အထည်ချုပ်စက်ရုံ

September 14, 2021

အထည်ချုပ်စက်ရုံများ ပိတ်သိမ်းနေသဖြင့် အလုပ်လက်မဲ့ ၂ သိန်းခန့် ထပ်တိုးလာနိုင်

အထည်ချုပ်စက်ရုံတွေ ဆက်တိုက်ပိတ်သိမ်းခဲ့တာကြောင့် အခုနှစ်ကုန်မှာ အလုပ်လက်မဲ့ ဦးရေ ၂ သိန်းလောက်ထပ်တိုးလာနိုင်တယ်လို့ အလုပ်သမားရေးရာကျွမ်းကျင်သူတွေက ခန့်မှန်းပါတယ်။ 

စစ်အာဏာသိမ်းပြီးနောက်ပိုင်းမှာ အထည်ချုပ်လုပ်ငန်းတွေ မလည်ပတ်နိုင်တော့တာကြောင့် ရန်ကုန်မြို့က စက်ရုံတွေ ဆက်တိုက်ပိတ်သိမ်းခဲ့တာပါ။

နိုင်ငံရေးအခြေအနေအရ နိုင်ငံတကာရင်းနှီးမြှုပ်နှံသူတွေ ထွက်ခွာတာ၊ ဘဏ်စနစ်ယိုယွင်းပြီး ငွေကြေးမလည်ပတ်နိုင်တာ၊ ကိုဗစ်-၁၉ ပြဿနာတွေကြောင့် လုပ်ငန်းရှင်တွေဟာ အစောပိုင်းမှာ လုပ်သားလျှော့ချခဲ့ပြီး နောက်ပိုင်းမှာတော့ စက်ရုံတွေပိတ်သိမ်းတဲ့အထိ ဖြစ်လာပါတယ်။ 

စက်မှုဇုန်လုပ်ငန်းတွေမှာ လုပ်သားတွေကို အလုပ်အကိုင်အခွင့်အလမ်း အများဆုံးပေးခဲ့တဲ့ အထည်ချုပ်စက်ရုံတွေ ပိတ်သိမ်းတာကြောင့် လုပ်သားတွေဟာ စားဝတ်နေရေး ခက်ခဲနေ ကြပါတယ်။ 

အထည်ချုပ်စက်ရုံ ၇၀၀ ကျော်ရှိတဲ့အထဲကအများစုဟာ ပိတ်သိမ်းခဲ့ရတာကြောင့် လုပ်သား တစ်သိန်းကျော်အလုပ်လက်မဲ့ဖြစ်နေပြီး အခုနှစ်ကုန်မှာ အလုပ်လက်မဲ့ဦးရေ ၂ သိန်းလောက် ထပ်တိုးလာနိုင်တယ်လို့ မြန်မာနိုင်ငံစက်မှုလက်မှုနဲ့ ဝန်ဆောင်မှုလုပ်ငန်းပေါင်းစုံ အလုပ်သမားသမဂ္ဂများအဖွဲ့ချုပ် MICS-TUsF ရဲ့လက်ထောက်အတွင်းရေးမှူး ကိုနေလင်းအောင်က ပြောပါတယ်။

မပိတ်သိမ်းဘဲကျန်နေတဲ့ စက်ရုံတချို့ကတော့ အရင်တုန်းကလို လခစားစနစ်နဲ့  လုပ်ခ ရှင်းမပေးတော့ဘဲ နေ့စား၊ ပုတ်ပြတ်စနစ်နဲ့လုပ်ခပေးချေတဲ့ ပုံစံကိုပြောင်းလဲကျင့်သုံးနေပါတယ်။ ငွေပေးချေတဲ့နည်းလမ်းပြောင်းလဲလိုက်တဲ့အတွက် NLD အစိုးရလက်ထက်တုန်းကလို့ အနိမ့်ဆုံး လုပ်ခလစာ နှုန်းထားကိုမရတော့ဘဲ ဝင်ငွေသိသိသာသာနည်းသွားတယ်လို့ အလုပ်သမား တစ်ယောက်က ပြောပါတယ်။ ဝင်ငွေနည်းသွားသလို လစဉ်ဝင်ငွေရဖို့ အာမခံချက်လည်း မရှိတော့ဘူးလို့ အထည်ချုပ်စက်ရုံလုပ်သား မသဇင် က ဆိုပါတယ်။

အခြေခံလုပ်သားတွေ အလုပ်အကိုင်အခွင့်အလမ်းဆုံးရှုံးမှုတွေ ဆိုးဆိုးရွားရွားဖြစ်နေပေမယ့် စစ်ကောင်စီက ကူညီဖြေရှင်းဖို့မကြိုးစားဘဲ  သပိတ်တွေမှာ ဦးဆောင်ခဲ့တဲ့ အလုပ်သမားရေးရာ တက်ကြွလှုပ်ရှားသူတွေကို ရှာဖွေဖမ်းဆီးတာတွေ ပြုလုပ်နေပါတယ်။

အမျိုးသားညီညွတ်ရေးအစိုးရကလည်း လုပ်သားတွေကို အကူအညီပေးဖို့ကြိုးစားနေပေမယ့် စစ်ကောင်စီရဲ့ထိန်းချုပ်မှုတွေကြောင့် ကူညီနိုင်ဖို့ခက်ခဲနေတယ်လို့ NUG အလုပ်သမားဝန်ကြီးဌာန၊ ဒုဝန်ကြီး ဦးကျော်နီက ပြောပါတယ်။

အာဏာသိမ်းပြီးနောက်ပိုင်းမှာ နိုင်ငံတကာရင်းနှီးမြှုပ်နှံသူတွေအားလုံးနီးပါး ထွက်ခွာမှာ ဖြစ်ပြီး သူတို့နေရာမှာ တရုတ်နဲ့ ထိုင်းစီးပွားရေးလုပ်ငန်းရှင်တွေ အစားထိုးဝင်ရောက်လာလိမ့်မယ်လို့ စီးပွားရေးပညာရှင် ဦးဇော်ဖေဝင်းက ခန့်မှန်းထားပါတယ်။

1 month Ago

June 18, 2021

ရန်ကုန်ရှိ အထည်ချုပ်စက်ရုံ ၂၀၀ ပိတ်ရန် အလုပ်သမားဝန်ကြီးဌာနထံ တင်ပြထား

ရန်ကုန်မြို့ရှိ စက်မှုဇုန်တွေက  အထည်ချုပ်စက်ရုံ ၂၀၀ လောက်ပိတ်သိမ်းဖို့ စစ်ကောင်စီ အလုပ်သမားဝန်ကြီးဌာနကို တင်ပြထားတယ်လို့ အလုပ်သမားအရေးဆောင်ရွက်သူတွေက ပြောပါတယ်။ 

မြန်မာတစ်နိုင်ငံလုံးမှာ အထည်ချုပ်စက်ရုံ ၆၀၀ ကျော်ရှိတာဖြစ်ပြီး အဲ့ဒီအထဲက သုံး ပုံတစ်ပုံဟာ နိုင်ငံရေး၊ စီးပွား ရေးမတည်ငြိမ်တာကြောင့် ပိတ်သိမ်းဖို့ ဖြစ်လာတာပါ။ 

စက်ရုံတွေ ပိတ်သိမ်းတာ အလုပ်ရပ်နားတာတွေကြောင့် အလုပ်သမားတွေဟာ အလုပ် လက်မဲ့ပြဿနာနဲ့ ရင်ဆိုင်နေရပြီး စစ်အာဏာသိမ်းပြီးနောက်ပိုင်း ဥပဒေရဲ့အကာအကွယ်နဲ့ ခံစား ခွင့်တွေ ဆုံးရှုံးနေရသလို မပိတ်သေးတဲ့ စက်ရုံတွေထဲမှာလည်း လုပ်သားတွေဟာ ဥပဒေမဲ့ အနိုင့်အထက်ပြုကျင့်တာတွေခံနေရတယ်လို့ Federation Of General Worker Myanmar က မမိုးစန္ဒာမြင့်က ပြောပါတယ်။

အထည်ချုပ်စက်ရုံတွေ ပိတ်သိမ်းနေတာနဲ့ပတ်သက်ပြီး ပြည်တွင်းလုပ်ငန်းရှင် တစ်ယောက်က ငွေသားလည် ပတ်ဖို့ ခက်ခဲပြီး ပိတ်ကုန်ကြမ်းတွေ ဈေးတက်တာကြောင့် တွက်ခြေ မကိုက်တော့ဘူးလို့ ပြောပါတယ်။ 

နိုင်ငံခြားသားပိုင် အထည်ချုပ်စက်ရုံတွေ ပိတ်သိမ်းတဲ့အတွက် အလုပ်သမားတွေ အလုပ်လက်မဲ့ ဖြစ်ရတာကိုမြင်နေပေမဲ့ ကူညီနိုင်တဲ့အင်အားလည်း မရှိဘူးလို့ သူက ဆိုပါတယ်။

"မလည်ပတ်နိုင်ဘူး။ ဝယ်အားရပ်သွားပြီ။ ပိုက်ဆံလွှဲတာ တွေကလည်း လွှဲလို့ မရတော့ဘူး။ ကုန်ကြမ်းတွေကို Mobile Banking, Kpay နဲ့ဝယ်လို့မရတော့ဘူး။ အမတို့ပြန်ဝယ်တဲ့ ပိတ်စတွေကြတော့။ Mobile Banking နဲ့ဆို ရာခိုင်နှုန်း ထည့်ပေးရတာပေါ့။  အကြွေးလည်း ထပ်မပေးတော့ဘူး။ နဂိုအကြွေးတွေကို Mobile Banking နဲ့ဆပ်။ ရာခိုင်နှုန်းထည့်ပေး။ အခုပစ္စည်းတွေကြတော့ လက်ငင်းပဲဝယ်ပေါ့။ ကုန်ကြမ်းဈေးတွေလည်း တက်ကုန်တယ်။ ကုန်ကြမ်းအဝင်မရှိတော့ Export ပြန်လုပ်လို့မရဘူး" လို့ အထည်ချုပ်လုပ်ငန်းရှင် တစ်ယောက်က ပြောပါတယ်။

အထည်ချုပ်စက်ရုံတွေပိတ်သိမ်းရတာဟာ နိုင်ငံရေး၊ စီးပွားရေးမတည်ငြိမ်တာနဲ့ ကုန်အမှာ အော်ဒါမရတာကြောင့်ဖြစ်ပါတယ်။ 

ဥရောပအခြေစိုက်အဝတ်အထည်လုပ်ငန်းတွေက စစ်အာဏာသိမ်းပြီးနောက်မှာ ကုန်အမှာ တွေ ရပ်ဆိုင်းထားခဲ့ပေမဲ့ မေလနှောင်းပိုင်းမှာတော့ မြန်မာအထည်ချုပ်လုပ်သားတွေကို စာနာ သော အားဖြင့် ကုန်အမှာ ပြန်ပေးမယ်လို့ သတင်းထုတ်ပြန်ခဲ့ပါတယ်။ 

ဥရောပလုပ်ငန်းရှင်တွေရဲ့ဆောင်ရွက်ချက်ကို မကန့်ကွက်ချင်ပေမဲ့ စစ်အာဏာရှင် သက်ဆိုး မရှည်အောင်တိုက်နေတဲ့ကာလမှာ စစ်ကောင်စီယန္တရားမလည်ပတ်နိုင်အောင် လုပ်ငန်း အားလုံး ရပ်ဆိုင်းရမယ်ဆိုတဲ့ အမျိုးသားညီညွတ်ရေးအစိုးရရဲ့မူနဲ့တော့ ကိုက်ညီမှု မရှိဘူးလို့ NUG အလုပ်သမား ဒုဝန်ကြီးက ပြောပါတယ်။ 

စစ်ကောင်စီပြုတ်ကျအောင် တိုက်နေရသလို အလုပ်သမားတွေရဲ့စားဝတ်နေရေးကလည်း ရှိနေသေးတဲ့အတွက် လုပ်ရကိုင်ရခက်တယ်လို့လည်း ဆိုပါတယ်။ 

အခြေခံလုပ်သားတွေရဲ့ စားဝတ်နေရေးကိုကူညီနိုင်ဖို့ နိုင်ငံတကာအဖွဲ့အစည်းတွေနဲ့ ချိတ်ဆက်ပြီး နည်းလမ်းရှာနေတယ်လို့ NUG အလုပ်သမားဒုဝန်ကြီး ဦးကျော်နီက ဆိုပါတယ်။

ဥရောပနာမည်ကျော် အဝတ်အထည်လုပ်ငန်းတွေက မြန်မာ့အထည်ချုပ်လုပ်ငန်းကို ကုန်အမှာတွေ ပြန်ပေးမယ်လို့ ဆိုပေမဲ့  အလုပ်သမားအရေး တက်ကြွလှုပ်ရှားသူတွေကတော့ အလုပ်သမားတွေအတွက် အကာအကွယ်တွေ မပေးနိုင်ဘဲ ကုန်အမှာပေးတာဟာ အလုပ်သမား တွေအတွက် အကျိုးမရှိနိုင်ဘူးလို့ ဆိုကြပါတယ်။

ဥရောပအဝတ်အထည်လုပ်ငန်းတွေကတော့ အထည်ချုပ်လုပ်ငန်းမှာ စစ်ကောင်စီရဲ့ ပါဝင်ပတ်သက်မှု  မရှိသလောက်နည်းပါးတဲ့အတွက် ကုန်အမှာ ပြန်ပေးဖို့ဆုံးဖြတ်တာလို့ ဆိုထားပါတယ်။ 

4 months Ago
More News
Up