အကြမ်းဖက်စစ်ကောင်စီ

July 21, 2021

ဦးဉာဏ်ဝင်း ကျဆုံးမှု ဝမ်းနည်းကြောင်းထုတ်ပြန်၊ အကြမ်းဖက်စစ်ကောင်စီတွင် အပြည့်အဝ တာဝန်ရှိဟု CRPH ပြော

ပြည်ထောင်စုဥပဒေအထောက်အကူပေးရေးအဖွဲ့ဥက္ကဋ္ဌ၊ အမျိုးသားဒီမိုကရေစအဖွဲ့ချုပ် ဗဟိုအလုပ်အမှုဆောင်အဖွဲ့အတွင်းရေးမှူးအဖွဲ့ဝင် ဦးဉာဏ်ဝင်း ကျဆုံးခဲ့မှုနဲ့ ပတ်သက်ပြီး ပြည်ထောင်စုလွှတ်တော်ကိုယ်စားပြုကော်မတီ (CRPH) က ဝမ်းနည်းကြောင်း သဝဏ်လွှာထုတ်ပြန်လိုက်ပြီး ဒီကိစ္စအတွက် အကြမ်းဖက်စစ်ကောင်စီမှာ အပြည့်အဝ တာဝန်ရှိတယ်လို့ ပြောလိုက်ပါတယ်။

ဦးဉာဏ်ဝင်းဟာ ပြီးခဲ့တဲ့ ဖေဖော်ဝါရီ ၁ ရက်နေ့ကတည်းက အကြမ်းဖက်စစ်ကောင်စီရဲ့ မတရားဖမ်းဆီးထိန်းသိမ်းတာကို ခံခဲ့ရပြီး အင်းစိန်ထောင်အတွင်းမှာ ကိုဗစ်-၁၉ ရောဂါပိုးကူးစက်ခံခဲ့ရတာ ဖြစ်ပါတယ်။

အဲဒီနောက် လုံလောက်တဲ့ ဆေးဝါးကုသမှု မပေးတာကြောင့် အင်းစိန်ထောင်ကတဆင့် ရန်ကုန်ပြည်သူ့ဆေးရုံကြီးကို ပို့ဆောင်ဆေးကုသမှုခံယူခဲ့ပြီး မနေ့က ဇူလိုင် ၂၀ ရက်နေ့မှာ ကွယ်လွန်သွားခဲ့တာဖြစ်ပါတယ်။

တရက်တည်းမှာပဲ ရန်ကုန်တိုင်းဒေသကြီး၊ လှိုင်သာယာမြို့နယ်အနောက်ပိုင်း အမျိုးသားဒီမိုကရေစီအဖွဲ့ချုပ်ပါတီ (NLD) အလုပ်အမှုဆောင်အဖွဲ့ဝင် ဦးဝင်းကြိုင်ဟာလည်း အင်းစိန်အကျဉ်းထောင်တွင်း ထိန်းသိမ်းခြင်း ခံထားရချိန်အတွင်းမှာပဲ ကိုဗစ်-၁၉ ရောဂါ ကူးစက်ခံခဲ့ရပြီး ကျဆုံးသွားခဲ့တယ်လို့ သိရှိရပါတယ်။

ဒါကြောင့်မို့ ယုံကြည်ချက်ကြောင့် အကျဉ်းကျခံခဲ့ရတဲ့ နိုင်ငံရေးအကျဉ်းသားတွေကို လုံလောက်တဲ့ ကျန်းမာရေးစောင့်ရှောက်မှုပေးဖို့ ပျက်ကွက်တဲ့အတွက် အကြမ်း ဖက် စစ်ကောင်စီအနေနဲ့ အဆိုပါကိစ္စရပ်တွေအတွက် တာဝန်အပြည့်ယူရမှာဖြစ်တယ်လို့ CRPH က ဆိုပါတယ်။

ကွယ်လွန်သွားခဲ့တဲ့ ဦးဉာဏ်ဝင်းရဲ့ မိသားစုနဲ့ ထပ်တူဝမ်းနည်းကြေကွဲရကြောင်းနဲ့ မပြီးဆုံးသေးတဲ့ စစ်အာဏာရှင်စနစ်ကျဆုံးရေးနဲ့ ဖက်ဒရယ်ဒီမိုကရေစီပြည်ထောင်စု တည်ဆောက်ရေးတို့အတွက် ဆက်လက်တိုက်ပွဲဝင်သွားမယ်လို့လည်း ကတိပြုပါကြောင်း သဝဏ်လွှာထဲမှာ ဖော်ပြပါတယ်။

မြန်မာနိုင်ငံမှာ မတရားအာဏာသိမ်းကာလ ၅ လခွဲကျော်အကြာ အာဏာသိမ်း စစ်ကောင်စီတပ်ရဲ့ ပစ်ခတ်သတ်ဖြတ်မှုကြောင့် နိုင်ငံရေးအကျဉ်းသားတွေအပါအဝင် အပြစ်မဲ့ ကျဆုံးပြည်သူ ၉၂၂ ယောက်ထိ ရှိလာခဲ့ပြီလို့ နိုင်ငံရေးအကျဉ်းသားများ ကူညီစောင့် ရှောက်ရေးအသင်း(အေအေပီပီ)က ထုတ်ပြန်ထားပါတယ်။

4 days Ago

July 13, 2021

ကိုဗစ်-၁၉ ကို လက်နက်သဖွယ် အသုံးချနေသည့် စစ်ကောင်စီကို NUG သတိပေး

လတ်တလော နိုင်ငံတဝန်း ကူးစက်ပျံ့နှံ့မှုတွေ မြင့်တက်နေတဲ့ ကိုဗစ်-၁၉ ရောဂါကို လက်နက်သဖွယ် အသုံးချနေတဲ့ အာဏာသိမ်းစစ်ကောင်စီကို အမျိုးသားညီညွတ်ရေးအစိုးရ (NUG) က သတိပေးစာ ထုတ်ပြန်လိုက်ပါတယ်။

အမျိုးသားညီညွတ်ရေးအစိုးရ၊ အမျိုးသားအဆင့် ကိုဗစ်-၁၉ ကာကွယ်၊ ထိန်းချုပ်၊ ကုသရေးကော်မရှင်၊ အတွင်းရေးမှူး ဒေါက်တာဇော်ဝေစိုးက ဇူလိုင် ၁၃ ရက်စွဲနဲ့ လက်မှတ်ရေးထိုးထုတ်ပြန်လိုက်တာဖြစ်ပြီး အကျဉ်းထောင်တွေမှာ ရောဂါကူးစက်ပြန့်ပွားသေဆုံးမှုတွေ ဖြစ်ပွားနေတဲ့ ကိစ္စနဲ့ပတ်သက်ပြီး စစ်ကောင်စီကို ပြင်းပြင်းထန်ထန် သတိပေးလိုက်တာပါ။

မြန်မာနိုင်ငံတဝှမ်း ကိုဗစ်-၁၉ ရောဂါဖြစ်ပွား၊ သေဆုံးမှုတွေ ကြောက်ခမန်းလိလိ ဖြစ်ပွားနေချိန်မှာ စစ်ကောင်စီက လူသားချင်းစာနာ ထောက်ထားမှုမရှိဘဲ မိမိအာဏာတည်မြဲရေး ကိုသာရှေးရှုပြီး ပြည်သူလူထုကို ဖိနှိပ်ရာမှာ ကိုဗစ်-၁၉ ရောဂါကို လက်နက်သဖွယ် အသုံးချနေတာကို တွေ့မြင်နေရတဲ့အပြင် လူ့အခွင့်အရေးတရပ်ဖြစ်တဲ့ လူတိုင်းလွတ်လပ်စွာ ဆေးကုသ ပိုင်ခွင့်ကိုလည်း နည်းမျိုးစုံနဲ့ ပိတ်ပင်တားဆီးနေတာကို သက်သေသာဓက အမြောက်အမြားနဲ့တကွ တွေ့ရှိနေရကြောင်းလည်း ဖော်ပြထားပါ တယ်။

ပြည်သူလူထုအနေနဲ့ “ပြေးစရာ မြေမရှိ” ဆိုသလို စိတ်ဓာတ်လုံခြုံမှုမရှိဘဲ နေ့စဉ်နဲ့အမျှ စိတ်ရောကိုယ်ပါ ပင်ပန်းဆင်းရဲကြီးစွာ ခံစားနေရတာတွေကိုလည်း ကြားသိနေရပြီး ဒီ့ထက်ပိုဆိုးတာကတော့ အကျဉ်းထောင်တွေထဲမှာ ကိုဗစ်-၁၉ ရောဂါဖြစ်ပွား၊ ကူးစက်၊ သေဆုံးမှုနှုန်းတွေဟာ စိုးရမ်ဖွယ်ရာကောင်းလောက်အောင် မြင့်တက်နေတာကို ခိုင်လုံတဲ့ သတင်းရင်းမြစ်တွေကတဆင့် သိရှိရတယ်လို့ ဆိုပါတယ်။

အထူးသဖြင့် မတရား ဖမ်းဆီးထိန်းသိမ်းခံထားရတဲ့ နိုင်ငံရေးအကျဉ်းသားတွေကို ကိုဗစ်-၁၉ ရောဂါကူးစက်ပြီး ထိခိုက်သေဆုံးစေဖို့ စစ်ကောင်စီက ရည်ရွယ်ချက်ရှိရှိ လုပ်ဆောင်နေတဲ့အတွက် နိုင်ငံအကျဉ်းသားတွေအနေနဲ့ ရောဂါကူးစက်မှုကြောင့် ထိခိုက်သေဆုံးမှုတွေ မဖြစ်ပွားစေဖို့နဲ့ လုံလောက်တဲ့ ကျန်းမာရေးစောင့်ရှောက်မှုတွေ ခံယူရရှိနိုင်စေဖို့၊ နိုင်ငံရေးအကျဉ်းသားအားလုံးကို ခြွင်းချက်မရှိ ချက်ချင်းလွှတ်ပေးဖို့လည်း NUG က သတိပေးထားပါတယ်။

အဲဒီလိုမဟုတ်ရင်တော့ ဖြစ်ပေါ်လာတဲ့ အကျိုးဆက်တွေအားလုံးကို အကြမ်းဖက် စစ်ကောင်စီက တာဝန်ယူရမှာဖြစ်ပြီး လူမဆန်တဲ့ အဆိုပါလုပ်ရပ်တွေအတွက် ပြည်သူ့ဆန္ဒအရ တရားဥပဒေနဲ့အညီ ပြင်းပြင်းထန်ထန် အရေးယူဆောင်ရွက်သွားမယ်လို့ ထုတ်ပြန်ချက်ထဲမှာ ဖော်ပြပါတယ်။

မြန်မာနိုင်ငံမှာ ပထမဆုံးသော ကိုဗစ်-၁၉ အတည်ပြုလူနာကိုတော့ ပြီးခဲ့တဲ့ ၂၀၂၀ ပြည့်နှစ်၊ မတ် ၂၃ ရက်ကစတင်တွေ့ရှိခဲ့တာဖြစ်ပြီး ပြီးခဲ့တဲ့ ဇန်နဝါရီ ၂၇ ရက်မှာတော့ အာဆီယံနိုင်ငံတွေထဲ အစောဆုံး ကာကွယ်ဆေးထိုးနှံတဲ့နိုင်ငံ ဖြစ်လာခဲ့ပါတယ်။

ခုရက်ပိုင်းတွေမှာ ရောဂါကူးစက်မှုဟာ နေ့စဉ်ရက်ဆက် ခပ်စိပ်စိပ်ဖြစ်နေခဲ့ပြီး မျိုးရိုးဗီဇကွဲ ကိုဗစ်-၁၉ ရောဂါပိုး ၃ မျိုး စစ်ဆေးတွေ့ရှိခဲ့ကြောင်းလည်း ဇွန် ၁၅ ရက်နေ့က ကြေညာထားခဲ့တာပါ။

ပြီးခဲ့တဲ့ ဇွန်လ ၃ ရက်နေ့ ကာကွယ်ရေးဝန်ကြီးဌာန၊ ဆေးသုတေသနစင်တာမှ စစ်ဆေးတဲ့ ဓာတ်ခွဲစစ်ဆေးချက်အဖြေအရ ကိုဗစ်-၁၉ မျိုးရိုးဗီဇ ပြောင်းလဲတဲ့ ပိုးတွေ့ရှိသူ ၁၁ ဦးရှိတယ်လို့ ဆိုပါတယ်။

လတ်တလောမှာတော့ ရောဂါကူးစက်မှုတွေ မြင့်တက်နေတာကြောင့် နိုင်ငံတဝန်း စာသင်ကျောင်းတွေ ပိတ်ထားဖို့ စစ်ကောင်စီက ကြေညာထားတဲ့အပြင် ပိုးတွေ့နှုန်းများ တဲ့ မြို့နယ်တွေကိုလည်း Stay At Home မြို့နယ်တွေအဖြစ် ကန့်သတ်ထားပြီး ရောဂါကူး စက်ခံရမှု အဆိုးဝါးဆုံး အခြေအနေတွေနဲ့အတူ အောက်ဆီဂျင်လိုအပ်တဲ့ ပြဿနာတွေနဲ့ လိုအပ်ချက်တွေ ရှိလာနေတာ ဖြစ်ပါတယ်။

မြန်မာနိုင်ငံမှာ လတ်တလော အချိန်ထိ ကိုဗစ်-၁၉ အတည်ပြု လူနာစုစုပေါင်း ၁ သိန်း ၉ သောင်းကျော်လာခဲ့ပြီဖြစ်ကာ သေဆုံးသူ ၃၉၀၀ ကျော်နဲ့ အာဆီယံနိုင်ငံတွေထဲမှာ ရောဂါ ကူးစက်ခံရပြီး သေဆုံးမှုအများဆုံး ၃ နိုင်ငံထဲမှာ ပါဝင်နေပါတယ်။

2 weeks Ago
More News
Up