သထုံမြို့နယ်

November 10, 2022

သထုံမြို့နယ် ပစ်ခတ်မှုတွင် စစ်ကောင်စီ ဒုတပ်ရင်းမှူး အပါအဝင် ၃ ဦး သေဆုံး

မွန်ပြည်နယ်၊ သထုံမြို့နယ်၊ ဝင်းစိန်ကျေးရွာမှာ ဖြစ်ပွားခဲ့တဲ့ နှစ်ဖက်အပြန်အလှန် ပစ်ခတ်အတွင်း စစ်ကောင်စီ ဒုတပ်ရင်းမှူး ဗိုလ်မှူး ချစ်ဝင်းသူအပါအဝင် ၃ ဦး သေဆုံးခဲ့တယ်လို့ သထုံမြို့နယ် ပြည်သူ့ကာကွယ်ရေးတပ်ဖွဲ့ တာဝန်ခံက ဒီဗွီဘီကို ပြောပါတယ်။

နိုဝင်ဘာ ၁၀ ရက်နေ့ မနက် ၅ နာရီခွဲအချိန်လောက်မှာ ပြည်သူတဦးအား ဖမ်းဆီးလာတဲ့ စစ်ကောင်စီ ကားတစီးကို သထုံမြို့နယ် ပြည်သူ့ကာကွယ်ရေးအဖွဲ့ (ပကဖ)က ကင်းလှည့်ပြီး ပြန်လာစဉ် မသင်္ကာတဲ့အတွက် တားဆီးပစ်ခတ်ရာကနေ နှစ်ဖက် အပြန်အလှန် ပစ်ခတ်မှု ဖြစ်ပွားခဲ့တာပါ။

အဲဒီပစ်ခတ်မှုအတွင်း သထုံမြို့နယ်အခြေစိုက် စစ်ကောင်စီ အမှတ်(၉) လေ့ကျင့်ရေး တပ်ရင်းက ဒုတပ်ရင်းမှူး ဗိုလ်မှူး ချစ်ဝင်းသူ အပါအဝင် ၃ ဦး သေဆုံးခဲ့ပြီး စစ်ကောင်စီတပ်က ဖမ်းဆီးလာတဲ့ ပြည်သူတဦးလည်း လွတ်မြောက်ခဲ့တယ်လို့ ဆိုပါတယ်။

“ကျနော်တို့က ကင်းလှည့်ပြီး ပြန်လာတာ၊ ဝင်းစိန်ကျေးရွာအရောက်မှာ အမဲရောင်ကားတစ်စီးကို မသင်္ကာလို့ စောင့်ကြည့်ပြီး ဝင်ရောက်ပစ်လိုက်တာ၊ ဒုတပ်ရင်းမှူး အပါအဝင် ၃ ယောက်တော့ သေသွားတယ်၊ တယောက်တော့ လွတ်သွားတယ်”လို့ သထုံမြို့နယ် (ပကဖ) တာဝန်ခံက ပြောပါတယ်။

နှစ်ဖက်အပြန်အလှန် ပစ်ခတ်မှုအတွင်း စစ်ကောင်စီတပ်ဖွဲ့ထံကနေ သေနတ် ၃ လက်၊ ဖုန်း ၄ လုံး အပါအဝင် ကျည်ဆန်တွေနဲ့ ငွေကျပ် သိန်း ၂၀ ကျော်ကို သထုံပြည်သူ့ကာကွယ်ရေးတပ်ဖွဲ့က သိမ်းဆည်းရမိခဲ့တာပါ။

အဲဒီပစ်ခတ်မှုပြီးနောက် စစ်ကောင်စီတပ်က အင်အား ၈၀ လောက်နဲ့ ဝင်းစိန်ကျေးရွာ အပါအဝင် အနီးပတ်ဝန်းကျင် ကျေးရွာတွေက ဒေသခံ နေအိမ်တွေကို တအိမ်တက်ဆင်း လိုက်လံ စစ်ဆေးတာတွေ လုပ်ဆောင်နေသလို ရမ်းသမ်းပစ်ခတ်တာတွေ ဆက်တိုက်လုပ်နေတယ်လို့ ဒေသခံတွေက ဆိုကြပါတယ်။

နှစ်ဖက်အပြန်အလှန် ပစ်ခတ်မှုမှာ သေဆုံးတဲ့ စစ်ကောင်စီ ဒုတပ်ရင်းမှူး ဗိုလ်မှူး ချစ်ဝင်းသူဟာ သထုံမြို့နယ် ထုံးဘိုလေးကျေးရွာ မီးရှို့မှာ အဓိက ပါဝင်သူ ဖြစ်ပြီး တက်ကြွလှုပ်ရှားသူတွေကို မတရားဖမ်းဆီးတာအပြင် မူးယစ်ဆေးဝါးဖြန့်ဖြူးရောင်းချတာ၊ ကားမှောင်ခိုလုပ်ငန်းတွေကို လုပ်ကိုင်နေသူ ဖြစ်တယ်လို့ သထုံမြို့နယ်(ပကဖ)က ထုတ်ပြန်ထားပါတယ်။

3 months Ago

October 26, 2022

သထုံမြို့နယ်တွင် နယ်ထိန်းရဲ ၁ ဦး ပစ်သတ်ခံရ

မွန်ပြည်နယ်၊ သထုံမြို့နယ်၊ ထောင်မှူးကျေးရွာအုပ်စု၊ ဈေးမသွယ်ကျေးရွာမှာ စစ်ကောင်စီလက်အောက်ခံ နယ်ထိန်းရဲတယောက်ကို သေနတ်နဲ့ ပစ်ခတ်ရှင်းလိုက်တယ်လို့ သထုံမြို့နယ် ပြည်သူ့ကာကွယ်ရေးတပ်ဖွဲ့က ထုတ်ပြန်ပါတယ်။

အောက်တိုဘာ ၂၅ ရက် ညနေ ၆ နာရီလောက်က ဈေးမသွယ်ကျေးရွာ ဘီယာဆိုင်မှာ ဘီယာသောက်နေတဲ့ နယ်ထိန်းရဲတပ်ကြပ် အောင်ဝင်းထွန်းကို သထုံမြို့နယ် ပြည်သူ့ကာကွယ်ရေးတပ်ဖွဲ့က သေနတ်နဲ့ ဝင်ရောက်ပစ်ခတ်ခဲ့တာပါ။

သေနတ်နဲ့ ပစ်ခတ်ခံရတာကြောင့် နယ်ထိန်းရဲတပ်ကြပ် အောင်ဝင်းထွန်းဟာ ရင်ဘတ်နဲ့ ဦးခေါင်းတွေမှာ သေနတ်ဒဏ်ရာ ၅ ချက်ရရှိပြီး အခင်းဖြစ်နေရာမှာပဲ ပွဲချင်းပြီး သေဆုံးသွားခဲ့တာပါ။

နယ်ထိန်းရဲတပ်ကြပ် အောင်ဝင်းထွန်းဟာ လမ်းဘေးဓာတ်ဆီဆိုင်တွေမှာ ဆီထည့်ရင် ဆိုင်ရှင်တွေကို ပိုက်ဆံမပေးတာအပြင် ဒေသခံတွေကို ခြိမ်းခြောက် အကျပ်ကိုင်နေတဲ့အတွက် ပစ်ခတ်ရှင်းလင်းရတာလို့ သထုံမြို့နယ် ပြည်သူ့ကာကွယ်ရေးတပ်ဖွဲ့ တာဝန်ခံက ဒီဗွီဘီကို ပြောပါတယ်။

သေနတ်နဲ့ပစ်ခတ်ခံရတာကြောင့် သေဆုံးသွားတဲ့ နယ်ထိန်းရဲတပ်ကြပ် အောင်ဝင်းထွန်းကို လူမှုကယ်ဆယ်ရေးအဖွဲ့တွေက သထုံခရိုင် ပြည်သူ့ဆေးရုံ ပို့ဆောင်ထားတယ်လို့ သိရပါတယ်။

သထုံမြို့နယ်အတွင်းရှိ စစ်ကောင်စီခန့် အုပ်ချုပ်ရေးမှူးတွေ အနေနဲ့လည်း တပတ်အတွင်း နုတ်ထွက်ကြဖို့ သထုံမြို့နယ် ပြည်သူ့ကာကွယ်ရေးတပ်ဖွဲ့က နောက်ဆုံးအကြိမ် သတိပေးထားပါတယ်။

သထုံမြို့နယ် ပြည်သူ့ကာကွယ်ရေးတပ်ဖွဲ့ဟာ ပြီးခဲ့တဲ့ စက်တင်ဘာ ၂၉ ရက်ကလည်း သထုံမြို့နယ်၊ ဒေးဗရိန်းကျေးရွာက ပျူစောထီးခေါင်းဆောင် စိုးဝင်းကို ပစ်ခတ်ရှင်းလင်းထားပါတယ်။

3 months Ago
More News
Up