အစိုးရတပ်က လက်နက်လူသူအင်အား အလုံးအရင်းဖြင့် တိုက်ခိုက်နေဟု ကိုးကန့်ပြော

June 13, 2015

တရုတ်က ဖုန်ကြားရှင်ကို တိုက်ပွဲရပ်ရန် ဖိအားပေးပြောခဲ့ဟုဆို

တရုတ်အစိုးရက ကိုးကန်တပ်ဖွဲ့ခေါင်းဆောင် ဖုန်ကြားရှင်ကိုဆက်သွယ်ပြီး တိုက်ပွဲရပ်ဖို့ ဖိအားပေးပြောဆိုခဲ့တယ်လို့  မြန်မာနိုင်ငံဆိုင်ရာ တရုတ် သံအမတ်က ထုတ်ဖော်ပြောဆို လိုက်ပါတယ်။ တာဝန်ပြီးဆုံးလို့ မြန်မာနိုင်ငံက ပြန်တော့မယ့် တရုတ်သံအမတ် မစ္စတာ ရန်ဟို့လန်ဟာ ဇွန်လ ၁၂ ရက်က တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်နဲ့တွေ့ဆုံခိုက် အခုလို ပြောဆိုခဲ့တာလို့ နိုင်ငံပိုင်သတင်းမှာ ဖော်ပြထားပါတယ်။ တရုတ်သံအမတ်က တရုတ်ဟာ ဖုန်ကြားရှင်ကို ဆက်သွယ်ပြီး တိုက်ပွဲရပ်ပြီး ပြဿ   နာကို နိုင်ငံရေးနည်းနဲ့ဖြေရှင်းဖို့ တောင်းဆိုခဲ့တယ်လို့ သတင်းက ဆိုပါတယ်။ တရုတ်သံအမတ်ဖြစ်သူ အခုလို ထုတ်ဖော်မပြောခင် ပြီးခဲ့တဲ့ ဇွန်လ ၁၀ ရက်မှာ ကိုးကန့်တပ်ဖွဲ့က တဖက်သတ် အပစ်အခတ်ရပ်စဲကြောင်း ကြေညာခဲ့ပြီး ဒီလိုကြေညာတာဟာ တရုတ်ရဲ့ ဖိအားပေးပြောဆိုမှုကြောင့် မဟုတ်ဘူးလို့ ကိုးကန့်ပြောခွင့်ရသူက မီဒီယာကို ပြောဆိုခဲ့ပါတယ်။ ပြီးခဲ့တဲ့ ရက်ပိုင်းအတွင်းမှာပဲ ကိုးကန့်တိုက်ပွဲမှာ တရုတ်ပါဝင်ပတ်သက်နေသလားလို့ ဂျပန်သတင်းဌာနတခုက ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်ကိုမေးမြန်းရာမှာ ပါဝင်ပတ်သက်တဲ့ အထောက်အထား မတွေ့ရဘူးလို့ ဖြေဆိုခဲ့ပါတယ်။ ဗိုလ်ချုပ်မှူးကြီးမင်းအောင်လှိုင်က "ဒီ အမ်အန်ဒီအေအေ အဖွဲ့တွေရဲ့ စားနပ်ရိက္ခာတွေ၊ နောက်လက်နက် ခဲယမ်းမီးကျောက်တွေ ရရှိမှုပေါ့။ နောက် အုပ်ချုပ်ထောက်ပံ့မှု ဆိုင်ရာတွေ၊ နောက်တခါ တိုက်ပွဲတွေမှာ ထိခိုက်ဒဏ်ရာရတဲ့ လူတွေကိုကုသပေးတဲ့ အခြေအနေကို ကြည့်လိုက်ရင် ထင်စရာရှိပေမယ့် လက်ဆုပ်လက်ကိုင် ကျနော်တို့ ဘာမှပြလို့ရတဲ့ အနေအထားမျိုး မရှိပါဘူး။ ဒါကတော့ မြင်ရတဲ့အခြေအနေ၊ နောက်တရုတ် အစိုးရအနေနဲ့လည်း တိုက်ရိုက်တော့ ကူညီပေးတဲ့ အနေအထားမျိုး မရှိဘူး။ ဒါပေမယ့် အောက်ခြေမှာတော့ တူညီတဲ့လူမျိုးစုတွေဆီက ထိုက်သင့်တဲ့ အထောက်အပံ့ အကူအညီတွေတော့ သူတို့ရကောင်း ရနိုင်တာပေါ့။ Goverment နဲ့လည်း မဆိုင်လောက်ဘူးလို့ ကျနော်တို့ထင်တယ်။ သူတို့ ပုန်းလျှိုးကွယ်လျှိုးတော့ လုပ်ရင်လုပ်မှာပေါ့။ ဒါပြောလို့တော့မရဘူး။ ခိုင်ခိုင်မာမာ ပြောနိုင်လောက်တဲ့ အထောက်အထားတော့ မရှိပါဘူး။ ဒါ့ကြောင့် နည်းနည်းပြောဖို့ ခက်ပါတယ်။ ဒါကတော့ တရုတ်အစိုးရနဲ့ ဘယ်လိုမှမပတ်သက်ဘူး ဆိုတာ ကျနော်တို့ ပြောလို့ရပါတယ်"လို့ ဖြေဆိုခဲ့တာ ဖြစ်ပါတယ်။ ပြီးခဲ့တဲ့ ဖေဖော်ဝါရီလ ၉ ရက်ကစပြီး ရှမ်းပြည်အရှေ့မြောက်ပိုင်း၊ ကိုးကန့်ဒေသ၊ လောက်ကိုင်အနီးတ၀ိုက်မှာ ကိုးကန့်နဲ့ အစိုးရစစ်တပ်တို့ တိုက်ပွဲဖြစ်ပွားခဲ့ပြီး ၄ လလောက်အကြာမှာ ကိုးကန့်တပ်ဘက်က တဖက်သတ်အပစ်ရပ်ခဲ့ပါတယ်။
6 years Ago

May 27, 2015

ကိုးကန့်တိုက်ပွဲ မြ၀တီရုပ်သံတွင်ပြမည်

ကိုးကန့်တိုက်ပွဲဖြစ်ရပ်မှန်မှတ်တမ်းရုပ်ရှင်ကို စစ်တပ်ပိုင်မြ၀တီရုပ်မြင်သံကြားဌာနက မေလ ၂၇ ရက် နေ့ကစပြီး နေ့တိုင်းထုတ်လွှင့်မယ်လို့ သတင်းထုတ်ပြန်လိုက်ပါတယ်။ မြန်မာနိုင်ငံအရှေမြောက်ပိုင်း၊ လောက်ကိုင်ဒေသ၊ ကိုးကန့်ကိုယ်ပိုင်အုပ်ချုပ်ခွင့်ရဒေသကို ဦးဖုန်ကြားရှင်ခေါင်ဆောင်တဲ့ MNDAA သောင်းကျန်းသူများက တိုက်ခိုက်သိမ်းပိုက် ထိန်းချုပ်ရန် ကြိုးပမ်းဆောင်ရွက်လာမှုကို တပ်မတော်က တန်ပြန်တိုက်ခိုက်ချေမှုန်းမှု ဖြစ်ရန်မှန်မှတ်တမ်းအား မြ၀တီရုပ်သံချန်နယ် ၃ ခုက ဒီနေ့ည ၈ နာရီသတင်းအပြီး နေ့တိုင်း အပိုင်းလိုက်ထုတ်လွှင့်ပေးသွားမယ်လို့ သတင်းမှာ ဖော်ပြထားပါတယ်။ ဖေဖော်ဝါရီ ၉ ရက်ကစလို့  အစိုးရတပ်နဲ့ မြန်မာအမျိုးသားဒီမိုကရက်တစ်မဟာမိတ်တပ်ဖွဲ့ (အမ်အန်ဒီအေအေ) တို့ တိုက်ပွဲဖြစ်ပွားခဲ့တာ ၃ လကျော်ကြာမြင့်ခဲ့ပြီဖြစ်ပြီး အခုချိန်ထိ တိုက်ပွဲတွေ ဆက်လက်ဖြစ်ပွားနေပါတယ်။
6 years Ago
Up