အိုးအိမ်စွန့်ခွာ ထွက်ပြေး

July 7, 2022

စစ်အာဏာသိမ်းပြီးနောက် အိုးအိမ်စွန့်ခွာထွက်ပြေးရသူ ၇ သိန်းခွဲကျော်၊ ဖျက်ဆီးခံရသည့် နေအိမ် ၁၉,၀၀၀ ကျော်ရှိဟု ကုလပြော

ပြီးခဲ့တဲ့ ၂၀၂၁ ခုနှစ် စစ်အာဏာသိမ်းပြီးချိန်ကတည်းက အခုနှစ် ဇွန် ၂၇ ရက်အထိ ပဋိပက္ခနဲ့ မလုံခြုံမှုတွေကြောင့် အိုးအိမ်စွန့်ခွာထွက်ပြေးရသူ ၇၅၈,၀၀၀ ယောက် အပါအဝင် မြန်မာနိုင်ငံတဝန်းမှာ ပြည်တွင်း နေရပ်စွန့်ခွာထွက်ပြေးရသူဦးရေ စုစုပေါင်း ၁ သန်းကျော် ရှိလာခဲ့ပြီလို့ ကုလသမဂ္ဂ လူသားချင်းစာနာမှုဆိုင်ရာ ညှိနှိုင်းရေးရုံး (UNOCHA) က ထုတ်ပြန်ပါတယ်။

ဒါ့အပြင် နိုင်ငံအနောက်မြောက်ပိုင်း တနံတလျားမှာ  ခရစ်ယာန်ဘုရားကျောင်းနဲ့ ဘုန်းတော်ကြီးကျောင်းတွေ အပါအဝင် အရပ်သားနေအိမ် အနည်းဆုံး ၁၉,၃၅၀ လုံး ဖျက်ဆီးခံခဲ့ရတယ်လို့ ဆိုပါတယ်၊ 

ပြီးခဲ့တဲ့ ရက်သတ္တပတ်အတွင်း နိုင်ငံအနောက်မြောက်ပိုင်းနဲ့ အရှေ့တောင်ပိုင်းတို့မှာ တိုက်ပွဲတွေ ပြင်းထန်လာတာတွေ အပါအဝင် ပြည်နယ်နဲ့ တိုင်းဒေသကြီး အများအပြားမှာ လက်နက်ကိုင်တိုက်ပွဲတွေ ဆက်လက်ဖြစ်ပွားနေတယ်လို့ အစီရင်ခံစာထဲမှာ ဖော်ပြထားပါတယ်။

ပဲခူးတိုင်းဒေသကြီး (အရှေ့ပိုင်း)၊ ကျောက်ကြီးမြို့နယ်ထဲက ကျေးရွာ ၁၂ ရွာက လူပေါင်း ၅,၄၀၀ ကျော် အိုးအိမ်စွန့်ခွာ ထွက်ပြေးတိမ်းရှောင်ခဲ့ရသလို ဇွန်လလယ်က စတင်ပြီး တနင်္သာရီတိုင်းဒေသကြီး လောင်းလုံးမြို့နယ်က လူ ၃,၀၀၀ ကျော်လည်း အနီးနားရှိ သစ်တောတွေနဲ့ ဘေးကင်းလုံခြုံရာဒေသတွေကို ထွက်ပြေးတိမ်းရှောင်ခဲ့ရကာ ကယားပြည်နယ်မှာတော့ ပြည်တွင်းနေရပ်စွန့်ခွာပြည်သူ ၄,၀၀၀ ကျော်ဟာ လွိုင်ကော်နဲ့ ဒီးမော့ဆိုမြို့နယ်တွေက သူတို့ရဲ့ မူလနေရပ်တွေကို ပြန်လည်ရောက်ရှိနေပြီလို့ ဆိုပါတယ်။

မြန်မာနိုင်ငံမှာတော့ အကြမ်းဖက်စစ်အုပ်စုက အာဏာသိမ်းထားတဲ့ ကာလဟာ ၁ နှစ်ခွဲနီးပါး ကြာမြင့်လာခဲ့ပြီဖြစ်ကာ ဒီကာလတွေအတွင်း စစ်ကောင်စီတပ်တွေနဲ့ ဒေသခံ ပြည်သူ့ကာကွယ်ရေးတပ်တွေ၊ တိုင်းရင်းသား လက်နက်ကိုင်တပ်တွေကြား တိုက်ပွဲတွေလည်း ပြင်းထန်နေပြီး စစ်ကောင်စီဟာ တိုင်းဒေသကြီးနဲ့ ပြည်နယ်တွေအနှံ့ လေကြောင်းတိုက်ခိုက်မှုတွေ အပါအဝင် ရွာလုံးကျွတ် မီးရှို့ဖျက်ဆီးတာတွေ၊ အပြစ်မဲ့ အရပ်သားတွေကို အစုလိုက်အပြုံလိုက် သတ်ဖြတ်တာတွေကိုလည်း မင်းမဲ့စရိုက်ဆန်ဆန် ကျူးလွန်နေတာပါ။

နိုင်ငံရေးအကျဉ်းသားများ ကူညီစောင့်ရှောက်ရေးအသင်း (အေအေပီပီ) က ထုတ်ပြန်ချက်အရ မတရားအာဏာသိမ်း ၁ နှစ်ခွဲနီးပါးအကြာ စစ်ကောင်စီတပ်တွေ အကြမ်းဖက် ပစ်ခတ်သတ်ဖြတ်မှုတွေကြောင့် နိုင်ငံတဝန်း အပြစ်မဲ့ကျဆုံးပြည်သူ ၂,၀၆၈ ယောက်နဲ့ ဖမ်းဆီးထိန်းသိမ်းခံရသူပေါင်း ၁၄,၅၀၂ ယောက်ထိ ရှိလာခဲ့ပြီဖြစ်တယ်လို့ ဆိုပါတယ်။

9 months Ago

January 26, 2022

တိုက်ပွဲများကြောင့် အိုးအိမ်စွန့်ခွာထွက်ပြေးရသူ ပေါင်း ၃၈၀,၀၀၀ ကျော်ရှိလာ

မြန်မာနိုင်ငံအနောက်မြောက်ပိုင်းနဲ့ အရှေ့တောင်ပိုင်းမှာ စစ်ကောင်စီတပ်တွေနဲ့ တိုင်းရင်းသားလက်နက်ကိုင်တပ်ဖွဲ့တွေ၊ ပြည်သူ့ကာကွယ်ရေးတပ်ဖွဲ့တွေကြား ဖြစ်ပွားတဲ့ တိုက်ပွဲတွေကြောင့် အိုးအိမ်စွန့်ခွာထွက်ပြေးရသူပေါင်း ၃၈၀,၀၀၀ ကျော်ထိ ရှိလာခဲ့တယ်လို့ ကုလသမဂ္ဂ လူသားချင်းစာနာမှုဆိုင်ရာ ညှိနှိုင်းရေးရုံး (UNOCHA) က ပြောပါတယ်။

ဇန်နဝါရီ ၁၈ ရက်ကနေ ၂၄ ရက်အထိ ဒေသတွင်း သတင်းအစီရင်ခံစာမှာ ခုလိုဖော်ပြထားတာဖြစ်ပြီး လက်နက်ကြီးအသုံးပြုတာတွေ၊ လေကြောင်းက တိုက်ခိုက်မှုတွေကြောင့်  ပိုမိုပြင်းထန်တဲ့ တိုက်ပွဲတွေအတွင်း အရပ်သားပိုင် အိုးအိမ်ပစ္စည်း ပျက်စီးဆုံးရှုံးရမှု၊ နေရပ် စွန့်ခွာထွက်ပြေးရမှုတွေလည်း ဆက်တိုက်တိုးပွားလာနေတယ်လို့ ဆိုပါတယ်။

ဇန်နဝါရီ ၁၇ ရက်က ရရှိတဲ့ ကိန်းဂဏန်းတွေအရ စစ်ကိုင်းတိုင်းမှာ ၁၁၃,၉၀၀ ယောက်၊ ချင်းပြည်နယ်မှာ ၃၃,၈၀၀ ယောက်၊ မကွေးတိုင်းမှာ ၂၀,၁၀၀ ယောက်အပါအဝင် လူဦးရေ ၁၆၇,၈၀၀ လောက်ဟာ မြန်မာနိုင်ငံအနောက်မြောက်ပိုင်းမှာ အိုးအိမ်စွန့်ခွာ ထွက်ပြေးခဲ့ကြရပြီး ပြီးခဲ့တဲ့ ၂၀၂၁ ခုနှစ် မေလလယ်ကတည်းကစပြီး နေအိမ်အလုံးပေါင်း ၁,၈၄၀၊ ခရစ်ယာန်ဘုရားကျောင်းတွေအပါအဝင် တခြားအရပ်သားပိုင်ပစ္စည်းများစွာ ပျက်စီးဆုံးရှုံး ခဲ့ရတယ်လို့ ဖော်ပြပါတယ်။

တချိန်တည်းမှာပဲ ကယားပြည်နယ်မှာ ၉၁,၄၀၀၊ ကရင်ပြည်နယ်မှာ ၇၄,၆၀၀၊ ရှမ်းပြည် နယ်တောင်ပိုင်းမှာ ၄၂,၆၀၀၊ မွန်ပြည်နယ်မှာ ၇,၁၀၀၊ တနင်္သာရီတိုင်းဒေသကြီးမှာ ၁,၆၀၀ နဲ့ ပဲခူးတိုင်းဒေသကြီးမှာ ၆၀၀ အပါအဝင် လူဦးရေ ၂၁၇,၉၀၀ လောက်ဟာလည်း မြန်မာနိုင်ငံအရှေ့တောင်ပိုင်းမှာ တိုက်ပွဲ‌ရှောင် ထွက်ပြေးခဲ့ကြရတယ်လို့ ဆိုပါတယ်။

ဆက်လက်ဖြစ်ပွားနေတဲ့ ပဋိပက္ခ၊ မတည်ငြိမ်တဲ့ လုံခြုံရေးအခြေအနေနဲ့ သွားလာခွင့် မရတာတွေကြောင့် လူသားချင်းစာနာမှုလုပ်ငန်း ဆောင်ရွက်သူတွေအနေနဲ့ အကာအ ကွယ်ပေးရေးဆိုင်ရာဝန်ဆောင်မှုနဲ့ အရေးပေါ်အကူအညီတွေကို လိုအပ်နေသူတွေဆီ ပေး အပ်ဖို့လည်း ခဲယဥ်းနေတယ်လို့ ဆိုပါတယ်။

မတရားစစ်အာဏာသိမ်းမှုကို မြန်မာပြည်သူတရပ်လုံးက ဆန့်ကျင်တော်လှန်ခဲ့ကြတဲ့ မြန် မာ့နွေဦးတော်လှန်ရေးဟာ လာမယ့် ဖေဖော်ဝါရီ ၁ ရက်မှာတော့ တနှစ်ပြည့်မြောက်ခဲ့ပြီ ဖြစ်ပါတယ်။

ဒီကာလတွေအတွင်း နိုင်ငံရေးမတည်ငြိမ်မှုတွေနဲ့အတူ ကျန်းမာရေး၊ စီးပွားရေး၊ လူမှုရေး ကဏ္ဍတွေအသီးသီးမှာ အဘက်ဘက်က ကျဆင်းနေခဲ့တာပါ။

အမျိုးသားညီညွတ်ရေးအစိုးရ(NUG)ကတော့ စစ်အာဏာရှင်ဆန့်ကျင်ရေး ခုခံတွန်းလှန် စစ်စတင်ကြောင်းနဲ့ မင်းအောင်လှိုင် ဦးဆောင်တဲ့ အကြမ်းဖက်စစ်အုပ်ချုပ်ရေးကို လှည်း နေလှေအောင်း မြင်းဇောင်းမကျန် တွန်းလှန်တိုက်ဖျက်ကြဖို့ ပြီးခဲ့တဲ့ ၂၀၂၁ ခုနှစ်၊ စက် တင်ဘာ ၇ ရက်မှာ ကြေညာထားခဲ့ပြီး အာဏာရှင်စနစ်ကို ဆန့်ကျင်တွန်းလှန်နေကြတဲ့ လူ ထုတိုက်ပွဲတွေဟာလည်း အရှိန်အဟုန်နဲ့ အားကောင်းနေဆဲ ဖြစ်ပါတယ်။

နိုင်ငံရေးအကျဉ်းသားများကူညီ စောင့်ရှောက်ရေးအသင်း (အေအေပီပီ) ရဲ့ ထုတ်ပြန်ချက်အရ မြန်မာနိုင်ငံမှာ မတရားအာဏာသိမ်းကာလ ၁၁ လခွဲကျော်အကြာ အကြမ်းဖက် စစ်တပ် ပစ်ခတ်သတ်ဖြတ်မှုကြောင့် အပြစ်မဲ့ကျဆုံးပြည်သူ ၁၄၉၃ ယောက်နဲ့ ဖမ်းဆီးထိန်းသိမ်း ခံရသူပေါင်း ၁၁၇၃၇ ယောက်ထိ ရှိလာခဲ့ပြီလို့ ဆိုပါတယ်။

1 year Ago
More News
Up