အကျဉ်းထောင်

September 8, 2021

အင်ဒိုနီးရှား အကျဉ်းထောင် မီးလောင်၊ အကျဉ်းသား ၄၁ ဦးသေဆုံး

အင်ဒိုနီးရှားနိုင်ငံ၊ ဂျာဗားကျွန်းပေါ်က အကျဉ်းထောင်မှာ ဒီကနေ့မနက်အစောပိုင်းက မီးလောင်မှုတခု ဖြစ်ခဲ့တာကြောင့် အကျဉ်းသား ၄၁ ယောက် သေဆုံးပြီး ဒါဇင်နဲ့ချီ ထိခိုက်ဒဏ်ရာတွေ ရရှိသွားခဲ့တယ်လို့ တာဝန်ရှိသူတယောက်က ပြောပါတယ်။

အဆိုပါအကျဉ်းထောင်ဟာ အင်ဒိုနီးရှားမြို့တော် ဂျကာတာအပြင်ဘက်မှာ တည်ရှိပြီး အကျဉ်းသားတွေ အများစု အိပ်ပျော်နေချိန် အစောပိုင်းက မီးလောင်ကျွမ်းမှုဖြစ်ခဲ့တာလို့ ဆိုပါတယ်။

“အကျဉ်းသား ၄၁ ယောက် သေဆုံးသွားခဲ့ပြီး ၈ ယောက်ကတော့ ဆိုးဆိုးဝါးဝါး ထိခိုက်ဒဏ်ရာတွေ ရရှိသွားခဲ့ပါတယ်။ နောက်ထပ် အနည်းအကျဉ်း ထိခိုက်ဒဏ်ရာရရှိသူ ၇၂ ယောက်ရှိပါတယ်”လို့ ဂျကာတာရဲချုပ် ဖာဒိလ်အင်မ်ရန်က သတင်းစာရှင်းလင်းပွဲမှာ ပြောပါတယ်။

လတ်တလောမှာတော့ မီးငြှိမ်းသတ်နိုင်ခဲ့ပြီဖြစ်ကာ ပြင်းပြင်းထန်ထန် ထိခိုက်ဒဏ်ရာရရှိသူတွေကို ဆေးရုံပို့ဆောင်ထားပြီး အနည်းအကျဉ်း ထိခိုက်ဒဏ်ရာရရှိသူတွေကိုတော့ ဆေးပေးခန်းမှာ ဆေးဝါးကုသမှုပေးနေတယ်လို့ ဆိုပါတယ်။

မီးစတင်လောင်ကျွမ်းရတဲ့ အကြောင်းရင်းကိုတော့ သက်ဆိုင်ရာ အာဏာပိုင်တွေက စုံစမ်းနေဆဲ ဖြစ်ကာ အခင်းဖြစ်တဲ့နေရာမှာ ကနဦး စစ်ဆေးတွေ့ရှိရသလောက် ဒါဟာ လျှပ်စစ်ဝါယာရှော့ခ်ကြောင့် ဖြစ်နိုင်တယ်လို့ အင်မ်ရန်က ပြောပါတယ်။

2 weeks Ago

August 5, 2021

မော်လမြိုင်တက္ကသိုလ် ကျောင်းသူ ၂ ဦးကို ၅၀၅(က) ဖြင့် အမှုဖွင့်ပြီး အကျဉ်းထောင်ပို့ဆောင်

မွန်ပြည်နယ် ပေါင်မြို့နယ်၊ ဆင်ရွာကျေးရွာနေ တက္ကသိုလ်ကျောင်းသူ ၂ ဦးကို အာဏာသိမ်းစစ်ကောင်စီက ရာဇသတ်ကြီး ဥပဒေ ပုဒ်မ ၅၀၅(က)နဲ့ အမှုဖွင့်ပြီး အကျဉ်းထောင်ကို ပို့ဆောင်ထားတယ်လို့ ဒေသခံတွေက  ပြောပါတယ်။

မော်လမြိုင်တက္ကသိုလ် အင်္ဂလိပ်စာနောက်ဆုံးနှစ်ကျောင်းသူ နန်းစန္ဒာဝင်းနဲ့ ရုက္ခဗေဒ အဝေးသင်း စတုတ္ထနှစ်ကျောင်းသူ နန်းဆုပိုင်ဖူးတို့ကို သြဂုတ် ၃ ရက်ညနေပိုင်းမှာ အာဏာသိမ်းစစ်ကောင်စီရဲ့ တပ်နဲ့ရဲတွေက နေအိမ်အတွင်း ဝင်ရောက်ဖမ်းဆီးသွားခဲ့တာပါ။

သူတို့ ၂ ဦးကိုတော့ စစ်အာဏာရှင် ဆန့်ကျင်ရေးဆန္ဒပြပွဲမှာ ပါဝင်ခဲ့တယ်ဆိုတဲ့ မှတ်တမ်းဓာတ်ပုံတွေကို လူမှုကွန်ရက်မှတဆင့် သတင်းရပြီးနောက် နေအိမ်မှာ လာရောက် ဖမ်းဆီးသွားခဲ့တာလို့ ဒေသခံတစ်ဦးက ပြောပါတယ်။

အဲဒီတက္ကသိုလ်ကျောင်းသူ ၂ ဦးဟာ သြဂုတ် ၄ ရက်မှာ ကျိုက်မရော ဗဟိုအကျဉ်းထောင်ကို ပို့ဆောင်ခံလိုက်ရတာ ဖြစ်ပါတယ်။

အာဏာသိမ်းစစ်ကောင်စီ အမည်ပြောင်း အိမ်စောင့်အစိုးရဟာ ဆန္ဒပြပွဲပါဝင်ခဲ့တဲ့ သူတချို့ကို ပြန်လွှတ်ပေးမယ်လို့ ထုတ်ပြန်ထားပေမဲ့ တဖက်မှာတော့ ဆန္ဒပြပွဲ ပါဝင်သူတွေကို ဆက်လက် ဖမ်းဆီးနေတာ ဖြစ်ပါတယ်။

ဖမ်းဆီးခံထားရတဲ့ ကျောင်းသူတွေကို အမြန်ဆုံးပြန်လွှတ်ပေးဖို့ မော်လမြိုင်တက္ကသိုလ် ဆရာများသမဂ္ဂက သြဂုတ် ၃ ရက်မှာ တောင်းဆိုထားပါတယ်။

2 months Ago

ရေးမြို့၌ ဆန္ဒပြခဲ့စဉ် ဖမ်းဆီးခံရသည့် လူငယ် ၁ ဦးအကျဉ်းထောင်တွင် သေဆုံး

မွန်ပြည်နယ်  ရေးမြို့မှာ စစ်ကောင်စီ ကျဆုံးရေး ဆန္ဒပြပွဲမှာ ပါဝင်ပြီး  ဖမ်းဆီးခံရတဲ့ လူငယ် ၁၇ ဦးထဲက လူငယ် ၁ ဦး ကျိုက်မရော အကျဉ်းထောင်မှာ သြဂုတ် ၄ ရက်နေ့မှာ သေဆုံးခဲ့တယ်လို့ သက်ဆိုင်ရာ နယ်မြေခံရဲစခန်းမှ မိဘများထံအကြောင်း ကြားခဲ့ပါတယ်။ 

သေဆုံးသူဟာ မောင်ပြေသိန်း အသက် ၂၉ နှစ်ဖြစ်ပြီး သေဆုံးရတဲ့ အကြောင်းအရင်းကို မသိရှိရသေးသလို မိဘတွေမှာလည်း တွေ့ခွင့်မရသေးဘူးလို့လည်း မိဘဆွေမျိုးနဲ့နီးစပ်တဲ့သူက ပြောပါတယ်။

မောင်ပြေသိန်းအပါအဝင် လူငယ် ၁၇ ဦးဟာ ရေးမြို့မှာ ဆန္ုပြနေစဉ် ဖမ်းဆီးခံခဲ့ရတာဖြစ်ပြီး ကျိုက်မရောထောင်သို့ပို့ဆောင်ခံခဲ့ရတာဖြစ်ပါတယ်။ အဲဒီထဲက  အသက်မပြည့်သူတစ်ဦးကတော့ လူငယ်ပြုပြင်ထိန်းသိမ်းရေးစခန်းကို ပို့ဆောင်ခံခဲ့ရတာပါ။

 ရေးမြို့နယ်မှာ စစ်အာဏာရှင်ဆန့်ကျင်ရေး ဆန္ဒပြပွဲမှာ ဖမ်းဆီးခံထားရတဲ့သူ အနည်းဆုံး ၃၀ ဦးခန့်ရှိပြီး ၅၀၅-ကနဲ့ အရေးယူခဲ့သလို မတရားဖမ်းဆီးခံခဲ့ရတဲ့သူတွေလည်း ဒီနေ့အထိ ပြန်မလွှတ်ပေးတဲ့သူတွေလည်း ရှိနေပါတယ်။

2 months Ago
More News
Up