အကြမ်းဖက်စစ်ခေါင်းဆောင်

September 23, 2021

အစိုးရချမ်းသာရန်မဟုတ်ဘဲ တိုင်းပြည်ချမ်းသာရန် ဆောင်ရွက်နေခြင်းဖြစ်ဟု အကြမ်းဖက်စစ်ခေါင်းဆောင်ပြော

အစိုးရချမ်းသာဖို့မဟုတ်ဘဲ တိုင်းပြည် ချမ်းသာဖို့အတွက် ဆောင်ရွက်နေခြင်းဖြစ်တယ်လို့ အာဏာသိမ်း အကြမ်းဖက်ခေါင်းဆောင် ဗိုလ်ချုပ်မှူးကြီး မင်းအောင်လှိုင်ကပြောကြားလိုက်ပါတယ်။

စက်တင်ဘာ ၂၂ ရက်က  နေပြည်တော်မှာကျင်းပတဲ့ ဘဏ္ဍာရေးဆိုင်ရာကော်မရှင် အစည်းအဝေးမှာ ပြောကြားခဲ့တာဖြစ်ပါတယ်။

စစ်ခေါင်းဆောင်က “တိုင်းဒေသကြီးနဲ့ ပြည်နယ်အစိုးရအဖွဲ့တွေအနေနဲ့ ခွင့်ပြုရန်ပုံငွေတွေကို ပြည်သူလူထုအတွက် အသုံးပြုဖို့လုပ်အပ်တယ်၊ မိမိတို့ဟာ နိုင်ငံရေးအစိုးရ မဟုတ်ပေမဲ့ ပကာသနကိုလျှော့ချကာ တိုင်းပြည်အတွက် လက်တွေ့အကျိုးရှိပြီး ပြည်သူလူထုကို တိုက်ရိုက်အကျိုးပြုမယ့် လုပ်ငန်းတွေကို ဆောင်ရွက်သွားဖို့ လိုအပ်ကြောင်း၊ မိမိတို့ ဆောင်ရွက်မှုတွေဟာ အစိုးရချမ်းသာရန်မဟုတ်ဘဲ တိုင်းပြည်ချမ်းသာရန်အတွက် ဆောင်ရွက်နေခြင်းဖြစ်တယ်” လို့ ပြောပါတယ်။

လက်ရှိ ၂၀၂၀-၂၀၂၁ ခု၊ ဘဏ္ဍာရေးနှစ်မှာ အခွန်ဝင်ငွေတွေ ကျဆင်းခဲ့ရသကဲ့သို့ နိုင်ငံပိုင်စီးပွားရေးလုပ်ငန်းတွေလည်း ဝင်ငွေကျဆင်းခဲ့ကြောင်း၊ မိမိတို့အနေနဲ့ အသုံးစရိတ်တွေ ခြိုးခြံချွေတာ စိစစ်သုံးစွဲကြဖို့၊ ပစ္စည်းဝယ်ယူရာမှာ ပြည်တွင်းကျပ်ငွေနဲ့ ဝယ်ယူနိုင်တဲ့ ပစ္စည်းတွေကို ကျပ်ငွေနဲ့သာ ဝယ်ယူပြီး နိုင်ငံခြားသုံးငွေသုံးစွဲမှုကို တတ်နိုင်သမျှ လျှော့ချဖို့လည်း စစ်ခေါင်းဆောင်က ပြောပါတယ်။ 

တင်ဒါလုပ်ငန်းတွေနဲ့ ပတ်သက်ပြီး  လက်သင့်ရာ မလုပ်ဆောင်ကြဖို့နဲ့ သတ်မှတ် စည်းမျဉ်းတွေအတိုင်းသာ ဆောင်ရွက်ကြဖို့၊  ပြည်ပချေးငွေနဲ့ ပတ်သက်ပြီး အရင်း၊ အတိုး ပြန်လည်ပေးဆပ်မှုတွေကို တာဝန်သိနိုင်ငံတစ်ခုအဖြစ် မပျက်မကွက် ပြန်လည် ပေးဆပ်ဖို့လည်း တိုက်တွန်းပြောသွားပါတယ်။

ကိုဗစ်-၁၉ ကပ်ရောဂါဆိုင်ရာအသုံးစရိတ်ကို အခု (၆) လ ဘဏ္ဍာရေး နှစ်မှာ အရေးပေါ်ရန်ပုံငွေကျပ် ၅၆ ဘီလီယံအပြင် ကိုဗစ်-၁၉ ကပ်ရောဂါ ဆိုင်ရာ အထူးရန်ပုံငွေတစ်ရပ်ကိုလည်း ကျပ် ဘီလီယံ ၁၀၀ လျာထား သုံးစွဲသွားနိုင်ဖို့ စီစဉ် ထားကြောင်းလည်း သိရပါတယ်။ 

ဘဏ္ဍာရေးဆိုင်ရာကော်မရှင် အစည်းအဝေးမှာ ၂၀၂၁ ခုနှစ်၊ အောက်တိုဘာလ (၁) ရက်မှ ၂၀၂၂ ခုနှစ်၊ မတ်လ (၃၁) ရက် အထိ (၆) လအတွက် ပြည်ထောင်စု၏အရအသုံး ခန့်မှန်းခြေ ငွေစာရင်းနဲ့ ပြည်ထောင်စုရဲ့ ဘဏ္ဍာငွေအရအသုံးဆိုင်ရာ ဥပဒေကြမ်းတို့ကို ဆွေးနွေး အတည်ပြုတာဖြစ်ပြီး ကာကွယ်ရေးဘတ်ဂျက်အပါအဝင် တိုင်းပြည်ရဲ့ တစ်စုံလုံးဘတ်ဂျက်အခြေအနေနဲ့ ပတ်သက်လို့ တော့ စစ်ကောင်စီက ပြည်သူလူထုကို ပွင့်လင်းမြင်သာစွာ ချပြခြင်းမရှိဘဲ ထိမ်ချန်လျှို့ဝှက်ထားပါတယ်။

ပြီးခဲ့တဲ့ အရပ်သားအစိုးရလက်ထက်က တိုင်းပြည်ရဲ့ဘတ်ဂျက်နဲ့ ပတ်သက်ပြီး လွှတ်တော်မှာ ဆွေးနွေးခဲ့ကြသလို  ဘဏ္ဍာရေးကော်မရှင်   ဥက္ကဋ္ဌဖြစ်တဲ့ နိုင်ငံတော်သမ္မတက တိုင်းပြည်ရဲ့ ဘတ်ဂျက်အသုံးစရိတ်ပမာဏနဲ့ ပတ်သက်ပြီး  ပွင့်လင်းမြင်သာပြည်သူတွေကို ချပြခဲ့ပါတယ်။ 

စစ်တပ်အာဏာသိမ်းပြီးနောက် မြန်မာနိုင်ငံရဲ့ ဘဏ္ဍာရေးနှစ်ကို ၂၀၂၂-၂၀၂၃ ခု၊ ဘဏ္ဍာရေးနှစ်ကစပြီး ဧပြီလ (၁) ရက်မှ မတ်လ (၃၁) ရက်အထိ ပြောင်းလဲပြင်ဆင် သတ်မှတ်လိုက်ပြီး   ကူးပြောင်းချိန်အဖြစ် ၂၀၂၂ ခုနှစ်၊ မတ်လ (၃၁) ရက်အထိ (၆) လတာကာလ သတ်မှတ်ထားတာဖြစ်ပါတယ်။

ဒါ့အပြင် စက်တင်ဘာ ၂၂ ရက်မနက်က ကျင်းပတဲ့ နောက်ထပ်အစည်းအဝေးတခုဖြစ်တဲ့    အမျိုးသားစီမံကိန်းကော်မရှင်အစည်းအဝေးမှာလည်း တိုင်းပြည်ရဲ့ စီးပွားရေး ဆက်လက်ကျဆင်းနေတယ်လို့ အာဏာသိမ်း စစ်ခေါင်းဆောင်က ဝန်ခံပြောသွားပါတယ်။    

“မိမိတို့နိုင်ငံ၏ စီးပွားရေးအခြေအနေကို ပြန်လည်သုံးသပ်ရမည်ဆိုပါက ၂၀၂၀ ပြည့် နှစ်၊ မတ်လတွင် စတင်ဖြစ်ပွားခဲ့သည့် ကိုဗစ်-၁၉ ကူးစက်ရောဂါကြောင့် ခရီးသွားလုပ်ငန်း အပါအဝင် ဝန်ဆောင်မှုလုပ်ငန်းများ၊ အသေးစား၊ အလတ်စားလုပ်ငန်းများနှင့် အချို့သော ကုန်ထုတ်လုပ်မှု လုပ်ငန်းများရပ်ဆိုင်းခြင်း၊ လုပ်ငန်းစွမ်းဆောင်ရည်ကျဆင်းခြင်း ဖြစ်ပေါ်ခဲ့ သည့်အတွက် ၂၀၁၉-၂၀၂၀ ဘဏ္ဍာရေးနှစ်၊ တတိယ (၃) လပတ်မှ စတင်ကာ နိုင်ငံ၏ စီးပွားရေးကျဆင်းမှု ဖြစ်ပေါ်လာခဲ့ပြီး ယခု ၂၀၂၀-၂၀၂၁ ဘဏ္ဍာရေးနှစ် ပထမ (၆) လပတ် အထိ စီးပွားရေးအခြေအနေ ဆက်လက်ကျဆင်းလျက်ရှိသည်ကို သုံးသပ်ပြောကြားလိုကြောင်း” စစ်ခေါင်းဆောင်က ပြောပါတယ်။

တိုင်းပြည်ကို ဖွံ့ဖြိုးမှုအနည်းဆုံးနိုင်ငံ (LDC) အဖြစ်မှ လွတ်မြောက်ဖို့အတွက် သတ်မှတ်ထားတဲ့ စံနှုန်းတွေ ဆက်လက်ပြည့်မီရေး ကိုလည်း စီမံကိန်းတွေ၊ လုပ်ငန်းစဉ်တွေနဲ့ ချိတ်ဆက်အကောင်အထည်ဖော် ဆောင်ရွက် သွားကြဖို့လည်း စစ်ခေါင်းဆောင်က ပြောသွားပါတယ်။

Photo- DSINFO

3 days Ago

September 19, 2021

အကြမ်းဖက်စစ်ခေါင်းဆောင် ပူတာအိုခရီးပျက်၊ ကချင်မြေမှ ထွက်သွားရန် မောင်းထုတ်ဆန္ဒပြခံရ

အာဏာသိမ်း အကြမ်းဖက်စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်ရဲ့   ကချင် ပြည်နယ်ခရီးစဉ်ဟာ ပြီးဆုံးသွားခဲ့ကာ ပူတာအိုခရီးစဉ်လည်း မသွားဖြစ်တော့ဘဲ ဖျက်သိမ်းသွားတယ်လို့  စစ်တပ်နဲ့နီးစပ်တဲ့ ပူတာအိုဒေသခံတစ်ဦးက ပြောပါတယ်။

အကြမ်းဖက် ခေါင်းဆောင်ဟာ စက်တင်ဘာ ၁၉ ရက် ဒီကနေ့မှာ ပူတာအိုကို ခရီးဆက်ဖို့ စီစဉ်ခဲ့ပေမဲ့ လုံခြုံရေးကိုအကြောင်းပြကာ ခရီးစဉ်ဖျက်သိမ်းခဲ့တာဖြစ်နိုင်တယ်လို့လည်း ဆိုပါတယ်

အာဏာသိမ်းစစ်ခေါင်းဆောင်ဟာ စက်တင်ဘာ ၁၈ ရက်ကတည်းက ကချင်ပြည်နယ်ကို ပထမဆုံးအကြိမ် ရောက်ရှိလာတာဖြစ်ပြီး ခရီးစဉ်အတွင်းမှာ ဒေသခံကျောင်းသားလူငယ်တွေက အကြမ်းဖက်စစ်ခေါင်းဆောင်  ကချင်မြေကနေ ထွက်သွားဖို့ မောင်းထုတ်ဆန္ဒပြတာနဲ့ ကြုံတွေ့ခဲ့ရတယ်။

လုံခြုံရေးတွေ တင်းတင်းကြပ်ကြပ်ချထားတဲ့ကြားကပဲ   မြစ်ကြီးနားမြို့ အထင်ကရ နေရာများမှာ ကချင်လူငယ်တွေနဲ့ ကျောင်းသားသမဂ္ဂ လူငယ်တွေက ဆန္ဒပြကြတာ ဖြစ်ပါတယ်။ ပြောက်ကျားသပိတ် ပြုလုပ်တဲ့ လူငယ်တွေက "အကြမ်းဖက်စစ်ခေါင်းဆောင် မင်းအောင်လှိုင်အား ကချင်ပြည်သူတွေ မကြိုဆိုကြောင်းနဲ့ ကချင်မြေက ခုထွက်သွား... သွေးကြွေးမှာဆွေးနွေးစရာမရှိ၊ ကချင်မြေဟာ တပ်ပိုင်မြေမဟုတ်"စတဲ့ စာသားတွေပါတဲ့ ပိုစတာတွေ ကိုင်ပြီး ဆန္ဒပြကြပါတယ်။    

ကချင်လွတ်မြောက်ရေးတပ်မတော် (ကေအိုင်အေ)အနေကလည်း အကြမ်းဖက်ခေါင်းဆောင်ရဲ့ ကချင်ပြည်နယ်ခရီးစဉ်အတောအတွင်းမှာ မြစ်ကြီးနား-ပူတာအိုကားလမ်းကို ယာယီပိတ်ထားခဲ့ ပြီးနောက် အကြမ်းဖက်ခေါင်းဆောင်ဟာ ရှမ်းပြည်ဘက်ကို ခရီးဆက်သွားပြီဖြစ်ကြောင်း သိရပါတယ်။

စစ်ကောင်စီခန့် ကချင်ပြည်နယ်၀န်ကြီးချုပ် ဦးခက်ထိန်နန်က  အာဏာသိမ်းစစ်ခေါင်းဆောင်   ကချင်အမျိုးသား ရိုးရာဝတ်စုံ၊  ခေါင်းပေါင်း၊ ဓားနဲ့ လွယ်အိတ် ဂုဏ်ပြုလက်ဆောင်ပေးအပ်ခဲ့တဲ့ အတွက်လည်း ကချင်တိုင်းရင်းသားတွေက ရှုတ်ချကန့်ကွက်ဝေဖန်နေကြပါတယ်။ 

အာဏာသိမ်းပြီးနောက် တိုင်းပြည် နိုင်ငံရေး၊ စီးပွားရေး။ လူမှုရေး၊ ကိုဗစ် ကပ်ဘေး  ဘာတခုမှ အောင်မြင်အောင် မဆောင်ရွက်နိုင်တဲ့ စစ်ကောင်စီခေါင်းဆောင်က  စက်တင်ဘာ ၁၈ ရက်မနက်ပိုင်း ၊ မြစ်ကြီးနားတပ်နယ်ရှိ အရာရှိ၊ စစ်သည်၊ မိသားစုတွေနဲ့ တွေ့ဆုံစဉ်  အန်အယ်လ်ဒီအစိုးရလက်ထက်မှာ တိုင်းပြည်ရဲ့ နိုင်ငံရေး၊ စီးပွားရေး၊ လူမှုရေး၊ ဘက်ပေါင်းစုံမှာ ထိုက်သင့်သလောက် တိုးတက်မှုများ မဖြစ်ပေါ်ခဲ့ကြောင်း ပြောကြားခဲ့ပါတယ်။

7 days Ago

အန်အယ်လ်ဒီအစိုးရလက်ထက် ဘက်ပေါင်းစုံတိုးတက်မှုမရှိခဲ့ဟု အကြမ်းဖက်စစ်ခေါင်းဆောင် ဝေဖန်

အန်အယ်လ်ဒီအစိုးရလက်ထက်မှာ တိုင်းပြည်ရဲ့ နိုင်ငံရေး၊ စီးပွားရေး၊ လူမှုရေး၊ ဘက်ပေါင်းစုံမှာ ထိုက်သင့်သလောက် တိုးတက်မှုများ မဖြစ်ပေါ်ခဲ့ကြောင်း အာဏာသိမ်းအကြမ်းဖက် စစ်ခေါင်းဆောင်က ပြောကြားလိုက်ပါတယ်။

စက်တင်ဘာ ၁၈ ရက်မနက်က  ကချင်ပြည်နယ်၊ မြစ်ကြီးနားမြို့၊ မြစ်ကြီးနားတပ်နယ်ရှိ အရာရှိ၊ စစ်သည်၊ မိသားစုတွေကို တိုင်းစစ်ဌာနချုပ် ဗလမင်းထင် ခန်းမမှာတွေ့ဆုံစဉ်  အာဏာသိမ်း စစ်ခေါင်းဆောင်  ဗိုလ်ချုပ်မှူးကြီး မင်းအောင်လှိုင်က ပြောသွားတာပါ။ 

စစ်ခေါင်းဆောင်က “၂၀၁၅ ခုနှစ် ပါတီစုံဒီမိုကရေစီရွေးကောက်ပွဲတွင် အစိုးရသစ်တစ်ရပ်တက်လာခဲ့ပြီး ၅ နှစ်တာ သက်တမ်းအုပ်ချုပ်ခဲ့ရာတွင် အစိုးရ၏လုပ်ဆောင်ချက်များအပေါ်တွင် ဝေဖန် ပြောဆိုမှုများ၊ ဝေဖန်ထောက်ပြမှုများ များစွာဖြစ်ပေါ်ခဲ့ပြီး တိုင်းပြည်၏ နိုင်ငံရေး၊ စီးပွားရေး၊ လူမှုရေး၊ ဘက်ပေါင်းစုံတွင် ထိုက်သင့်သလောက် တိုးတက်မှုများ မဖြစ်ပေါ် ခဲ့ကြောင်း၊ ပြည်သူလူထုအနေဖြင့် မိမိတို့ရွေးခြယ်ထားသည့် အစိုးရ၏ လုပ်ဆောင်ချက် များအပေါ်တွင် အားမလိုအားမရဖြစ်ခဲ့ပြီး မျှော်မှန်းသကဲ့သို့ ဖြစ် မလာသည့်အတွက် ရွေးကောက်ပွဲအပေါ်စိတ်ပျက်လာပြီး မဲမပေးရေးလှုပ်ရှားမှု (No Vote) များဖြစ်ပေါ်လာခဲ့ သည်ကိုတွေ့ရှိရကြောင်း” ပြောပါတယ်။

သမ္မတ ဦးသိန်းစိန် လက်ထက်မှာတော့ နိုင်ငံတော်ဟာ ဒီမိုကရေစီပြုပြင်ပြောင်းလဲမှုတွေ၊ နိုင်ငံရေး၊ စီးပွားရေး၊ လူမှုရေး၊ နိုင်ငံတကာ ဆက်ဆံရေးနဲ့  ကဏ္ဍပေါင်းစုံမှာ တိုးတက်ပြောင်းလဲမှုများ လုပ်ဆောင်နိုင်ခဲ့ပေမဲ့ စိန်ခေါ်မှုတွေနဲ့လည်း  ရင်ဆိုင်ခဲ့ရကြောင်း စစ်ခေါင်းဆောင်က ပြောပါတယ်။

တပ်မတော်သားမိသားစုတွေကို အဆင့်နဲ့လျော်ညီတဲ့  လစာ၊ ရိက္ခာနဲ့ ရပိုင်ခွင့်တွေကို လုပ်ဆောင်ပေးထားပြီး ဖြစ်လို့  မိမိဘဝတိုးတက်ရေးကို ထိခိုက်စေနိုင်တဲ့ အရက်၊ ဆေးလိပ်၊ ကွမ်းယာတို့ကို သုံးစွဲတာ၊ ဝင်ငွေ၊ ထွက်ငွေ မျှတအောင် သုံးစွဲနိုင်မှုမရှိခြင်းတို့ကို ကိုယ်ပိုင်အသိစိတ်မနဲ့ ဆင်ခြင်ထိန်းသိမ်း ဆောင်ရွက်ကြဖို့လည်း စစ်ခေါင်းဆောင်က တိုက်တွန်း သွားပါတယ်။

Photo-DSINFO

1 week Ago
More News
Up