သမ္မတ ဦးဝင်းမြင့်

December 1, 2021

သမ္မတ ဦးဝင်းမြင့်နှင့် နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်တို့ကို အဂတိမှု ၁ မှု ထပ်တိုး အမှုဖွင့်

ပြည်သူတွေအတွက် သဘာဝဘေးအန္တရယ်ကယ်ဆယ်ရေးလုပ်ငန်းတွေဆောင်ရွက်ဖို့  ရဟတ်ယာဉ်တစ်စီးဝယ်ယူ ငှားရမ်းအသုံးပြုခဲ့တာနဲ့ ပတ်သက်ပြီး နိုင်ငံတော်သမ္မတ ဦးဝင်းမြင့်နဲ့  နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်တို့ကို စစ်ကောင်စီက အဂတိလိုက်စားမှုနဲ့ အမှုဖွင့်လိုက်ပါတယ်။ 

ရဟတ်ယာဉ် ငှားရမ်း၊ ဝယ်ယူ ထိန်းသိမ်း စောင့်ရှောက်တဲ့ကိစ္စနဲ့ပတ်သတ်တဲ့ စွပ်စွဲချက်နဲ့  အဂတိလိုက်စားမှု တိုက်ဖျက်ရေးဥပဒေ ပုဒ်မ ၅၅ အရ နေပြည်တော်၊ ဘုရားကုန်း မြို့မရဲစခန်းမှာ နိုဝင်ဘာ ၃၀ ရက်နေ့မှာ စစ်ကောင်စီက အမှုထပ်ဖွင့်လိုက်တာပါ။

ရဟတ်ယာဉ်ကိစ္စ ပြည်ထောင်စုဝန်ကြီး ဒေါက်တာဝင်းမြတ်အေး အပေါ်  အဂတိလိုက်စားမှု တိုက်ဖျက်ရေးဥပဒေ ပုဒ်မ ၅၅ အရ နေပြည်တော်၊ ဘုရားကုန်း မြို့မ ရဲစခန်းမှာ ပြီးခဲ့တဲ့  ဩဂုတ် ၂၇ ရက်က ပထမသတင်းပေးတိုင်ကြားချက် ဖွင့်လှစ်ခဲ့ပြီး ထပ်မံစစ်ဆေး ပေါ်ပေါက်ချက်အရ သမ္မတဟောင်း ဦးဝင်းမြင့်နဲ့ နိုင်ငံတော်၏အတိုင်ပင်ခံပုဂ္ဂိုလ်ဟောင်း ဒေါ်အောင်ဆန်းစုကြည်တို့ကို အမှုထပ်ဖွဲ့လိုက်တာလို့ စစ်ကောင်စီပြန်ကြားရေးက နိုဝင်ဘာ ၃၀ ရက်မှာသတင်းထုတ်ပါတယ်။

နိုင်ငံခေါင်းဆောင် နှစ်ဦးဟာ နိုင်ငံရေး ရာထူးလက်ရှိဖြစ်ခဲ့စဉ်က ရဟတ်ယာဉ် ငှားရမ်းခြင်း၊ ဝယ်ယူခြင်းနဲ့ ထိန်းသိမ်း စောင့်ရှောက်ရေး ကိစ္စရပ်တွေမှာ သူတို့ရဲ့ လုပ်ပိုင်ခွင့် အခွင့်အာဏာကို အသုံးပြုပြီး ဘဏ္ဍာရေး စည်းမျဉ်း စည်းကမ်းတွေကို လိုက်နာ ဆောင်ရွက်ခြင်းမပြုဘဲ ရုံးတွင်းစာ အဆင့်ဆင့်နဲ့ ခွင့်ပြုပေးခဲ့လို့  နိုင်ငံတော်၏ဘဏ္ဍာငွေကြေး၊ ပိုင်ဆိုင်မှုကို ထိခိုက်နစ်နာ ဆုံးရှုံးစေခဲ့တယ်လို့ စစ်ကောင်စီက စွပ်စွဲထားပါတယ်။

နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်ကို စစ်ကောင်စီက အာဏာသိမ်းပြီးနောက် အမှု ၁၁ မှုနဲ့ တရားစွဲထားတာဖြစ်ပြီး အခု ရဟတ်ယာဉ်ကိစ္စ အဂတိမှု တမှုထပ်တိုးလိုက်သလို စစ်ကောင်စီရွေးကောက်ပွဲကော်မရှင်ကလည်း ရွေးကောက်ပွဲတရားမဲ့ပြုကျင့်မှုနဲ့ ထပ်တရားစွဲထားတဲ့အတွက် ရင်ဆိုင်ရမယ့်အမှု ပိုများလာမှာ ဖြစ်ပါတယ်။

နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်၊ သမ္မတဦးဝင်းမြင့်နဲ့ နေပြည်တော်ကောင်စီ ဥက္ကဋ္ဌ ဒေါက်တာမျိုးအောင်တို့ သုံးဦးတွဲအစွဲခံထားရတဲ့ ပုဒ်မ ၅၀၅(ခ)အမှုနဲ့ အတိုင်ပင်ခံပုဂ္ဂိုလ်နဲ့ သမ္မတတို့ကို သီးခြားစီစွဲဆိုထားတဲ့ သဘာဝဘေးပုဒ်မအမှု ၂ ခု၊ စုစုပေါင်းအမှု ၃ ခုကို  မနေ့က နိုဝင်ဘာ ၃၀ ရက်နေ့မှာ အပြီးသတ်စီရင်ချက်ချဖို့ ချိန်းဆိုခဲ့ပေမယ့် တရားရုံးက ဒီဇင်ဘာ ၆ ရက်နေ့မှ အမိန့်ချမယ်ဆိုပြီး ရက်ရွှေ့ဆိုင်းခဲ့ပါတယ်။

2 months Ago

October 19, 2021

ဒေါ်အောင်ဆန်းစုကြည်နှင့်သမ္မတအပါအဝင် နိုင်ငံရေးအကျဉ်းသားအားလုံး ပြန်လွှတ်ပေးရန် ကုလတောင်းဆို

စစ်ကောင်စီက အကျဉ်းသားတွေလွှတ်ပေးလိုက်တာနဲ့ပတ်သက်လို့  ကုလသမဂ္ဂက အသေးစိတ် အချက်လက်တွေကို သိအောင် လုပ်သွားမှာ ဖြစ်သလို ဒေါ်အောင်ဆန်းစုကြည်နဲ့ နိုင်ငံရေးအကျဉ်းသားအားလုံး ပြန်ပြီးလွှတ်ပေးဖို့ ကုလသမဂ္ဂ အတွင်းရေးမှူးချုပ်က တောင်းဆိုကြောင်း အတွင်းရေးမှူးချုပ်ရုံး ပြောခွင့်ရသူ စတက်ဖနီဒူဂျာရစ်က အောက်တိုဘာ ၁၈ မှာ ပြောပါတယ်။

မြန်မာနိုင်ငံမှာ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ သမ္မတဦးဝင်းမြင့် အပါအဝင် နိုင်ငံရေးအရ ဖမ်းဆီးထားသူ အားလုံးကို ပြန်လွှတ်ပေးဖို့၊ အကြမ်းဖက်မှုကို အဆုံးသတ်ဖို့၊  ဖိနှိပ်မှုကို အဆုံးသတ်ဖို့ အကြိမ်ကြိမ်တောင်းဆိုခဲ့တယ်လို့ ဆိုပါတယ်။

စစ်ကောင်စီရဲ့ ကြေညာချက်ထဲမှာ နိုင်ငံရေးအရ ပြစ်ဒဏ်ကျခံနေရသူ ၁,၃၁၆ ယောက်ကို ကန့်သတ်ချက်နဲ့ လွတ်ငြိမ်းချမ်းသာခွင့်ပြုလိုက်သလို အမှုရင်ဆိုင်နေရဆဲ ဖမ်းဆီးထိန်းသိမ်းထား သူ ၄,၃၂၀ ကို အမှုတွေ ပိတ်သိမ်းပြီး ပြန်လွှတ်ပေးမယ်လို့ ဖော်ပြထားပါတယ်။

အောက်တိုဘာ ၁၈ ရက်နေ့ကတော့ နိုင်ငံတဝန်း အကျဉ်းထောင်တွေမှာ ဖမ်းဆီးထိန်းသိမ်းခံထားရတဲ့ သတင်းသမားတွေ၊ နိုင်ငံရေးလှုပ်ရှားသူတွေ အပါအဝင် နိုင်ငံရေးအကျဉ်းသားတွေ ပြန်လည်လွတ်မြောက်ခဲ့ပါတယ်။

မနေ့က ရန်ကုန် အင်းစိန်ထောင်က အကျဉ်းသား ၆၄၇ ဦး၊ မန္တလေး  အိုးဘိုထောင်က အယောက်  ၈၀၊ ဘားအံထောင်က ၇၁ ယောက်၊ ကော့သောင်းထောင်မှ အချုပ်သား ၄၆ ဦး၊ သာယာဝတီထောင်မှာ ၁၂ ဦး၊ ပဲခူးအချုပ်ထောင်မှာ  ၇ ဦး   စသဖြင့်ပြန်လွတ်လာပြီး မိတ္ထီလာထောင်မှ လွတ်မြောက်လာသူ ၃၈ ဦးအနက် ၁၁ ဦး ပြန်အဖမ်းခံရပါတယ်။

နိုင်ငံရေးအကျဉ်းသားများ ကူညီစောင့်ရှောက်ရေးအသင်း(အေအေပီပီ)ရဲ့ စာရင်းတွေအရတော့ နွေဦးတော်လှန်ရေးကာလအတွင်း မနေ့ကအထိ  ပြည်သူ ၉၀၄၃ ယောက် ဖမ်းဆီးခံခဲ့ရကာ ၇၃၅၅ ယောက်ကတော့ လက်ရှိ ချုပ်နှောင်ခံထားရဆဲဖြစ်ပြီး အဲဒီထဲက ၃၅၄ ယောက်ကတော့ ထောင်ဒဏ် ချမှတ်ခံထားရပါတယ်။

3 months Ago
More News
Up