အရက်ဝိုင်းဖွဲ့သောက်

May 8, 2020

မယ်ဆိုင်တွင် အရက်ဝိုင်းဖွဲ့သောက်နေသည့်  မြန်မာ ၁၂ ဦးကို ထိုင်းရဲဖမ်းဆီး

ထိုင်း-မြန်မာနယ်စပ်၊ ချင်းရိုင်းခရိုင်၊ မယ်ဆိုင်မြို့ထဲမှာ COVID-19 ကပ်ဘေးကာလ အရေးပေါ်စည်းကမ်းထုတ်ပြန်ထားတာကို မလိုက်နာပဲ  အရက်ဝိုင်းဖွဲ့သောက်နေတဲ့ တရားမဝင်မြန်မာအလုပ်သမား ၁၂ ဦး ဖမ်းဆီးခံရတယ်လို့ Chiangraifocus ဒေသတွင်း သတင်းမှာဖော်ပြပါတယ်။  မေလ ၆ ရက် ညနေပိုင်းက မယ်ဆိုင်မြို့ ရပ်ကွက် ၁ ရှိ မိုင်ဒဲန်ဈေးနားမှာ လူတစ်စု အသံဆူဆူညံနဲ့ အရက်ဝိုင်းထောင်ပြီး သောက်စားပျော်ပါးနေကြောင်း ရပ်ကွက်နေပြည်သူတို့ရဲ့ သတင်းပေးချက်အရ နယ်မြေခံရဲတပ်ဖွဲ့တွေနဲ့အတူ သွားရောက်စစ်ဆေးခဲ့တယ်လို့  မယ်ဆိုင်မြို့နယ်အုပ်ချုပ်ရေးရုံးတာဝန်ရှိသူက ပြောပါတယ်။  တာဝန်ရှိသူတွေ ရောက်သွားချိန်မှာ မိုင်ဒဲန်ဈေးရှေ့ ပိတ်ထားတဲ့ဈေးဆိုင်တစ်ခုမှာ ဝိုင်းဖွဲ့ထိုင်ပြီး ဆူညံစွာ အရက်သောက်ပျော်ပါးနေတဲ့ အသက် ၃၀ နဲ့ ၅၀ ကြားရှိ လူ ၁၀ ယောက်ကျော်တွေ့ရကြောင်း ၊ စစ်ဆေးမေးမြန်းရာမှာ သူတို့ဟာ မြန်မာနိုင်ငံကနေ အလုပ်လာလုပ်ကြတာဖြစ်ပြီး ထိုင်းနိုင်ငံက ထုတ်ပြန်ထားတဲ့ COVID-19 ကာလ လူစု လူဝေးမနေရဆိုတဲ့ အရေးပေါ်ဥပဒေထုတ်ပြန်ချက်ကိုမသိဘဲ ဝိုင်းဖွဲ့သောက်စားနေတာလို့ ဆိုပါတယ်။  တာဝန်ရှိသူတွေက အရေးပေါ်စည်းကမ်းချက်အကြောင်း ပြောပြခဲ့သလို  ကျန်းမာရေးစစ်ဆေးဖို့နဲ့ လိုအပ်သလိုအရေးယူဖို့ စုစုပေါင်း အမျိုးသား ၁၂ ဦးကို လူစုခွဲပြီး ဖမ်းဆီးထိန်းသိမ်းလိုက်ပါတယ်။  ထိုင်း-မြန်မာ နယ်စပ်ဂိတ်တွေ ပိတ်ထားပါလျက်နဲ့ သူတို့ဟာ ထိုင်းနိုင်ငံထဲ တရားမဝင် ဝင်ရောက်လာပြီး အလုပ်လာလုပ်တာကို စစ်ဆေးတွေ့ရှိရလို့ တရားမဝင်ဝင်ရောက်နေထိုင်မှု၊ အရေးပေါ်ဥပဒေချိုးဖောက်မှု၊ လူစုလူဝေးနဲ့အရက်ဝိုင်းထောင်မှုအပြင် ပတ်ဝန်းကျင်အား ဆူညံစွာ အနှောင့်အယှက်ပေးမှုတွေနဲ့ အရေးယူခံမယ်လို့  မယ်ဆိုင်မြို့နယ်တာဝန်ရှိသူက ပြောပါတယ်။  ကိုးကား- Chiangraifocus 
1 year Ago
Up