အမျိုးသမီး ၁ ဦးသေ

October 24, 2021

မိုးဗြဲတွင် စစ်တပ်ကလက်နက်ကြီးဖြင့်ပစ်ခတ်သဖြင့် အမျိုးသမီး ၁ ဦးသေ၊ ကလေးများအပါအဝင် ၆ ဦး ဒဏ်ရာရ

ရှမ်း-ကယားနယ်စပ်၊ မိုးဗြဲမြို့မှာ အောက်တိုဘာ ၂၄ ရက် ဒီမနက် ၇  နာရီလောက်က စစ်ကောင်စီတပ်က လက်နက်ကြီးနဲ့ ပစ်ခတ်မှုကြောင့် ကလေး၂ ဦးအပါအဝင် အရပ်သား ၆ ယောက်လောက်ဒဏ်ရာရပြီး  အဲဒီထဲက အမျိုးသမီး ၁ ယောက် သေဆုံးသွားပါတယ်။

မိုးဗြဲအခြေစိုက် စစ်ကောင်စီတပ် ခလရ ၄၂၂ တပ်ရင်းကနေ မနက် ၇ နာရီလောက်က လက်နက်ကြီးတွေနဲ့ လှမ်းပစ်ခတ်တဲ့အတွက် မိုးဗြဲမြို့၊ စည်ကား ၁ ရပ်ကွက်နဲ့ စည်ကား ၃ ရပ်ကွက်တွေမှာ လက်နက်ကြီးကျည်ကျရောက်ပေါက်ကွဲပြီး  ကလေးငယ်တွေအပါအဝင် ၆ ယောက် ဒဏ်ရာရရှိခဲ့တာလို့ မိုးဗြဲကယ်ဆယ်ရေးအဖွဲ့က တာဝန်ရှိသူက  ပြောပါတယ်။

“စည်ကား ၃ က ကလေး နှစ်ယောက်ထိတယ်ဗျာ။ ၄ နှစ်နဲ့ ၂ နှစ်အရွယ်ကလေး ၂ ယောက်၊ ယောက်ျားလေး ၁ ယောက်၊ မိန်းကလေး ၁ ယောက်။ စည်ကား ၁ ကတော့ အမျိုးသမီး ၂ ဦးနဲ့ အမျိုးသား ၁  ဦးပေါ့နော်။ အမျိုးသားတဦးကလည်း ၆၀ ဝန်းကျင်၊ အမျိုးသမီး ၂ ဦးကလည်း အသက်၆၀ ဝန်းကျင်။ အမျိုးသမီး ၁ ဦးကတော့ သေသွားတယ်။ ကျန်တဲ့အမျိုးသားတဦးနဲ့ အမျိုးသမီးကြီးတဦးကတော့ စိုးရိမ်ဒဏ်ရာရတယ်။ ဒဏ်ရာပြင်းထန်တယ်။ ဒဏ်ရာက စိုးရိမ်ရတယ်။ ပထမဆုံးဒဏ်ရာရတာက အမျိုးသားတဦးဗျာ။ သူက ဗိုက်မှာထိတာ။ သူကတော့ မစိုးရိမ်ရဘူးပေါ့။”

ထိခိုက်ဒဏ်ရာရသူတွေကို မိုးဗြဲဆေးရုံကို ပို့ဆောင်တာမရှိပဲ မိုးဗြဲ Rescue Team က လုံခြုံတဲ့နေရာတနေရာမှာ ဆေးကုပေးနေတယ်လို့ ပြောပါတယ်။

မိုးဗြဲမြို့မှာ PDF တွေလှုပ်ရှားနေတယ်ဆိုကာ မိုးဗြဲအခြေစိုက် စစ်ကောင်စီတပ် ၄၂၂ က သူတို့နေထိုင်ရာစခန်းတွင်းကနေ လက်နက်ကြီးတွေနဲ့ ပစ်ခတ်ခဲ့တာဖြစ်ပြီး လူထုတွေကို ထိမှန်လို့ဆိုကာ စစ်ကြောင်းထိုးနေတဲ့ စစ်ကောင်စီတပ်ကို PDF မနက် ၉ နာရီလောက်က ဝင်ရောက်တိုက်ခိုက်ပြီး နှစ်ဘက် အပြန်အလှန် အနည်းငယ်ဖြစ်ပွားခဲ့တယ်လို့လည်း ဆိုပါတယ်။

ဒီလို ပစ်ခတ်မှုဖြစ်ပြီးနောက်ပိုင်းမှာ ဒီကနေ့ မိုးဗြဲမြို့ခံတွေ အများအပြား ထွက်ပြေး တိမ်းရှောင်နေကဲရတယ်လို့လည်း ဆိုပါတယ်။

“ရှိတယ်ဗျာ။ အခု ၂၀ ရာခိုင်နှုန်းလောက်တော့ ထွက်ပြေးတိမ်းရှောင်နေကြတယ်ဗျာ။ မိုးဗြဲမြို့ပေါ်မှာရှိတဲ့ ရပ်ကွက် ပြည်သူတွေဗျာ။ ”

ဒါ့အပြင် လက်နက်ကြီးကျည်ကျရောက်ပေါက်ကွဲမှုကြောင့်  နေအိမ် တချို့လည်း ထိခိုက်ပျက်စီးခဲ့တယ်လို့ ပြောပါတယ်။

ဒီလို လူထုတွေကိုပါ ထိခိုက်လာတဲ့ ပစ်ခတ်မှုတွေ ဖြစ်ပေါ်တဲ့အတွက် မိုးဗြဲမြို့နယ်မှာ စစ်ကောင်စီတပ်ဖွဲ့နဲ့  မိုးဗြဲ PDF တို့ကြား စစ်ရေးတင်းမာနေပြီး အချိန်မရွေးတိုက်ပွဲ ဖြစ်နိုင်တဲ့အနေအထားရှိတယ်လို့  ဒေသခံတွက ပြောပါတယ်။

မိုးဗြဲ PDF ရဲ့လူမှုကွန်ယက်စာမျက်နှာမှာတော့  ပြည်သူတွေအနေနဲ့ သတိနဲ့နေထိုင်ကြဖို့ သတိပေးထားတာတွေ့ရပါတယ်။“ပြည်သူလူထုကြီးခင်ဗျာ အစိုးမရတဲ့ စစ်ရေးအခြေနေတွေကြောင့် အစစအရာရာ သတိနှင့် အသိယှဉ်တွဲပြီး ဂရုတစိုက် နေထိုင်ကြဖို့ ထပ်မံအသိပေးအပ်ပါသည်။ ယခုကာလအတွင်း ဆောင်ရန်၊ ရှောင်ရန် အခြေအနေများကိုလည်း အသိပေးပြီး ဖြစ်ပါသည်။ မိမိလုံခြုံရေးကို ပထမဦးစားပေး‌ အဆင့်မှာထားဖို့ တိုက်တွန်းအပ်ပါသည်။ လုံခြုံမည့် နေရာများမှာ နေထိုင်ကြဖို့လည်း သတိပြုစေချင်ပါသည်။”

3 months Ago

July 18, 2020

မင်းကင်းတွင် ကားနှင့်ဆိုင်ကယ်တိုက်၊ စိုက်ပျိုးရေးဝန်ထမ်း အမျိုးသမီး ၁ ဦးသေဆုံး 

စစ်ကိုင်းတိုင်း၊ မင်းကင်းမြို့အဝင် လမ်းဆုံအနီးမှာ ဇူလိုင် ၁၇ ရက်နေ့က ဖော်ကားတစ်စီးနဲ့ ဆိုင်ကယ်တိုက်မှု ဖြစ်ပွားခဲ့ပြီး ဆိုင်ကယ်စီးလာသူ စိုက်ပျိုးရေးဝန်ထမ်း အမျိုးသမီး  ၁ ဦး သေဆုံးပြီး ၁ ဦး ပြင်းထန်ဒဏ်ရာ ရရှိခဲ့တယ်လို့ သိရပါတယ်။ ရဲဆွေဝင်း မောင်းနှင်လာတဲ့ ဖောကားနဲ့ စိုက်ပျိုးရေးဌာနက ဒုလက်ထောက်ဦးစီးမှူး ဒေါ်ခိုင်မာဦးနဲ့ ဒေါ်နှင်းနှင်းမော်တို့ မောင်းနှင်စီးနင်းလာတဲ့ ဆိုင်ကယ်တို့ တိုက်မိခဲ့တာပါ။ ယာဉ်တိုက်မှုကြောင့် ဒုလက်ထောက်ဦးစီးမှူး ဒေါ်ခိုင်မာဦး (၃၃) နှစ် ပြင်းထန်ဒဏ်ရာရရှိပြီး ဆေးရုံပို့ဆောင်စဉ် သေဆုံးသွားပါတယ်။ ဒေါ်နှင်းနှင်းမော်မှာလည်း တင်ပါးဆုံရိုးကျိုးသွားတဲ့အတွက် မုံရွာဆေးရုံကြီးကို ပို့ဆောင် ကုသနေရတာပါ။  ဖောကားမောင်းနှင်သူ ရဲဝင်းဆွေကို‌တော့ ယာဉ် (ပ) ၁၀/၂၀၂၀၊ ရာဇသတ်ကြီးပုဒ်မ ၃၃၇၊ ၃၀၄ (က) နဲ့ မင်းကင်းမြို့မရဲစခန်းက တရားစွဲဆိုထားပါတယ်။ အခုနှစ်အတွင်း မင်းကင်းမြို့မရဲစခန်းပိုင်အတွင်းမှာ ယာဉ်တိုက်မှုပေါင်း ၁၀ ခုအထိ ရှိနေပြီး ဖြစ်ပါတယ်။
2 years Ago
Up