သိပ္ပံပညာရှင်

September 19, 2021

စပိန်လာပယ်လ်မာကျွန်းတွင် သိပ္ပံပညာရှင်များ မီးတောင်အန္တရာယ် အချက်အလက်ရှာဖွေ

စပိန်နိုင်ငံ လာပယ်လ်မာကျွန်းပေါ်မှာ သိပ္ပံပညာရှင်တွေဟာ မီးတောင် အန္တရာယ်နဲ့ပတ်သက်ပြီး   စက်တင်ဘာ ၁၈ ရက်က သတင်းအချက်အလက်တွေ ကောက်ယူနေကြပါတယ်။

ဒီသီတင်းပတ်ထဲမှာ ငလျင်လှုပ်အပြီး အတ္တလန္တိတ် သမုဒ္ဒရာထဲက ကျွန်းပေါ်မှာ မီးတောင် အန္တရာယ်သတိပေးချက် ထုတ်ပြန်ခဲ့အပြီးမှ သုတေသနတွေကို ပိုတိုးလုပ်နေ ကြတာပါ။

သိပ္ပံပညာရှင်တွေဟာ ကျွန်းရဲ့ တောင်ပိုင်းက ကမ်ဘရေ ဗေးဂျာ အမျိုးသား ဥယျာဉ်ထဲမှာ မြေပြင်တုန်ခါမှု အကြိမ်ရေ ၄၀၀၀ ကျော်ကို မှတ်တမ်းတင်နိုင်ခဲ့ ပါတယ်။

အဲဒီနောက် အာဏာပိုင်တွေက မီးတောင်ပေါက်နိုင်ခြေအတွက် အဆင့်လေးဆင့်ရှိတဲ့ တပ်လှန့် သတိပေးစနစ်အတွင်း ဒုတိယဖြစ်တဲ့ အဝါရောင်အဆင့် သတိပေးချက်ကို စက်တင်ဘာ ၁၄ ရက်မှာ ထုတ်ပြန်ခဲ့ပါတယ်။

စနေမနက် ၃ နာရီခွဲ လောက်ကလည်း  အင်အား ရစ်ချတ်တာစကေး ၃ ဒသမ ၂ ရှိတဲ့ ငလျင်လှုပ်ခဲ့ ပေမဲ့ အပျက်အစီးတော့ မရှိပါဘူး။

ဒေသခံတွေကတော့ မြေပြင် တုန်ခါနေတာကို ခံစားမိခဲ့ကြပါတယ်။ ဒေသတွင်းကနေ ဘေးကင်းရာကို အမြန်ရွှေ့ပြောင်းနိုင်ဖို့ အာဏာပိုင်တွေက ဒေသခံတွေကို မရှိမဖြစ် ပစ္စည်းတွေနဲ့ ဖုန်းပါတဲ့ အရေးပေါ် အိတ်တွေ ပြင်ဆင်ထားဖို့ သောကြာနေ့မှာ အကြံပြုခဲ့ပါတယ်။

၁၉၇၁ ခုနှစ်က ဒီမီးတောင် နောက်ဆုံး အကြီးအကျယ် ပေါက်ခွဲခဲ့ဖူးပြီး မီးတောင် ချော်ရည် ကုဗမီတာ ၁၁ သန်းဟာ ကမ်ဘရေဗေးဂျာ တောင်ကြောတလျှောက် စီးဆင်းခဲ့ပါတယ်။

စပိန်ရဲ့ ဘူမိဗေဒနဲ့ သတ္ထုရေးရာတက္ကသိုလ်က သိပ္ပံပညာရှင်တွေဟာ သိပ္ပံဆိုင်ရာ ဒရုမ်းယာဉ်တွေကို စနေနေ့မှာ လွှတ်တင်ခဲ့ပြီး အခြေအနေနဲ့ပတ်သက်လို့ ရနိုင်သမျှ အချက်အလက် အားလုံးနဲ့ မြေပြင် အပြောင်းအလဲကို စောင့်ကြည့်ခဲ့ပါတယ်။

တကယ်လို့ဘေးကင်းရာ ရွှေ့ပြောင်းရမယ်ဆိုရင် လူအယောက် လေးသောင်းလောက်ကို နေရာ ရွှေ့ပေးရလိမ့်မယ်လို့လည်း တွက်ချက်ထားကြောင်း ရိုက်တာသတင်းဌာနက ဖော်ပြပါတယ်။

3 months Ago

December 27, 2020

ကိုရိုနာဗိုင်းရပ်စ်မူကွဲသစ်ကို ကယ်လီဖိုးနီးယား သိပ္ပံပညာရှင်များ စမ်းသပ်

အမေရိကန်နိုင်ငံ ကယ်လီဖိုးနီးယားပြည်နယ်က သိပ္ပံပညာရှင်တွေဟာ ဒေသတွင်းမှာ ပြန့်နေတဲ့ ကိုရိုနာဗိုင်းရပ်စ်မူကွဲသစ်ကို ဗြိတိန်မှာ တွေ့ရှိပျံ့နှံ့နေတဲ့ မူကွဲနဲ့ တူ၊ မတူ ဆိုတာ စမ်းသပ် အကဲဖြတ်နေတယ်လို့ လော့စ်အိန်ဂျလိစ်တိုင်းမ်စ်သတင်းဌာနက ဒီဇင်ဘာ ၂၇ ရက်မှာ ပြောပါတယ်။ အမေရိကန်နိုင်ငံတဝန်း ပြည်သူ ၁ သန်းကျော် ကာကွယ်ဆေးထိုးပြီးပြီ ဖြစ်ပေမဲ့ ကိုဗစ်-၁၉ ကပ်ရောဂါ ကူးစက်နှုန်းဟာ ကယ်လီဖိုးနီးယားနဲ့ တဲင်းနက်စီပြည်နယ်တွေမှာ တိုးနေတာပါ။ အမေရိကန် နိုင်ငံရေးခေါင်းဆောင်တွေကတော့ ဗြိတိန်မှာ ကူးစက်နေတဲ့ ပိုကူးလွယ်တဲ့ ကိုရိုနာဗိုင်းရပ်စ် မူကွဲသစ်ကို အမေရိကန်နိုင်ငံထဲ ရောက်မလာအောင် ကြိုးစားနေကြပါတယ်။ B.1.1.7 လို့ ပညာရှင်တချို့က နာမည်ပေးထားတဲ့ ကိုရိုနာဗိုင်းရပ်စ် မူကွဲသစ်ဟာ ဗြိတိန်မှာ အရင်က ပျံ့နှံ့နေတဲ့ မူကွဲတွေထက် ၇၀ ရာခိုင်နှုန်း ပိုပြီးကူးစက်နိုင်စွမ်း ရှိနေပါတယ်။ လောလောဆယ် အင်္ဂလန်နယ်တောင်ပိုင်းမှာ အဓိကကူးစက်နေတာ မူကွဲသစ်ဖြစ်ပြီး ဆေးရုံတင် လူနာတိုးနှုန်း မြင့်လာနေပါတယ်။ အခုတော့ ကိုရိုနာဗိုင်းရပ်စ် မူကွဲသစ်ဟာ စင်ကာပူ၊ ဂျပန်၊ အစ္စရေးနဲ့ သြစတြေးလျနိုင်ငံတို့ဆီကိုပါ ကူးစက်ခဲ့ပြီးတာကို ဖော်ထုတ်နိုင်ခဲ့ပါတယ်။ အမေရိကန်နိုင်ငံ ရောဂါကာကွယ်ရေးနဲ့ ထိန်းချုပ်ရေးဌာနကလည်း စနေ တရက်တည်းမှာ ကိုရိုနာဗိုင်းရပ်စ်သစ် ကူးစက်ကူးခံရသူ ၃၄၀,၀၀၀ ရှိခဲ့လို့ စုစုပေါင်း ကူးစက်ခံ ၁၈ သန်း ၇ သိန်း ကျော်ပြီလို့ ပြောပါတယ်။ အမေရိကန် ပြည်နယ် ၃၁ ခုမှာ ဒီဇင်ဘာလအတွင်း ကိုရိုနာဗိုင်းရပ်စ် ကူးစက်ခံအသစ် စံချိန်တင် မြင့်တက်ခဲ့ပြီး ဆေးရုံတင် ကုသနှုန်းနဲ့ သေဆုံးနှုန်းလည်း မြင့်တက်ခဲ့တယ်လို့ ရိုက်တာ သတင်းဌာနက ဖော်ပြပါတယ်။
11 months Ago
More News
Up