သိမ်းဆည်း

May 8, 2021

ဖားကန့်တွင် အရောင်းဆိုင်များမှ ဆိုင်ကယ်သစ်များကို အာဏာသိမ်းစစ်ကောင်စီ လိုက်လံ သိမ်းဆည်း

ကချင်ပြည်နယ် မိုးညှင်းခရိုင် ဖားကန့်မြို့ပေါ်နဲ့ လုံးခင်းကျေးရွာ၊ ဆိပ်မူကျေးရွာတွေမှာရှိတဲ့ မော်တော်ဆိုင်ကယ် အရောင်းဆိုင်တွေက ဆိုင်ကယ်အသစ်တွေကို အာဏာသိမ်းစစ်ကောင်စီရဲ့ အကြမ်းဖက်ရဲတပ်ဖွဲ့နဲ့ မြို့နယ်အုပ်ချုပ်ရေးအဖွဲ့တွေက မေ ၇ ရက်နေ့ည ၁၀ နာရီချိန်မှာ လိုက်လံ သိမ်းဆည်းခဲ့တာလို့ မြို့ခံတွေက ပြောပါတယ်။

ဖားကန့်မြို့ မော်ဝမ်းရပ်ကွက်ရှိ ဆိုင်ကယ်အရောင်းဆိုင်လေးဆိုင်မှာ ၁ ဆိုင်ကို ၂ စီးနှုန်းနဲ့ ဖမ်းဆီးသွားတယ်လို့လည်း ဆိုင်ကယ်အရောင်းဆိုင်ပိုင်ရှင်တဦးက ပြောပါတယ်။

"ဖမ်းသွားတာတော့ နှစ်စီးပါ။ လူတွေကိုတော့ မဖမ်းပါဘူး။ ခံဝန်ထိုးပေးရတာလည်းမရှိဘူး၊ ဘယ်လိုအရေးယူမယ်ဆိုတာကလည်း အပေါ်က ညွှန်ကြားချက်လာမှလို့ ပြောတယ်ဗျ။" 

ဖားကန့်မြို့နဲ့ ဆိပ်မူ၊ လုံးခင်းကျေးရွာတွေမှာ ဆိုင်ကယ်အရောင်းဆိုင် ၆ ဆိုင်ထက်မနည်းရှိနေပြီး အဲဒီနေ့ညက စစ်ကောင်စီက ဆိုင်ကယ် ၁၀ စီးကျော်ကို ဖမ်းဆီးထိန်းသိမ်းသွားခဲ့တယ်လို့ သိရပါတယ်။

အဲဒီနေ့နေ့ညက ဖားကန့်အပါအဝင် ဗန်းမော်နဲ့ မိုးညှင်းမြို့တွေမှာလည်း အလားတူ ဖမ်းဆီးမှုမျိုးတွေကို တချိန်တည်း လုပ်ဆောင်ခဲ့တယ်လို့ မြို့ခံအသီးသီးဆီက သိရပါတယ်။

ဆိုင်ကယ်ဆိုင်တွေဟာ ရောင်းချနေတာ နှစ်ပေါင်းအတော်ကြာပြီဖြစ်ကာ ဝန်ထမ်း၊ အရာရှိအရာခံတွေပါ လိုင်စင်မဲ့ဆိုင်ကယ်စီးပြီး ရုံးတက်နေချိန်မှာ ဝင်ရောက်ဖမ်းဆီးတာဟာ နားမလည်နိုင်ဘူးလို့ ဖမ်းဆီးခံရတဲ့ ဆိုင်ရှင်တွေက ပြောဆိုနေကြပါတယ်။

အခုလိုမျိုးလုပ်ဆောင်နေတာဟာ ပြည်သူတွေ၊ စီးပွားရေးလုပ်ငန်းရှင်သေးသေးလေးတွေကို အကြပ်ဆိုက်အောင် ရည်ရွယ်ချက်ရှိရှိ စစ်ကောင်စီက လုပ်နေတာလို့ ဖားကန့်မြို့ခံတွေက ပြောပါတယ်။

1 month Ago

April 11, 2021

ပဲခူးအကြမ်းဖက်တိုက်ခိုက်မှု ကျဆုံးရုပ်အလောင်းများ သိမ်းဆည်းထားသည့်အပေါ် ဂျပန်သံရုံး ကန့်ကွက်

ပဲခူးမြို့မှာ စစ်အာဏာရှင် ဆန့်ကျင်ရေး လူထုလှုပ်ရှားမှုတွေမှာ ပါဝင်သူတွေကို စစ်တပ်နဲ့ ရဲလုံခြုံရေးအဖွဲ့တွေက အကြမ်းဖက်ဖြိုခွင်းခဲ့လို့ ကျဆုံးခဲ့ရသူတွေရဲ့ ရုပ်အလောင်းတွေကို သိမ်းဆည်းထားတဲ့အပေါ် ဂျပန်နိုင်ငံက စိတ်ပျက်တုန်လှုပ်မှုနဲ့အတူ ကန့်ကွက်ကြောင်း မြန်မာနိုင်ငံဆိုင်ရာ ဂျပန်သံရုံးက ထုတ်ပြန်ပါတယ်။

ပြီးခဲ့တဲ့ ဧပြီ ၉ ရက်နေ့က ပဲခူးတိုင်းဒေသကြီးအတွင်းရှိ ပဲခူးမြို့ကို အကြမ်းဖက်စစ်အုပ်စုက မနက်အစောပိုင်းအချိန်က စတင်ကာ ညအချိန်ထိတိုင် စစ်တလင်းသဖွယ်၊ လူသတ်ကွင်းတွေ သဖွယ် အပြင်းအထန် ပစ်ခတ်သတ်ဖြတ်ခဲ့တာကြောင့် ပြည်သူ ၈၂ ယောက်ထက်မနည်း ကျဆုံးခဲ့တာ ဖြစ်ပါတယ်။

ဒီလိုအကြမ်းဖက်လုပ်ရပ်တွေ အားလုံးကို ချက်ချင်းရပ်တန့်ဖို့ တပ်မတော်နဲ့ ရဲတပ် ဖွဲ့ဝင်တွေကို ဂျပန်သံရုံးအနေနဲ့ ထပ်မံပြီးတော့ အလေးအနက်ထား တိုက်တွန်းကြောင်းလည်း ဖော်ပြထားပါတယ်။

နိုင်ငံရေးအကျဉ်းသားများကူညီစောင့်ရှောက်ရေးအသင်း (အေအေပီပီ) ကတော့ တရက်အတွင်း ဒေသတခုတည်းမှာ လူပေါင်း ၈၂ ယောက်ထက်မနည်းကို အင်အားသုံး အကြမ်းဖက် သတ်ဖြတ်ခဲ့တာဟာ လူမျိုးတုံးသတ်ဖြတ်မှုဖြစ်ပြီး လူသားမျိုးနွယ်ကို ဆန့်ကျင်တဲ့ ရာဇဝတ်မှုဖြစ်တယ်လို့ ဧပြီ ၁၀ ရက် ရက်စွဲနဲ့ ထုတ်ပြန်ထားပါတယ်။

လက်ရှိမှာတော့ ပဲခူးမြို့က ကျဆုံးပြည်သူတွေရဲ့ ရုပ်အလောင်းတွေကို ကျန်ရစ်သူ မိသားစုတွေက ထုတ်ယူရာမှာ အလောင်းတလောင်းကို ငွေကျပ် ၁ သိန်း ၂ သောင်းစီ ပေး ရတယ်လို့ သတင်းတွေ ထွက်နေပေမယ့် ဒီဗွီဘီအနေနဲ့ သီးခြားအတည်မပြုနိုင်သေးပါဘူး။

နိုင်ငံတဝန်း စစ်အာဏာရှင်ဆန့်ကျင်ရေး ဆန္ဒပြပွဲတွေမှာ ပြည်သူတွေ မြို့ရွာအနှံ့ ပါဝင်နေခဲ့ကြပြီး စစ်တပ်နဲ့ ရဲတပ်ဖွဲ့ဝင်တွေက အကြမ်းဖက် ပစ်ခတ်နှိမ်နင်းမှုတွေနဲ့ ကျ ဆုံးမှုတွေ၊ ဖမ်းဆီးထိန်းသိမ်း တရားစွဲဆိုခံရတာတွေနဲ့အတူ အခြေအနေတွေ ပိုမိုတင်းမာလာနေခဲ့တာ ဖြစ်ပါတယ်။

ပြည်သူတရပ်လုံးက လက်မခံဘဲ ဝိုင်းဝန်းဆန့်ကျင်ခဲ့ကြတဲ့ စစ်အာဏာရှင်ဆန့်ကျင် နွေဦးတော်လှန်ရေး ကာလဟာ ၂ လကျော်ရှိခဲ့ပြီဖြစ်ကာ လက်ရှိအချိန်ထိ ကျဆုံးသူပေါင်း ၇၀၀ ကျော်ထိ ရှိနေခဲ့ပြီ ဖြစ်ပါတယ်။

2 months Ago
More News
Up