အောင်လအန်ဆန်း

April 22, 2021

မြန်မာပြည်သူများ အကြမ်းဖက်ခံနေရသည့်ကိစ္စ တားဆီးပေးရန် အောင်လအန်ဆန်း တောင်းဆို

မြန်မာပြည်သူတွေ အကြမ်းဖက်တိုက်ခိုက်ခံနေရတဲ့ အခြေအနေကို ဝင်ရောက်တားဆီးပေးဖို့ One Championship လိုက်ဟဲဗီးဝိတ်ချန်ပီယံ အောင်လအန်ဆန်းက အမေရိကန်သမ္မတ ဂျိုးဘိုင်ဒင်ထံ တောင်းဆိုလိုက်ပါတယ်။

သမ္မတဘိုင်ဒင်အနေနဲ့ မြန်မာစစ်အစိုးရကို ဘယ်လိုနည်းနဲ့ဖြစ်ဖြစ် စကားပြောနိုင်ရင် နေ့တိုင်းဒုက္ခခံစားနေရတဲ့ မြန်မာနိုင်ငံသားတွေအတွက် အကူအညီဖြစ်စေနိုင်လိမ့်မယ်လို့ ပြောပါတယ်။

ဒါ့အပြင် မြန်မာနိုင်ငံမှာ သတင်းမီဒီယာတွေ ကန့်သတ်ပိတ်ဆို့ခံနေရတဲ့အကြောင်း လူမှုကွန်ယက်တွေမှာလည်း စစ်အစိုးရကို ဆန့်ကျင်ပြောဆိုလို့မရဘဲ အိမ်တွေထဲအထိ လာရောက်ဖမ်းဆီးခံနေရတဲ့ကြောင်းနဲ့ သမ္မတဘိုင်ဒင်အနေနဲ့သာ  စစ်ဗိုလ်ချုပ်တွေနဲ့ မြန်မာစစ်တပ်ကို ဆက်သွယ်ပြောဆိုနိုင်မယ်ဆိုရင် မြန်မာနိုင်ငံသားတွေ အားလုံးက ကျေးဇူးတင်ကြပါလိမ့်မယ်လို့ တိုက်တွန်းပြောဆိုလိုက်ပါတယ်။ 

အောင်လအန်ဆန်းက သူ့အနေနဲ့ မြန်မာနိုင်ငံတွင်းက အကြမ်းဖက်မှုတွေကို အရေးတကြီး ရပ်ဆိုင်းစေချင်တဲ့အကြောင်း ပြည်တွင်းမှာ လူငယ်တွေ ကလေးငယ်တွေ ရက်ရက်စက်စက်အသတ်ဖြတ်‌ခံနေရတဲ့ ဗီဒီယိုတွေ အများကြီးလက်ခံရရှိခဲ့ပြီး ပြန်လည်ဖြန့်ဝေခဲ့တယ်လို့လည်း ပြောပါတယ်။

Photo Credit-AungLaNsang

2 weeks Ago

March 4, 2021

သေနတ်မောင်းခလုတ်ဆွဲမညှစ်ခင် ကလေးနှင့်မိသားစုကို စဉ်းစားရန် ရဲနှင့် စစ်တပ်ကို အောင်လအန်ဆန်းပြော

ရဲနဲ့ စစ်တပ်အနေနဲ့ သေနတ်မောင်းခလုတ်ကို ဆွဲမညှစ်ခင်မှာ ကိုယ့်ရဲ့ ကလေးတွေနဲ့ မိသားစုတွေအကြောင်းကို အရင်စဉ်းစားကြဖို့  One Championship လိုက်ဟဲဗီးဝိတ်ချန်ပီယံ အောင်လအန်ဆန်းက ပြောပါတယ်။

မတ်လ ၃ ရက်နေ့က ရန်ကုန်၊ မန္တလေးနဲ့ မုံရွာအပါအဝင် မြို့ကြီးတွေမှာ ရဲနဲ့ စစ်တပ်ရဲ့ အကြမ်းဖက်ပစ်ခတ်မှုကြောင့် ပြည်သူအယောက် ၄၀ လောက် သေဆုံးပြီး ရာနဲ့ချီ ဒဏ်ရာရခဲ့ပြီးနောက် ခုလို ပြောကြားလိုက်တာပါ။

“ရဲ နှင့် စစ်တပ်ကို ကျွန်တော်ပြောချင်တာက ခင်ဗျားတို့ရဲ့ မောင်းခလုတ်ကို မဆွဲညှစ်ခင်မှာ ခင်ဗျားတို့ရဲ့ ကလေး၊ ခင်ဗျားတို့ရဲ့ မိသားစုတွေအကြောင်းကို အရင်စဉ်းစားစေချင်ပါတယ်။ အခုဆန္ဒပြနေသူတွေဟာ ခင်ဗျားတို့ရဲ့ ညီအစ်ကို၊ အစ်မ၊ ညီမ၊ ခင်ဗျားတို့ရဲ့ တိုင်းပြည်ကလူတွေသာဖြစ်ပြီး သူတို့ကခင်ဗျားတို့ရဲ့ ရန်သူတွေ (လုံး၀) မဟုတ်ပါဘူး။ ဒါကြောင့် ကျေးဇူးပြု၍ ခင်ဗျားတို့ လူတစ်ယောက်ရဲ့ဘ၀ တစ်ခုကို မယူခင် (သို့မဟုတ်) လူတစ်ယောက်ကို ထိခိုက်နာကျင်အောင် မလုပ်ခင် သေချာလေးစဉ်းစားနိုင်ကြပါစေလို့ ကျွန်တော်ဆုတောင်းပါတယ်။” လို့ အောင်လအန်ဆန်းက သူ့ရဲ့လူမှုကွန်ရက်မှာပြောပါတယ်။ 

လွတ်လပ်မှုအတွက် တိုက်ပွဲ၀င်ခဲ့ပြီး အသက်တွေပါ စတေးခဲ့ကြရတဲ့ သူရဲကောင်းအားလုံးရဲ့ မိသားစုတွေနဲ့အတူ ထပ်တူ၀မ်းနည်းကြေကွဲရကြောင်းနဲ့ သူတို့ရဲ့စွန့်လွှတ်အနစ်နာခံမှုတွေက စိတ်နှလုံးထဲမှာ အမြဲထာ၀ရရှိနေမှာဖြစ်သလို ကျဆုံးခဲ့ရတဲ့သူတွေဟာ ထာ၀ရလေးစားသွား ရမယ့်သူတွေအဖြစ် ထိုက်တန်ကြတယ်လို့ ဆိုပါတယ်။

ငြိမ်းချမ်းစွာဆန္ဒပြနေသူတွေကို ပြင်းထန်တဲ့ အကြမ်းဖက်လုပ်ရပ်တွေနဲ့ ဖိနှိပ်နေမှုတွေကို ရပ်တန့်ဖို့အတွက် စစ်အာဏာရှင်တွေကို တိုက်တွန်းလိုက်ပြီး သွေးထွက်သံယိုဖြစ်နေမှုတွေ ရပ်တန့်သွားစေဖို့နဲ့ အခုလက်ရှိအခြေအနေတွေကနေ ငြိမ်းချမ်းတဲ့ဖြေရှင်းနည်းတွေ အမြန်ရရှိဖို့ မြန်မာပြည်က လူအားလုံးအတွက် ဆုတောင်းပေးနေတယ်လို့လည်း အောင်လအန်ဆန်းက ပြောပါတယ်။

2 months Ago
More News
Up