အကြမ်းဖက်အုပ်စု

December 7, 2020

ဟူသီအဖွဲ့ကို အကြမ်းဖက်အုပ်စုအဖြစ် သတ်မှတ်ရေး အမေရိကန်နှင့်အိုမန်ဆွေးနွေး

ယီမင်နိုင်ငံအတွင်းက အီရန်နဲ့ မဟာမိတ် ဟူသီလှုပ်ရှားမှုအဖွဲ့ကို အကြမ်းဖက် အုပ်စုအဖြစ် နာမည်ပျက်စာရင်းသွင်းရေး အရှေ့အလယ်ပိုင်းဆိုင်ရာ အမေရိကန်ထိပ်တန်း သံတမန်နဲ့ ဆွေးနွေးခဲ့တယ်လို့ အိုမန်နိုင်ငံခြားရေးဝန်ကြီးက ဒီဇင်ဘာ ၅ရက်မှာ ပြောပါတယ်။  ဘာရိန်းနိုင်ငံက ထိပ်သီးဆွေးနွေးပွဲမှာ မူစကတ်မြို့ကို အလည်ရောက်နေတဲ့ အမေရိကန် ကာကွယ်ရေးသံတမန် ဒေးဗစ်စချန်ကာ အစဖော်ပေးခဲ့တဲ့ နာမည်ပျက် စာရင်းသွင်းမယ့် ကိစ္စနဲ့ ပတ်သက်တဲ့ မေးခွန်းကို သူက တုံ့ပြန်ပြောဆိုလိုက်တာပါ။  “ပဋိပက္ခတရပ်မှာ အဓိက ပါဝင်ပတ်သက်သူကို ပိတ်ဆို့တာ၊ နာမည်ပျက် စာရင်းသွင်း တာကို အခြေခံတဲ့ ပြဿနာ ဖြေရှင်းနည်း ရှိမယ်လို့ ကျနော် မထင်ဘူး။ ဒါဟာ သူတို့ကို ညှိနှိုင်းရေး စားပွဲဆီ ရောက်မလာစေဘူး” လို့ အိုမန် နိုင်ငံခြားရေးဝန်ကြီးက ပြောပါတယ်။  အမေရိကန်သမ္မတ ဒေါ်နယ်ထရမ့်အစိုးရဟာ ၂၀၁၅ တည်းက ယီမင်နိုင်ငံအတွင်း ဆော်ဒီ အာရေဗျဦးဆောင်တဲ့ ညွန့်ပေါင်းတပ်ကို တိုက်နေတဲ့ ဟူသီအဖွဲ့ကို နာမည်ပျက် စာရင်းသွင်းဖို့ ခြိမ်းခြောက်နေတယ်လို့ သတင်းရင်းမြစ် ၂ ခုက ရိုက်တာ သတင်းဌာနကို အရင်လက ပြောခဲ့ဖူးပါတယ်။  ကုလသမဂ္ဂကတော့ ၂၀၁၈ မှာ ရပ်နေခဲ့တဲ့ ငြိမ်းချမ်းရေး ဆွေးနွေးပွဲတွေ ပြန်စဖို့ ကြိုးစားနေပြီး ဟူသီတပ်ဖွဲ့တွေက မြို့တော် စာနာနဲ့ မြို့ကြီး အများစုကို ထိန်းချုပ်ထားပါတယ်။  ယီမင်ပဋိပက္ခဟာ ဆော်ဒီအာရေဗျနဲ့ အီရန်တို့ရဲ့ ကြားခံအုပ်စုတွေ ကြားက စစ်ပွဲအဖြစ် ဒေသတွင်းမှာ ကျယ်ကျယ်ပြန့်ပြန့် ရှုမြင်ထားကြပါတယ်။  ယီမင်ပြည်သူ ၈၀ ရာခိုင်နှုန်းကျော်က အကူအညီတွေ လိုအပ်နေလို့ ဟူသီတွေကို အကြမ်းဖက်အဖွဲ့အဖြစ် အမေရိကန်အစိုးရက သတ်မှတ်လိုက်ရင် အသက်ကယ်နေတဲ့ အကူအညီ တွေ ပြည်သူတွေဆီ မရောက်အောင် ဟန့်တာမှာကို ကူညီရေးလုပ်သားတွေက စိုးရိမ်နေကြပါတယ်။
5 months Ago

March 24, 2020

အေအေအဖွဲ့ကို အကြမ်းဖက်အုပ်စု၊ မတရားအသင်းအဖြစ်ကြေညာ

ရက္ခိုင်အမျိုးသားအဖွဲ့ချုပ် ( ယူအန်အေ)/ ရက္ခိုင့်တပ်တော် (အေအေ) လက်နက်ကိုင်အဖွဲ့ကို အကြမ်းဖက်အုပ်စုအဖြစ် မြန်မာနိုင်ငံအကြမ်းဖက်မှုတိုက်ဖျက်ရေးဗဟိုအဖွဲ့က ကြေညာလိုက်ပြီး မတရားအသင်းအဖြစ်လည်း ပြည်ထဲရေးဝန်ကြီးဌာနက  မတ်လ ၂၃ ရက်ညမှာ ထုတ်ပြန် ကြေညာလိုက်ပါတယ်။ United League of Arakan(UNA)၊  Arakan Army(AA) လက်နက်ကိုင်အဖွဲ့ဟာ ရခိုင်ပြည်နယ်မြောက်ပိုင်းက ပြည်သူတွေကိုစည်းရုံး၊ အကြောက်တရားနဲ့လွှမ်းမိုးပြီး ဒေသခံပြည်သူတွေကို အကာအကွယ်ရယူကာ တပ်မတော်စစ်ကြောင်းတွေ၊ မြန်မာနိုင်ငံရဲတပ်ဖွဲ့၀င်တွေနဲ့ လုံခြုံရေးစခန်းတွေကို တိုက်ခိုက်တာ၊ ကျေးရွာအုပ်ချုပ်ရေးမှူးတွေ၊ အစိုးရ၀န်ထမ်းတွေနဲ့ အပြစ်မဲ့အရပ်သားပြည်သူတွေကို ဖမ်းဆီး၊ သတ်ဖြတ်၊ နှိပ်စက်တာ၊ ကျေးရွာတွေအတွင်း ပစ်ခတ် မိုင်းထောင်ဖောက်ခွဲတာတွေလုပ်နေတယ်လို့ အကြမ်းဖက်မှု တိုက်ဖျက်ရေးဗဟိုအဖွဲ့ရဲ့ ထုတ်ပြန်ချက်မှာ ဖော်ပြပါတယ်။ အေအေလက်နက်ကိုင်အဖွဲ့ရဲ့ အကြမ်းဖက်မှုတွေဟာ အများပြည်သူ လုံခြုံရေး၊ အသက်အိုးအိမ်စည်းစိမ်ကို ထိခိုက်သလို အများပြည်သူနဲ့ ပုဂ္ဂလိကအတွက် အရေးကြီတဲ့ အခြေခံအဆောက်အအုံတွေ၊ နိုင်ငံပိုင်အဆောက်အအုံ၊ ယာဉ်၊ ပစ္စည်း၊ ကိရိယာနဲ့ အသုံးအ ဆောင်တွေကို  ပြင်းထန်စွာထိခိုက်ဆုံးရှုံးစေတယ်လို့လည်းဆိုပါတယ်။ ဒါ့အပြင် အေအေလက်နက်ကိုင်အဖွဲ့ဟာ ဥပဒေနဲ့အညီ တပ်မတော်အတွင်း မှတ်ပုံတင်ထားတဲ့ ရေယာဉ်၊ လေယာဉ်နဲ့ အခြားစက်တပ်ယာဉ်တွေပေါ်မှာ အကြမ်းဖက်မှုတွေ ကျုးလွန်နေတဲ့အပြင် နိုင်ငံတော်အတွင်း အခြေပြုကာ နိုင်ငံတော်ကို အကြမ်းဖက်မှုတွေ ကျုးလွန်နေတာကြောင့် အကြမ်းဖက်အုပ်စုအဖြစ် ကြေညာလိုက်တာလို့လည်း ထုတ်ပြန်ချက်မှာ ဖော်ပြပါတယ်။ အလားတူ  ပြည်ထဲရေးဝန်ကြီးဌာနကလည်း  အေအေအဖွဲ့နဲ့ အေအေလက်အောက်ခံ အဖွဲ့တွေကို မတရားအသင်းများ အက်ဥပဒေ ပုဒ်မ ၁၅ ၊ ပုဒ်မခွဲ (၂) နဲ့အညီ မတရားအသင်းအဖြစ် မတ်လ ၂၃ ရက်ညက သီးခြား ထုတ်ပြန် ကြေညာလိုက်ပါတယ်။ United League of Arakan(UNA)၊  Arakan Army(AA) လက်နက်ကိုင်အဖွဲ့နဲ့ အဖွဲ့ဝင်တွေရဲ့ ရည်ရွယ်ချက်နဲ့ လုပ်ရပ်တွေဟာ မြန်မာနိုင်ငံရဲ့ တရားဥပဒေစိုးမိုးရေး၊ နိုင်ငံတော် တည်ငြိမ်အေးချမ်းရေး၊ အများပြည်သူ အေးချမ်းသာယာရေးကို အနှောင့်အယှက် အန္တရာယ် ဖြစ်စေတယ်လို့ ယူဆတာကြောင့် မတရားသင်းအဖြစ် ကြေညာလိုက်တာလို့ ပြည်ထဲရေးဝန်ကြီး ဒု-ဗိုလ်ချုပ်ကြီး စိုးထွဋ် လက်မှတ်နဲ့ထုတ်ပြန်တဲ့ အမိန့်ကြော်ငြာစာမှာ ဖော်ပြပါတယ်။ 
1 year Ago
Up