ဟားခါး

November 6, 2021

ဟားခါးနှင့် ထန်တလန်တွင် တိုက်ပွဲဖြစ်ပြီး စစ်ကောင်စီဘက်က ၁၁ ဦးသေဆုံး

ချင်းပြည်နယ်၊ ဟားခါးနဲ့ ထန်တလန်မြို့တွေမှာ နိုဝင်ဘာ ၆ ရက် ဒီနေ့ မနက်ပိုင်းတိုက်ပွဲတွေကြောင့် စစ်သားနဲ့ရဲ ၁၁ ယောက်သေဆုံးပြီး တချို့ ဒဏ်ရာရတွေရှိခဲ့တယ်လို့ ချင်းအမျိုးသားတပ်ဦး CNF တာဝန်ရှိသူကပြောပါတယ်။

စစ်ကောင်စီအကြမ်းဖက်အဖွဲ့က  အနော်ရထာစစ်ဆင်ရေးကို လက်တွေ့အကောင်အထည် ဖော်လာတာကြောင့် ရက်ပိုင်းအတွင်း ချင်းပြည်နယ်မှာ ထိတွေ့တိုက်ပွဲ ၁၃ ကြိမ်နီးပါးရှိလာပါတယ်။

နိုဝင်ဘာ ၆ ရက်မနက် ၄ နာရီနဲ့ ၅ နာရီအကြားမှာ ချင်းပြည်နယ်ဟားခါးမြို့ပေါ်က စစ်ကောင်စီလုံခြုံရေးတပ်စခန်းကို ချင်းပူးပေါင်းတပ်ဖွဲ့က ဝင်ရောက်ပစ်ခတ်တာကြောင့် စစ်သား ၅ ယောက်သေဆုံးပြီး ဒဏ်ရာရသွားသူတွေရှိခဲ့တယ်လို့ ချင်းအမျိုးသားတပ်ဦး CNF တာဝန်ရှိသူကပြောပါတယ်။

ဟားခါးမြို့၊ ပြည်နယ်ရဲစခန်းအပေါ်ဘက်မှာ တပ်စွဲထားတဲ့ ပြည်နယ်ရဲအရန်တပ်ရင်းကိုလည်း တချိန်တည်းမှာ ချင်းပူးပေါင်းတပ်ဖွဲ့က ဝင်ရောက်တိုက်ခိုက်ခဲ့ပြီး ရဲတပ်ဖွဲ့ဝင် ၆ ဦးသေဆုံးသွားပါတယ်။

ဟားခါးမြို့မှာ တိုက်ပွဲဖြစ်တာနဲ့တပြိုင်နက် ထန်တလန်မြို့မှာလည်း တိုက်ပွဲသုံးကြိမ်ဖြစ်ပွားခဲ့ပြီး ထိခိုက်သေဆုံးမှုအခြေအနေတွေကို အတည်မပြုနိုင်သေးပါဘူး။

စစ်ကောင်စီက မနက်ပိုင်းတိုက်ပွဲမှာ ပစ်ခတ်လိုက်တဲ့ လက်နက်ကြီးကြောင့် ထန်တလန်မြို့၊ ဘာသာရေးမိဘမဲ့ဂေဟာ မီးလောင်ပျက်စီးသွားတယ်လို့ ချင်းအမျိုးသားတပ်ဦး CNF တာဝန်ရှိသူ ဆလိုင်းထက်နီက ပြောပါတယ်။

"စစ်ကောင်စီက အောက်တိုဘာလမှာ အင်အားဖြည့်တင်းထားတဲ့နောက်ပိုင်း ချင်းပြည်တောင်ပိုင်းနဲ့ မြောက်ပိုင်း စစ်မျက်နှာနှစ်ခုပေါင်းမှာ စုစုပေါင်း တိုက်ပွဲ ၁၃ခု လောက်ဖြစ်ပွားခဲ့တယ်။ သူတို့ရဲ့ အနော်ရထာစစ်ဆင်ရေးကို လက်တွေ့အကောင်အထည်ဖော်နေပြီလို့ပြောရမှာပေါ့လေ။ တိုက်ပွဲကပိုပြီးဖြစ်ပွားလာဖို့တော့ရှိပါတယ်။"

စစ်ကောင်စီက ချင်းပြည်နယ်မြောက်ပိုင်းမှာ နယ်မြေထိန်းချုပ်ဖို့ကြိုးစားနေသလို ချင်းပြည်နယ်တောင်ပိုင်း မင်းတပ်-မတူပီဒေသမှာလည်း သာလွန်အင်အားသုံးနေတာကြောင့် ထိတွေ့တိုက်ပွဲတွေဆက်တိုက်ဖြစ်နေပါတယ်။

နိုဝင်ဘာ ၅ ရက်နေ့မနက်ပိုင်းက မင်းတပ်မြို့အနီး ၁၁ မိုင်နဲ့ မိုင် ၄၀ တို့မှာ အပြန်အလှန်ပစ်ခတ်မှုတွေရှိခဲ့ပါတယ်။ နိုဝင်ဘာ ၄ ရက်နေ့က မင်းတပ်-မတူပီဒေသကို ဝင်ရောက်လာတဲ့စစ်ကောင်စီလမ်းကြောင်းကို CDF တွေကမိုင်းခွဲတိုက်ခိုက်တာကြောင့် စစ်သား ၂၅ ယောက်ထက်မနည်းသေဆုံးခဲ့ပါတယ်။

ဒေသခံ CDF တွေကတော့ နယ်မြေကျွမ်းကျင်မှုကိုအားပြုပြီး ပြောက်ကျားစနစ်နဲ့ ခုခံတိုက်ခိုက်နေတာဖြစ်တယ်လို့  မင်းတပ် CDF တာဝန်ရှိသူတစ်ဦးကပြောပါတယ်။

စစ်ကောင်စီရဲ့အင်အားသုံးအကြမ်းဖက်မှုတွေကြောင့် မင်းတပ်မြို့နဲ့ ထန်တလန်မြို့က ပြည်သူတွေဟာ မြို့လုံးကျွတ်စစ်ဘေးရှောင်နေကြရပါတယ်။ ဟားခါးမြို့က ထောင်နဲ့ချီတဲ့ပြည်သူတွေဟာလည်း မြို့ကိုစွန့်ခွာနေကြရပါတယ်။

ချင်းပြည်နယ်တစ်ခုလုံးမှာ စစ်ဘေးသင့်ပြည်သူ ၅၀၀၀၀ ကျော်ရှိနေပြီး စားနပ်ရိက္ခာနဲ့ဆေးဝါး တွေအရေးတကြီးလိုအပ်နေပါတယ်။ ချင်းအမျိုးသားတပ်ဦး CNF နဲ့ ဒေသတွင်း CDF တွေပူးပေါင်းပြီး အပြန်အလှန်စစ်ထိုးနေတာကြောင့် တီးတိန်၊ ဖလမ်း၊ ဟားခါး၊ ထန်တလန်၊ မတူပီ၊ မင်းတပ်၊ ကန်ပက်လက်မြို့ နယ်တွေမှာ တိုက်ပွဲတွေ ခပ်စိပ်စိပ်ဖြစ်ပေါ်နေပါတယ်။

3 weeks Ago

October 21, 2021

ဟားခါးတွင် စစ်အင်အားတိုးချဲ့နေပြီး အင်အား ၇၀၀ ခန့်ရှိလာ၊ ဒေသခံများ အိုးအိမ်စွန့်ခွာ ထွက်ပြေး

ချင်းပြည်နယ်၊ ဟားခါးမြို့ထဲကို အောက်တိုဘာ ၂၀ရက်နေ့က တင့်ကားတွေအပါအဝင် စစ်ကား ၅၀ ကျော်နဲ့ စစ်သားအင်အား ၄၀၀ ကျော်ထပ်တိုးဝင်ရောက်ခဲ့ပြီး မူလရှိတဲ့ အင်အားနဲ့ပေါင်းရင် စစ်ကောင်စီတပ်သား ၇၀၀ နီးပါးရှိလာပါတယ်။ 

ဟားခါးမြို့ပေါ်က ပြည်သူတွေဟာ သေနတ်သံ၊ ဗုံးသံတွေကြားထဲမှာ ထိန့်လန့်မှုတွေခံစားနေရတာကြောင့် အိမ်ခြေ ၂၀၀ နီးပါး အိုးအိမ်စွန့်ခွာထွက်ပြေးနေကြပြီး စစ်ကောင်စီက ဘာသာရေး၊ လူမျိုးရေးအရ အနိုင်ကျင့်ဖိနှိပ်နေတယ်လို့ ချင်းနှစ်ချင်းခရစ်ယာဉ်အဖွဲ့ချုပ် ဥက္ကဋ္ဌက ပြောပါတယ်။

စစ်ကောင်စီနဲ့ ဟားခါး CDF တို့ အချိန်မရွေးတိုက်ပွဲတွေဖြစ်လာနိုင်တဲ့အတွက် ပြည်သူတွေအတွက် လုံခြုံရေးဇုန်နေရာ သတ်မှတ်ဖို့ ဒေသခံ ဘာသာရေးခေါင်းဆောင်တွေနဲ့ အရပ်ဘက်အဖွဲ့တွေက ကြိုးစားတာတွေရှိနေပြီး စစ်ကောင်စီဘက်က နုတ်အားဖြင့်သဘောတူထားတယ်လို့ ချင်းနှစ်ချင်းခရစ်ယာန်အဖွဲ့ချုပ် ဥက္ကဋ္ဌက ပြောပါတယ်။ စစ်ကောင်စီက ဘုရားကျောင်းတွေကို မီးရှို့တာ၊ ရည်ရွယ်ချက်ရှိရှိ တပ်စွဲတာတွေကတော့ ဘာသာရေး၊ လူမျိုးရေးအရ အနိုင်ကျင့်ဖိနှိပ်တာဖြစ်တယ်လို့ ချင်းနှစ်ချင်းခရစ်ယာန်အဖွဲ့ချုပ်ဥက္ကဋ္ဌ သိက္ခာတော်ရဒေးနစ်ငွန်ထောင်းမန်က ပြောပါတယ်။

"တကယ်တမ်းကြတော့ ကြိုက်သလိုဖမ်းလိုက် အိမ်ထဲဝင်လိုက် ပစ္စည်းတွေမွှေနှောက်လိုက်။ ဘုရားကျောင်းလည်း မရှောင်ဘူးပေါ့။ ရည်ရွယ်ချက်ရှိရှိနဲ့ မီးရှို့တာတွေ တပ်စွဲတာတွေ တွေ့တဲ့အခါကြတော့ ကျနော်တို့ဘက်က ပြောသင့်သလောက်ပြောတယ်။ သူတို့ဘက်က လိုက်လျောမှုတော့မရှိဘူး။ ခံစားမှုကတော့ ဘာသာရေးလူမျိုးရေး အနိုင်ကျင့်တဲ့သဘော အထင်သေးတဲ့သဘော ဖိနှပ်တဲ့သဘောလို့ပဲ ခံစားတယ်ပေါ့။ ပြည်သူတွေက အထိတ်တလန့်ဖြစ်နေတယ်။ သေနတ်သံ ဗုံးသံကြားတဲ့အခါ ထွက်ပြေးကြပြီပေါ့။ ဟားခါးမြို့ပေါ်ကနေ အိမ်ခြေ ၁၆၀ ကနေ ၂၀၀ နီးပါးထွက်ပြေးကြတယ်။ မနေ့က မြို့ထဲဝင်လာတာ ၅၁ စီး တင့်ကားလည်းပါတယ်။ အင်အား ၄၀၀ လောက်။ နဂိုရှိတာနဲ့ဆို အင်အား ၆၀၀ ကျော် ၇၀၀ လောက်ရှိမယ်။"

ချင်းပြည်နယ်၊ စစ်ကိုင်းတိုင်းနဲ့ မကွေးတိုင်းနယ်စပ် အနောက်မြောက်တိုင်းစစ်ဒေသမှာ စစ်ကောင်စီက ချင်းပြည်နယ်ကို ဦးတည်ချေမှုန်းဖို့ကြိုးစားနေတာဖြစ်ပါတယ်။ 

စစ်ကိုင်းတိုင်းနဲ့ မကွေးတိုင်းနယ်စပ် ဂန့်ဂေါလမ်းမကြီးပေါ်က စစ်ကောင်စီလမ်းကြောင်းတွေကိုတော့ ဒေသခံ PDF တွေက ပြောက်ကျားစနစ်နဲ့ဖောက်ခွဲတိုက်ခိုက်တာတွေပြုလုပ်နေပြီး အောက်တိုဘာ ၂၀ ရက်နေ့မွန်းလွဲပိုင်းက ပြည်သူ့တော်လှန်ရေးတပ် PRA ရဲ့ ကြားဖြတ်တိုက်ခိုက်မှုကြောင့် စစ်သား ၁၃ ယောက်ထက်မနည်း ကျဆုံးခဲ့တယ်လို့ PRA တပ်ဖွဲ့ တာဝန်ရှိ ဗိုလ်ဂျပန်က ပြောပါတယ်။

"အောက်တိုဘာ ၂၀ ရက်နေ့ ၁နာရီ မိနစ် ၂၀ ဝန်းကျင်မှာဖြစ်တာ။ ကြာချိန်က ၃၅ မိနစ်၊ မိနစ် ၄၀ ဝန်းကျင် ကြာတယ်။ ဂန့်ဂေါလမ်းမကြီးပေါ်မှာ PRA တပ်ရင်း ၂နဲ့ ဖြစ်တာပါ။ စစ်ကောင်စီဘက်က ထိုးစစ်ဆင်တာတွေ စိပ်လာတယ်။ ကျနော်တို့က အခြေအနေပေါ်မူတည်ပြီး ခြုံခိုတိုက်ခိုက်ရခြင်းဖြစ်ပါတယ်။ ဒီရက်ပိုင်းမှာ ချင်းပြည်နယ်နဲ့စစ်ကိုင်းတိုင်းကို စစ်ကောင်စီက အင်အားအလုံးအရင်းသုံးပြီး နယ်မြေရှင်းလင်း ထိုးစစ်ဆင်တာတွေ စိပ်လာတယ်။ ကျနော်တို့ ပတ်ဝန်းကျင်ကိုရောက်လာတဲ့ စစ်တပ်ကို ရနိုင်သမျှတိုက်ခိုက်ရခြင်းဖြစ်ပါတယ်။ စစ်ရှောင်တွေကိုပါ ကူညီနေရတာဖြစ်တဲ့အတွက် စားရေးသောက်ရေးပါ ခက်ခဲနေပါတယ်။ ဒါပေမယ့် ပြည်သူကို အသက်ပေးပြီး ကျွန်တော်တို့ တစ်ဖွဲလုံး ကာကွယ်ပေးသွားမှာပါ။ မြို့သိမ်းတိုက်ပွဲတွေ ကျနော်တို့ဘက်က စတင်သွားဖို့ ဆုံးဖြတ်ထားပါတယ်ဗျ။"

စစ်ကိုင်းတိုင်းမှာတော့ စစ်ကောင်စီက ကုန်လမ်းသာမက ချင်းတွင်းမြစ်ရိုးတစ်လျှောက်ရေလမ်းကိုလည်း ထိန်းချုပ်ဖို့ကြိုးစားနေပါတယ်။ 

မုံရွာမြို့နဲ့ ပတ်ဝန်းကျင်ဒေသတွေမှာ PDF တွေက ဖောက်ခွဲတာတွေ ပြောက်ကျားတိုက်ခိုက်တာတွေဆောင်ရွက်နေပါတယ်။ 

အနောက်မြောက်တိုင်းစစ်ဒေသမှာ မိုးရွာသွန်းပြီး ရာသီဉတုဆိုးရွားနေတာကြောင့် စစ်ကောင်စီဟာ စစ်ဆင်ရေးတွေ ဆောင်ရွက်ဖို့ ခက်ခဲနေတယ်လို့ စစ်ကိုင်းဒေသခံ နိုင်ငံရေးသမားတစ်ဦးက ပြောပါတယ်။

"ချင်းတွင်းမြစ်အနောက်ဘက်မှာတော့ ပြောက်ကျားတွေ ဖောက်ခွဲတိုက်ခိုက်တာတွေရှိတယ်။ ဂန့်ဂေါ-ကလေးလမ်းကြောင်းတစ်လျှောက်မှာ အင်အားတချို့ရှိတယ်။ ရာသီဉတုအခြေအနေအရ စစ်ကောင်စီက ရှေ့တိုးလို့မရ နောက်ဆုတ်လို့မရဖြစ်နေတာရှိတယ်။  မြင်းမူ-မြောင်ဘက်လမ်းကြောင်းမှာတော့ စစ်ကောင်စီက ကားကိုအသုံးမပြုဘဲ ရေလမ်းကြောင်းကနေ တက်လာတာရှိတယ်။ ကနီ၊ ပုလဲ၊ ယင်းမာပင်ဘက်မှာတော့ အေးနေတယ်။ ပုံတောင်ပုံညာတဝိုက်မှာတော့ အေးဆေးတဲ့အယောင်ဖြစ်ပေမယ့် ဂန့်ဂေါရဲ့အနောက်ဘက် ချင်းပြည်နယ်မှာတော့ အလုံးအရင်းနဲ့ သူထိုးစစ်ဆင်နေတယ်။"

အနောက်မြောက်တိုင်းစစ်ဒေသမှာ စစ်ကောင်စီက ဗျူဟာမြောက်ထိုးစစ်ဆင်ပြီး နယ်မြေထိန်းချုပ်ဖို့ ကြိုးစားနေသလို ဒေသခံ PDF တွေကလည်း လက်နက်နဲ့လူအင်အားဖြည့်တင်းပြီး အသင့်အနေအထားနဲ့ စောင့်ဆိုင်းနေကြတာဖြစ်ပါတယ်။

လက်နက်အင်အား၊ လူအင်အားမမျှတတဲ့အခြေအနေဖြစ်ပေမယ့် စိတ်ဓာတ်ရေးရာအားသာချက်နဲ့ နယ်မြေကျွမ်းကျင်မှုကိုအသုံးချပြီး ခုခံတုံ့ပြန်မယ်လို့ ဒေသခံ PDF ခေါင်းဆောင်တွေက ပြောပါတယ်။

1 month Ago
More News
Up