အင်တာနက်ညီလာခံ

December 17, 2015

ကမ္ဘာ့နိုင်ငံများအနေဖြင့် အင်တာနက်သုံးစွဲမှု အခွင့်အရေးကို လေးစားရန် တရုတ် တိုက်တွန်း

တရုတ်သမ္မတ ဇီကျင့်ဖျင်က ကမ္ဘာ့နိုင်ငံတွေအနေနဲ့ တခြားတနိုင်ငံရဲ့ အင်တာနက်သုံးစွဲမှု အခွင့်အရေး၊ မတူညီတဲ့ အုပ်ချုပ်မှုပုံစံကို အသိအမှတ်ပြု လေးစားဖို့ ဒီဇင်ဘာ ၁၆ ရက်နေ့က တိုက်တွန်း တောင်းဆိုလိုက်ပါတယ်။ တရုတ်နိုင်ငံအရှေ့ပိုင်း ဇီကျန်း (Zhejiang) ပြည်နယ်မှာ တရုတ်အစိုးရက ကျင်းပပေးတဲ့ ကမ္ဘာ့အင်တာနက်ညီလာခံ သမ္မတ ဇီကျင့်ဖျင်ရဲ့ အဖွင့်မိန့်ခွန်းမှာ ပြောဆိုခဲ့တာပါ။ နိုင်ငံတိုင်းမှာ အင်တာနက်ကို သူ့နိုင်ငံအခြေအနေနဲ့ လိုက်အောင်  ပြဋ္ဌာန်းသုံးစွဲခွင့် ရှိတယ်လို့လည်း တရုတ်သမ္မတက ပြောဆိုပါတယ်။ တရုတ်အစိုးရဟာ အင်တာနက်သုံးစွဲမှုကို ထိန်းချုပ်လွန်းပြီး တရုတ်ပြည်သူတွေ ကြည့်လို့မရအောင် အဓိက အင်တာနက်ဝက်ဆိုက်တွေကို ပိတ်ထားတာ၊ ဆင်ဆာဖြတ်ထားတာတွေကြောင့် ပြစ်တင်ဝေဖန်ခံရပါတယ်။ တရုတ်သမ္မတကိုယ်တိုင် ဒီညီလာခံ တက်ရောက်ပြီး ပြောကြားတဲ့ မိန့်ခွန်းကိုကြည့်ရင် တရုတ်နိုင်ငံဟာ အင်တာနက်လုံခြုံရေးနဲ့ ထိန်းချုပ်ရေးကို အထူးအလေးထားတယ်ဆိုတာ ပေါ်လွင်တယ်လို့ နည်းပညာသုံးသပ်သူတွေက ဆိုပါတယ်။ တရုတ်နိုင်ငံမှာ အင်တာနက်သုံးစွဲသူ သန်း ၆၅၀ ရှိလို့ ကမ္ဘာ့အင်တာနက်သုံးစွဲသူ အများဆုံးနိုင်ငံဖြစ်ပြီး ကမ္ဘာ့အင်တာနက်နဲ့ ဆိုင်တဲ့ စည်းမျဉ်းစည်းကမ်းတွေ ရေးဆွဲပြဋ္ဌာန်းမှုတွေမှာ တရုတ်နိုင်ငံဟာ ပါဝင်ခွင့်ရသင့်တယ်လို့ သမ္မတ ဇီကျင့်ဖျင်က သူ့ရဲ့ မိန့်ခွန်းမှာ ထည့်သွင်းပြောဆိုပါတယ်။ နယ်စည်းမခြား သတင်းသမားများအဖွဲ့ကတော့ တရုတ်နိုင်ငံမှာ သတင်းထောက် အယောက် ၄၀ လောက် ဖမ်းဆီးထောင်ချခံရတဲ့အတွက် ဒီညီလာခံကို နည်းပညာကုမ္ပဏီတွေနဲ့ အစိုးရတွေက မတက်ရောက်ဖို့ တိုက်တွန်းထားကြပြီး တက်ရောက်ရင် တရုတ်အစိုးရရဲ့ မူဝါဒတွေကို  ထောက်ခံသလိုဖြစ်မယ်လို့ ပြောဆိုပါတယ်။
6 years Ago

July 21, 2015

တရုတ် အင်တာနက် ညီလာခံ စတင်ဖွင့်လှစ်

၂၀၁၅ တရုတ် အင်တာနက် ညီလာခံကို မြို့တော် ဘေကျင်းမှာ ဇူလိုင် ၂၁ ရက်က စတင်ဖွင့်လှစ်လိုက်ပါတယ်။ ၃ ရက်ကြာကျင်းပမယ့် ညီလာခံရဲ့ ဆောင်ပုဒ်ကိုတော့ လုပ်ငန်းတွေ တိုးမြှင့်မှု၊ အချင်းချင်း ဆက်သွယ်ချိတ်ဆက်မှုနဲ့ မျှဝေမှုလို့ သတ်မှတ်ထားပါတယ်။ ညီလာခံအတွင်း ဆွေးနွေးမယ့် အချက်အလက် အမျိုးမျိုးထဲမှာ အင်တာနက် အသုံးပြု ဘဏ္ဍာရေးနဲ့ လုံခြုံရေး၊ အွန်လိုင်းဆေးဝါးကုသမှုနဲ့ ပညာရေး၊ အင်တာနက်ပေါ်က အကြောင်းခြင်းရာတွေနဲ့ သတင်းအချက်အလက်တွေကို အဝေးတနေရာက ဆာဗာတွေထဲမှာ သိမ်းဆည်းသုံးစွဲ မျှဝေတဲ့ ကွန်ရက်စနစ်ကို အသုံးချခြင်း စတာတွေ ပါဝင်ပါတယ်။ ဇူလိုင် ၂၁ ရက် မွန်းလွဲပိုင်းကနေ ၂၄ ရက် မနက်ပိုင်းအထိ ဖိုရမ် ဆွေးနွေးပွဲပေါင်း ၃၀ နီးပါးကို ကျင်းပမှာပါ။ တရုတ်အင်တာနက် လုပ်ငန်းကြီးတွေရဲ့ ခေါင်းဆောင်တွေနဲ့ ထိပ်တန်း လုပ်ငန်းတွေလည်း ဖိုရမ်တွေမှာ ပါဝင်ဆွေးနွေးမှာပါ။ တရုတ်အင်တာနက်လုပ်ငန်းရဲ့ အနာဂတ်အရေးကို ဆွေးနွေးမှာဖြစ်ပြီး အောင်မြင်တဲ့ စီးပွားရေးလုပ်ငန်း နောက်ဆုံးဖြစ်ထွန်းမှုတွေကို မျှဝေတာနဲ့ နည်းပညာရဲ့ အစွန်းရောက်မှုတွေကို ကန့်သတ်တာတွေအကြောင်း ဆွေးနွေးမှာ ဖြစ်ပါတယ်။ ၃ ရက်ကြာ ညီလာခံအတွင်း တရုတ် အင်တာနက် ဘဏ္ဍာရေး တိုးတက်မှု ၂၀၁၅ ခုနှစ်အတွက် အစီရင်ခံစာ၊ တရုတ်အင်တာနက် သုံးစွဲသူတွေအတွက် အကျိုးစီးပွားနဲ့ အခွင့်အရေးဆိုင်ရာ အကာအကွယ် လမ်းညွှန်ချက် ၂၀၁၅ တို့ အပါအဝင် အင်တာနက်ဆိုင်ရာ အစီရင်ခံစာနဲ့ လမ်းညွှန်ချက် အတော်များများကိုလည်း ဖြန့်ချိဖို့ မျှော်လင့်ထားပါတယ်။
6 years Ago
Up