အကြောင်းရင်း

July 4, 2020

ဘာကြောင့် လက်တုန် ရတာလဲ ၊ ဒါတွေကြောင့် ဖြစ်နိုင်ပါတယ်။

တစ်ခုခုများ အာရုံစိုက်ပြီး လုပ်ရမယ်ဆို လက်က တုန်လာပြီ။ ဇွန်းလေး ကိုင်ပြီး ဟင်းချိုသောက်တာတောင် တုန်လို့ ဖိတ်ကုန်တာ၊ တူနဲ့ စားမယ်ဆို ညှပ်ရခက်တာ၊ ရေခွက် ကိုင်ရင် လက်တုန်တာတွေ အတော် အဆင်မပြေဖြစ်ရတာပါ။ ဘာ့ကြောင့် လက်တုန် ကြသလဲ အများစု ကတော့ အရက်ကြောင့်၊ ကဖင်းကြောင့် ဒီလို ဖြစ်တတ်တယ်လို့ ပြောကြပေမယ့် အရက် မသောက်၊ ကော်ဖီ မသောက်တတ်တဲ့ သူတွေ အတွက်တော့ တခြား အကြောင်းရင်းတွေ ရှိနေပါသေးတယ် – အာရုံကြော ရောဂါ Essential Tremor လို့ ခေါ်တဲ့ အာရုံကြောရောဂါ တစ်မျိုး ကြောင့် လက်တုန် စေတတ်ပါတယ်။ ကော်ဖီခွက် ကိုင်လည်း တုန်၊ ဖယောင်းတိုင် ကိုင်လည်း တုန်၊ ဇွန်းခက်ရင်း ကိုင်လည်း တုန်နေတတ်တဲ့ သူတွေ မှာ အဖြစ်များဆုံး အကြောင်းရင်းတစ်ခု ဖြစ်ပါတယ်။ ဒီတုန်ခါမှု အမျိုးအစား ရဲ့ အကြောင်းရင်းက အတိအကျ မသိရပါဘူး။ နေ့စဉ် အလုပ်တွေမှာ နည်းနည်း အဆင်မပြေ ရှိတတ်ပေမယ့် Essential Tremor ခံစားရသူ အများစု ကတော့ အန္တရာယ် မရှိသလို နောက်ဆက်တွဲ ပြဿနာ ကြီးကြီးမားမား မရှိတတ်ပါဘူး။ ကဖင်း လွန်ကဲခြင်း မနက်ပိုင်း ကော်ဖီသောက်တယ်၊ နေ့လယ် ခဏနားချိန်မှာ သောက်တယ်၊ လက်ဖက်ရည် သောက်တယ်၊ အားဖြည့်အချိုရည် သောက်တယ်၊ ညကျ ကော်ဖီထပ်သောက်တယ်။ ကဲ ကဖင်းဓာတ်တွေ အများကြီး ဗိုက်ထဲ ဝင်သွားပြီပေါ့။ ကဖင်းက အာရုံလန်းဆန်းအောင် နှိုးဆွတဲ့ဓာတ်တစ်မျိုးဖြစ်သလို သောက်တာများရင်လည်း လက်တုန်အောင် ပိုနှိုးဆွတဲ့အရာလည်း ဖြစ်ပါတယ်။ အရက် ဖြတ်ခြင်း အရက်ကြိုက်သူတွေ မသောက်ရတဲ့အခါ ဖြစ်တတ်တဲ့ လက္ခဏာတွေထဲ လက်တုန်ခြင်း ပါဝင်ပါတယ်။ နောက်ဆုံးသောက်ခဲ့ပြီး ၁၀ နာရီအတွင်းမှာ စပြီး ခံစားရတတ်ပါတယ်။ ပါကင်ဆန် ရောဂါ ပါကင်ဆန်ရောဂါရှိသူ တွေမှာ ကြွက်သားတွေကို လှုပ်ရှားဖို့ သတင်းပို့တဲ့ ဦးနှောက်ဆဲလ်တွေ ပျက်စီးလာတာကြောင့် လက်တုန်တတ်ပါတယ်။ စစချင်းတော့ လက်တစ်ဖက်မှာပဲ တုန်တတ်ပေမယ့် ကြာလာတာ နဲ့အမျှ နောက်တစ်ဖက် မှာပါ ဖြစ်လာပါတော့တယ်။ လှုပ်ရှားမှုတွေ နှေးလာနိုင်သလို ဟန်ချက်ညီအောင် ထိန်းဖို့လည်း ခက်လာတယ်၊ ဒါမှမဟုတ် လက်နဲ့ ခြေထောက်တွေ တောင့်တင်းလာနိုင်ပါတယ်။ ပါကင်ဆန်ကြောင့် တုန်ရီတာ ဆိုရင်တော့ သောက်ဆေးတွေ ဒါမှမဟုတ် ခွဲစိတ်ကုသမှု လိုအပ်လာနိုင်ပါတယ်။ ဦးနှောက် အာရုံကြော ရောဂါ (MS) Multiple Sclerosis (MS) ဟာ myelin လို့ခေါ်တဲ့ အာရုံကြောအပေါ်ယံအလွှာကို ပျက်စီးစေပါတယ်။ ဒီလိုဖြစ်လာရင် လက်တွေ သို့မဟုတ် တခြားအစိတ်အပိုင်းတွေမှာ တုန်ခါတဲ့ လက္ခဏာ ဖြစ်နိုင်ပါတယ်။ သိုင်းရွိုက် ရောဂါ (Hyperthyroidism) လက်တုန်ခြင်းက သိုင်းရွိုက်ဟော်မုန်းများခြင်းရဲ့ လက္ခဏာတစ်ခု ဖြစ်နိုင်ပါတယ်။ သိုင်းရွိုက်ဂလင်းက အရမ်းအလုပ်လုပ်လွန်းပြီး နှလုံးခုန်နှုန်းကိုမြင့်စေပါတယ်။ ဘာမှလည်း မလုပ်ရဘဲ ကိုယ်အလေးချိန် ကျဆင်းသွားတာ၊ အလင်းရောင်ကို မခံနိုင်တာ၊ နှလုံးခုန်မြန်တာ၊ကောင်းကောင်းအိပ်မပျော်တာတွေလည်း ဖြစ်နိုင်ပါတယ်။ အိပ်ရေးပျက်ခြင်း လောင်စာအလုံအလောက် မဖြည့်ပေးရင် ကားစက်တောင် နှိုးမရပါဘူး။ လူ့ခန္ဓာကိုယ်တစ်ခုလုံးကို ကောင်းကောင်းလည်ပတ်နိုင်ဖို့က အစားအသောက်နဲ့ အိပ်ရေးဝနေဖို့လိုပါတယ်။ မအိပ်ဘဲနဲ့ဆို ဦးနှောက်က မှန်မှန်ကန်ကန် အလုပ်လုပ်မယ် ထင်ပါသလား။ ဦးနှောက်ရဲ့ မှားယွင်းသတိပေးချက်တွေ ကြောင့် လက်တုန်တာ အပါအဝင် အာရုံကြောစနစ်တွေ ကမောက်ကမ ဖြစ်စေနိုင်ပါတယ်။ သွေးချို ကျခြင်း ကြွက်သားတွေနဲ့ အာရုံကြောတွေ ဆိုတာ သွေးတွင်းသကြားဓာတ်နဲ့ အားဖြည့်ပေးထားတာပါ။ သကြားဓာတ် အလုံအလောက်မရရင် လက်တွေတုန်လာနိုင်တယ်။ ဆီးချိုကြောင့်၊ဆေးဝါးတချို့ကြောင့်၊ အရက်ကြောင့်၊ အစားနည်းတာကြောင့်သွေးတွင်းသကြားဓါတ်ကျဆင်းနိုင်ပါတယ်။ စိတ်ဖိစီးခြင်း စိတ်ဖိစီးတဲ့ အခါ ခန္ဓာကိုယ်က အာရုံကြော တွေရဲ့ လှုပ်ရှားမှု ကလည်း လွန်ကဲလာပါတယ်။ နှလုံးခုန်တွေ မြန်လာပြီး လက်လည်း တုန်တတ်ပါတယ်။ ဒါကတေ့ာ အသက်ရှူလေ့ကျင့်ခန်းဖြစ်ဖြစ်၊ တရားထိုင်တာ ဖြစ်ဖြစ် တစ်နည်းနည်းနဲ့ စိတ်ဖိစီးမှုကို ဖြေလျော့လိုက်တဲ့ အခါ ပြန်ပြေပျောက်သွားမှာပါ။ ဆေးဝါး လက်တုန် ခြင်းက စိတ်ကျန်းမာရေး ဆိုင်ရာ ဆေးတွေ၊ အတက်ရောဂါ၊ ခေါင်းတစ်ခြမ်း ကိုက်ခြင်း၊ အာရုံကြော ရောဂါ၊ ပန်းနာရင်ကျပ် တို့လိုရောဂါတွေ အတွက် သောက်သုံးရတဲ့ ဆေးဝါးတွေရဲ့ ဘေးထွက်ဆိုးကျိုး ဖြစ်နေတတ်ပါတယ်။ ဗီတာမင် အားနည်းခြင်း အာရုံကြောစနစ် ကျန်းမာရေးအတွက် B12 ရဲ့အခန်းကဏ္ဍ က ကြီးမားပါတယ်။ အသား ၊ကြက်ဥ သိပ်မစားရင် ဒါမှမဟုတ် နွားနို့ မသောက်ရင်၊ ဗီတာမင် B12 ကြွယ်ဝတဲ့ အစားအစာတွေ မစားရင် အားနည်းနိုင်ပါတယ်။ ဗီတာမင် B12 ချို့တဲ့တဲ့ အခါ လက်တုန် တာ၊ ခြေလက်တွေ ထုံကျဉ်တာ၊ အားနည်းတာတွေ ဖြစ်တတ်ပါတယ်။ ရေးသားသူ  ဆေးပညာပိုင်းဆိုင်ရာတည်းဖြတ်သူ    ဤဆောင်းပါးကို DVB ၏ မိတ်ဘက် ကျန်းမာရေးနှင့် ဆေးပညာဝက်ဘ်ဆိုဒ် hellosayarwon.com မှ ကူးယူဖော်ပြပါသည်။  
10 months Ago

May 3, 2020

ဗင်နီဇွဲလား ထောင်အဓိကရုဏ်း ၄၆ ဦး သေဆုံး

ဗင်နီဇွဲလားနိုင်ငံမှာ ထောင်တွင်းအဓိကရုဏ်းကြောင့် လူ ၄၆ယောက် သေဆုံးပြီး ၇၅ယောက် ဒဏ်ရာရခဲ့ကာ ဖြစ်ရတဲ့အကြောင်းရင်းအဖြေကို ထောင်သားတွေရဲ့ မိသားစုတွေက မေ ၂ရက်မှာ တောင်းဆိုလိုက်ကြပါတယ်။  ထောင်ဖောက်ပြေးဖို့ ကြိုးစားမှုနဲ့ ပတ်သက်ပြီး ဖြစ်တာလို့ အာဏာပိုင်တွေက ဖြေခဲ့ပေမယ့် လူ့အခွင့်အရေးအုပ်စုတွေက မေးခွန်တွေ ထပ်ထုတ်ခဲ့ကြပါတယ်။ ပေါ်တူဂေဆာပြည်နယ်က လော့်စ်အယ်လ်လာနော့စ် ထောင်မှာ သောကြာနေ့က ဖြစ်တဲ့ အဓိကရုဏ်းကို နက်နက်ရှိုင်းရှိုင်း စိုးရိမ်တယ်လို့ ကုလသမဂ္ဂလူ့အခွင့်အရေးဆိုင်ရာ မဟာမင်းကြီးရုံးက တွစ်တာလူမှုကွန်ရက်ပေါ်ကနေ ပြောပါတယ်။ တောင်အမေရိကနိုင်ငံ ဗင်နီဇွဲလားမှာ ထောင်တွေဟာ အခြေအနေ ညံ့ဖျင်းတာနဲ့ အကြမ်းဖက်မှုအဆင့် အစွန်းရောက်နေလို့ နာမည်ဆိုးနဲ့ ကျော်ကြားပါတယ်။ အကျဉ်းဦးစီးညွှန်မှူးက ထောင်ဖောက်ထွက်ပြေးဖို့ ကြိုးစားနေတဲ့ ထောင်သားတွေနဲ့ ညှိုနှိုင်းဖို့ ကြိုးစားခဲ့တယ်လို့ အကျဉ်းဦးစီးဝန်ကြီးကို ကိုးကားပြီး အစိုးရရေဒီယို ဌာနရဲ့ အင်တာနက် စာမျက်နှာက ဖော်ပြပါတယ်။  ဒီဖြစ်ရပ်နဲ့ပတ်သက်ပြီး မှတ်ချက်ပေးဖို့ တောင်းဆိုချက်ကို ပြန်ကြားရေးဝန်ကြီးဌာနကရော အစိုးရရှေ့နေချုပ်ရုံးကပါ မတုံ့ပြန်သေးပါဘူး။  ထောင်တွေထဲမှာ ကိုရိုနာဗိုင်းရပ်စ်ကူးစက်မှု ဟန့်တားရေးအတွက် ထောင်သားတွေရဲ့ မိသားစုဝင်တွေ ထောင်ဝင်စာ ပိတ်ဖို့ ထောင်အာဏာပိုင်တွေက တားမြစ်အပြီးမှာ ခုလို အဓိက ရုဏ်းဖြစ်ခဲ့တာလို့ လူ့အခွင့်အရေးအုပ်စုတွေဖြစ်တဲ့ ဂျီရွန်နဲ့ A Window Toward Freedom တို့က ပြောခဲ့ပါတယ်။ အလားတူ ကန့်သတ်ချက်တွေကြောင့် အီတလီအပါအဝင် နိုင်ငံအတော်များများမှာ ထောင်အဓိကရုဏ်းတွေ ပေါ်ပေါက်ခဲ့ပါတယ်။ 
1 year Ago
Up