အန်စီအေ

December 2, 2018

ABSDF တပ်ဖွဲ့ဝင်အချို့အားဖမ်းဆီးမှု အန်စီအေထိုးထားသောအဖွဲ့များကို ထိန်းချုပ်လိုသည့် သဘောဟုဆို

ABSDF ကျောင်းသားတပ်မတော် တပ်ဖွဲ့ဝင်တချို့ကို ဖမ်းဆီးတာဟာ NCA လက်မှတ်ထိုးထားတဲ့ အဖွဲ့တွေကို ထိန်းချုပ်ချင်တဲ့သဘော သက်ရောက်နေတယ်လို့ PNLO နယက ဗိုလ်မှူးကြီး ခွန်ဥက္ကာက ပြောကြားလိုက်ပါတယ်။ တနိုင်ငံလုံး ပစ်ခတ်တိုက်ခိုက်မှု ရပ်စဲရေးဆိုင်ရာ သဘောတူစာချုပ် (NCA) လက်မှတ်ရေးထိုးထားတဲ့ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တပ်ဦး (ABSDF) မြောက်ပိုင်း ဒုဥက္ကဋ္ဌ ဦးအောင်ဆွေဦးအပါအ၀င် ၃ ဦးကို တပ်ပိုင်းဆိုင်ရာတာဝန်ရှိသူတွေက တရားလိုလုပ်ကာ မတရားအသင်းအက်ဥပဒေ (၁၇) ၁ နဲ့ ဖမ်းဆီးထားပါတယ်။ ပအို့ပ်အမျိုးသားလွတ်မြောက်ရေးအဖွဲ့ချုပ် (PNLO) နယက ဗိုလ်မှူးကြီး ခွန်ဥက္ကာက “အခုလို လက်မှတ်ထိုးထားတဲ့ ABSDF က ရဲဘော်တွေကို ဒီလိုထိန်းချုပ်လိုက်တာဟာ လက်မှတ်ထိုးထားတဲ့ အဖွဲ့အစည်းတွေအပေါ်မှာ နည်းနည်းလေး တင်းကြပ် ထိန်းချုပ်ချင်တဲ့ သဘောသက်ရောက်နေတာပေါ့၊ ဒီလိုယူဆရတယ်” လို့ ပြောပါတယ်။ ဖမ်းဆီးခံခဲ့ရတဲ့သူတွေဟာ ကချင်ပြည်နယ် မိုးညှင်းမြို့မှာ ကွယ်လွန်သွားတဲ့ ABSDF တပ်ဖွဲ့ဝင်တဦးရဲ့ နာရေးကို KIA ထိန်းချုပ်နယ်မြေမှာ သွားရောက်ခဲ့တာကြောင့် ဒုဥက္ကဋ္ဌ ဦးအောင်ဆွေဦး၊ တပ်ရုံးမှူး ဦးမောင်ဦးနဲ့ ယာဉ်မောင်းအရပ်သာတဦးတို့ကို နိုဝင်ဘာ ၃၀ ရက်နေ့က ဖမ်းဆီးခဲ့တယ်လို့ ABSDF ဘက်က ပြောဆိုထားပါတယ်။ လက်ရှိမှာတော့ ဒီ ၃ ဦးကို မိုးညှင်းမြို့နယ် ခလရ တပ်ရင်း ၁၅ မှ ဗိုလ်ကြီးသီဟစိုးက တရားလိုလုပ်ပြီး မတရားအသင်း ဆက်သွယ်မှု အက်ဥပဒေ (၁၇) ၁ နဲ့ မိုးညှင်းရဲစခန်းမှာ အမှုဖွင့်ဖမ်းဆီးထားပါတယ်။ “မနေ့က ဒီဇင်ဘာ ၁ ရက်နေ့ ညနေပိုင်းမှာ ဖမ်းထားတဲ့ ၃ ယောက်ကို ရုံးထုတ်ရမန်ယူတယ်။ လောလောဆယ်တော့ မိုးညှင်းရဲစခန်းမှာ ရှိသေးတယ်။ တရားရုံးကနေတော့ ရမန်ကြီးတပတ်ယူထားတယ်။ တရားလိုကိုယ်တိုင် လာရောက်ခဲ့တယ်” လို့ အမှုကို လက်ပါဆောင်ရွက်ပေးနေတဲ့ ABSDF ရဲဘော်ဟောင်းတဦးဖြစ်သူ ဦးစိန်အေးက ပြောပါတယ်။ အခုလို NCA ထိုးထားတဲ့ အဖွဲ့အစည်းရဲ့ ခေါင်းဆောင်တွေကို ဖမ်းဆီးအရေးယူမှုတွေဟာ ငြိမ်းချမ်းရေး လုပ်ငန်းစဉ် ထိခိုက်စေတယ်လို့ နိုင်ငံရေးလေ့လာသုံးသပ်သူတွေကလည်း ပြောဆိုထားပါတယ်။ တိုင်းရင်းသားအဖွဲ့အစည်းတွေနဲ့ အစိုးရ၊ တပ်မတော်ကြား ယုံကြည်မှုတည်ဆောက်နိုင်တဲ့ ဆွေးနွေးမှုတွေ များစွာလုပ်ဖို့ လိုအပ်နေသေးကြောင်းလည်း ဦးခွန်ဥက္ကာက ပြောပါတယ်။ အခုလို ABSDF ဒုဥက္ကဋ္ဌအပါအ၀င် ၃ ဦးကို ဖမ်းဆီးထားတာနဲ့ ပက်သက်ပြီး ငြိမ်းချမ်းရေး ကော်မရှင်နဲ့ သက်ဆိုင်ရာခေါင်းဆောင်တွေထံ အကြောင်းကြားပြီး ဖြေရှင်းပေးဖို့ တောင်းဆိုထားပါတယ်။ “ဒီကိစ္စနဲ့ ပတ်သက်ပြီး စာ ၃ သုံးစောင် ပို့ထားတာ ရှိတယ်လို့တော ကြားတယ်။ ငြိမ်းချမ်းရေးကော်မရှင် ဥက္ကဋ္ဌဆီ လိပ်မူပြီးတစောင်၊ NRPC ဥက္ကဋ္ဌဆီ လိပ်မူပြီး တစောင်ရယ်၊ နောက် JMC ဥက္ကဋ္ဌ ရယ်ဆီကိုပေါ့။ ကျန်တဲ့အသေးစိတ်တော့ မသိဘူး” လို့ ငြိမ်းချမ်းရေး ကော်မရှင်အဖွဲ့ တာဝန်ရှိသူတဦးက ပြောပါတယ်။ ၂၀၁၆ ခုနှစ် ဒီဇင်ဘာတုန်းကလည်း ABSDF ဗဟိုကော်မတီဝင် ဦးမင်းဌေးကို KIA နဲ့ ဆက်သွယ်တယ်ဆိုပြီး တပ်မတော်က တရားလိုလုပ်ကာ မတရားအသင်းဥပဒေနဲ့ အရေးယူခဲ့ပြီး ၈ လကျော်ကြာ အဖမ်းခံခဲ့ရပြီးမှ လွတ်မြောက်ခဲ့ပါတယ်။ “အဓိကကတော့ ABSDF ဆိုတာ တရားဝင်လက်မှတ်ရေးထိုးထားတဲ့ အဖွဲ့အစည်း ဖြစ်တယ်။ နောက်တချက်က ပြည်ထောင်စုအဆင့် ထိုးထားတဲ့အဖွဲ့အစည်းလေ၊ ဒီလိုအခြေအနေမှာတောင် ရဲဘော်တွေနဲ့ ခေါင်းဆောင်တွေကို ဖမ်းဆီးတယ်ဆိုတာ မဖြစ်သင့်ဘူး” လို့ ABSDF ဗဟိုကော်မတီဝင် မမိဆူးပွင့်က ပြောပါတယ်။
3 years Ago

November 11, 2018

အန်စီအေကို နားလည်သလို အကောင်အထည်ဖော်နေကြဟု ကေအန်ယူပြော

ငြိမ်းချမ်းရေးဖြစ်စဉ်မှာ ပါဝင်တဲ့ Stakeholder တွေအနေနဲ့ အန်စီအေအပေါ် နားလည်မှု ကွဲလွဲနေတာတွေကို ဖြေရှင်းဖို့ထက် ရှောင်ကွင်းပြီး နားလည်သလို အကောင်အထည်ဖော်နေကြ တယ်လို့ ကရင်အမျိုးသားအစည်းအရုံး (ကေအန်ယူ) က ထုတ်ပြန်ပါတယ်။ နိုဝင်ဘာ ၆ ရက်ကနေ ၁၀ ရက်နေ့အထိ ကရင်ပြည်နယ် ဘားအံခရိုင်၊ လေးဝါးမှာ ပြုလုပ်ခဲ့တဲ့ ကေအန်ယူရဲ့ ၆ ကြိမ်မြောက် ဗဟိုအမြဲတမ်းကော်မတီ အရေးပေါ်အစည်းအဝေးအပြီး ကြေညာချက် ထုတ်ပြန်လိုက်တာပါ။ ဒီအစည်းအဝေးမှာ ပြီးခဲ့တဲ့ အောက်တိုဘာလက နေပြည်တော်မှာ ပြုလုပ်ခဲ့တဲ့ အစိုးရနဲ့ တိုင်းရင်းသားလက်နက်ကိုင်အဖွဲ့ သီးသန့် အစည်းအဝေးဖြစ်စဉ်နဲ့ သဘောတူညီချက်တွေအပါအဝင် ငြိမ်းချမ်းရေးလုပ်ငန်းစဉ် အကောင်အထည်ဖော်မှု အားနည်းချက်၊ အားသာချက်တွေကို သုံးသပ်ခဲ့တယ်လို့ ဆိုပါတယ်။ Stakeholder အနေနဲ့ အန်စီအေကို နားလည်သလိုအကောင်အထည်ဖော်နေလို့ ရှုပ်ထွေးတာတွေ ဆင့်ကဲဖြစ်နေပြီး တဖက်မှာလည်း အန်စီအေပါ အချက်တွေကို အကောင်အထည်မဖော်နိုင်သေးတာတွေ အဖြေရှာနိုင်ရေးအတွက် အလွတ်သဘော ဆက်လက်ဆွေးနွေးသွားမယ်လို့ ဖော်ပြထားပါတယ်။ အစိုးရနဲ့ တပ်မတော်ဘက်က အန်စီအေ သဘောတူစာချုပ်မှာ မပါဝင်တဲ့ ခွဲမထွက်ရနဲ့ တခုတည်းသော တပ်မတော်ကိစ္စရပ်တွေကို ဆွေးနွေးဖို့ တင်သွင်းလာပြီး အဲဒီကိစ္စကို လက်ခံမှ ဆက်လက် ဆွေးနွေးသွားမယ့် သဘောဖြစ်နေကြောင်း၊ ကေအန်ယူအနေနဲ့ လုံခြုံရေးစနစ်ကို အကျေအလည် ဆွေးနွေးပြီးမှ အခုအဆင့်ကို သွားလိုကြောင်း ထုတ်ပြန်ချက်က ဆိုပါတယ်။ ဒါ့အပြင် လေးနက်တဲ့ နိုင်ငံရေးဆွေးနွေးမှုတွေရဖို့ တောင်းဆိုတာတွေကို လျစ်လျူရှုတာ၊ ကန့်သတ်တာတွေကြောင့် တိုင်းရင်းသားနယ်မြေတွေမှာ တိုက်ပွဲတွေ ဖြစ်နေသလို ပုံသဏ္ဌာန် အမျိုးမျိုးကွဲတဲ့ ကန့်သတ်ပိတ်ပင်တာက ကင်းလွတ်ပြီး အားလုံးပါဝင်တဲ့ နိုင်ငံရေးဆွေးနွေးပွဲ အခင်းအကျင်းကို ဖန်တီးနိုင်မှ ဒီမိုကရေစီနဲ့ ဖက်ဒရယ်စနစ်ကို အခြေခံတဲ့ ပြည်ထောင်စုကို တည်ဆောက်နိုင်မယ်လို့လည်း ဆိုပါတယ်။ ဒါကြောင့် ငြိမ်းချမ်းရေး လုပ်ငန်းစဉ် တရားဝင်အစည်းအဝေးတွေ တက်ရောက်တာကို  ယာယီရပ်ဆိုင်းထားပြီး အလွတ်သဘော တွေ့ဆုံဆွေးနွေးတဲ့ လမ်းကြောင်းက တဆင့် ဆွေးနွေးသွားမယ်လို့ ဆိုပါတယ်။ အခုသွားနေတဲ့ အလွတ်အသဘောတွေက အလွတ်သဘောလို့ နာမည်တပ်ထားပေမယ့် သူ့ရပ်တည်ချက်၊ ကိုယ့်ရပ်တည်ချက်ကို ကိုင်လာပြီး ဆွေးနွေးတော့ အလွတ်သဘောဟာ အလွတ်သဘောလို မမည်ဘဲ တရားဝင် အစည်းအဝေးလိုဖြစ်နေပြီး ကေအန်ယူအနေနဲ့ နိုင်ငံရေးပြဿနာကို နိုင်ငံရေးနည်းနဲ့ ဖြေရှင်းဖို့အတွက် ငြိမ်းချမ်းစွာအဖြေရှာတဲ့နည်းလမ်း၊ အင်အားမသုံးဘဲ အဖြေရှာတဲ့နည်းလမ်းနဲ့ ညှိနှိုင်းဆွေးနွေးသွားမှာ ဖြစ်တယ်လို့လည်း ထုတ်ပြန်ထားပါတယ်။
3 years Ago
More News
Up