အရာတော်

January 28, 2023

အရာတော် ပျူစောထီးရွာကို PDF အဖွဲ့များသိမ်းပိုက်၊ ကန့်ဘလူတွင် စစ်ကောင်စီတပ် ၄ ရက် ဆက် တိုက်ခိုက်ခံရ

စစ်ကိုင်းတိုင်း၊ အရာတော်မြို့နယ်၊ ပျူစောထီးကျေးရွာဖြစ်တဲ့ သလဲဘာကျေးရွာကို ဇန်နဝါရီ ၂၇ ရက် ညနေ ၆ နာရီက စတင်ကာ ဒေသခံပြည်သူ့ကာကွယ်ရေးအဖွဲ့တွေနဲ့ မဟာမိတ်တော်လှန်ရေး အင်အားစုတွေက တိုက်ခိုက်သိမ်းပိုက်ခဲ့ပြီး စခန်းသိမ်းရှင်းလင်းနိုင်ခဲ့တယ်လို့ ဒေသခံ ပြည်သူ့ကာကွယ်ရေးအဖွဲ့ခေါင်းဆောင်တွေက ပြောပါတယ်။

အဲဒီတိုက်ပွဲဟာ ဇန်နဝါရီ ၂၇ ရက် ညနေ ၆ နာရီလောက်စ စတင်ဖြစ်ပွားခဲ့ပြီး ၆ နာရီနီးပါး ကြာမြင့်ခဲ့တယ်လို့ ဆိုပါတယ်။

မြင်းခြံ Zero ပြောက်ကျားတပ်ဖွဲ့ တာဝန်ရှိသူ ကိုသက်ကြီးက "အရာတော်မြို့နယ်၊ သလဲဘာပျူအခြေစိုက်စခန်းကို ကျနော်တို့အဖွဲ့နဲ့ အရာတော်မြို့နယ်က နယ်မြေခံတပ်ရင်း၊ တပ်ဖွဲ့တော်လှန်ရေးအင်အားစုတွေ တိုက်ခိုက်ရင်း ပျူစခန်းသိမ်းနိုင်ခဲ့တယ်ဗျ။ တိုက်ပွဲအထိခိုက်ကတော့ စကစအရာရှိအပါအဝင် စခ ၈ ကောင်ဘဝပြောင်းသွားပြီး ပျူ ၃၅ ကောင်ဝန်းကျင် နိဂုံးချုပ်ပေးနိုင်ခဲ့တယ်ဗျ။ ည ၁၁ နာရီ ၃၀ မိနစ်မှာ ပျူစခန်းအား လုံးဝသိမ်းနိုင်ခဲ့တယ်ဗျ။ ကျနော်တို့တော်လှန်ရေးအဖွဲ့တွေဘက်ကတော့ အထိခိုက်မရှိ ပြန်ဆုတ်ခွာနိုင်ခဲ့တယ်” လို့ ပြောပါတယ်။

အခုစခန်းသိမ်းနိုင်ခဲ့တဲ့ သလဲဘာပျူစခန်းကို နိုဝင်ဘာ ၃ ရက်နေ့ကလည်း ဒရုန်းနဲ့တိုက်ခိုက်ခဲ့သေးတယ်လို့ ဆိုပါတယ်။

တိုက်ပွဲဖြစ်ပြီးနောက် သလဲဘာကျေးရွာအနီးက ကျေးရွာတွေကို စစ်ကောင်စီက စစ်ကြောင်းထိုးနေတာကြောင့် အကြမ်းဖက်ခံရမှာကို စိုရိမ်နေကြတယ်လို့ ဒေသခံတွေက ပြောပါတယ်။
စစ်ကိုင်းတိုင်း ကန့်ဘလူခရိုင်၊ ထန်းကုန်းတိုက်နယ်၊ ညောင်ဇင်လေး (အနောက်) ရွာ စာသင်ကျောင်းအတွင်း အထိုင်ချထားတဲ့ စစ်ကောင်စီတပ်နဲ့ ပျူစောထီးတွေကို ဇန်နဝါရီ ၂၅ ရက် ည ၉ နာရီလောက်က ကန့်ဘလူ မဟာမိတ် ပူးပေါင်းအဖွဲ့တွေက လက်နက်ကြီးနဲ့ ပစ်ခတ်တိုက်ခိုက်ခိုက်ခဲ့တယ်လို့ ကျွန်းလှ-ကန့်ဘလူ တက်ကြွလှုပ်ရှားသူများ-ကန့်ဘလူခရိုင် အဖွဲ့က ထုတ်ပြန်ပါတယ်။

အဖွဲ့တာဝန်ရှိသူက “ဒေသခံ ပကဖအဖွဲ့များမှ ပူးပေါင်းပြီး ၈၀ မမ၊ ၄၀ မမ နဲ့ ပစ်ခတ် တိုက်ခိုက်ခဲ့ပါတယ်။ စစ်ကောင်စီတပ်နဲ့ ပျူစောထီးတွေဘက်ကလည်း ပြန်လည်ပစ်ခတ်တာ အနည်းငယ်ရှိခဲ့ပါတယ်” လို့ ပြောပါတယ်။

ဇန်နဝါရီ ၂၆ ရက် မနက် ၁၀ နာရီလောက်ကလည်း ညောင်ဇင်လေး (အနောက်) ရွာမှာရှိတဲ့ စစ်ကောင်စီတပ်နဲ့ ပျူစောထီးတွေကို မဟာမိတ်ပူး‌ပေါင်းအဖွဲ့တွေက ၄ ကြိမ်မြောက် သွားရောက်တိုက်ခိုက်ခဲ့တယ်လို့ သိရပါတယ်။ 

ညောင်ဇင်လေး (အနောက်) ရွာမှာ အထိုင်ချနေတဲ့ စစ်ကောင်စီတပ်နဲ့ ပျူစောထီးတွေကို ကန့်ဘလူမဟာမိတ်အဖွဲ့တွေက ဇန်နဝါရီ ၁၇၊ ၂၃ ၊ ၂၅ နဲ့ ၂၆ ရက်နေ့တွေမှာ သွားရောက်ပစ်ခတ်တိုက်ခိုက်ခဲ့တယ်လို့ ကျွန်းလှ ကန့်ဘလူ တက်ကြွလှုပ်ရှားသူများအဖွဲ့-ကန့်ဘလူခရိုင် တာဝန်ရှိသူက ပြောပါတယ်။

အကြိမ်ကြိမ် သွားရောက်ပစ်ခတ်တိုက်ခိုက်တာတွေကြောင့် စစ်ကောင်စီတပ်နဲ့ ပျူစောထီးတွေ အထိအခိုက် အကျအဆုံးရှိနိုင်ပြီး ကန့်ဘလူမဟာမိတ်အဖွဲ့များအားလုံး အထိအခိုက်မရှိ အ‌န္တရာယ်ကင်းစွာ ဆုတ်ခွာနိုင်ခဲ့ တယ်လို့ ကျွန်းလှ-ကန့်ဘလူ တက်ကြွလှုပ်ရှားသူများအဖွဲ့-ကန့်ဘလူခရိုင်အဖွဲ့က ထုတ်ပြန်ထားပါတယ်။

3 days Ago

January 27, 2023

ကသာ၌ လက်နက်ကြီးမှန်ပြီး ကလေး ၁ ဦးသေဆုံး၊ အရာတော်တွင် စိတ်မနှံ့သူ အပါအဝင် ပြည်သူ ၄ ဦးကို စစ်တပ်ဖမ်းဆီး

စစ်ကိုင်းတိုင်း၊ ကသာမြို့နယ်၊ ကျောက်ထုံးကြီးကျေးရွာမှာ စစ်တပ်လက်နက်ကြီးထိမှန်ပြီး ၁၂ နှစ်အရွယ် ကလေးတယောက် သေဆုံးကာ ၁၃ နှစ်အရွယ် ကလေးတယောက် ဒဏ်ရာရခဲ့တယ်လို့ ဒေသခံတွေက ပြောပါတယ်။

ဇန်နဝါရီ ၂၆ ရက် မွန်းလွဲ ၁ နာရီခွဲလောက်က ကသာမြို့နားက အောင်မြေသာစည်ကျေးရွာ ဘုန်းတော်ကြီးကျောင်းကနေ ပစ်ခတ်ခဲ့တာလို့ သိရပါတယ်။

ကျောက်ထုံးကြီးရွာ ဒေသခံက “၁၂၀ မမ ၉ လုံးနဲ့ပစ်တယ်။ ရွာအလယ်ကောင် တလုံးကျပြီး ပေါက်ကွဲပြီး အခုလို သေရတာ။ သေတဲ့ကလေးအမည်က ရွာထဲကခေါ်တာကတော့ မိထော်လို့ ခေါ်ကြတယ်။ ကျန် ၁၃ နှစ် ကလေးကတော့ လက်ကောက်ဝတ်ပေါက်ပြဲ ဒဏ်ရာနဲ့ ခြေကျင်းဝတ် ပေါက်ပြဲဒဏ်ရာ ရသွားတယ်။ ဘာကြောင့်ပစ်တာလဲတော့ မသိဘူး” လို့ ပြောပါတယ်။

အိမ်ခြေ ၁,၀၀၀ ကျော်ရှိတဲ့ ကျောက်ထုံးကြီးရွာကို အရင်တပတ်ကလည်း စစ်တပ်က လက်နက်ကြီးနဲ့ပစ်လို့ ဒေသခံတယောက် ထိခိုက်ဒဏ်ရာရခဲ့သလို နေအိမ်တချို့လည်း ပျက်စီးခဲ့တယ်လို့ သိရပါတယ်။

စစ်ကိုင်းတိုင်း၊ အရာတော်မြို့နယ်မှာတော့ ဇန်နဝါရီ ၂၆ ရက် နေလယ်ပိုင်းက စိတ်မနှံ့သူ အပါအဝင် ဒေသခံပြည်သူ ၄ ဦးကို စစ်ကောင်စီတပ်က ဖမ်းဆီးသွားတယ်လို့ ဒေသခံတွေဆီကနေ သိရပါတယ်။

ဖမ်းဆီးသွားတဲ့ စစ်ကောင်စီတပ်ဟာ အရာတော်မြို့ တကရ ၅၀၀၄ တပ်ရင်းက စစ်သားတွေ ဖြစ်တယ်လို့လည်း ဒေသခံတွေက ပြောပါတယ်။

ဒေသခံရွာသားတဦးက “အရာတော်မြို့ကနေ အင်အား ၅၀ လောက်နဲ့ ထွက်လာပြီး အခုလို ဖမ်းသွားကြတာဗျ။ စိတ်ဝေဒနာသည်နဲ့ တခြားဒေသခံပြည်သူတဦးကို တောထဲကနေ ဖမ်းလာတယ်။ အဲဒီကနေ မကျီးကန်ရွာဘက် တက်လာတယ်။ သူတို့တက်လာတာကို မသိတော့ ကုန်းသာကျေးရွာကနေ ဈေးလာဝယ်ပြီးပြန်သွားတဲ့ ကိုကျော်ထက်နိုင်နဲ့ ကိုဟိန်းဇော်တို့ လူငယ်နှစ်ဦးကို လက်ပြန်ကြိုးတုပ်ပြီး နောင်ကြီးအိုင်ရဲစခန်းဆီ ဖမ်းခေါ်သွားကြတယ်”လို့ ပြောပါတယ်။

အဆိုပါအဖမ်းခံရသူ ၄ ဦးထဲက ၂ ဦးကို ပြန်လွှတ်ပေးပြီး ကျန် ၂ ဦးဖြစ်တဲ့ ကိုကျော်ထက်နိုင်နဲ့ ကိုဟိန်းဇော်တို့ကိုတော့ ပြန်လွှတ်ပေးခြင်း မရှိသေးဘူးလို့လည်း ဒေသခံတွေက ပြောပါတယ်။

နောင်ကြီးအိုင်ရဲစခန်းမှာ ဖမ်းဆီးထားတဲ့ လူငယ် ၂ ဦးထဲက တဦးဟာ ရိုးရာဆေးကုဆရာတဦးဖြစ်ပြီး တဦးမှာ ပန်းရံလုပ်ငန်းလုပ်ကိုင်တဲ့ အရပ်သား ပြည်သူတွေသာ ဖြစ်တယ်လို့ ဒေသခံတွေရဲ့ ပြောပြချက်အရ သိရပါတယ်။

4 days Ago
More News
Up