သံဖြူဇရပ်

November 22, 2021

ကျိုက်နဲရေလယ်ဘုရားတွင် ရေနစ် သေဆုံးသူ ၁ ဦး အလောင်းထပ်တွေ့၊ ပျောက်ဆုံး ၁၀ ဦး ကျန်ရှိ

မွန်ပြည်နယ်၊ သံဖြူဇရပ်မြို့နယ် ဝဲကလောင်းကျေးရွာနဲ့ အံခဲကျေးရွာကြားက ကျိုက်နဲရေလယ်ဘုရားဖူး ဖြစ်စဉ်မှာ ရေနစ်သေဆုံးသူ နောက်တယောက်ရဲ့  ရုပ်အလောင်းကို နိုဝင်ဘာ ၂၂ ရက် ဒီမနက် ၁၀ နာရီက ပြန်လည် ဆယ်ယူရရှိခဲ့တယ်လို့ လူမှုကယ်ဆယ်ရေးအဖွဲ့တွေက ဒီဗွီဘီကို ပြောပါတယ်။

ပြန်လည်ဆယ်ယူရရှိခဲ့တဲ့ ရေနစ်သေဆုံးသူဟာ ရေးမြို့နယ် အစင်ကျေးရွာက အသက် ၄၀ အရွယ် အမျိုးသား တယောက်ဖြစ်ပြီး လက်ရှိမှာတော့ သံဖြူဇရပ်မြို့နယ်ပြည်သူ့ဆေးရုံ ရင်ခွဲကို ပို့ဆောင်ထားပါတယ်။

ဘုရားဖူး လာရောက်သူတွေထဲက  ပျောက်ဆုံးနေသူ ၁၁ ဦး လာရောက် စာရင်းပေးထားပြီး၊ ရေးမြို့နယ် အစင်ကျေးရွာက အမျိုးသားတယောက် ပြန်လည် ဆယ်ယူရရှိထားတဲ့အတွက်ကြောင့် ၁၀ ဦး ကျန်ရှိနေသေးတာ ဖြစ်ပါတယ်။

လက်ရှိမှာတော့ ပျောက်ဆုံးနေသူတွေရဲ့ မိသားစုဝင်တွေလည်း ကမ်းခြေမှာ ဆက်လက်စောင့်ဆိုင်းနေပြီး  ရှာဖွေကယ်ဆယ်ရေးတွေ ဆက်လက်လုပ်နေတယ်လို့ လူမှုကယ်ဆယ်ရေးအဖွဲ့ တာဝန်ရှိသူ တစ်ဦးက ပြောပါတယ်။

ကျိုက်နဲရေလယ်ဘုရားမှာတော့ မနေ့က  ဒေသအခေါ် နတ်လမ်းမှာ လူအများအပြား တိုးကြိတ်သွားလာရာမှ ဒီရေလှိုင်း ပုတ်ခတ်မှုကြောင့် ပင်လယ်ထဲ မျောပါသေဆုံးခဲ့တာဖြစ်ပါတယ်။

ကျိုက်နဲရေလယ်ဘုရားဖူး ဖြစ်စဉ်မှာတော့ ဒီကနေ့ နိုဝင်ဘာ ၂၂ ရက် မနက်ပိုင်းထိ ရေနစ်သေဆုံးသူ ရုပ်အလောင်း ၁၆ လောင်းထိ ပြန်လည် ဆယ်ယူရရှိထားပါတယ်။

1 week Ago

November 21, 2021

ကျိုက်နဲရေလယ်နတ်လမ်းတွင် ပင်လယ်ရေနှင့်မျောပါသွားသူ ၁၄ ဦးအလောင်း ဆယ်ယူရရှိ

မွန်ပြည်နယ်  သံဖြူဇရပ်မြို့နယ်ရှိ ကျိုက်နဲရေလယ်ဘုရားပွဲ နတ်လမ်းမှာ နိုဝင်ဘာ ၂၁ ရက် မနက် ၇ နာရီလောက်က  ပင်လယ်ရေနဲ့ မျောပါသွားတဲ့ ၁၄ ဦးအလောင်း ဆယ်ယူရရှိပြီလို့  ကယ်ဆယ်ရေးသမားတွေက ပြောပါတယ်။

ကျိုက်နဲရေလယ်ဘုရားဟာ ဒေသအခေါ် နတ်လမ်းပေါ်တဲ့အချိန် သွားရောက်ကြတာဖြစ်ပြီး ဒီနေ့ ထောင်နဲ့ချီ ဘုရားဖူးတွေက လှေပေါ်လုတက်ရာကနေ ရေထဲပြုတ်ကျပြီး ပင်လယ်ရေနဲ့မျောပါ သေဆုံးခဲ့ကြတာလို့ ဒေသခံတဦးက ပြောပါတယ်။

ပင်လယ်ရေနဲ့ မျောပါသွားတဲ့ ပျောက်ဆုံးနေသူတွေကို ကယ်ဆယ်ရေးတွေက ဆက်လက်ရှာဖွေနေတယ်လို့ သိရပါတယ်။

ရေနစ်သေဆုံးသူတွေထဲမှာ  သံဃာတော် ၁ ပါးအပါအဝင် အမျိုးသား၊ အမျိုးသမီးနဲ့ ကလေးတွေလည်း ပါဝင်ပြီး အလောင်းတွေကို ကျုံကဒတ်မှ သံဖြူဇရပ်ဆေးရုံကို ကယ်ဆယ်ရေးသမားတွေက ပို့ဆောင်ပေးထားပါတယ်။

ဒါအပြင် ရေနစ်သေဆုံးတဲ့ ရုပ်အလောင်းတွေကို ဒေသခံတွေနဲ့ ကယ်ဆယ်ရေးတွေ ပူးပေါင်းရှာဖွေ ဆယ်ယူနေပြီး ရေနစ်သေဆုံးသူတွေနဲ့ပျောက်ဆုံးနေသူတွေ ဘယ်သူဆိုတာတော့ မသိရသေးဘဲ ဒီဗွီဘီက စုံစမ်းမေးမြန်းနေဆဲ ဖြစ်ပါတယ်။

ကျိုက်နဲရေလယ်ဘုရားကို နှစ်စဉ် တန်ဆောင်မုန်းလပြည့်ကျော် ၂ ရက်နေ့ညမှ လပြည့်ကျော် ၃ ရက်နေ့ထိ ဘုရားပွဲကျင်းလေ့ရှိပြီး အနယ်နယ်အရပ်ရပ်က ဘုရားဖူးတွေ လာရောက်ကြပါတယ်။

1 week Ago
More News
Up