သေနတ်ပစ်ခတ်မှု

November 16, 2021

ကော်လိုရာဒိုပြည်နယ်တွင် သေနတ်ပစ်ခတ်မှုကြောင့် ဆယ်ကျော်သက် ၆ ဦး ဒဏ်ရာရ

အမေရိကန်နိုင်ငံ၊ ကော်လိုရာဒိုပြည်နယ်၊ အော်ရိုရာမြို့က အထက်တန်းကျောင်းနားမှာ ကားပေါ်ကနေ သေနတ်နဲ့ ပစ်ခတ်ထွက်ပြေးမှုကြောင့် နိုဝင်ဘာ ၁၅ ရက်က ဆယ်ကျော်သက် ၆ ယောက် ဒဏ်ရာရခဲ့ပါတယ်။

အာဏာပိုင်တွေက တိုက်ခိုက်မှုအတွက် သံသယရှိသူ အတော်များများကို ရှာနေပြီး ဂိုဏ်းတွေနဲ့ ပတ်သက်တဲ့အမှုလို့ စုံစမ်းစစ်ဆေးသူတွေက ယုံကြည်နေကြကြောင်း မြို့ရဲ့ ရဲတပ်ဖွဲ့ အကြီးအကဲက ပြောပါတယ်။

အသက် ၁၄ နှစ်ကနေ ၁၈ နှစ်ကြား ဒဏ်ရာရသူ ၆ ယောက်စလုံး အသက်ဘေး မစိုးရိမ်ရတဲ့ ဒဏ်ရာတွေကနေ ပြန်နာလန်ထူလာဖို့ မျှော်လင့်ထားတယ်လို့  ပစ်ခတ်မှုအပြီး ၂ နာရီအကြာမှာ ရဲမှူး ဗနက်ဆာဝီလ်ဆင်က သတင်းထောက်တွေကို ပြောပါတယ်။

“ဒန်ဗာခရိုင် ဆင်ခြေဖုံးအလယ်၊ အော်ရိုရာစင်ထရယ် အထက်တန်းကျောင်း မြောက်ပိုင်းက ပန်းခြံမှာ မွန်းလွဲ ၁ နာရီက သေနတ်သုံး အကြမ်းဖက်ခဲ့တာ ဖြစ်ပြီး ဒဏ်ရာရသူ ၅ ယောက်ကို လူနာတင်ယာဉ်နဲ့ ဆေးရုံတင်ပို့ခဲ့ရတယ်။ တယောက်ကတော့ ခွဲစိတ်ကုသခံခဲ့ရပြီး တယောက်ကတော့ သူ့ဟာသူ ဆေးရုံ သွားခဲ့တယ်။ သူတို့အားလုံးဟာ အထက်တန်းကျောင်းသူ ကျောင်းသားတွေ”လို့ ရဲအကြီးအကဲက ပြောပါတယ်။

ဒန်ဗာခရိုင်အရှေ့ပိုင်းက လူဦးရေ ၃၈၆,၀၀၀ ရှိတဲ့ အော်ရိုရာမြို့မှာ ၂၀၁၂ ခုနှစ်ကလည်း ရုပ်ရှင်ရုံ ပစ်ခတ်မှုကြောင့် လူ ၁၂ ယောက် သေဆုံးပြီး ဒါဇင်နဲ့ချီတဲ့ လူတွေ ဒဏ်ရာရခဲ့ဖူးပါတယ်။

2 weeks Ago

November 7, 2021

ဟိုပင်မြို့က လက်ဖက်ရည်ဆိုင်တခုကို သေနတ်သမား ဝင်ပစ်၊ ၆ ဦး သေဆုံးပြီး ၈ ဦး ဒဏ်ရာရ

ကချင်ပြည်နယ်၊ မိုးညှင်းခရိုင် ဟိုပင်မြို့ အ.ထ.က ၁ ကျောင်းအနီး ထူးထိုက်စံ လက်ဖက်ရည်ဆိုင်မှာ ဒီနေ့မနက် ၉ နာရီကျော်လောက် ပစ်ခတ်မှုဖြစ်ခဲ့တယ်လို့ မြို့ခံတဦးက ပြောပါတယ်။

အမည်မသိသေနတ်သမားဟာ ထူးထိုက်စံ လက်ဖက်ရည်ဆိုင်ရှေ့ကို ကားတစီးနဲ့ရောက်လာပြီး လက်ဖက်ရည်ဆိုင်အတွင်းက လူတွေကို ကားပေါ်ကနေ တရစပ် ပစ်ခတ်သွားခဲ့တာကြောင့် ၆ ဦး သေဆုံးခဲ့ပြီး ၈ ဦး ပြင်းထန်တဲ့ သေနတ်ဒဏ်ရာတွေ ရခဲ့တယ်လို့ အမည်မဖော်လို့တဲ့ မျက်မြင်တွေ့ရှိသူတဦးက ပြောပါတယ်။

“လမ်းမပေါ်ကနေ မတ်တူးကားအဖြူရောင်တစီးရပ်ပြီး ကားထဲကနေ လက်ဖက်ရည်ဆိုင်ထဲကို အေကေ-၄၇ လို သေနတ်အရှည်နဲ့ အတွဲလိုက် လှမ်းပစ်တာ။ လူတော်တော်များများ သေနတ်မှန်ခံရတယ်။ ၆ ယောက်တော့ သေတယ်ကြားတယ်၊ ပွဲချင်းပြီး သေတာလား၊ ဆေးရုံရောက်မှ သေတာလားတော့ မသိရဘူး။ ၈ ယောက်ကတော့ စိုးရိမ်ရလို့ မြစ်ကြီးနားဆေးရုံကို ပို့လိုက်တယ်။" 

သေဆုံးသူတွေထဲမှာ လက်ဖက်ရည်ဆိုင်က မုန့်ဆရာတဦး၊ ဆိုင်ပိုင်ရှင်ရဲ့ လေး ငါးနှစ်အရွယ် သမီးငယ်လေးတဦးနဲ့ ဘုန်းကြီးတပါးအပါအဝင် ၆ ဦး သေဆုံးခဲ့တယ်လို့ သိရပါတယ်။

အခုဖြစ်စဉ်ကို ဟိုပင် ပျူစောထီးအဖွဲ့က လုပ်ကြံတာဖြစ်နိုင်တယ်လို့ မြို့ခံအများစုက ခန့်မှန်းနေကြပေမဲ့ DVB အနေနဲ့ကတော့ သီးခြားအတည်ပြုနိုင်သေးပါဘူး။

အခုအခင်းမဖြစ်ပွားခင် အရင်က အဲဒီလက်ဖက်ရည်ထဲမှာ စစ်ကောင်စီ သတင်းပေး ထွန်းထွန်းဝင်း ဆိုသူ အဖမ်းခံခဲ့ရပြီး ပစ်ခတ်သတ်ဖြတ်ခံခဲ့ရတယ်လို့ ဟိုပင်မြို့ခံတွေက ပြောပါတယ်။

အမည်မဖော်လို့တဲ့ မြို့ခံတဦးက "ထွန်းထွန်းဝင်းကို ဒီဆိုင်ထဲမှာ အဖမ်းခံရတာနဲ့ မဆီမဆိုင် ဒီဆိုင်ကို ပျူတွေက အငြိုးတကြီးနဲ့ လုပ်တာလို့ပဲ ကျနော်တို့က မြင်တယ်။ ဆိုင်ဆိုတာကတော့ ဘယ်သူလာထိုင်ထိုင် လက်ခံရတာပဲလေ" လို့ ပြောပါတယ်။

ခုလို ပစ်ခတ်တာ စစ်အာဏာသိမ်းပြီးနောက်ပိုင်း ပထမဆုံးအကြိမ် ဖြစ်ပွားခဲ့တာဖြစ်ပြီး လူသေဆုံးမှု အများဆုံးဖြစ်စဉ်တခုလို့ မြို့ခံတွေက ပြောဆိုနေကြပါတယ်။

အခုဖြစ်စဉ်နဲ့ ပတ်သက်ပြီး  ဟိုပင်အခြေစိုက် ပြည်သူ့ကာကွယ်ရေးတပ်ဖွဲ့က  သူတို့အဖွဲ့က လုံးဝ မလုပ်ခဲ့ကြောင်း ထုတ်ပြန်ထားပါတယ်။

3 weeks Ago
More News
Up