရာ အခွန်ရုံးတွေရဲ့ ငွေစာရင်းထဲကို အချိန်နဲ့ တပြေးညီ စာရင်းတွေရောက်သွားမှာ ဖြစ်ပါတယ်။  ဒီလို အခွန်ပေးသွင်းရာမှာ ပေးသွင်းမှုအထောက်အထားတွေအဖြစ် အွန်လိုင်းငွေကြေး ဝန်ဆောင်မှုလုပ်ငန်းတွေကနေ အခွန်ထမ်းကို အခွန်ပေးသွင်းပြီးကြောင်း အထောက်အထား ကနဦး ထုတ်ပေးမှာဖြစ်ပြီး ပြည်တွင်းအခွန်များဦးစီးဌာနဆီကို လွှဲပြောင်းရရှိပြီးရင်တော့ အထောက်အထားတွေကို အီးမေးလ်ကတဆင့် ပေးပို့မှာ ဖြစ်ပါတယ်။ ဒါနဲ့ပတ်သက်ပြီး အသေးစိတ် သိချင်ရင်တော့ ပြည်တွင်းအခွန်များဦးစီဌာနရဲ့ဝက်ဘ်ဆိုဒ် www.ird.gov.mm မှာ ဝင်ကြည့်နိုင်သလို သက်ဆိုင်ရာအခွန်ရုံးတွေ၊ ရန်ကုန်၊ မန္တလေးနဲ့ နေပြည်တော်က အခွန်ဆိုင်ရာ ဝန်ဆောင်မှုရုံးတွေမှာ ဆက်သွယ်မေးမြန်းနိုင်ပါတယ်။
10 months Ago
More News
Up