အင်တာနက်လိုင်း

August 3, 2020

ရခိုင်နှင့်ချင်းတွင် အင်တာနက်လိုင်း ပြန်လည်ဖွင့်ပေးသော်လည်း အသုံးပြုမရ

၁ နှစ်ကျော်ကြာ အင်တာနက်ပိတ်ထားခဲ့တဲ့ ရခိုင်ပြည်နယ် မြို့နယ် ၇ ခုနဲ့ ချင်းပြည်နယ် ပလက်ဝမြို့နယ်တို့မှာ သြဂုတ် ၁ ရက်နေ့ ည ၁၀ နာရီကစပြီး အော်ပရေတာအားလုံး အင်တာနက်လိုင်းတွေ ပြန်ဖွင့်ပေးလိုက်ပေမဲ့ 2G Network ပဲရရှိကြတဲ့အတွက် လုံးဝ အသုံးပြုမရဘူးလို့ ဒေသခံတွေက ပြောပါတယ်။ ဘူးသီးတောင်မြို့ ထူး Mobile ဆိုင်မှ ကိုအောင်ထူးက “ကျနော်တို့ကို ကိုယ်စားလှယ်က ဖုန်းဆက်တယ်။ MPT က message ဝင်တယ်။ အင်တာနက် ဖွင့်တော့ဖွင့်ပေးတယ်။ E ပဲ ပေါ်တယ်။ အခုလို 5G Network တောင် ပေါ်နေတဲ့အချိန်မှာ ဖွင့်ပေးတာက 2G ဆိုတော့ ဘာမှ သုံးမရပါဘူး။ ဖွင့်ပေးရင်လည်း သုံးလို့ရအောင် ဖွင့်ပေးစေချင်တယ်” လို့ ပြောပါတယ်။ ဘူသီးတောင်မြို့မှ မခိုင်ရွှေဝါက “ပြန်ဖွင့်ပေးတဲ့ အင်တာနက်လိုင်းတွေမှာ 2G ပဲရရှိပြီး လိုင်းမကောင်းတာကြောင့် တခြားမြို့တွေနည်းတူ အင်တာနက်လိုင်းတွေ အပြည့်အဝဖွင့်ပေးဖို့ တောင်းဆိုချင်တယ်”လို့  ပြောပါတယ်။ ဖုန်းနှင့်လျှပ်စစ်ပစ္စည်းမျိုးစုံ အရောင်းဆိုင်မှ ကိုလင်းလင်းက “သတင်းတွေမှကတော့ အင်တာနက်ပြန်ရပြီလို့ ပြောကြတယ်။ ဒါပေမဲ့ ဘာမှသုံးမရဘူး။ Mytel က 2G ပဲ ပေါ်တယ်။ အင်တာနက်မရှိတော့ အလုပ်လုပ်ရတာလည်း ဘာမှကို အဆင်မပြေပါဘူး။ ဖွင့်ပေးရင်လည်း အပြည့်အဝဖွင့်ပေးပေါ့။ အခုက ဘာမှလည်း မဟုတ်ဘူး” လို့ ပြောပါတယ်။ အင်တာနက်လိုင်း ပြန်ဖွင့်ပေးတဲ့ မြို့နယ်တွေဖြစ်တဲ့ ရခိုင်ပြည်နယ်မှ ဘူးသီးတောင်၊ ပုဏ္ဏားကျွန်း၊ ကျောက်တော်၊ ရသေ့တောင်၊ မြောက်ဦး၊ မင်းပြား၊ မြေပုံနှင့် ချင်းပြည်နယ်၊ ပလက်ဝမြို့နယ်များ၏ အင်တာနက်လိုင်းတွေမှာ 2G ပဲ ရရှိပြီး သုံးမရဖြစ်နေကြပြီး ပြည်သူတွေ အခက်အခဲတွေ့နေကြတာပါ။ ဘူးသီးတောင်မြို့မှ လူငယ်တချို့ကတော့ အင်တာနက်အသုံးပြုဖို့အတွက် ပေ ၁၀၀ ကျော် ၂၀၀ နီးပါး မြင့်တဲ့တောင်ထိပ်တွေ ဘုရားစေတီပုထိုးတွေရှိရာ တောင်ကုန်းတွေပေါ်အထိ ခက်ခက်ခဲခဲ သွားရောက်ရှာဖွေသုံးနေကြရဆဲ ဖြစ်သလို မြိုနဲ့ ၂ မိုင်ကျော်ဝေးပြီး မောင်တောမြို့ဘက်မှ network မိတဲ့နေရာတွေကို သွားရောက် အသုံးပြုနေကြရပါတယ်။ MPT မှ တာဝန်ရှိသူတစ်ဦးကတော့ ညွှန်ကြားချက်မှာ 2G network သာ ဖွင့်ပေးရန် ညွှန်ကြားထားတယ်လို့ ​ပြောဆိုပါတယ်။ ရခိုင်ပြည်နယ်ရှိ ဘူးသီးတောင်၊ မောင်တော၊ ရသေ့တောင်၊ ပုဏ္ဏားကျွန်း၊ ကျောက်တော်၊ မြေပုံ၊ မြောက်ဦး၊ မင်းပြားနှင့် ချင်းပြည်နယ် ပလက်ဝမြို့နယ်တို့ကို ၂၀၁၉ ခုနှစ် ဇွန်လ ၂၁ ရက်နေ့မှာ ကြိုတင်အသိမပေးဘဲ အင်တာနက်ဖြတ်တောက်ခဲ့ပြီးနောက် စက်တင်ဘာလ ၁ ရက်နေ့မှာ ဘူးသီးတောင်၊ မောင်တော၊ ရသေ့တောင်၊ မြေပုံနှင့် ပလက်ဝမြို့နယ်တို့ကို အင်တာနက် ပြန်ဖွင့်ပေးခဲ့ပေမယ့် ဖေဖော်ဝါရီလ ၃ ရက်နေ့မှာ ထပ်မံဖြတ်တောက်ခဲ့ပါတယ်။ ၂၀၂၀ ပြည့်နှစ် မေလ ၂ ရက်နေ့မှာ မောင်တောမြို့နယ်ကို အင်တာနက်လိုင်းတွေ ပြန်ဖွင့်ပေးခဲ့ပါတယ်။ ပိတ်ထားတဲ့ အင်တာနက်လိုင်းတွေ ပြန်ဖွင့်ပေးဖို့ တောင်းဆိုခဲ့သူအချို့ တရားစွဲဆိုခံရမှုတွေလည်း ရှိပါတယ်။  လင်းလက်
12 months Ago

February 22, 2020

အင်တာနက်လိုင်းများ ပြန်ဖွင့်ပေးရန် တောင်ကုတ်မြို့တွင် ဆန္ဒပြ

ရခိုင်ပြည်နယ်ရှိ မြို့နယ်  ၈ မြို့နယ်နဲ့ ချင်းပြည်နယ် (ပလက်ဝမြို့နယ်) တို့မှာ တိုက်ပွဲတွေကြောင့် ပိတ်ထားတဲ့ အင်တာနက်လိုင်းတွေ ပြန်ဖွင့်ပေးဖို့ တောင်ကုတ်ဒီဂရီကောလိပ် ကျောင်းသားသမဂ္ဂက ဦးဆောင်ပြီး တောင်ကုတ်မြို့မှာ ဒီနေ့မနက် ဆန္ဒဖော်ထုတ်ခဲ့ကြပါတယ်။ တောင်ကုတ်ဒီဂရီကောလိပ် ကျောင်းသားသမဂ္ဂဥက္ကဋ္ဌ ကိုသော်ဇင်ထွန်းက “ကျနော်တို့ အဓိက ဆန္ဒပြရတဲ့အချက်တွေကတော့ အင်တာနက်ဖြတ်တောက်ထားတာတွေကို ပြန်လည်ဖွင့်ပေးဖို့ဆိုတဲ့ အဓိကအချက်ကိုပြတာပါ။ နောက်ပြီးတော့ ပြည်တွင်း ပြည်ပက သတင်းမီဒီယာတွေ လွတ်လပ်စွာ သတင်းယူနိုင်ရေး၊ ပြီးတော့ အသက်အန္တရာယ်လုံခြုံစွာ ပညာသင်ကြားနိုင်ရေးဆိုတဲ့ အချက်တွေကို အဓိကထားပြီးတော့ ဆန္ဒဖော်ထုတ်ရတာဖြစ်တယ်” လို့ ပြောပါတယ်။ အဆိုပါဆန္ဒဖော်ထုတ်ပွဲကို လူပေါင်း ၁၀၀ ကျော်ပါဝင်ခဲ့ကြပြီး တောင်ကုတ် ဒီဂရီကောလိပ်ကနေ တောင်ကုတ်မြို့ ဦးဥတ္တမရုပ်တုရှေ့ထိ စီတန်းလှည့်လည်ကာ ဆန္ဒဖော်ထုတ်ခဲ့ကြပါတယ်။ ဆန္ဒပြသူတွေက ချင်းပြည်နယ်နဲ့ ရခိုင်ပြည်နယ်အတွင်း အင်တာနက်ဖြတ်တောက်ထားမှုကို လုံးဝမပိတ်ဘဲ ပြန်လည်ဖွင့်ပေးဖို့၊ ကမ္ဘာ့အရှည်အကြာဆုံး အင်တာနက် ဖြတ်တောက်ထားမှု ချက်ချင်းရပ်၊ ပြည်တွင်း၊ ပြည်ပမီဒီယာများ လွတ်လပ်စွာ သတင်းရယူနိုင်ရေးဖော်ဆောင်ပေး၊ အသက်အန္တရာယ်လုံခြုံစွာ ပညာသင်ကြားနိုင်ရေး စတဲ့ကြွေးကြော်သံတွေနဲ့ ကြွေးကြော်ဆန္ဒပြခဲ့ကြပါတယ်။ ရခိုင်ပြည်နယ်မြို့နယ် ၈ ခုနဲ့ ချင်းပြည်နယ် ပလက်ဝမြို့နယ်တို့မှာ ပြီးခဲ့တဲ့ ၂၀၁၉ ခုနှစ် ဇွန်လ ၂၁ ရက်နေ့မှ စတင်ပြီး အင်တာနက် အသုံးပြုခွင့် ပိတ်ပင်ခဲ့ပြီးနောက် စက်တင်ဘာလအစောပိုင်းမှာ မြို့နယ် ၅ မြို့နယ်ကို အင်တာနက် ပြန်လည်ဖွင့်လှစ်ပေးခဲ့ပေမယ့် ကျောက်တော်၊ မင်းပြား၊ မြောက်ဦးနဲ့ ပုဏ္ဏားကျွန်းမြို့နယ်တို့အား ဆက်ပိတ်ထားပါတယ်။ ဒီနောက် ဖေဖော်ဝါရီ ၃ ရက် နေ့ကစပြီး ရခိုင်ပြည်နယ် မောင်တော၊ ဘူးသီးတောင်၊ မြေပုံနဲ့ ရသေ့တောင်မြို့နယ်တွေနဲ့ ချင်းပြည်နယ် ပလက်ဝမြို့တွေမှာ အင်တာနက်လိုင်းတွေ ထပ်မံဖြတ်တောက်ခဲ့တာပါ။ သမ္မတရုံး ပြောရေးဆိုခွင့်ရှိသူ ဦးဇော်ဌေးကတော့ နိုင်ငံတော်ကာကွယ်ရေးလိုအပ်ချက်အရ ရခိုင်ပြည်နယ်က မြို့နယ်အချို့မှာ အင်တာနက်အသုံးပြုခွင့် ပိတ်ထားတာလို့ ပြောကြားထားပါတယ်။
1 year Ago
Up