အကြမ်းဖက်စစ်ကောင်စီတပ်

July 20, 2021

ပေါက်မြို့နယ် ကြည့်ငိုတောင်အနီး မိုင်းနင်းမိသဖြင့် စစ်ကောင်စီတပ်သား ၁၂ ဦးခန့် သေဆုံး

မကွေးတိုင်းဒေသကြီး ပေါက်မြို့နယ် ကြည့်ငိုတောင်အနီးမှာ ဇူလိုင် ၁၉ ရက်နေ့ညက မိုင်းနင်းမိပြီး စစ်ကောင်စီတပ်သား ၁၂ ယောက်လောက် သေဆုံးခဲ့တယ်လို့ ပေါက်မြို့နယ် PDF အဖွဲ့ကနေ သိရပါတယ်။

ပေါက် PDF အဖွဲ့က ကြည့်ငိုတောင်အနီးမှာ မိုင်းထောင်ထားတဲ့ဟာကို စစ်ကောင်စီတပ်ဖွဲ့က နင်းမိပေါက်ကွဲခဲ့တာဖြစ်ပြီး ထိခိုက်ဒဏ်ရာရသူတွေလည်းရှိတယ်လို့ PDF အဖွဲ့ တာဝန်ရှိသူတစ်ယောက်က DVB ကို ပြောပါတယ်။

ပေါက်မြို့နယ်မှာ စစ်ကောင်စီတပ်ဖွဲ့ဝင်တွေကို PDF အဖွဲ့က မိုင်းထောင်တိုက်ခိုက်နေတာဖြစ်ပြီး ၂ ရက်အတွင်း ၅၆ ယောက် သုတ်သင်နိုင်ခဲ့တယ်လို့ ဆိုပါတယ်။

ပေါက်မြို့နယ်တောင်ပိုင်းက ကင်းမရွာကို ပြီးခဲ့တဲ့ ဇွန်လ ၁၅ ရက်နေ့က အကြမ်းဖက်စစ်အုပ်စုတွေ မီးရှို့ခဲ့တာကြောင့် အိမ်ခြေ ၂၀၀ လောက် မီးလောင်ဆုံးရှုံးခဲ့ပြီး သက်ကြီးဘိုးဘွားနှစ်ယောက်နဲ့ အိမ်မွေးတိရစ္ဆာန်တွေ အသက်ဆုံးရှုံးခဲ့တယ်လို့ သိရပါတယ်။

2 weeks Ago

July 12, 2021

ကနီတွင် လက်ပြန်ကြိုးတုပ် ပစ်သတ်ခံထားရသည့် စစ်ရှောင်ပြည်သူအလောင်း ၁၄ လောင်းတွေ့ရှိ

စစ်ကိုင်းတိုင်း၊ ကနီမြို့နယ်အတွင်းမှာ  စစ်ကောင်စီတပ်က လက်ပြန်ကြိုးတုပ်ကာ သေနတ်နဲ့ ပစ်သတ်ထားတဲ့ စစ်ဘေးရှောင်ပြည်သူအလောင်း ၁၄ လောင်းတွေ့ရှိခဲ့တယ်လို့ လူမှုကူညီကယ်ဆယ်ရေးလုပ်ကိုင်ပေးနေသူတွေဆီက သိရပါတယ်။

ကနီမြို့နယ် ယင်းကျေးရွာနဲ့ အနီးအနားက ကျေးရွာသားတချို့ဟာ စစ်ကောင်စီတပ်တွေ ဇူလိုင် ၉ ရက်‌နေ့မှာ ရွာထဲ ဝင်ရောက်လာတာကြောင့် နေအိမ်တွေကို စွန့်ခွာပြီး တောတောင်‌တွေထဲ သွားရောက်ပုန်းရှောင်နေကြတာပါ။ 

အဲဒီလို ပုန်းရှောင်ရာနေရာကို စစ်ကောင်စီတပ်တွေက ဇူလိုင် ၁၀ ရက်နေ့မှာ တောနင်းရှာဖွေပြီး အပြစ်မဲ့ရွာသားတွေကို ဖမ်းဆီးခေါ်ဆောင်ကာ သတ်ဖြတ်ခဲ့တာဖြစ်ပြီး ဒီနေ့မှ အလောင်းတွေ ပြန်တွေ့တာလို့ လူမှုကူညီကယ်ဆယ်ရေးလုပ်ကိုင်ပေးနေသူတစ်ဦးက ပြောပါတယ်။

 “ကျနော်တို့ ရှာဖွေမှုတွေကို ဇူလိုင်  ၁၁ ရက်နေ့ကနေ ရှာဖွေတာ ပထမရက်က ၃ လောင်း၊ ဒီနေ့က ၁၁ လောင်း စုစုပေါင်း ၁၄ လောင်းရှိနေပြီဗျ။ ကျနော်တို့တွေ့ရှိရတဲ့ အလောင်းတွေက လက်တွေကို နောက်ပြန်ကြိုးတုပ်ပြီး ရိုက်နှက်ကာ သေနတ်နဲ့ ပစ်သတ်ခံရတယ်လို့ ထင်တယ်ဗျ။ ခေါင်းပွင့်ထွက်ဒဏ်ရာတွေနဲ့ဗျာ။ ဒီကောင်တွေ သတ်ပြီးတဲ့ အလောင်းတွေကို တောထဲက ချုံကြိုချုံကြား၊ ချောက်ကြိုချောက်ကြား ပစ်ချထားခဲ့ကြတာ။ အခုတွေ့ရှိတဲ့ အလောင်းတွေက သူတို့ကို ကြောက်လို့ တောထဲမှာပုန်းနေတဲ့ အပြစ်မဲ့ရွာသားတွေပါ။ ဘာလက်နက်မှ မရှိကြပါဘူး။ တကယ်ကို ရင်နာစရာကောင်းတယ်ဗျ” လို့ ပြောပါတယ်။

ကနီမြို့ ယင်းကျေးရွာနဲ့ အနီးနားက ရွာသားတွေဟာ စစ်ကောင်စီတပ်တွေရဲ့ ဖမ်းဆီးသတ်ဖြတ်တာကို ခံရမှာ ကြောက်ရွံ့နေကြတယ်လို့ ဆိုပါတယ်။

သေဆုံးသူတွေဟာ စစ်ကောင်စီတပ်တွေက အပြစ်မဲ့ ဖမ်းဆီးခေါ်ဆောင်သွားတဲ့ ၁၉ ယောက်ထဲက‌ ၁၄ ယောက် ဖြစ်တယ်လို့ သိရပါတယ်။

3 weeks Ago

ပြည်မြို့အဝေးပြေးကားဂိတ်အနီး စတိုးဆိုင်ပိုင်ရှင် အမျိုးသားတစ်ဦးကို စစ်ကောင်စီတပ်က ဖမ်းဆီး

ပဲခူးတိုင်းအနောက်ခြမ်း၊ ပြည်မြို့ ခေတ္တရာအဝေးပြေးကားဂိတ်အနီး အင်္လကာစတိုးဆိုင်မှာ ဇူလိုင် ၁၁ ရက်နေ့ နေ့လယ်ပိုင်းက အမျိုးသားတစ်ဦးကို စစ်ကောင်စီတပ်ဖွဲ့ဝင်တွေ လာရောက်ဖမ်းဆီးခေါ်ဆောင်သွားခဲ့တယ်လို့ သိရပါတယ်။

ဖမ်းဆီးခံရသူမှာ အသက် ၂၉ နှစ်အရွယ် ကိုမြတ်မင်းဦးဆိုသူဖြစ်ပြီး အဝေးပြေးကားဂိတ်အနီးက သူရဲ့ အင်္လကာစတိုးဆိုင်မှာ စစ်သား ၂ ယောက်၊ အရပ်ဝတ်နဲ့ လူ ၄ ယောက် နာမည်နဲ့တကွ မေးမြန်းစရာရှိတယ်ဆိုပြီး လာခေါ်သွားခဲ့တာလို့ မိသားစုနဲ့ နီးစပ်သူတဦးက ပြောပါတယ်။

“နာမည်နဲ့လာဖမ်းတာ၊ အမှတ် ၅ ကျောင်းထဲခေါ်သွားမယ်ဆိုပြီး ခေါ်သွားတာ။ သူ့မိသားစုတွေ လိုက်သွားတော့ အဲဒီမှာမရှိတော့ဘူးတဲ့ ဒကစ(စစ်တပ်) ကို ခေါ်သွားပြီလို့ ပြောတယ်တဲ့။ ဘာ့ကြောင့် လာဖမ်းတယ်လည်း မပြောဘဲ ဒီအတိုင်းမေးစရာရှိတယ်ဆိုပြီး ခေါ်သွားတာ။ သူတို့ မိသားစုတွေ အခုအရမ်းစိတ်ပူနေကြတယ်။ ပြောတုန်းက တနေရာ တကယ်ခေါ်သွားတော့ တနေရာဖြစ်နေတော့ စိတ်ပူမှာပေ့ါ။”

ဖမ်းဆီးခံရပြီးနောက် ညနေ ၅ နာရီလောက်မှာလည်း စစ်သား ၂ ယောက်နဲ့ အရပ်ဝတ် ၅ ယောက် ထပ်မံရောက်ရှိလာပြီး ဆိုင်အတွင်း ထပ်မံရှာဖွေတာတွေ ပြုလုပ်ခဲ့သွားတယ်လို့ သိရပါတယ်။

3 weeks Ago
More News
Up