ဟေတီသမ္မတ

July 24, 2021

ဟေတီသမ္မတ ဈာပနအခမ်းအနား ကျင်းပ

ဟေတီနိုင်ငံရဲ့ ကွယ်လွန်သူသမ္မတ ဂျိုဇစ်နယ်လ်မိုအိဇ်ရဲ့ဈာပန အခမ်းနားကို လုပ်ကြံ သတ်ဖြတ်ခံရပြီး ၂ ပတ်အကြာ ဇူလိုင် ၂၃ ရက်မှာ ကျင်းပခဲ့ပါတယ်။

ဟေတီနိုင်ငံအလံလွှမ်းခြုံထားတဲ့ သမ္မတရဲ့ခေါင်းတလားကို ခန်းမတခုထဲမှာ ပြင်ဆင်ထားပြီး စစ်ဝတ်စုံ ဝတ်ဆင်ထားသူတွေက ဝန်းရံစောင့်ကြပ်ပါတယ်။ 

အမေရိကန်သမ္မတ ဂျိုးဘိုင်ဒန်ရဲ့ အနောက်ကမ္ဘာခြမ်းအတွက် ထိပ်တန်းအကြံပေးပုဂ္ဂိုလ် အပါအဝင် နိုင်ငံရပ်ခြားမှ ဂုဏ်သရေရှိ ဧည့်သည်တွေဟာ ကွယ်လွန်သူသမ္မတကို လေးစားဂါရဝပြုဖို့ ဟေတီနိုင်ငံမြောက်ပိုင်းက ကပ်ဟေတီရန်ကို လာရောက်ခဲ့ကြပြီး သမ္မတဆီကို လွမ်းဆွတ်ငိုကြွေး ဂါရဝလာပြုကြတဲ့ ဟေတီပြည်သူတွေနဲ့အတူ ဈာပနကို ပူးပေါင်းတက်ရောက်ခဲ့ကြပါတယ်။

 ဇူလိုင် ၇ ရက် မနက်စောစောက သမ္မတ မိုအီဇ်ဟာ မြို့တော် ပို့တ်အောပရင့်စ်ရှိ သူ့နေအိမ်မှာ သေနတ်နဲ့ပစ်သတ်ခံခဲ့ရတာပါ။ လုပ်ကြံမှုကို ကိုလံဘီယာစစ်သားဟောင်း ၂၆ ယောက် ပါဝင်တဲ့အဖွဲ့က ပြုလုပ်ခဲ့တာဖြစ်ပြီး သူတို့ထဲက ၆ ယောက်ဟာ အမေရိကန် စစ်သင်တန်းဆင်းတွေဖြစ်ပါတယ်။

 ဟေတီ-အမေရိကန်တွေလည်း စွပ်စွဲခံရသူတွေထဲမှာ ပါဝင်နေပါတယ်။ ဒီတိုက်ခိုက်မှုကို ကြံစည်သူတွေဟာ သူတို့ကိုယ်သူတို့ အမေရိကန်ပြည်ထောင်စုရဲ့ မူးယစ်ဆေးဝါးထိန်းချုပ်ရေး အဖွဲ့ဝင်တွေအဖြစ် ဟန်ဆောင် လှည့်ဖြားပြီး သမ္မတအိမ်ကို ဝင်ရောက်ခဲ့တာကြောင့် သမ္မတအိမ်က လုံခြုံရေးအစောင့်တွေ ခုခံနိုင်စွမ်းမရှိခဲ့ဘူးလို့ ဟေတီအာဏာပိုင်တွေက ပြောပါတယ်။

သမ္မတလုပ်ကြံခံရပြီး နိုင်ငံမငြိမ်သက်မှုတွေကြောင့် ဟေတီနိုင်ငံဟာ အမေရိကန်သမ္မတ ဂျိုးဘိုင်ဒန်ရဲ့ နိုင်ငံခြားရေးမူဝါဒကို ဦးစားပေးပြီး ဇူလိုင် ၂၂ ရက်မှာ အမေရိကန် နိုင်ငံခြားရေး ဝန်ကြီးဌာနက ဟေတီအတွက် အထူးသံတမန်တယောက် ခန့်အပ်ဖို့ အမည်တင်သွင်းခဲ့ပါတယ်။ 

ဟေတီနိုင်ငံရဲ့ ကြားဖြတ်အစိုးရအဖွဲ့ ခေါင်းဆောင်တွေက နိုင်ငံကိုကာကွယ်ပေးဖို့အတွက် တပ်ဖွဲ့များစေလွှတ်ပေးဖို့ တောင်းဆိုချက်ကိုတော့ သမ္မတ ဘိုင်ဒန်က ငြင်းဆန်ခဲ့ပါတယ်။ 

3 months Ago

July 17, 2021

ဟေတီသမ္မတကိုလုပ်ကြံရန် တရားရေးအရာရှိဟောင်းက အမိန့်ပေးခဲ့ဖွယ်ရှိ

ဟေတီသမ္မတ ဂျိုဗစ်နယ်လ်မိုအိဇ် လုပ်ကြံခံရမှုမှာ တရားရေး၀န်ကြီးဌာနမှ အရာရှိဟောင်း ဂျိုးဇက်ဖလစ်ဇ်ဘာဒီရိုက အမိန့်ပေးခဲ့တာ ဖြစ်နိုင်တယ်လို့ ကိုလံဘီယာရဲချုပ်က ဇူလိုင် ၁၆ ရက် က လူသတ်မှုနဲ့ပတ်သက်ပြီး ကြိုတင်စုံစမ်းစစ်ဆေးချက်တွေအရ ပြောကြားသွားပါတယ်။

ဇူလိုင် ၇ ရက်က ပို့တ်အောပရင့်စ်မြို့အထက်မှာရှိတဲ့ တောင်ကုန်းတွေပေါ်က သမ္မတ အိမ်တော်မှာ တိုက်ခိုက်ရေးရိုင်ဖယ်တွေနဲ့ ဟေတီသမ္မတ သတ်ဖြတ်ခံရမှုမှာ အင်တာပိုလ်နဲ့အတူ ဟေတီနဲ့ ကိုလံဘီယာအာဏာပိုင်တွေရဲ့ စုံစမ်းစစ်ဆေးမှုတွေအရ ဘာဒီရိုက တိုက်ခိုက်မှုမတိုင်မီ သုံးရက်အလိုမှာ အမိန့်ပေးခဲ့တယ်ဆိုတာ ဖော်ထုတ်သိရှိရတယ်လို့ ကိုလံဘီယာရဲချုပ် ဗိုလ်မှူးကြီး ဂျော်ဂျီဗားဂတ်စ်က သတင်းဌာနတွေကို စကားပြောဆိုထားချက် ပေးပို့ခဲ့ပါတယ်။ 

ဒီပြောဆိုချက်နဲ့ပတ်သက်ပြီး ဘာဒီရိုရဲ့မှတ်ချက်ရရှိဖို့ ချက်ချင်းမဖြစ်နိုင်သေးဘဲ သူ့ကို ဘယ်မှာထားရှိတယ်ဆိုတာလည်း မသိရပါဘူး။ 

ဗာဂတ်စ်ရဲ့ အဆိုအရ အထွေထွေထောက်လှမ်းရေးဌာနနဲ့အတူ အဂတိလိုက်စားမှု တိုက်ဖျက်ရေးဌာနမှာ လုပ်ကိုင်ခဲ့တဲ့ဘာဒီရိုဟာ လုံခြုံရေးတာဝန်ထမ်းဆောင်ဖို့ အစပိုင်းက ဆက်သွယ်ခဲ့တဲ့ ကိုလံဘီယာစစ်သားဟောင်း ဒူဘာနေးကာပါဒေါ်နဲ့ ဂါမန်ရီဗီရာတို့ကို သမ္မတ မိုအိဇ် ကိုသတ်ဖို့ အမိန့်ပေးခဲ့တာကို စုံစမ်းဖော်ထုတ် တွေ့ရှိခဲ့တယ်လို့ ဆိုပါတယ်။

ဒါပေမဲ့ ဒီအချက်အလက်တွေ  ဘယ်ကရတယ်ဆိုတဲ့ အသေးစိတ် အထောက်အထားတွေကိုတော့ မပြခဲ့ပါဘူး။ 

သမ္မတ မိုအိဇ်အသတ်ခံရအပြီးမှာ လုပ်ကြံသူ ကာပါဒေါ်အသတ်ခံရပြီး ရီဗီရာကို ဟေတီရဲတွေ ဖမ်းမိခဲ့တယ်လို့ အာဏာပိုင်တွေက ပြောပါတယ်။

ပြီးခဲ့တဲ့ တနင်္ဂနွေနေ့က ဟေတီအာဏာပိုင်တွေဟာ ဖလော်ရီဒါအခြေစိုက် ဆရာဝန်လို့ အသိများတဲ့ အသက် ၆၃ နှစ်အရွယ်  ခရစ္စတီရန်အီမန်နူရယ်ဆာနွန် ကိုလည်း ဒီလူသတ်မှု နောက်ကွယ်က ကြိုးကိုင်သူလို့ စွပ်စွဲပြီး ဖမ်းဆီးခဲ့ပါတယ်။ 

ဟေတီနန်းတော်လုံခြုံရေးအကြီးအကဲ Dimitri Herard ဒီမီထရီဟာရက်ဒ်ကို ဖမ်းဆီးထားချိန်မှာပဲ ဟေတီအမျိုးသားရဲတပ်ဖွဲ့ ရဲချုပ်လီနွန်ချားလ်က ဟေတီအထက်လွှတ်တော်အမတ်ဟောင်း ဂျွန်ဂျိုးဇက် ကိုလည်း ဒီလုပ်ကြံမှုရဲ့ အဓိကပုဂ္ဂိုလ် ဖြစ်တယ်လို့ ဖော်ထုတ်လိုက်ပြီးနောက်မှာ သူ့ကိုရဲတွေက လိုက်ရှာနေပါတယ်။ 

ကိုလံဘီယာဟာ ဖမ်းဆီးထိန်းသိမ်းခံ ကိုလံဘီယာနိုင်ငံသားတွေနဲ့ တွေ့ဆုံဖို့၊ သူတို့ရဲ့အခွင့်အရေးကို လေးစားပေးထားဖို့နဲ့ သေဆုံးသွားတဲ့ ကိုလံဘီယာနိုင်ငံသားတွေရဲ့ အလောင်းတွေကို နေရပ်ပြန်လည်ယူဆောင်ဖို့တွေကို  ကာရစ်ဘီယံကျွန်းနိုင်ငံ ဟေတီရဲ့ အတည်ပြုချက်ကိုရရှိပြီးတာနဲ့ သံတမန်ရေးဆိုင်ရာ ကောင်စစ်ဝန်အဖွဲ့တဖွဲ့ ဟေတီကို စေလွှတ်သွားမှာဖြစ်တယ်လို့ ကိုလံဘီယာနိုင်ငံရဲ့ ဒုသမ္မတလည်းဖြစ်တဲ့ နိုင်ငံခြားရေးဝန်ကြီး မာတာလူစီရာရာမီရာဇ်က သောကြာနေ့က သတင်းထောက်တွေကို ပြောခဲ့ပါတယ်။

၀န်ကြီးဌာနဟာ သေဆုံးသူတွေ၊ ဖမ်းဆီးခံထားရသူတွေရဲ့ မိသားစုတွေနဲ့ နေ့စဉ်အဆက်အသွယ်ရှိတယ်လို့လည်း ပြောပါတယ်။ 

ဒီလုပ်ကြံမှုအစီအစဉ်ကို ကိုလံဘီယာ စစ်သားဟောင်း အနည်းငယ်လာက်ကသာ သိရှိထားတယ်လို့ ကိုလံဘီယာအစိုးရက အခိုင်အမာပြောကြားထားပေမဲ့ တာဝန်ရှိတဲ့ သက်ဆိုင်သူတွေကတော့ တန်ရာတန်ကြေး ပြန်ပေးရမှာပဲလို့လည်း ထပ်လောင်းပြောကြား ပါတယ်။ 

ဒီအတောအတွင်းမှာပဲ လုပ်ကြံခံသမ္မတရဲ့ ဈာပနကို ဇူလိုင် ၂၃ ရက်မှာ ကျင်းပသွားမှာဖြစ်ပြီး သမ္မတကတော် မာတီနိ မိုအိဇ်လည်း တက်ရောက်လိမ့်မယ်လို့ ဟေတီအာဏာပိုင်တွေက ကြေညာထားပါတယ်။ 

3 months Ago
More News
Up