အင်းလေးကန်

June 17, 2020

အင်းလေးကန်ထိန်းသိမ်းရေး ၁၀ နှစ်စီမံကိန်း ဆောင်ရွက်မည်

အင်းလေးကန်ကို ပြန်လည်ပြုပြင်ထိန်းသိမ်းဖို့အတွက် နိုင်ငံတော်ရဲ့ အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်ရဲ့ လမ်းညွှန်မှုနဲ့ ၁၀ နှစ်စီမံကိန်းချ ဆောင်ရွက်သွားဖို့ ရှိတယ်လို့ သယံဇာတနဲ့ သဘာဝပတ်ဝန်းကျင်ထိန်းသိမ်းရေးဝန်ကြီးဌာနက ပြောပါတယ်။ ရှမ်းပြည်နယ်တောင်ပိုင်း၊ညောင်ရွှေမြို့နယ်က အင်းလေးကန်ဟာ တစ်နှစ်ထက်တစ်နှစ် ရေခန်းခြောက်မှုနဲ့ ကြုံတွေ့နေရပြီး အခုနှစ်မှာတော့ စံချိန်တင် ရေခန်းခြောက်ခဲ့တာပါ။ ဒီလိုခန်းခြောက်လာနေတဲ့ အင်းလေးကန်ကို ပြန်လည်ပြုပြင်ဖို့အတွက် ဒေါ်အောင်ဆန်းစုကြည်က လမ်းညွှန်ထားပြီး လာမယ့်နှစ်ကစလို့ ၁၀ နှစ်စီမံကိန်းနဲ့ ဆောင်ရွက်ဖို့ရှိနေတယ်လို့ သစ်တောဦးစီးဌာနက ညွှန်ကြားရေးမှူးချုပ် ဒေါက်တာညီညီကျော်က ပြောပါတယ်။ "အင်းလေးကန်ကလည်း ပြောမယ်ဆိုရင်တော့ ကျနော်တို့ ထိန်းသိမ်းခြင်တဲ့အနေအထားအထိတော့မရောက်သေးဘူးပေါ့။ အဲ့တာ ကြောင့်မို့ နိုင်ငံတော် အတိုင်ပင်ခံရဲ့ လမ်းညွှန်ချက်နဲ့ ၁၀နှစ်စီမံကိန်းလုပ်နေတယ်။လာမယ့် ၂၀၂၀-၂၀ ဘတ်ဂျက်ကစပြီး ၁၀ နှစ်စီမံကိန်း လုပ်မှာ။အဲ့ဒီမှာ အဓိကကတော့ ဒေသခံပြည်သူတွေပူးပေါင်းပါဝင်တဲ့ သစ်တောထိန်းသိမ်းရေးလုပ်ငန်းတွေကို လုပ်ဖို့ လျာထားပါတယ်" လို့ ဒေါက်တာညီညီကျော်က ဇွန်လ ၁၇ ရက်က ပြုလုပ်တဲ့ အစိုးရသတင်းစာရှင်းလင်းပွဲအပြီးမှာ ပြောပါတယ်။ မြန်မာနိုင်ငံရဲ့ ဒုတိယအကြီးဆုံးကန်ဖြစ်တဲ့ အင်းလေးကန်ဟာ အကျယ်အဝန်းအားဖြင့် ၄၄.၉ စတုရန်းမိုင်ရှိပြီး ပင်လယ်ရေမျက်နှာ ပြင်အထက် ပေ၂၉၀၀ မှာ တည်ရှိတာပါ။ အင်းလေးကန်ပြုပြင်ထိန်းသိမ်းရေး လုပ်ငန်းကို သစ်တောဦးစီးဌာနက ဦးစီးလုပ်ကိုင်မှာ ဖြစ်ပေမယ့် အဓိက ဆောင်ရွက်ရမှာကတော့ ဒေသခံပြည်သူတွေက ဆောင်ရွက်ရမှာဖြစ်တယ်လို့ လည်း ဆိုပါတယ်။ ဒေါက်တာညီညီကျော်က" သစ်တောပြုန်းသွားတဲ့နေရာမှာ သစ်တောတွေပြန်စိုက်မယ်။စို က်တဲ့အခါမှာလည်း ဒီသစ်တောသစ်ပင် မှာ သူတို့အတွက် နိစ္စဓူဝ ဝင်ငွေရရှိအောင် သီးနှံသစ်တောစနစ် သီးနှံတွေကြားညှပ်စိုက်တာတွေလုပ်မယ်။ အခြားသောဝင်ငွေ ရတဲ့ လုပ်ငန်းတွေ ဥပမာဆိုရင် Eco Tourism လို့ခေါ်တဲ့ ခရီးသွားလုပ်ငန်းတွေလုပ်မယ်။ဒါတွေကို အဓိက က ဒေသခံပြည်သူတွေ ပူးပေါင်းပါဝင်အောင် ဆောင်ရွက်မှာဖြစ်ပါတယ်။ဌာနတွေကပဲ သီးသန့်လုပ်တဲ့ ပုံစံမဟုတ်ဘူး " လို့ ပြောပါတယ်။ အင်းလေးကန် ပြန်လည်ပြုပြင်ထိန်းသိမ်းရေး ၁၀ နှစ်တာ စီမံကိန်းအတွက် ဘတ်ဂျက်သီးသန့်လျာထားသုံးစွဲသွားမှာဖြစ်ပြီး လာမယ့်နှစ်ဘတ်ဂျက်မှာ ကျပ်ငွေသန်း ၅၀၀ ခန့် သုံးစွဲသွားမှာဖြစ်တယ်လို့ သိရပါတယ်။ သတင်း-ဖြိုးသက်ပိုင်မြင့်(နေပြည်တော်)
12 months Ago

January 21, 2020

အာရှရေငှက်စာရင်း စုပေါင်းကောက်ယူခြင်း မြန်မာတွင် ပြုလုပ်

အာရှရေငှက်စာရင်း စုပေါင်းကောက်ယူတာကို ရမ်ဆာ (နိုင်ငံတကာအရေးပါတဲ့ ရေဝပ်ဒေသ) ထိန်းသိမ်းရေးနယ်မြေတွေ ဖြစ်ကြတဲ့ အင်းတော်ကြီးအင်း၊ အင်းလေးကန်၊ မိုးယွန်းကြီးအင်း၊ မြန်မာနိုင်ငံအလယ်ပိုင်း ပုလိပ်အင်းနဲ့ ပြူကန်တွေမှာ ငှက်ပညာရှင်/ငှက်ကြည့်ဝါသနာရှင် ၁၃၅ ဦးက စုပေါင်းဆောင်ရွက်ခဲ့ကြတယ်လို့ Asian Waterbird Census-Myanmar က သတင်းထုတ်ပြန်ပါတယ်။ စာရင်းကောက်ယူမှုတွေအရ အင်းတော်ကြီးအင်းမှာ ရေငှက်နဲ့ ရေဝပ်ဒေသ မှီခိုတဲ့ ငှက်မျိုးစိတ် ၅၃ မျိုး၊ အကောင်ရေ ၂၅၀၀၀ ကျော်အပါအဝင် ငှက်မျိုးစိတ်ပေါင်း ၉၃ မျိုး၊ အင်းလေးကန်မှာ ရေငှက်မျိုးစိတ်စုစုပေါင်း ၃၆ မျိုး၊ ရေငှက်ကောင်ရေ အရေအတွက် ၁၃၂၇၁ ကောင်နဲ့ ရေဝပ်ဒေသကို မှီခိုကျက်စားတဲ့ ကုန်းငှက်မျိုးစိတ်စုစုပေါင်း ၅၅ မျိုး၊ ကောင်ရေအရေအတွက် ၂၀၁၅ ကောင် ဖြစ်ပါတယ်။ ဒါ့အပြင် မိုးယွန်းကြီးအင်းမှာ ရေငှက်နဲ့ ရေဝပ်ဒေသမှီခိုတဲ့ ငှက်မျိုးစိတ် ၃၅ မျိုး၊ အကောင်ရေ ၁၅၀၀၀ ကျော်အပါအဝင် ငှက်မျိုးစိတ်ပေါင်း ၈၄ မျိုး၊ ပုလိပ်အင်းမှာ ရှားပါးမျိုးစိတ် ပို့ချပ်ခေါင်းစိမ်း အပါအဝင် ရေငှက်မျိုးစိတ် ၃၂ မျိုး ငှက်ကောင်ရေ ၁၅၀၀ ကျော်နဲ့ ပြူကန်မှာ ရေငှက်မျိုးစိတ် ၂၉ မျိုး၊ ငှက်ကောင်ရေ  ၁၁၀၀ ကျော်ကို မှတ်တမ်းတင်နိုင်ခဲ့ပါတယ်။ Photo : Asian Waterbird Census-Myanmar
1 year Ago
More News
Up