အင်းစိန်ထောင်

August 2, 2021

၅၀၅-က ဖြင့် ဖမ်းဆီးခံရသူတစ်ချို့ အင်းစိန်ထောင်မှ ပြန်လည်လွတ်မြောက်လာ (ဓာတ်ပုံ)

ရန်ကုန်တိုင်းဒေသကြီး၊ အင်းစိန်ထောင်မှာ နိုင်ငံရေး ပုဒ်မ ၅၀၅ က နဲ့ တရားစွဲ ဖမ်းဆီးခံထားရတဲ့ ဆရာဝန်နဲ့ ဌာနဆိုင်ရာဝန်ထမ်းတွေထဲက တချို့ သြဂုတ် ၂ ရက်နေ့ နေ့လယ်ပိုင်းမှာ ပြန်လည်လွတ်မြောက်လာတယ်လို့ သိရပါတယ်။

Photo -  MPA

7 mins Ago

July 29, 2021

သြစတြေးလျစီးပွားရေးပညာရှင် ရှောင်တာနယ်လ်ကို အင်းစိန်ထောင်တွင်း ဆေးထိုးပေးနေသည့် ဓာတ်ပုံ ထွက်ပေါ်

ရန်ကုန်မြို့ အင်းစိန်ထောင်အတွင်းမှာ ၆ လကြာလောက် ဖမ်းဆီးထိန်းသိမ်းခံထားရတဲ့ သြစတြေးလျစီးပွားရေးပညာရှင် ပါမောက္ခ ရှောင်တာနယ်လ်ရဲ့ အကျဉ်းထောင်တွင်း  ပထမဆုံးဓာတ်ပုံတွေအဖြစ် ကိုဗစ် ကာကွယ်ဆေးထိုးခံနေရတဲ့ ဓာတ်ပုံ ၂ ပုံ ထွက်ပေါ်လာပါတယ်။ 

ရန်ကုန် အင်းစိန်ထောင်အတွင်းမှာ ကိုဗစ်-၁၉ ရောဂါဟာ ပျံ့နှံ့နေကြောင်း သတင်းတွေ အခိုင်အမာ ထွက်ပေါ်အပြီးမှာ ဒေါ်အောင်ဆန်းစုကြည်ရဲ့ စီးပွားရေးအကြံပေး  ပါမောက္ခ ရှောင်တာနယ်လ်ရဲ့ ကာကွယ်ဆေးထိုးခံနေရပုံတွေကို စစ်တပ်အာဘော် The Global New Light of Myanmar မှ ထုတ်ဝေခဲ့တာပါ။

သတင်းစာထဲမှာတော့ ရှောင်တာနယ်လ်ရဲ့ နာမည်ကို မဖော်ပြထားပေမယ့် နာမည်ဆိုးနဲ့ ကျော်ကြားတဲ့ အင်းစိန်ထောင်မှာ ကာကွယ်ဆေးထိုးခြင်းအစီအစဉ်ကိုစတင်ခဲ့တယ်လို့ ကြေညာထားတဲ့သတင်းနဲ့ ဓာတ်ပုံတွေ ပေါ်ထွက်လာတာဖြစ်ပြီး ပထမဆုံးနေ့မှာ အကျဉ်းသား ၉၀၀၀ ကျော်ထဲက  ၆၁၀ ဟာ ထိုးဆေးနှံခဲ့တယ်လို့ဆိုပါတယ်။

အကျဉ်းထောင်မှာ အကျဉ်းသားတွေကို ပထမဆုံးအကြိမ် ကိုဗစ်ကာကွယ်ဆေးထိုးပေးတာ လို့ အကျဉ်းထောင်အရာရှိတဦးရဲ့ပြောဆိုချက်ကိုလည်းဖော်ပြထားသလို ထောင်ထဲမှာ ဗိုင်းရပ်စ်ကူးစက်မှု မရှိဘူးလို့ အခိုင်အမာ ငြင်းဆိုထားပါတယ်။

ဒါပေမဲ့ အမျိုးသားဒီမိုကရေစီအဖွဲ့ချုပ် အန်အယ်လ်ဒီ ပါတီ ဗဟို အတွင်းရေးမှူး အဖွဲ့ဝင် ဦးဉာဏ်ဝင်းမှာ အကျဉ်းထောင်မှာထိမ်းသိမ်းခံနေရစဉ် ကိုဗစ်-၁၉ ရောဂါ ကူးစက်ခံရပြီးနောက် ရန်ကုန်ဆေးရုံကြီးသို့ ပို့ဆောင် ဆေးကုသမှုခံယူနေစဉ် မကြာသေးခင်မှ ကွယ်လွန်သွားခဲ့တာပါ။

ထိန်းသိမ်းခံထားရတဲ့ အမေရိကန်ဂျာနယ်လစ် ဒန်နီဖှန်စတာ  အပါအ၀င် အနည်းဆုံး အကျဉ်းသား ၄၈ ဦး ကိုဗစ်-၁၉ ကူးစက်ခံထားရတယ်လို့ အကျဉ်းသားတွေအတွက် ရှေ့နေတွေက ပြောပါတယ်။

ဗိုင်းရပ်စ်ပျံ့နှံ့မှုကြောင့် ပြီးခဲ့တဲ့ သောကြာနေ့က အင်းစိန်ထောင်တွင်း အကျဉ်းသားတွေ ဆန္ဒပြခဲ့ကြပါတယ်။ 

ဩစတြေးလျနိုင်ငံ ဆစ်ဒနီမှာရှိတဲ့ ရှောင်တာနယ်လ်ရဲ့ဇနီးကလည်း သူ့ခင်ပွန်းသည်မှာ အအေးမိနဲ့ တုပ်ကွေးရောဂါ လက္ခဏာတွေ ခံစားနေရလို့ သူ့ကိုပြန်လွှတ်ပေးဖို့ ဒါမှမဟုတ် အနည်းဆုံး သူ့ရဲ့ ကျန်းမာရေးအတွက် နေအိမ်အကျယ်ချုပ်ချထားဖို့အတွက် လွှဲပြောင်းပေးဖို့ မြန်မာစစ်ခေါင်းဆောင်တွေကို ထပ်ပြီး အသနားခံ လျှောက်ထားခဲ့ပါတယ်။

ပါမောက္ခရှောင်တာနယ်လ်ဟာ စစ်တပ်အာဏာသိမ််းပြီး ၅ ရက်အကြာ ဖေဖော်ဝါရီ ၆ ရက်ကတည်းက ဖမ်းဆီးထားတာဖြစ်ပြီး တရား၀င်လျှို့ဝှက်ချက်အက်ဥပဒေကို ချိုးဖောက်တယ်လို့ စွပ်စွဲထားတာပါ။ 

သူ့ရဲ့ရှေ့နေတွေ ပြောတာကတော့ ဒေါ်အောင်ဆန်းစုကြည်အပေါ် စစ်တပ်က စွဲဆိုထားတဲ့ နိုင်ငံတော်လျှို့ဝှက်ချက် အက်ဥပဒေနဲ့စွဲဆိုထားတဲ့ အမှုအတွက်  ရှောင်တာနယ်လ်ကို လိုအပ်တယ်လို့ ဆိုတယ်။ ဒါကြောင့် သူ့ကို အသက်ရှင်သန်နေဖို့ ပိုကောင်းအောင် လုပ်ပေးရပါမယ်လို့ ရှောင်တာနယ်လ်ရဲ့ ဇနီး ဟာဗျူက သူ့ရဲ့ဖေ့စ်ဘွတ်ခ်မှာ ပြီးခဲ့တဲ့အပတ်က ရေးသားထားပါတယ်။

သြစတြေးလျအစိုးရကလည်း  ရှောင်တာနယ်လ်ကို ပြန်လွှတ်ပေးဖို့ မြန်မာသံအမတ်ကို ထပ်ပြီးတောင်းဆိုထားပါတယ်။ သူအကျဉ်းကျခံနေရတာကို မတရားဖမ်းဆီးချုပ်နှောင်မှုအဖြစ် အစိုးရက သတ်မှတ်ထားတယ်လို့ သြစတြေးလျ နိုင်ငံခြားရေး၀န်ကြီး ကပြောကြားခဲ့ပါတယ်။

ထောင်ထဲမှာ အကျဉ်းသားတွေကိုထိုးပေးခဲ့တဲ့ ကိုဗစ်ကာကွယ်ဆေးတံဆိပ်ကို အစိုးရသတင်းစာမှာ မဖော်ပြထားပေမယ့် မြန်မာနိုင်ငံဟာ တရုတ်နဲ့ ရုရှားမှ ဆေးတွေကို ဝယ်ယူခဲ့ပြီး AstraZeneca တင်ပို့မှုလည်း ရှိထားပါတယ်။

ထောင်နံရံတွေရဲ့အပြင်ဘက်မှာတော့ ကိုဗစ်-၁၉ ကြောင့် အာဏာသိမ်းမှုနောက်ဆက်တွဲ နိုင်ငံရေးအခင်းအကျင်းကို ပိုရှုပ်ထွေးစေပြီး ဆန္ဒပြသူတွေလည်း ဆက်လက် သတ်ဖြတ်ခံနေရကာ စစ်တပ်နဲ့ တိုင်းရင်းသားအင်အားစုတွေအကြား ပဋိပက္ခတွေလည်း ပြန်လည် ပေါ်ပေါက်လာနေပါတယ်။

Photo- MOI

4 days Ago

အင်းစိန်ထောင်အပါအဝင် ရန်ကုန်၊ မန္တလေးနှင့် နေပြည်တော်တွင် ကိုဗစ်ကာကွယ်ဆေးစထိုးပေး

အင်းစိန်ထောင်က အကျဉ်းသားတွေ အပါအဝင် ရန်ကုန်၊ မန္တလေးနဲ့  နေပြည်တော်မှာ ဇူလိုင် ၂၈ ရက်က စုစုပေါင်း အယောက် ၂၄၀၀ ကျော်ကို ကိုဗစ်-၁၉ ရောဂါ ကာကွယ်ဆေးတွေထိုးပေးခဲ့တယ်လို့ ဒီကနေ့ ထုတ် စစ်ကောင်စီ သတင်းစာတွေမှာ ဖော်ပြပါတယ်။

အင်းစိန်ထောင်က အကျဉ်းသားနဲ့ အချုပ်သား အယောက် ၆၁၀ ၊  နေပြည်တော်အချုပ်က အကျဉ်းသား အယောက်  ၃၆၀ ၊  နေပြည်တော်ရှိ ဝန်ကြီးဌာနပေါင်းစုံမှ ဝန်ထမ်း၂၇၆ ယောက်၊ မန္တလေးတိုင်းက အသက် ၆၅ နှစ်နဲ့ အထက် ပြည်သူ  ၁၁၆၁ ယောက်တို့ကို ထိုးပေးခဲ့တာလို့ ဆိုပါတယ်။ 

ရန်ကုန်မြို့ အင်းစိန်ဗဟို အကျဉ်းထောင်မှာ အကျဉ်းသား/ အချုပ်သား အမျိုးသား၊ အမျိုးသမီးစုစုပေါင်း ၉၀၀၀ ကျော်ရှိပြီး ကာကွယ်ဆေးထိုးနှံဖို့ စာရင်းပေး သူတွေ စုစုပေါင်း ၂၅၀၀ ကျော်ရှိတယ်လို့လည်းဆိုပါတယ်။

အင်းစိန်ထောင်တွင်းမှာ ဇူလိုင် ၂၈ ရက်က အကျဉ်းသားတွေကို ကိုဗစ်-၁၉ ကာကွယ်ဆေးထိုးပေးတဲ့အကြောင်း ဒီနေ့ထုတ်စစ်ကောင်စီရဲ့ The Global New Light of Myanmar သတင်းစာမှာ ရေးသားဖော်ပြရာမှာ ဖမ်းဆီးခံထားရတဲ့ သြစတြေးလျ စီးပွားရေးပညာရှင်လည်းဖြစ် ဒေါ်အောင်ဆန်းစုကြည်ရဲ့ စီးပွားရေးအကြံပေးပုဂ္ဂိုလ်လည်းဖြစ်တဲ့ ပါမောက္ခ ရှောင်တာနယ်လ်ရဲ့ ဓာတ်ပုံကိုလည်း ထည့်သွင်းဖော်ပြတာတွေ့ရပါတယ်။

ပါမောက္ခ ရှောင်တာနယ်လ်ကို နိုင်ငံတော်လျှို့ဝှက်ချက်ပေါက်ကြားမှုနဲ့ စစ်ကောင်စီက စွဲချက်တင်ဖမ်းဆီးထားတာဖြစ်ပြီး ရှောင်တာနယ်လ်ဟာ မကြာသေးခင်က ဖျားနာ ကိုဗစ်-၁၉ ရောဂါ လက္ခဏာတွေ ခံစားနေရတယ်လို့ သူ့ရဲ့ဇနီးဖြစ်သူက ပြောထားပါတယ်။

အင်းစိန်ထောင်ထဲမှာ အချုပ်သားတွေကို အကြမ်းဖက်ရိုက်နှက်တာ၊ တိုက်ပိတ်တာ၊ ကိုဗစ်-၁၉ ရောဂါ ကာကွယ်ကုသမှုမပေးဘဲထားတာဟာ စစ်ကောင်စီက လူ့အခွင့်အရေးကိုမျက်ကွယ်ပြုပြီး ရာဇဝတ်မှုတွေကို  ပြောင်ပြောင်တင်းတင်းချိုးဖောက်နေတာလို့ လူ့အခွင့်အရေးသမားတွေက ဝေဖန်ခဲ့ပြီးနောက် အကျဉ်းထောင်တွင်း ကိုဗစ် ကာကွယ်ဆေးတွေစထိုးပေးနေတာပါ။ 

အင်းစိန်ထောင်တွင်းက စိုးရိမ်ထိတ်လန့်စရာ အခြေအနေတွေက လူမျိုးတုံးသတ်ဖြတ်နေတဲ့ မြန်မာနိုင်ငံ စစ်အာဏာရှင်ရဲ့ အကြင်နာမဲ့ ရက်စက်မှုတွေကို တဖန်ပြန်လည် ပြသနေတာ ဖြစ်တယ်လို့ အမျိုးသားညီညွတ်ရေးအစိုးရ(NUG)၊ ပြည်ထောင်စုဝန်ကြီး ဒေါက်တာ ဆာဆာက လည်း ပြောထားပါတယ်။

ရန်ကုန် အင်းစိန်အကျဉ်းထောင်တွင်းက နိုင်ငံရေးသမားတွေကိုထားတဲ့ သီးသန့်ထောင်မှာ  ဇူလိုင် ၂၃ ရက် မနက် နိုင်ငံရေးကြွေးကြော်သံတွေနဲ့ ဆန္ဒပြခဲ့ကြပါတယ်။ ဆန္ဒပြခေါင်းဆောင်တွေက ထောင်ထဲမှာ ဖျားနာသူတွေ များနေပြီး ဆေးဝါးကုသမှုမလုံလောက်တာ၊ ရာဇဝတ်အသေးအဖွဲအမှု တွေကို လွှတ်ပေးပြီး ပုဒ်မ ၅၀၅(က) တွေကို လွှတ်မပေးတာ၊ ထောင်ထဲမှာ စည်းကမ်းတင်းကျပ်မှု များလာတာ စတဲ့အချက်သုံးချက်ကို အမြန်ဆုံးဖြေလျှော့ပေးဖို့ တောင်းဆိုခဲ့ပါတယ်။

ထောင်ထဲမှာ ဖမ်းဆီးခံထားရသူတွေ ကိုဗစ်-၁၉ ရောဂါပိုး မကူးစက်ရေးနဲ့ လုံလောက်တဲ့ကုသမှုရဖို့အတွက် စစ်ကောင်စီမှာ အပြည့်အဝတာဝန်ရှိကြောင်းနဲ့ ထောင်တွင်းအခြေအနေတွေကို ICRC လို နိုင်ငံတကာအဖွဲ့အစည်းတွေ ဝင်ရောက်စစ်ဆေးခွင့်ပြုဖို့  နိုင်ငံရေးအကျဉ်းသားများကူညီစောင့်ရှောက်ရေးအသင်း AAPP ကလည်း တောင်းဆိုထားပါတယ်။ 

အမျိုးသားဒီမိုကရေစီအဖွဲ့ချုပ် ဗဟိုအလုပ်အမှုဆောင်အဖွဲ့အတွင်းရေးမှူးအဖွဲ့ဝင် ဦးဉာဏ်ဝင်းဟာ အင်းစိန်ထောင်အတွင်းမှာ ကိုဗစ်-၁၉ ရောဂါပိုးကူးစက်ခံခဲ့ရပြီးနောက် ရန်ကုန်ပြည်သူ့ဆေးရုံကြီးကို ပို့ဆောင်ဆေးကုသမှုခံယူခဲ့စဉ် ဇူလိုင် ၂၀ ရက်နေ့မှာ ကွယ်လွန်သွားခဲ့တာဖြစ်ပါတယ်။

စစ်ကောင်စီကျန်းမာရေးဌာနကတော့ မြန်မာနိုင်ငံ တဝန်းမှာ အသက်(၆၅)နှစ်အထက် သက်ကြီးရွယ်အိုတွေ၊ ကျန်းမာရေးဝန်ထမ်းတွေ၊ စေတနာ့ဝန်ထမ်းတွေ၊ ဌာနဆိုင်ရာ နိုင်ငံ့ဝန်ထမ်းတွေ၊ ဘိုးဘွားရိပ်သာတွေမှာ ရှိတဲ့ အဘိုးအဘွားတွေ၊ သာသနာ့ဝန်ထမ်း ဘုန်းတော်ကြီးနဲ့ သီလရှင်တွေ၊ ဘဏ်ဝန်ထမ်းတွေ၊ စက်ရုံအလုပ်ရုံဝန်ထမ်းတွေ၊ ဟိုတယ်ဝန်ထမ်းတွေ၊  အကျဉ်းသား၊ အချုပ်သားတွေ၊ သယ်ယူပို့ဆောင်ရေးလုပ်ငန်းကလူတွေ၊ ဆူပါမားကတ်နဲ့ ဈေးတွေက ဝန်ထမ်းတွေကို  ကိုဗစ်- ၁၉ ရောဂါ ကာကွယ် ဦးစားပေး ထိုးနှံပေးမယ်လို့ ထုတ်ပြန်ထားပါတယ်။

COVIDSHIELD အပါအဝင် ကိုဗစ်-၁၉ ရောဂါ ကာကွယ်ဆေးတစ်မျိုးမျိုးကို ၂ ကြိမ်ထိုးပြီးသူတွေ၊ လက်ရှိ ကိုဗစ်သံသယလူနာတွေနဲ့ အဖျားရောဂါရှိသူတွေ၊ ကိုဗစ်ကူးစက်ခံရတာ  ၆ လမပြည့်သေးတဲ့ လူနာတွေကိုတော့ ကာကွယ်ဆေးထိုးပေးမှာ မဟုတ်ဘူးလို့ လည်း ဆိုပါတယ်။

Photo-MOI

4 days Ago
More News
Up